US တေလူတ်းၶွၼ်ႇ 18% လႄႈ ဢိၼ်းတီးယႃး ၽွမ်ႉၸႂ် တႃႇၵိုတ်းယိုတ်း လွင်ႈသိုဝ်ႉၼမ်ႉမၼ်းမဵၼ် ရတ်ႈသျႃး

ဝၼ်းဢင်းၵၢၼ်း၊ ၾႅပ်ႇဝႃႇရီႇ 3၊ 2026

ၸွမ်ပွင်ၸိုင်ႈ ဢမႄႇရိၵၢၼ်ႇ တေႃႇၼႄႇထရမ်ႉ ပိုၼ်ၽၢဝ်ႇ ၶေႃႈတူၵ်းလူင်း ၵၢၼ်ၵႃႉၶၢႆ တင်း ဢိၼ်းတီးယႃး ဢၼ်တေ လူတ်းယွမ်း ၶွၼ်ႇ ၶူဝ်းၵုၼ်ႇ ဢိၼ်းတီးယႃး ဢၼ်မီး 50% ၼၼ်ႉ ႁႂ်ႈပဵၼ် 18% သေ ႁႂ်ႈဢိၼ်းတီးယႃး ၵိုတ်းယိုတ်း လွင်ႈသိုဝ်ႉၼမ်ႉမၼ်းမဵၼ် ရတ်ႈသျႃး လႄႈ လူတ်းယွမ်း လွင်ႈႁႄႉႁၢမ်ႈ ၵၢၼ်ၵႃႉၶၢႆ ၼႆယဝ်ႉ။

ဝၢႆးသေ ၸွမ်ၽွင်းလူင် ဢိၼ်းတီးယႃး ၼရႅၼ်ႇတရႃႇမူဝ်ႇတီႇ ၵပ်းသိုပ်ႇၵၼ်ယဝ်ႉ ထရမ်ႉ ပိုၼ်ၽၢဝ်ႇ ၶေႃႈတူၵ်းလူင်း ၼိူဝ်သိုဝ်ႇတူင်ႇဝူင်းၵူၼ်းသေ မၢႆတွင်းဝႃႈ ယၢမ်းလဵဝ် ဢိၼ်းတီးယႃး တေသိုဝ်ႉဢဝ် ၼမ်ႉမၼ်းမဵၼ် တီႈ ဢမႄႇရိၵၢၼ်ႇ လႄႈ ၸၢင်ႈပဵၼ်ပႃးတီႈ မိူင်းဝႄႇၼီႇၸွႆးလႃး ၼႆယဝ်ႉ။

ဝၢႆးသေ ထရမ်ႉ တဵၵ်းတဵင် ဢိၼ်းတီးယႃး ႁႂ်ႈၵိုတ်းယိုတ်း လွင်ႈပိုင်ႈဢိင် ၼမ်ႉမၼ်းမဵၼ် ရတ်ႈသျႃး ဢၼ်ၵႃႈၶၼ်ထုၵ်ႇၼၼ်ႉ လၢႆလိူၼ်ယဝ်ႉ ၸင်ႇလႆႈပဵၼ်မႃးၸိူင်ႉၼႆ။ ဢိၼ်းတီးယႃး ဢဝ်တိုဝ်ႉတၢင်း ဢၼ်ၶၼ်ၼမ်ႉမၼ်းမဵၼ် ရတ်ႈသျႃး လူတ်းယွမ်းၵႂႃႇၼၼ်ႉ ယွၼ်ႉဝႃႈ လုမ်ႈၾႃႉ ၵမ်ႈၼမ် ၶတ်းၸႂ် တႃႇတေ ၸႅၵ်ႇၽႄ မွတ်ႇသၵူဝ်ႇ ယွၼ်ႉ ၶဝ်ႈတိုၵ်း မိူင်းယူႇၶရဵၼ်း မိူဝ်ႈလိူၼ်ၾႅပ်ႇဝႃႇရီႇ 2022 ၼၼ်ႉယဝ်ႉ။

ထရမ်ႉ လၢတ်ႈဝႃႈ ဢိၼ်ႇတီးယႃးၵေႃႈ တေတႄႇလူတ်းယွမ်း ၶွၼ်ႇ ဢၼ်ၶဝ်တေႃႉသူင်ႇ ၶူဝ်းၶွင် ဢမႄႇရိၵၢၼ်ႇ ႁႂ်ႈပဵၼ် သုၼ်သေ သိုဝ်ႉၶူဝ်းၶွင် ဢမႄႇရိၵၢၼ်ႇ ဢၼ်ၵိုင်ႇငိုၼ်း 500 ပီႇလီႇယၼ်ႇတေႃႇလႃႇ ၼႆယဝ်ႉ။

“လွင်ႈၼႆႉ တေၸွႆႈထႅမ် ႁႂ်ႈပၢင်တိုၵ်း တီႈမိူင်းယူႇၶရဵၼ်း ဢၼ်ပဵၼ်ယူႇယၢမ်းလဵဝ် ဢၼ်ၵူၼ်းတၢႆၼပ်ႉႁူဝ်ႁဵင် ၼိုင်ႈဝူင်ႈလႂ်ၼၼ်ႉ ယဝ်ႉတူဝ်ႈၵႂႃႇၼၼ်ႉယဝ်ႉ” ၼႆယဝ်ႉ။ ထရမ်ႉ လၢတ်ႈဝႆႉ တီႈၼႂ်းလိၵ်ႈပိုၼ်ၽၢဝ်ႇ Truth Social ဢၼ်ပိုၼ်ၽၢဝ်ႇ လွင်ႈလူတ်းယွမ်း ၵဵပ်းၶွၼ်ႇ ၼိူဝ်ဢိၼ်းတီးယႃးၼၼ်ႉယဝ်ႉ။

မူဝ်ႇတီႇ ပိုၼ်ၽၢဝ်ႇ တီႈ X ဝႃႈ မၼ်း “ႁူမ်ၸူမ်း” ၸွမ်း လွင်ႈဢၼ် ပိုၼ်ၽၢဝ်ႇ လူတ်းယွမ်း ၵႃႈၶၼ် လႄႈ လွင်ႈဢွၼ်ႁူဝ် ထရမ်ႉၼႆႉ လမ်ႇလွင်ႈ တႃႇ လွင်ႈငမ်းယဵၼ်၊ လွင်ႈၼိမ်မၼ်ႈ လႄႈ လွင်ႈမၢၵ်ႈမီးလီပဵၼ် ၼႆယဝ်ႉ။

မူဝ်ႇတီႇ လၢတ်ႈဝႃႈ “ၶႃႈႁဝ်း မုင်ႈမွင်း တႃႇတေႁဵတ်းၵၢၼ်ၸွမ်းမၼ်း ၸမ်ၸႂ်ၵၼ် တႃႇဢဝ် လွင်ႈႁူမ်ႈမိုဝ်းၵၼ် ႁႂ်ႈၶိုၼ်ႈထိုင် ၸၼ်ႉသုင် ဢၼ်ဢမ်ႇယၢမ်ႈမီးမႃး” ၼႆသေ ယွင်ႈယေႃး လွင်ႈဢၼ် ထရမ်ႉ လႆႈၵပ်းသိုပ်ႇ ၾူၼ်း ဢၼ်လီဢၢမ်းၼၼ်ႉသေတႃႉ ဢမ်ႇလႆႈလၢတ်ႈပႃး လွင်ႈဢၼ် ထရမ်ႉ လၢတ်ႈဝႃႈ တေၵိုတ်းယိုတ်း လွင်ႈသိုဝ်ႉၼမ်ႉမၼ်းမဵၼ် ရတ်ႈသျႃးၼၼ်ႉ။

ငိူၼ်ႈငဝ်ႈၶၢဝ်ႇ

David Lawder and Aftab Ahmed. "US to cut tariffs on India to 18%, India agrees to end Russian oil purchases" — Reuters, February 2, 2026
euronews. "Trump to lower tariffs on India after Modi 'agrees' to stop buying Russian oil" — euronews, February 2, 2026
David Goldman and Matt Egan. "Trump slashes tariffs on India after he says Modi agrees to stop buying Russian oil" — CNN, February 3, 2026
Bernd Debusmann Jr. "US and India reach trade deal, Trump says after Modi call" — BBC News, February 3, 2026