Jump to content

Elon Musk လၢတ်ႈဝႃႈ လွင်ႈၵေႃႇၵၢၼ်ႁၢႆႉ ၼိူဝ်ဢွၼ်ႇလၢႆး ႁဵတ်းႁႂ်ႈ X ၶၢတ်ႇၵႂႃႇ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းဢင်းၵၢၼ်း၊ မၢတ်ႉၶျ် 11၊ 2025

ပရူဝ်ႇၾၢႆႇ ထဝိတ်ႉတႃႇ

မိူဝ်ႈဝၢႆးဝၼ်း ဝၼ်းၸၼ် ၼၼ်ႉ Elon Musk လၢတ်ႈဝႃႈ X ၼႆႉ လႆႈထုၵ်ႇ ဝႆႉယိူင်းမၢႆ ဢၼ် “လွင်ႈၵေႃႇၵၢၼ်ႁၢႆႉ ၼိူဝ်ဢွၼ်ႇလၢႆး ဢၼ်ယႂ်ႇလူင်” ဢၼ်ႁဵတ်းႁႂ်ႈ ၵၢၼ်ၸႂ်ႉတိုဝ်း ၶိူင်ႈၸၢၵ်ႈ လႆႈၵမ်းၵမ်းၵိုတ်းယင်ႉၵႂႃႇသေ ႁဵတ်းႁႂ်ႈ ၼႅၵ်ႉဝွၵ်ႉ တူင်ႇဝူင်းၵူၼ်း မၼ်း တူၵ်းၵႂႃႇ တင်းဝၼ်းၼၼ်ႉၼႆယဝ်ႉ။ တေးတၢင်း ဢၼ် မိူဝ်ႈဢွၼ်တၢင်း ႁွင်ႉဝႃႈ Twitter ၼႆၼၼ်ႉ ယွၼ်ႉပိူဝ်ႈ ၶေႃႈမုၼ်း ဢမ်ႇၸၢင်ႈဢဝ် လူင်းမႃးလႄႈ ဢမ်ႇတွပ်ႇၶိုၼ်းလႆႈ တွၼ်ႈတႃႇ ၵူၼ်းၸႂ်ႉတိုဝ်းၶဝ် တင်းၼမ်ၼႆယဝ်ႉ။

ၽူႈၵွၼ်းၵၢၼ် တေးတၢင်း ပိုၼ်ၽၢဝ်ႇဝႃႈ “ႁဝ်းၶႃႈ လႆႈထုၵ်ႇ ၵူၼ်းႁၢႆႉၶဝ် ၶဝ်ႈၵဝ်းယူႇၵူႈဝၼ်းသေတႃႉ လွင်ႈၼႆႉ လႆႈၸႂ်ႉႁႅင်းၵမ်ႉ တင်းၼမ်သေ ႁဵတ်းမႃး” ၼႆယဝ်ႉ။ “ၸုမ်းယႂ်ႇ ဢၼ်ၵပ်းသိုပ်ႇႁူမ်ႈႁွမ်းၵၼ် လႄႈ/ဢမ်ႇၼၼ် မိူင်းၼိုင်ႈမိူင်း ၶဝ်ႈပႃးၸွမ်း” ဝႃႈၼႆယဝ်ႉ။

ဝႅပ်ႉသၢႆႉ Downdetector ဢၼ်ပႂ်ႉတူၺ်း လွင်ႈၶၢတ်ႇမွတ်ႇ တီႈၼိူဝ် ဝႅပ်ႉသၢႆႉ လႄႈ တေးတၢင်းလၢႆလၢႆဢၼ်ၼၼ်ႉ ၼႄဝႆႉ ၶၢဝ်ႇငၢဝ်း လွင်ႈၶၢတ်ႇမွတ်ႇ ၼပ်ႉႁူဝ်ႁဵင် ဢၼ်တႄႇတင်ႈ မွၵ်ႈ 5.45 မူင်း ၼႃႈပႆႇၶိုၼ်းမိူၼ်ၵဝ်ႇ ၶၢဝ်းတၢင်းလၢႆၸူဝ်ႈမူင်းၼၼ်ႉယဝ်ႉ။ လွင်ႈဢၼ် ၶၢတ်ႇမွတ်ႇၵႂႃႇ ပွၵ်ႈၵမ်းသွင်ၼၼ်ႉ ပဵၼ်ၶၢဝ်းတၢင်း ၶိုင်ႈဝၼ်းသေ ၵမ်ႈၼမ် ပဵၼ်တီႈ ဢႅပ်ႉမိုဝ်းထိုဝ် ၶွမ်ႇပၼီႇၼၼ်ႉယဝ်ႉ။

တီႈၼႂ်း Tweet ဢၼ်ဢမ်ႇဢွၵ်ႇမႃးၼၼ်ႉ တေၼႄပၼ် ၶေႃႈၵႂၢမ်းဢၼ်ဝႃႈ “မီးလွင်ႈၽိတ်းပိူင်ႈ” ၼႆသေ လၢတ်ႈဝႃႈ ႁႂ်ႈၸၢမ်းၶိုၼ်းတၢင်ႇၶိုၼ်းၼႆယဝ်ႉ။

ၵူၼ်းမၢၵ်ႈမီးလိူဝ်ပိူၼ်ႈ ၼႂ်းလုမ်ႈၾႃႉၼႆႉ ဢမ်ႇၼႄလၵ်းထၢၼ်သင် တႃႇလွင်ႈမၼ်းလၢတ်ႈၼၼ်ႉ။ ၶေႃႈပိုၼ်ၽၢဝ်ႇမၼ်းၼႆႉ ပဵၼ်ၶေႃႈတွပ်ႇ ၸူး ၽူႈႁူမ်ႇငမ်း ၽၢႆႇငိုၼ်းတွင်း ၶရိပ်ႇတူဝ်ႇ ၵေႃႉပၼ်တၢင်းႁၼ်ထိုင်ဝႃႈ လွင်ႈဢၼ် လႆႈၶၢတ်ႇမွတ်ႇၵႂႃႇၼႆႉ ပဵၼ်ယွၼ်ႉ လွင်ႈသၢၼ်ၶတ်း ၶွမ်ႇပၼီႇ Musk တၢင်ႇၸိူဝ်းၼၼ်ႉၼႆယဝ်ႉ။ လွင်ႈၼႄၵၢင်ၸႂ် ဢၼ်ႁွင်ႉဝႃႈ “ႁွင်ႈၵၢၼ် ၽၢႆႇႁဵတ်းၵၢၼ် လူင်ပွင်ၸိုင်ႈ” ဢၼ် Musk ဢွၼ်ႁူဝ် လႄႈ လွင်ႈယႃႉလူႉ ႁူင်းၵၢၼ် ၵႃႉၶၢႆ Tesla ၼၼ်ႉ လႆႈပဵၼ်မႃး ၼႂ်းဝူင်ႈပူၼ်ႉမႃး တင်းမူတ်းယဝ်ႉ။

မိူဝ်ႈၽွင်း မၼ်းတွပ်ႇ ၵၢၼ်တွင်ႈထၢမ် ဢိၼ်ႇတႃႇဝိဝ်း တီႈ Fox Business ၼၼ်ႉ မသ်ႉၵ် ၶိုၼ်းလၢတ်ႈဝႃႈ ၵူၼ်းၸိူဝ်းႁဵတ်းၵၢၼ်းၽိတ်းပိူင်ႈၼၼ်ႉ ၸၢင်ႈပဵၼ် ၵူၼ်းမိူင်းယူႇၶရဵၼ်း ဝႃႈၼႆယဝ်ႉ။

မသ်ႉၵ် လၢတ်ႈဝႃႈ “ႁဝ်းၶႃႈ ဢမ်ႇႁူႉဝႃႈ ပဵၼ်သင်တႄႉတႄႉ ၵူၺ်းၵႃႈ မီးလွင်ႈ ၵေႃႇၵၢၼ်ႁၢႆႉ ၼိူဝ်ဢွၼ်ႇလၢႆး ဢၼ်ယႂ်ႇလူင် တႃႇၶတ်းၸႂ် ဢဝ် X system တူၵ်းၵႂႃႇ ဢၼ်လႆႈႁၼ်ပဵၼ် IP Address ဢၼ်လုၵ်ႉတီႈ ပိုၼ်ႉတီႈ မိူင်းယူႇၶရဵၼ်း မႃးၼၼ်ႉ ” ၼႆယဝ်ႉ ဝႃႈၼႆ။

ယွၼ်ႉပိူဝ်ႈ လွင်ႈၵပ်းသိုပ်ႇ ၼႂ်းၵႄႈ လူင်ပွင်ၸိုင်ႈ ယူႇၶရဵၼ်း လႄႈ လူင်ပွင်ၸိုင်ႈ ထရမ်ႉ ဢမ်ႇလီမႃးလႄႈ မသ်ႉၵ် လႆႈသႄႉသွမ်း လူင်ပွင်ၸိုင်ႈ ယူႇၶရဵၼ်း ႁၢဝ်ႈႁႅင်းမႃးယူႇ။ မိူဝ်ႈဝၼ်းလိုဝ်ႈၵၢၼ်ၼၼ်ႉ Musk လၢတ်ႈဝႃႈ သင်ဝႃႈ မၼ်းပိၵ်ႉပႅတ်ႈ ၶိူင်ႈၵပ်းသိုပ်ႇ လႅင်လၢဝ် Starlink မၼ်းၼႆ ၸိူဝ်းပဵၼ် ထႅဝ်ႈၼႃႈသိုၵ်းတင်းသဵင်ႈ ၸိုင်ႈမိူင်းၼၼ်ႉ တေလႆႈၵူၼ်ႇပင်းၵႂႃႇ ဝႃႈၼႆသေမၼ်းႁွင်ႉဝႃႈ ၽူႈတႅၼ်းၽွင်း တီႇမူဝ်ႇၶရႅတ်ႉတိၵ်ႉ Mark Kelly ၼႆႉ ပဵၼ် “ၽူႈၽိတ်းပိူင်ႈ“ ၼႆ ဝၢႆးသေ ၽူႈတႅၼ်းၽွင်းၼၼ်ႉ လႆႈတၢင်ႇၽူတ်ႉ ဢၼ်ၵႂႃႇဢႅဝ်ႇလႄႇ တီႈ မိူင်းယူႇၶရဵၼ်းၼၼ်ႉယဝ်ႉ။

ၽူႈၵွၼ်း ၶွမ်ႇပၼီႇ SpaceX ဢၼ်လႆႈသိုဝ်ႉဢဝ် Twitter လူၺ်ႈငိုၼ်းတေႃႇလႃႇ 44 ပီႇလီႇယၼ်ႇ မိူဝ်ႈပီ 2022 ၼၼ်ႉၵေႃႈ လၢတ်ႈဝႃႈ မိူဝ်ႈဢွၼ်တၢင်း ဢၼ်တေးတၢင်း (platform) လႆႈၶၢတ်ႇမွတ်ႇၵႂႃႇၼၼ်ႉ ပဵၼ်ယွၼ်ႉ လွင်ႈၵေႃႇၵၢၼ်ႁၢႆႉ ၼိူဝ်ဢွၼ်ႇလၢႆး ၼႆယဝ်ႉ။ မိူဝ်ႈၶေႃႈတွင်ႈထၢမ် ဢၼ်မၼ်းလႆႈ တွင်ႈထၢမ် တင်း တေႃႇၼႄႇထရမ်ႉ ၼၼ်ႉ ၵဵဝ်ႇၵပ်းလူၺ်ႈ လွင်ႈဢၼ်ပဵၼ်မႃး လွင်ႈလူႉလႅဝ်မိူဝ်ႈပီၵၢႆ ဢၼ်ပေႃးၸမ်လူႉလႅဝ်ၵႂႃႇၵမ်းလဵဝ်ၼၼ်ႉ မသ်ႉၵ် ၼႄးဝႃႈ ပဵၼ်ယွၼ်ႉပိူဝ်ႈ “လွင်ႈ DDOS ဢၼ်ယႂ်ႇလူင်” ၼႆယဝ်ႉ။ ၵူၺ်းၵႃႈ ဝၢႆးၼၼ်ႉ ၽူႈမီးပုၼ်ႈၽွၼ်း တီႈၶွမ်ႇပၼီႇ ၵေႃႉ႞ လၢတ်ႈတီႈ ၸုမ်းၶၢဝ်ႇ Verge ဝႃႈ ဢမ်ႇမီးလွင်ႈၵေႃႇၵၢၼ်ႁၢႆသင် ဝႃႈၼႆ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=Elon_Musk_လၢတ်ႈဝႃႈ_လွင်ႈၵေႃႇၵၢၼ်ႁၢႆႉ_ၼိူဝ်ဢွၼ်ႇလၢႆး_ႁဵတ်းႁႂ်ႈ_X_ၶၢတ်ႇၵႂႃႇ&oldid=11404"