Cloudflare လၢမ်းၶၢတ်ႈဝႆႉဝႃႈ ၶၢႆလႆႈၼမ်လိူဝ် ဢၼ်လၢမ်းၶၢတ်ႈဝႆႉ ယွၼ်ႉ AI လူဝ်ႇ cloud ၼမ်မႃး

ဝၼ်းပုတ်ႉ၊ ၾႅပ်ႇဝႃႇရီႇ 11၊ 2026

မိူဝ်ႈဝၼ်းဢႃးတိတ်ႉၼၼ်ႉ Cloudflare (NET.N) ၼႆႉ ပိုတ်ႇၽုၺ်ႇ ၽႅၼ်ႇၵၢၼ်မႂ်ႇ ဢၼ်လၢမ်းၶၢတ်ႈ ၶၢႆၶူဝ်းၶွင် ၼႂ်းပီလႂ်ပီၼၼ်ႉ လႄႈ ၼႂ်းၶၢဝ်းတၢင်း သီႇလိူၼ် ပွၵ်ႈဢွၼ်တၢင်းသုတ်း ဢၼ် Wall Street ၶဝ် လၢမ်းၶၢတ်ႈဝႆႉၼၼ်ႉယဝ်ႉ။

ၶၼ်ႁုၼ်ႈ ၶွမ်ႇပၼီႇၼႆႉ ၶိုၼ်ႈမႃး ၸမ် 12% ၼႂ်းၶၢဝ်းတၢင်း ဢၼ်မႄႇၶႂၢၵ်ႈၵၢၼ်ၵႃႉၶၢႆၼၼ်ႉယဝ်ႉ။

လွင်ႈၶႄႉၶဵင်ႇၵၼ် တႃႇတေဢဝ် AI မႃးႁူမ်ႈၵၼ် ၼႂ်းႁူင်းၵၢၼ်တင်းသဵင်ႈၼႆႉ ႁဵတ်းႁႂ်ႈ လွင်ႈလူဝ်ႇ cloud ၼမ်မႃး ယွၼ်ႉဝႃႈ ၵၢၼ်ပၢႆးမၢၵ်ႈမီးၶဝ် ဝႆႉၼၵ်းၼိူဝ် လွင်ႈၸႂ်ႉၸၢႆႇ ၼိူဝ် ၵၢၼ်ၵေႃႇသၢင်ႈ တီႇၵျိတ်ႇတႄႇ ဢၼ်လူဝ်ႇတႃႇ ႁဵတ်းႁႂ်ႈ ပၢႆးၸၢင်ႈ ၶိုၼ်ႈယႂ်ႇမႃးၼၼ်ႉယဝ်ႉ။

Cloudflare ၼႆႉၵေႃႈ မုင်ႈမွင်းဝႃႈ တေလႆႈၼမ်ႉတွၼ်းၽွၼ်းလီ တီႈ AI agents ၼမ်မႃး မိူၼ်ၼင်ႇ "Clawdbot" ဢၼ်ပႆႇႁိုင်သင်ၼႆႉ လႆႈမႄးၸိုဝ်ႈပဵၼ် "OpenClaw" ၼႆသေ ၽူႈၸႂ်ႉတိုဝ်းၶဝ် ၸၢင်ႈၸႂ်ႉတိုဝ်း ပႆၢးသၢင်ႈၶွင် cloud firm သေ ၸၢင်ႈသူင်ႇပၼ် လွင်ႈၵႂႃႇမႃး တီႈၶွမ်းသုၼ်ႇတူဝ်ၶဝ် လွတ်ႈလွတ်ႈလႅဝ်းလႅဝ်းယူႇယဝ်ႉ။

CEO Matthew Prince လၢတ်ႈဝႃႈ “လွင်ႈၶၢႆႉၸူး AI လႄႈ ၽူႈတၢင်တူဝ်ၶဝ်ၼႆႉ မၼ်းတၢင်တူဝ် လွင်ႈၶိုၼ်းမႄးႁဵတ်းပဵၼ် ပိုၼ်ႉထၢၼ် ဢိၼ်ႇတႃႇၼႅတ်ႉ ဢၼ်ႁဵတ်းႁႂ်ႈ လွင်ႈတုၵ်းယွၼ်း ၼႂ်းၵၢၼ်ၸႂ်ႉတိုဝ်း Cloudflare ၼၼ်ႉ တိူဝ်းမႃး” ၼႆယဝ်ႉ။

ၽွၼ်းလႆႈလီ မိူဝ်ႈဝၼ်းဢင်းၵၢၼ်းၼၼ်ႉ ၸၢင်ႈၸွႆႈထႅမ် လူတ်းယွမ်းပၼ် လွင်ႈမႆႈၸႂ် ၽူႈလူင်ႉလႅၼ်ႇ ၽၢႆႇလူင်းတိုၼ်းၶဝ် ဢၼ်ၵဵဝ်ႇလူၺ်ႈ လွင်ႈလူဝ်ႇ ၵူၼ်းၸႂ်ႉတိုဝ်းၶဝ် ဝၢႆးသေ Cloudflare လႆႈၶၢတ်ႇၵႂႃႇ မိူဝ်ႈလိူၼ်ၼူဝ်ႇဝႅမ်ႇပႃႇၼၼ်ႉသေ ႁႄႉႁၢမ်ႈ ၵူၼ်းၼပ်ႉႁူဝ်ႁဵင် ဢမ်ႇၸၢင်ႈၸႂ်ႉတိုဝ်း ဢိၼ်ႇတႃႇၼႅတ်ႉ ဢၼ်လမ်ႇလွင်ႈ ဢၼ်ပႃး X လႄႈ ChatGPT ၼၼ်ႉယဝ်ႉ။

ၸွမ်းၼင်ႇ ၶေႃႈမုၼ်း ဢၼ် LSEG ၶဝ် ၵဵပ်းႁွမ်ဝႆႉၼၼ်ႉ ၶွမ်ႇပၼီႇ Cloudflare ၶဝ် လၢမ်းၶၢတ်ႈဝႆႉဝႃႈ ၼႂ်းပီ 2026 ၼႆႉ တေၶၢႆလႆႈ ၼႂ်းၵႄႈ 2.79 ပီႇလီႇယၼ်ႇ တေႃႇထိုင် 2.80 ပီႇလီႇယၼ်ႇတေႃႇလႃႇသေ ၼမ်လိူဝ် ဢၼ်လၢမ်းၶၢတ်ႈဝႆႉ တေႃႇလႃႇ 2.74 ပီႇလီႇယၼ်ႇ ၼႆယဝ်ႉ။

ယဝ်ႉၵေႃႈ မၼ်းမုင်ႈမွင်းဝႃႈ ၼႂ်းၶၢဝ်းတၢင်း သီႇလိူၼ် ပွၵ်ႈဢွၼ်တၢင်းသုတ်းၼႆႉ တေၶၢႆလႆႈ ၼႂ်းၵႄႈ 620 လၢၼ်ႉတေႃႇလႃႇ တေႃႇထိုင် 621 လၢၼ်ႉတေႃႇလႃႇသေ မၼ်းၵေႃႈ မုင်ႈမွင်းဝႃႈ တေၶၢႆလႆႈလိူဝ် 613.9 လၢၼ်ႉတေႃႇလႃႇ ၼႆယဝ်ႉ။

ၶွမ်ႇပၼီႇ ပိုၼ်ၽၢဝ်ႇဝႃႈ ငိုၼ်းၶဝ်ႈ ၼႂ်းၶၢဝ်းတၢင်း သီႇလိူၼ် လိူၼ်တီႇသႅမ်ႇပႃႇၼၼ်ႉ ၶိုၼ်ႈမႃး 33.6% ထိုင် 614.5 လၢၼ်ႉတေႃႇလႃႇသေ ပူၼ်ႉလိူဝ် ဢၼ်လၢမ်းၶၢတ်ႈဝႆႉ 591.3 လၢၼ်ႉတေႃႇလႃႇၼၼ်ႉယဝ်ႉ။

လွင်ႈလူႉသုမ်းမၼ်း ၼႂ်းၶၢဝ်းတၢင်း သီႇလိူၼ်ၼၼ်ႉ လႆႈလူတ်းယွမ်းလူင်းထိုင် 12.1 လၢၼ်ႉတေႃႇလႃႇသေ မိူဝ်ႈပီၵၢႆၼၼ်ႉ လႆႈလူႉသုမ်း 12.8 လၢၼ်ႉတေႃႇလႃႇယဝ်ႉ။

ၶၼ်ႁုၼ်ႈၶွမ်ႇပၼီႇၼႆႉ တေႃႇထိုင်ပီၼႆႉ တူၵ်းလူင်းၵႂႃႇ 8% လိူဝ်လိူဝ်သေ မိူဝ်ႈပီ 2025 ၼၼ်ႉ ၶၼ်ႁုၼ်ႈမၼ်း ၶိုၼ်ႈမႃး 83% လိူဝ်လိူဝ်ယဝ်ႉ။

ငိူၼ်ႈငဝ်ႈၶၢဝ်ႇ

Reporting by Arsheeya Bajwa in Bengaluru; Editing by Vijay Kishore. "Cloudflare forecasts annual sales above estimates as AI drives cloud demand" — Reuters, February 11, 2026
Daniella Vallurupalli. "Cloudflare Announces Fourth Quarter and Fiscal Year 2025 Financial Results" — cloudflare, February 11, 2026
investing.com. "Earnings call transcript: Cloudflare Q4 2025 revenue and EPS beat forecasts" — investing.com, February 11, 2026