Jump to content

UAE ဢမ်ႇယွမ်းႁပ်ႉ လွင်ႈတႃႇၶၢႆႉၵူၼ်းမိူင်း ပႃးလဵတ်ႈသတၢႆး

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းၽတ်း၊ ၾႅပ်ႇဝႃႇရီႇ 20၊ 2025

ၽွင်းလူင်ၽၢႆႇၼွၵ်ႈမိူင်း ဢမႄႇရိၵၢၼ်ႇ ႁူပ်ႉထူပ်းတင်း ၸွမ်ပွင်ၸိုင်ႈ မိူင်းႁူမ်ႈတုမ် ၸဝ်ႈၾႃႉ ဢႃႇရၢပ်ႈ

ၸွမ်ပွင်ၸိုင်ႈ မိူင်းႁူမ်ႈတုမ် ၸဝ်ႈၾႃႉ ဢႃႇရၢပ်ႈ Sheikh Mohammed bin Zayed Al Nahyan လၢတ်ႈတီႈ ၽွင်းလူင်ၽၢႆႇၼွၵ်ႈမိူင်း ဢမႄႇရိၵၢၼ်ႇ မႃႇၶူဝ်ႇရူဝ်ႇပီႇယူဝ်ႇ (Marco Rubio) ဢၼ်ၵႂႃႇဢႅဝ်ႇလႄႇ ဝဵင်းဢႃႇပူဝ်ႇတႃႇပီႇ မိူဝ်ႈဝၼ်းပုတ်ႉၼၼ်ႉဝႃႈ သင်ဝႃႈ ၶတ်းၸႂ် တႃႇတေ ဢဝ်ၵူၼ်းမိူင်းပႃးလဵတ်ႈသတၢႆး ဢွၵ်ႇပႅတ်ႈ တီႈလိၼ်ၶဝ်ၼႆၸိုင် တေဢမ်ႇယွမ်းႁပ်ႉလႆႈ ၼႆယဝ်ႉ။ ၶေႃႈၵႂၢမ်းဢၼ်ၼႆႉ လႆႈထုၵ်ႇ သိုဝ်ႇၶၢဝ်ႇ ၸႄႈမိူင်း မိူင်းႁူမ်ႈတုမ် ၸဝ်ႈၾႃႉ ဢႃႇရၢပ်ႈ ပိုၼ်ၽၢဝ်ႇဝႆႉသေ ၸွမ်ပွင်ၸိုင်ႈ လၢတ်ႈဝႃႈ လူဝ်ႇလႆႈ ႁႄႉၵင်ႈ ပၢင်တိုၵ်း တီႈၵႃႇၸႃႇ ၼင်ႇႁိုဝ် တေဢမ်ႇယႂ်ႇၵႂၢင်ႈမႃး ၼႆယဝ်ႉ။

သိုဝ်ႇၶၢဝ်ႇ မိူင်းႁူမ်ႈတုမ် ၸဝ်ႈၾႃႉ ဢႃႇရၢပ်ႈ ဢွၵ်ႇၶၢဝ်ႇဝႃႈ “မၼ်းယင်းလၢတ်ႈဝႃႈ လွင်ႈၶိုၼ်းၵေႃႇသၢင်ႈ ၵႃႇၸႃႇ ႁႂ်ႈပဵၼ်မႃး လွင်ႈငမ်းယဵၼ် ဢၼ်ၵုမ်ႇထူၼ်ႈ လႄႈ ဢၼ်တေမၼ်ႈၵိုမ်း ဢၼ်ဢိင်ၼိူဝ် ၶေႃႈၵႄႈလိတ်ႈ သွင်မိူင်း ဢၼ်ပဵၼ် လၢႆးတၢင်း ဢၼ်တေႁဵတ်းႁႂ်ႈ ၼႂ်းပိုၼ်ႉတီႈ ၼိမ်သဝ်းၼၼ်ႉ ၼႆယဝ်ႉ။ ၽူႈဢွၼ်ႁူဝ် ဢႃႇရၢပ်ႉၶဝ် ဢမ်ႇႁပ်ႉၶၢမ်ႇ ၽႅၼ်ၵၢၼ် ဢၼ်ၸွမ်ပွင်ၸိုင်ႈဢမႄႇရိၵၢၼ်ႇ တေႃႇၼႄႇထရမ်ႉ တၢင်ႇလၢတ်ႈဝႆႉဝႃႈ ႁႂ်ႈၵူၼ်းမိူင်းပႃးလဵတ်ႈသတၢႆးၶဝ် ဢွၵ်ႇၵႂႃႇ တီႈၵႃႇၸႃႇသေ ၵႂႃႇယူႇသဝ်း တၢင်ႇမိူင်း လႄႈ ႁႂ်ႈဢမႄႇရိၵၢၼ်ႇ ၶိုၼ်းၵေႃႇသၢင်ႈ ၼႃႈလိၼ်ပႃးလဵတ်ႈသတၢႆး ဢၼ်ဝႃႈၼၼ်ႉယဝ်ႉ။

ၼႂ်းၶၢဝ်းတၢင်း ၽွင်းလူင်ၽၢႆႇၼွၵ်ႈမိူင်း ဢမႄႇရိၵၢၼ်ႇ Rubio ၼႆႉ ပႃးတင်း လွင်ႈဢုပ်ႇဢူဝ်းၵၼ်တင်း ၽူႈဢွၼ်ႁူဝ် မိူင်း UAE ၊ ၶၢဝ်းတၢင်း ရူဝ်ႇပီႇယူဝ်ႇၼႆႉ ပဵၼ်ၽွင်း ၶၵ်ႉတွၼ်ႈဢွၼ်တၢင်းသုတ်း ဢၼ်ဢိတ်ႇသရေး လႄႈ ၸုမ်းႁမၢသ်ႉ ၵိုတ်းတိုၵ်း တီႈၵႃႇၸႃႇၼၼ်ႉ ၶဝ်ႈမႃး ၼႂ်းဝူင်ႈလိုၼ်းသုတ်းၼၼ်ႉယဝ်ႉ။ ၽွင်းၼၼ်ႉ ၽူႈဢွၼ်ႁူဝ် ၸုမ်းႁမၢသ်ႉ ၵေႃႉ႞ လၢတ်ႈ မိူဝ်ႈဝၼ်းဢင်းၵၢၼ်းၼၼ်ႉဝႃႈ တေပွႆႇပၼ် ၵူၼ်းဢိတ်ႇသရေး 6 ၵေႃႉ ၸိူဝ်းဢၼ်ထုၵ်ႇၵုမ်းၶင်ဝႆႉ တီႈၵႃႇၸႃႇၼၼ်သေ တိုၵ်ႉၶပ်ႉၶိုင် တႃႇဢဝ်တူဝ်တၢႆ ၵူၼ်း 4 ၵေႃႉ ပွၵ်ႈမိူဝ်းၶိုၼ်း မိူဝ်ႈဝၼ်းၽတ်းၼၼ်ႉၼႆယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=UAE_ဢမ်ႇယွမ်းႁပ်ႉ_လွင်ႈတႃႇၶၢႆႉၵူၼ်းမိူင်း_ပႃးလဵတ်ႈသတၢႆး&oldid=11161"