Jump to content

ၾီလိပ်ႈပိၼ်း လၢတ်ႈဝႃႈ သင်ၵိုတ်းလွင်ႈႁႃလိူင်ႈၼႆၸိုင် တေဢဝ်မၢၵ်ႇၼူၾႆး သူင်ႇၶိုၼ်းပၼ် US

လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းသုၵ်း၊ ၸၼ်ႇဝႃႇရီႇ 31၊ 2025

ၸွမ်ပွင်ၸိုင်ႈ Xi Jinping လႄႈ ၸွမ်ပွင်ၸိုင်ႈ Ferdinand Marcos Jr. (ၶႅပ်းႁၢင်ႈၵဝ်ႇ)

ၸွမ်ပွင်ၸိုင်ႈ ၾီလိပ်ႈပိၼ်းၾႃႇတီႇၼႅၼ်ႇ မႃးၶူဝ်ႉသ် ၵျူႇၼီႇယႃႇ လၢတ်ႈဝႃႈ သင်ဝႃႈ ၶႄႇ ၵိုတ်းယိုတ်း လွင်ႈဢၼ် မၼ်းႁွင်ႉဝႃႈ လွင်ႈႁဵတ်းသၢင်ႈ ဢၼ်ႁၢဝ်ႈႁႅင်း လႄႈ ဢၼ်တဵၵ်းတဵင် တီႈပၢင်ႇလၢႆႇၶႄႇပွတ်းၸၢၼ်း ဢၼ်ပဵၼ် လွင်ႈထဵင်ထွင်ၵၼ်ၼၼ်ႉၼႆၸိုင် တေဢဝ်ဢွၵ်ႇ ၶိူင်ႈမၢၵ်ႇၼူၾႆး ဢမႄႇရိၵၢၼ်ႇ ဢၼ်မီးတီႈ မိူင်းၾီလိပ်ႉပိၼ်းၼၼ်ႉၼႆယဝ်ႉ။

မိူဝ်ႈလိူၼ်ဢေႇပရႄႇ ပီၵၢႆၼၼ်ႉ ၽၢႆႇသိုၵ်း ဢမႄႇရိၵၢၼ်ႇ လႆႈဢဝ် ၶိူင်ႈၸၢၵ်ႈ မၢၵ်ႇၼူၾႆး Typhoon ဢၼ်ၸၢင်ႈယိုဝ်းလႆႈ တၢင်းၵႆၵၢင်ၼၼ်ႉ သူင်ႇၵႂႃႇတီႈ မိူင်းၾီလိပ်ႈပိၼ်းပွတ်းႁွင်ႇသေ လၢတ်ႈဝႃႈ ပဵၼ်တႃႇ ႁူမ်ႈၵၼ် ၽိုၵ်းၽွၼ်ႉသိုၵ်း တင်း မိူင်းၾီလိပ်ႈပိၼ်းဢၼ်ပဵၼ် ဢူၺ်းလီၵၼ်မႃး ၶၢဝ်းႁိုင်ၼၼ်ႉၼႆယဝ်ႉ။

လူင်ပွင်ၸိုင်ႈၶႄႇ ၵမ်းၵမ်း တုၵ်းယွၼ်း ႁႂ်ႈၾီလိပ်ႈပိၼ်းဢဝ်ပႅတ်ႈ လွၵ်းပိူင် မၢၵ်ႇၼူၾႆးၼၼ်ႉသေ ဝႃႈၼၼ်ႉပဵၼ်လွင်ႈ တေႃႇၼႃႈၵၼ် ၽၢႆႇၼႃႈလိၼ်ၵၢၼ်မိူင်း လႄႈ ပဵၼ်လွင်ႈၶႄႉၶဵင်ႇ ၶိူင်ႈၵွင်ႈၵၢင်ႇ ၼႆယဝ်ႉ။ မိူဝ်ႈၽူႈသိုဝ်ႇၶၢဝ်ႇၶဝ် တွင်ႈထၢမ် ၸွမ်ပွင်ၸိုင်ႈ ၾီလိပ်ႈပိၼ်းMarcos ၵဵဝ်ႇၵပ်း ၶေႃႈပိုၼ်ၽၢဝ်ႇ ၶႄႇၼၼ်ႉ မၼ်းလၢတ်ႈဝႃႈ မၼ်းဢမ်ႇပွင်ႇၸႂ် သၢႆငၢႆပိူင်ပဵၼ် ၶႄႇ ဝႃႈၼႆယဝ်ႉ။

မိူင်းၾီလိပ်ႉပိၼ်းလၢတ်ႈဝႃႈတႄႉ ၶဝ်ဢမ်ႇလႆႈၼႄး ဢၼ်ၵဵဝ်ႇၵပ်းလူၺ်ႈ မၢၵ်ႇၼူၾႆး ဢၼ်မီးဝႆႉတီႈ မိူင်းၶႄႇၼၼ်ႉသေ လၢတ်ႈဝႃႈ တီႈတႄႉမၼ်း မၢၵ်ႇၼူၾႆး ဢၼ်ႁၢင်ႈဝႆႉ တီႈမိူင်းၶႄႇၼၼ်ႉ ႁႅင်းမၼ်းယႂ်ႇလိူဝ် မၢၵ်ႇၼူၾႆး ဢၼ်ႁၢင်ႈဝႆႉ တီႈမိူင်းၾီလိပ်ႈပိၼ်းယၢမ်းလဵဝ်ၼၼ်ႉ ၼပ်ႉႁူဝ်ႁဵင်ပုၼ်ႈၼႆယဝ်ႉ။

လိူဝ်သေၼၼ်ႉ ၶႂ်ႈႁႂ်ႈႁဵတ်းၶေႃႈတူၵ်းလူင်းၵၼ်တင်းၶႄႇသေဢမ်ႇၵႃး တႃႇၶႄႇတေၵိုတ်းယိုတ်းလွင်ႈတုၵ်းယွၼ်းၼႃႈလိၼ်၊ ၵိုတ်းယိုတ်းလွင်ႈလွၵ်ႇငိူတ်ႈ ၵူၼ်းႁႃပႃ ၾီလိပ်ႉပိၼ်း၊ ၵိုတ်းယိုတ်းလွင်ႈယိုဝ်းႁိူဝ်းၾီးလိပ်ႉပိၼ်း၊ ၵိုတ်းယိုတ်းလွင်ႈၶဝ်ႈၵႄႈၵၢင် လွင်ႈၵူၼ်းမိူင်းၾီလိပ်ႈပိၼ်းၵႂႃႇမႃး ၼိူဝ်ၼမ်ႉ လႄႈ ၵိုတ်းယိုတ်းလွင်ႈၸႂ်ႉတိုဝ်းလေႇသႃႇ သေ ပိုတ်းယိုဝ်း ဝႃးၼႆယဝ်ႉ။ မၼ်းလၢတ်ႈတီႈ ၽူႈသိုဝ်ႇၶၢဝ်ႇၶဝ်ဝႃႈ သင်ဝႃႈ ၶဝ်ၵိုတ်းယိုတ်း လွင်ႈလွၵ်ႇငိူတ်ႈ ႁၢဝ်ႈႁႅင်းၼႆၸိုင် ၶဝ်တေပၢၵ်ႈပႅတ်ႈ ပိူင်ၵၢၼ် မၢၵ်ႇၼူၾႆး ဢၼ်ဢမႄႇရိၵၢၼ်ႇၶဝ် တင်ႈဝႆႉယၢမ်းလဵဝ်ၼၼ်ႉ ၼႆယဝ်ႉ။

ၵပ်းၵၢႆႇလူၺ်ႈ ၶေႃႈပိုၼ်ၽၢဝ်ႇ ၾီလိပ်ႉပိၼ်းၼၼ်ႉ ၽၢႆႇၶႄႇ ပႆႇတွပ်ႇလၢတ်ႈသင်မႃး။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]