Jump to content

ႁိူဝ်းမိၼ် ဢိၼ်းတီးယႃး ဢၼ်တေမိၼ်ၸူး မိူင်းဢိင်းၵလဵတ်ႈ လႆႈလူႉတူၵ်း

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းၽတ်း၊ ၸုၼ်ႇ 12၊ 2025

ႁိူဝ်းမိၼ် သၢႆၵၢၼ်မိၼ် ဢိၼ်းတီးယႃး Boeing 787-8 Dreamliner ဢၼ်မိၼ်ၸူး မိူင်းဢိင်းၵလဵတ်ႈ (ၶႅပ်းႁၢင်ႈၵဝ်ႇ)

မိူဝ်ႈဝၼ်းၽတ်းၼၼ်ႉ ႁိူဝ်းမိၼ် Air India ဢၼ်တေၵႂႃႇတၢင်းလၼ်ႇတၼ်ႇ ဢၼ်ပႃးၵူၼ်း 242 ၵေႃႉၼၼ်ႉ လုၵ်ႉတီႈဝဵင်းဢႃႇမႄႇတႃႇပၢတ်ႉ ၽၢႆႇတူၵ်း မိူင်းဢိၼ်းတီးယႃး ၶိုၼ်ႈမႃးယဝ်ႉ ဝၢႆးလင်ႁိုင်မွၵ်ႈ လၢႆမိၼိတ်ႉၼၼ်ႉ လႆႈတူၵ်းၵႂႃႇလႄႈ ၸဝ်ႈၼႃႈတီႈၶဝ်လၢတ်ႈဝႃႈ ၵူၼ်းတၢႆ ဢမ်ႇယွမ်း 30 ၵေႃႉသေ ႁူဝ်ၼပ်ႉႁူဝ်တၢႆ တေၸၢင်ႈၶိုၼ်ႈမႃးထႅင်ႈ ၼႆယဝ်ႉ။

ႁိူဝ်းမိၼ်လမ်းၼႆႉ ဢၢင်ႈၵႂႃႇတီႈ တႃႈႁိူဝ်းမိၼ် Gatwick ဢၼ်မီးၽၢႆႇႁွင်ႇ ဝဵင်းလူင်ပရိတ်ႉတဵင်ႇၼၼ်ႉၼႆ ၶွမ်ႇပၼီႇ Air India ပိုၼ်ၽၢဝ်ႇဝႆႉသေ ၸဝ်ႈၼႃႈတီႈပလိၵ်ႈၶဝ်တႄႉ လၢတ်ႈဝႃႈ ႁိူဝ်းမိၼ်ၼၼ်ႉ တူၵ်းၵႂႃႇတီႈ ဢွင်ႈတီႈ ဢၼ်ၵူၼ်းယူႇသဝ်း ႁိမ်းတႃႈႁိူဝ်းမိၼ်ၼၼ်ႉ ၼႆယဝ်ႉ။

ၸဝ်ႈၼႃႈတီႈပလိၵ်ႈ ၸၼ်ႉသုင်ၵေႃႉ႞ လၢတ်ႈတီႈၽူႈသိုဝ်ႇၶၢဝ်ႇၶဝ်ဝႃႈ “ႁူင်းႁေႃ ဢၼ်မၼ်းတူၵ်းၵႂႃႇၼၼ်ႉ ပဵၼ်ႁူင်းသဝ်းမေႃယႃ... ႁဝ်းၶႃႈ လႆႈၽဵဝ်ႈပတ်း မွၵ်ႈ 70% တေႃႇ 80% ပၢႆယဝ်ႉ၊ ဢၼ်ၵိုတ်းၼၼ်ႉ တေၽဵဝ်ႈပတ်းၵႂႃႇ ၼႂ်းဢမ်ႇႁိုင်သင်” ၼႆယဝ်ႉ။

ႁူင်းပွႆႇသဵင် CNN News-18 မိူင်းဢိၼ်းတီးယႃး လၢတ်ႈဝႃႈ ႁိူဝ်းမိၼ်ၼၼ်ႉ တူၵ်းၵႂႃႇၼိူဝ် ႁွင်ႈၵိၼ်ၶဝ်ႈ ႁူင်းသဝ်း ၶေႃးလဵၵ်ႉပၢႆးမေႃ B.J. သေ လုၵ်ႈႁဵၼ်းပၢႆးမေႃယႃ လႆႈတၢႆၵႂႃႇတင်းၼမ်ၼႆယဝ်ႉ။ ၼႄဝႆႉ ႁၢင်ႈၽၢင် ႁိူဝ်းမိၼ် ဢၼ်တၢင်ႇဝႆႉ ၼိူဝ်ႁူင်းႁေႃၼၼ်ႉ ပွတ်းၼိုင်ႈ။

ၸုမ်းၸွႆႈထႅမ်ၶဝ်လၢတ်ႈဝႃႈ တီႈၼၼ်ႈ လႆႈႁၼ်တူဝ်တၢႆ ဢမ်ႇယွမ်း 30 ထိုင် 35 ၵေႃႉသေ ၵူၼ်းၸိူဝ်းဢၼ်ၶမ်ဝႆႉ ၼႂ်းႁွင်ႈၼၼ်ႉၵေႃႈ ၼမ်မႃးထႅင်ႈၼႆယဝ်ႉ။

ၽူႈမီးပုၼ်ႈၽွၼ်း လၢတ်ႈတီႈသိုဝ်ႇၶၢဝ်ႇ Reuters ဝႃႈ ၵူၼ်းၶီႇႁိူဝ်းမိၼ်ၼၼ်ႉ ပႃးၵူၼ်းလူင် 217 ၵေႃႉ လုၵ်ႈဢွၼ်ႇ 11 ၵေႃႉ လႄႈ လုၵ်ႈဢွၼ်ႇလဵၵ်ႉ 2 ၵေႃႉ ၼႆယဝ်ႉ။ ၶွမ်ႇပၼီႇ Air India ဢွၵ်ႇၶၢဝ်ႇဝႆႉဝႃႈ ၼႂ်းၼၼ်ႉ ၵူၼ်းမိူင်းဢိၼ်းတီးယႃး 169 ၵေႃႉ ၵူၼ်းမိူင်းဢိင်းၵလဵတ်ႈ 53 ၵေႃႉ ၵူၼ်းမိူင်းပေႃးတူႉၵၢဝ်ႇ 7 ၵေႃႉ ၵူၼ်းမိူင်းၶႅၼ်ႇၼေႇတႃႇ 1 ၵေႃႉ ဝႃႈၼႆ။

ဝႅပ်ႉသၢႆႉ ဢၼ်ၸွပ်ႇတူၺ်း ၵၢၼ်မိၼ် Flightradar24 လၢတ်ႈဝႃႈ ႁိူဝ်းမိၼ်ၼၼ်ႉ ပဵၼ်ႁိူဝ်းမိၼ် Boeing 787-8 Dreamliner ဢၼ်ပဵၼ် ႁိူဝ်းမိၼ် ၵူၼ်းၶီႇ ဢၼ်ၶိုတ်းၵၢပ်ႈ ဢၼ်ၸႂ်ႉတိုဝ်းယူႇၼၼ်ႉ ဢၼ်ၼိုင်ႈၼႆယဝ်ႉ။

ဢၼ်ၼႆႉ ပဵၼ်ပွၵ်ႈဢွၼ်တၢင်းသုတ်း တႃႇႁိူဝ်းမိၼ် Dreamliner ဢၼ်တႄႇမိၼ် တႃႇၵၢၼ်မၢၵ်ႈမီး မိူဝ်ႈပီ 2011 ၼၼ်ႉ ၼႆယဝ်ႉ။ ႁိူဝ်းမိၼ်ဢၼ်တူၵ်းၵႂႃႇ မိူဝ်ႈဝၼ်းၽတ်းၼၼ်ႉ လႆႈမိၼ်မႃး ပွၵ်ႈဢွၼ်တၢင်းသုတ်း မိူဝ်ႈပီ 2013 သေ လႆႈသူင်ႇပၼ် ၶွမ်ႇပၼီႇ Air India မိူဝ်ႈလိူၼ်ၸၼ်ႇဝႃႇရီႇ ပီ 2014 ၼႆ Flightradar24 ပိုၼ်ၽၢဝ်ႇဝႆႉၼင်ႇၼႆ။

ၶွမ်ႇပၼီႇ Air India လၢတ်ႈတီႈ X ဝႃႈ “ယၢမ်းလဵဝ် ႁဝ်းၶႃႈ တိုၵ်ႉမၵ်းမၼ်ႈ လွင်ႈတၢင်းမၼ်းယူႇသေ တေပိုၼ်ၽႄပၼ် ၶေႃႈမုၼ်းထႅင်ႈယူႇ” ၼႆယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ႁိူဝ်းမိၼ်_ဢိၼ်းတီးယႃး_ဢၼ်တေမိၼ်ၸူး_မိူင်းဢိင်းၵလဵတ်ႈ_လႆႈလူႉတူၵ်း&oldid=11808"