Jump to content

ႁိူဝ်းမိၼ် တပ်ႉလူမ်း တူၵ်းသႂ်ႇႁူင်းႁဵၼ်း မိူင်းပင်းၵလႃးတဵတ်ႈ ၵူၼ်းတၢႆ ဢမ်ႇယွမ်း 20 ၵေႃႉ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းပုတ်ႉ၊ ၸူႇလၢႆႇ 23၊ 2025

ႁိူဝ်းမိၼ် တပ်ႉလူမ်း မိူင်းပင်းၵလႃးတဵတ်ႈ

ႁိူဝ်းမိၼ် ၽိုၵ်းၽွၼ်ႉ တပ်ႉလူမ်း မိူင်းပင်းၵလႃးတဵတ်ႈ တူၵ်းသႂ်ႇၼႂ်းဝၢင်းႁူင်းႁဵၼ်း တီႈဝဵင်းလူင် တႃႇၵႃႇသေ ၵူၼ်းတၢႆ 20 ၵေႃႉ မၢတ်ႇၸဵပ်း 170 ၵေႃႉလိူဝ် ၼႆယဝ်ႉ။

ၶႅပ်းႁၢင်ႈ ဢၼ်လႆႈႁၼ်တီႈ ႁူင်းႁဵၼ်း Milestone လႄႈ College တီႈၶႅပ်ႇဝဵင်း Uttara ၼၼ်ႉ ၼႄဝႆႉဝႃႈ ၽႆးမႆႈႁႅင်း လႄႈ ၵႂၼ်းၽႆးလမ်ဢၼ်ၼႃၼႃ ဝၢႆးသေ ႁိူဝ်းမိၼ် ၽႃႇၺႃး ႁူင်းႁဵၼ်းသွင်ၸၼ်ႉၼၼ်ႉယဝ်ႉ။ ၽၢႆႇတပ်ႉသိုၵ်း ပိုၼ်ၽၢဝ်ႇ ၼႂ်းၾဵတ်ႉပုၵ်ႉဝႃႈ ႁိူဝ်းမိၼ် F-7 ၼႆႉ ဝၢႆးသေ ၶိုၼ်ႈၵႂႃႇၽိုၵ်းၽွၼ်ႉ မိူဝ်ႈဝၼ်းၸၼ် ယၢမ်း 13:00 မူင်း (07:06 GMT) ၼၼ်ႉ လႆႈထူပ်းၺႃး လွင်ႈၽိတ်းပိူင်ႈ ၽၢႆႇၶိူင်ႈၸၢၵ်ႈ ၼႆယဝ်ႉ။ ၼႂ်းၵူၼ်းတၢႆၼၼ်ႉ ၵူၼ်းႁေႃႈႁိူဝ်းမိၼ်ၵေႃႈ ပႃးၸွမ်း ၼႆ တပ်ႉလူမ်း သိုပ်ႇလၢတ်ႈထႅင်ႈ။

မေႃယႃ တီႈႁူင်းယႃ ၽၢႆႇၽႆးမႆႈ လႄႈ ၽႃႇတတ်း ပလႅတ်ႉသတိၵ်ႉ ၸိူဝ်ႉၸၢတ်ႈ လၢတ်ႈဝႃႈ ၵူၼ်း 50 ၵေႃႉလိူဝ် လႆႈသူင်ႇႁူင်းယႃ ယွၼ်ႉၽႆးမႆႈသေ ၵမ်ႈၼမ် ပဵၼ်ႁၢဝ်ႈႁႅင်း ၼႆယဝ်ႉ။ ၵူၼ်းၸိူဝ်းလႆႈလူႉတၢႆၵႂႃႇၼၼ်ႉ ၵမ်ႈၼမ်ပဵၼ်လုၵ်ႈႁဵၼ်း ၸိူဝ်းတိုၵ်ႉပွႆႇဢွၵ်ႇႁူင်းႁဵၼ်း မိူဝ်ႈၽွင်းႁိူဝ်းမိၼ်တူၵ်းၼၼ်ႉ ၼႆယဝ်ႉ။ ၼႂ်းၼၼ်ႉ ပႃးလုၵ်ႈဢွၼ်ႇ 17 ၵေႃႉ- ႁွင်ႈၵၢၼ်ၽၢႆႇပၢႆးယူႇလီ ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

ဢႃႇယု လုၵ်ႈႁဵၼ်း ဢၼ်ၶိုၼ်ႈႁူင်းႁဵၼ်းယူႇၼႆႉ တေလႆႈမီး ၼႂ်းၵႄႈ 4 ပီ တေႃႇထိုင် 18 ပီ ၼႆယဝ်ႉ။ မေႃသွၼ် တီႈၸၼ်ႉၸွမ် ဢၼ်ပဵၼ် Rezaul Islam ၼၼ်ႉ လၢတ်ႈတီႈ BBC Bangla ဝႃႈ မၼ်းလႆႈႁၼ် ႁိူဝ်းမိၼ်ၼၼ်ႉ တူၵ်းသႂ်ႇ ႁူင်းႁဵၼ်းၼၼ်ႉ ၵမ်းသိုဝ်ႈၼႆယဝ်ႉ။ မေႃသွၼ်ထႅင်ႈၵေႃႉ႞ ဢၼ်ပဵၼ် Masud Tarik လၢတ်ႈတီႈ သိုဝ်ႇၶၢဝ်ႇ Reuters ဝႃႈ မၼ်းလႆႈငိၼ်းသဵင်မၢၵ်ႇတႅၵ်ႇဝႃႈ “မိူဝ်ႈၶႃႈတူၺ်းၶိုၼ်းၼၼ်ႉ ၶႃႈလႆႈႁၼ်ၽႆးလႄႈ ၵႂၼ်းၽႆးလမ်ၵူၺ်း... တီႈၼႆႈ မီးၵူၼ်းလူလွမ်ပႂ်ႉတူၺ်း လႄႈ လုၵ်ႈဢွၼ်ႇတင်းၼမ်” ၼႆယဝ်ႉ။

လုၵ်ႈႁဵၼ်းၸၼ်ႉ 10 လၢတ်ႈဝႃႈ မၼ်းတိုၵ်ႉဢွၵ်ႇမႃးတီႈတိူၵ်ႈ ဝၢႆးသေတွပ်ႇလိၵ်ႈယဝ်ႉ မိူဝ်ႈမၼ်းႁၼ်ႁိူဝ်းမိၼ်တူၵ်းသႂ်ႇတိုၵ်ႈ "ၽၢႆႇၼႃႈတႃၶႃႈ"။ ဢူၺ်းၵေႃႉမၼ်း ဢၼ်လီသုတ်းၼၼ်ႉ လႆႈတၢႆၵႂႃႇ ၽၢႆႇၼႃႈမၼ်း ၼႆယဝ်ႉ။ ၽူႈၶပ်းႁိူဝ်းမိၼ် ဢၼ်ပဵၼ် ၸဝ်ႈသိုၵ်းလူင် Md. Taukir Islam ၼၼ်ႉ ဝၢႆးသေ ၶိူင်ႈၸၢၵ်ႈ ၽိတ်းပိူင်ႈယဝ်ႉ မၼ်းၶတ်းၸႂ် တႃႇတေ ၶတ်းႁိူဝ်းမိၼ် ၵႂႃႇတီႈ ဢၼ်ၵူၼ်းဢမ်ႇပေႃးၼမ်ၼၼ်ႉ ၼႆယဝ်ႉ။ မၼ်းတိုၵ်ႉလုၵ်ႉတီႈ တပ်ႉၵၢင်ႁၢဝ် တီႈဝဵင်းလူင်ၼၼ်ႉ ၶိုၼ်ႈႁိူဝ်းမိၼ်မႃးၵူၺ်း။ တႃႇတေၸွပ်ႇတူၺ်း လွင်ႈၼႆႉ လႆႈၶွတ်ႇၽွတ်ႈဝႆႉ ၶွမ်ႇမတီႇၵူတ်ႇၸွပ်ႇထတ်း ၼႆ ၼႂ်းၶေႃႈပိုၼ်ၽၢဝ်ႇၼၼ်ႉ သိုပ်ႇလၢတ်ႈထႅင်ႈ။

ၶႅပ်းႁၢင်ႈ ဢၼ်လႆႈမႃးတီႈ ဢွင်ႈတီႈ ဝၢႆးသေ ႁိူဝ်းမိၼ်တူၵ်းၵႂႃႇ ၶၢဝ်းတၢင်း ၸူဝ်ႈမူင်းၼၼ်ႉ ၼႄဝႆႉ ၵူၼ်းႁဵတ်းၵၢၼ် ၽၢႆႇၶိုၵ်ႉၶၵ်ႉ တင်းၼမ် ၸႅၵ်ႇၽႄ ၶူဝ်းၶွင် ဢၼ်လူႉလႅဝ်ၵႂႃႇ တႃႇၶတ်းၸႂ် ႁႃ ၵူၼ်းၸိူဝ်း လွတ်ႈၽေးၼၼ်ႉသေ ၵူၼ်းတင်းၼမ် ဢွၼ်ၶိုၼ်ႈၼိူဝ် ႁူင်းႁေႃ ႁိမ်းႁွမ်းၼၼ်ႉသေ လႆႈဢွၼ်ၵၼ်တူၺ်းယူႇ။ ၵူၼ်းၸိူဝ်းလႆႈတိူဝ်ႉဝၢတ်ႇၸဵပ်းၼၼ်ႉ လႆႈယူတ်းယႃတူဝ်ဝႆႉ တီႈႁူင်းယႃ 7 တီႈ ၼႂ်းဝဵင်းပတ်းပိုၼ်ႉ ၼႆ ႁွင်ႈၵၢၼ်ၽၢႆႇပၢႆးယူႇလီ ပိုၼ်ၽၢဝ်ႇဝႆႉၼင်ႇၼႆ။ တီႈႁူင်းယႃ Uttara Adhunik Medical College ၼၼ်ႉ မေႃယႃ ဢၼ်ႁဵတ်းၵၢၼ်ယူႇၼၼ်ႉ လၢတ်ႈဝႃႈ ၵူၼ်းၸိူဝ်းမၢတ်ႇၸဵပ်းၼၼ်ႉ ၵမ်ႈၼမ် ဢႃႇယု 10 တေႃႇ 15 ပီသေ ၵမ်ႈၼမ် လႆႈမၢတ်ႇၸဵပ်း ယွၼ်ႉ ၼမ်ႉမၼ်းၸၢၵ်ႈ မႆႈ ၼႆယဝ်ႉ။

ၵူၼ်းတင်းၼမ် ဢွၼ်ၵၼ် မႃးၸူႉတုမ်ၵၼ် တီႈႁူင်းယႃ ၸိူဝ်ႉၸၢတ်ႈ ၽၢႆႇၽႆးမႆႈ လႄႈ ၽၢႆႇၽႃႇတတ်း ပလႅတ်ႉသတိၵ်ႉ ဝဵင်းတႃႇၵႃႇသေ ၼႂ်းၼၼ်ႉ ပႃးၵူၼ်းႁိူၼ်း ဢၼ်ၶႂ်ႈလႆႈၶေႃႈမုၼ်း လွင်ႈပီႈၼွင်ႉ လႄႈ ၽူႈၸွႆႈထႅမ် ၸိူဝ်းမႃးလူႇလိူတ်ႈၼၼ်ႉ ၼႆယဝ်ႉ။ ၼႂ်းလုၵ်ႈႁဵၼ်းၸိူဝ်းလႆႈတၢႆၵႂႃႇ ၼႂ်းႁိူဝ်းမိၼ်တူၵ်းၼၼ်ႉ လၢၼ်ၸၢႆး ဢႃႇယု 8 ၶူပ်ႇ ၽူႈၸၢႆးၵေႃႉ႞ ၼႆယဝ်ႉ။ “လၢၼ်ၸၢႆး ဢၼ်ၶႃႈႁၵ်ႉၼၼ်ႉ မီးဝႆႉတီႈႁွင်ႈၶၢပ်ႈတူဝ်တၢႆ ယၢမ်းလဵဝ်” ၼႆသေ မိုဝ်းမၼ်း တၢင်ႇဝႆႉၼိူဝ် ၶႅၼ်ၼွင်ႉၸၢႆးမၼ်း ဢၼ်ပဵၼ်ပေႃႈလုၵ်ႈဢွၼ်ႇၸၢႆးၼၼ်ႉ ဢၼ်ၵႆႉၵႆႉလၢတ်ႈဝႃႈ “လုၵ်ႈၸၢႆးၶႃႈ မီးတီႈလႂ်” ၼႆၼၼ်ႉယဝ်ႉ။

Muhammad Yunus ၽူႈဢွၼ်ႁူဝ် လူင်ပွင်ၸိုင်ႈ ၸူဝ်ႈၵႅပ်ႉ မိူင်းပင်းၵလႃးတဵတ်ႈ လၢတ်ႈဝႃႈ တေဢဝ်လၢႆးတၢင်း ဢၼ်လူဝ်ႇၼၼ်ႉ ၵူတ်ႇထတ်း လွင်ႈတၢင်း ဢၼ်ပဵၼ်မႃးၼၼ်ႉသေ တေၸွႆႈထႅမ် ၵူႈလွင်ႈလွင်ႈ ၼႆယဝ်ႉ။

ၼႂ်းလိၵ်ႈပိုၼ်ၽၢဝ်ႇ ဢၼ်မၼ်းတႅမ်ႈဝႆႉ တီႈ X ၼၼ်ႉ လၢတ်ႈဝႃႈ “ ၶၢဝ်းယၢမ်းၼႆႉ ပဵၼ်ၶၢဝ်းယၢမ်း ဢၼ်လီမွင်ၸႂ်ၸွမ်း ၸိူဝ်ႉၸၢတ်ႈတႄႉတႄႉသေ ယွၼ်းသူးပၼ် ႁႂ်ႈၵူၼ်းမၢတ်ႇၸဵပ်း ႁၢႆၶႅၼ်းဝႆးဝႆးသေ သင်ႇႁႂ်ႈ ၽူႈမီးပုၼ်ႈၽွၼ်း ၵူႈၵေႃႉ ပႃးၸဵမ်ႁူင်းယႃ ၸိူဝ်းၵဵဝ်ႇၶွင်ႈ ႁႂ်ႈၵႄႈလိတ်ႈ ငဝ်းလၢႆးၼႆႉ ႁႂ်ႈပဵၼ်လွင်ႈယႂ်ႇသုတ်း” ၼႆယဝ်ႉ။

မိူင်းပင်းၵလႃးတဵတ်ႈ ပိုၼ်ၽၢဝ်ႇ ဝၼ်းမွင်ၸႂ်ၸွမ်း ဝၼ်းဢင်းၵၢၼ်းၼၼ်ႉသေ တေယွၼ်ႇၸွမ်ပိဝ်ၸိူဝ်ႉၸၢတ်ႈ လူင်းၶိုင်ႈသဝ် ၸွတ်ႇတူဝ်ႈ မိူင်းပင်းၵလႃးတဵတ်ႈ ၼႆယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ႁိူဝ်းမိၼ်_တပ်ႉလူမ်း_တူၵ်းသႂ်ႇႁူင်းႁဵၼ်း_မိူင်းပင်းၵလႃးတဵတ်ႈ_ၵူၼ်းတၢႆ_ဢမ်ႇယွမ်း_20_ၵေႃႉ&oldid=12088"