ၽွင်းလူင်ၽၢႆႇၼွၵ်ႈမိူင်း လၢတ်ႈဝႃႈ ငဝ်းလၢႆး ဢီႇရၢၼ်း မီးယူႇတႂ်ႈ လွင်ႈၵုမ်းၵမ်လႆႈ

ဝၼ်းဢင်းၵၢၼ်း၊ ၸၼ်ႇဝႃႇရီႇ 13၊ 2026 

ၽွင်းလူင်ၽၢႆႇၼွၵ်ႈမိူင်း ဢီႇရၢၼ်း Seyyed Abbas Araghchi

ၽွင်းလူင် ၽၢႆႇၼွၵ်ႈမိူင်းဢီႇရၢၼ်း ဢႃႇပႄးၸ်ဢႃႇရႅၵ်ႇၶျီႇ လၢတ်ႈဝႃႈ လွင်ႈသုၵ်ႉယုင်ႈဢူၼ်ၵဝ်း ၼႂ်းမိူင်းဢီႇရၢၼ်းၼၼ်ႉ တပ်ႉၽၢႆႇႁူမ်ႇလူမ်ႈၶဝ် ၵုမ်းၵမ်လႆႈ တင်းသဵင်ႈယဝ်ႉၼႆယူႇ။ သၢႆငၢႆမၼ်း ဢမ်ႇမိူၼ်မိူဝ်ႈသၢမ်ဝၼ်းပူၼ်ႉမႃးၼၼ်ႉယဝ်ႉလႄႈ ၵူၼ်းၸိူဝ်းဢၼ် ၵမ်ႉထႅမ်လူင်ပွင်ၸိုင်ႈဢီႇရၢၼ်းၵေႃႈ ဢွၵ်ႇမႃးၼႄၵၢင်ၸႂ် ၼိူဝ်တၢင်းၵေႃႈ မီးမႃးယဝ်ႉၼႆယဝ်ႉ။ ႁွင်ႈၵၢၼ် ၽၢႆႇႁၢင်ႈသဵင် ၼႂ်းမိူင်းၵေႃႈ ဢဝ်ဢွၵ်ႇၶၢဝ်ႇၼႄ လွင်ႈဝႃႈ သၢႆငၢႆၼႂ်းမိူင်းၶိုၼ်းမီးလွင်ႈငမ်းယဵၼ်ယဝ်ႉၼႆယူႇ။

လွင်ႈၼႄၵၢင်ၸႂ် ဢၼ်ပဵၼ်မႃး ၼႂ်းမိူင်းဢီႇရၢၼ်း ၸဵမ်မိူဝ်ႈဝၢႆးလိူၼ်တီႇသႅမ်ႇပႃႇ ယွၼ်ႉ ငိုၼ်းရီႇယႃႇ တူၵ်းလူင်းႁၢဝ်ႈႁႅင်းလႄႈ လွင်ႈယၢပ်ႇၽိုတ်ႇ ပၢႆးမၢၵ်ႈမီး ဢၼ်ပဵၼ်မႃး ၶၢဝ်းႁိုင်ၼၼ်ႉ လႆႈပဵၼ်မႃး လွင်ႈႁုၵ်ႉႁၢႆႉ လႄႈ လွင်ႈလိူတ်ႈဢွၵ်ႇ တႃႇတေပၼ် ၶေႃႈဢၢင်ႈ တႃႇၸွမ်ပွင်ၸိုင်ႈ ဢမႄႇရိၵၢၼ်ႇ တေႃႇၼႄႇထရမ်ႉ တေၶဝ်ႈၵႄႈၵၢင် ၼႆယဝ်ႉ။

မိူဝ်ႈဝၼ်းဢႃးတိတ်ႉၼၼ်ႉ ထရမ်ႉ လၢတ်ႈဝႃႈ လူင်ပွင်ၸိုင်ႈမၼ်း တိုၵ်ႉထတ်းသၢင် လွၵ်းလၢႆး ဢၼ်ႁႅင်းယႂ်ႇၼႃႇ ၵမ်ႈၽွင်ႈ ဢိၵ်ႇပႃး လွင်ႈဢၼ်တေၸၢင်ႈ ဢဝ်ၵၢၼ်သိုၵ်း တိုၵ်းတေႃႇ ဢီႇရၢၼ်းၼၼ်ႉယူႇ။

မိူဝ်ႈၽူႈသိုဝ်ႇၶၢဝ်ႇ ဢၼ်ၶီႇၼိူဝ်ႁိူဝ်းမိၼ် Air Force One ၶဝ် ထၢမ်ဝႃႈ ၸွင်ႇဢီႇရၢၼ်း ၶၢမ်ႈသၢႆလႅင် တႃႇတေ ႁဵတ်းႁႂ်ႈ မီးလွင်ႈတုမ်ႉတွပ်ႇၼႆၼၼ်ႉ ထရမ်ႉ လၢတ်ႈဝႃႈ “ၶဝ်တႄႇႁဵတ်းယူႇ မိူၼ်ၼင်ႇဝႃႈ” ၼႆယဝ်ႉ။

ထရမ်ႉ လၢတ်ႈဝႃႈ “ႁဝ်းၶႃႈ လႆႈတူၺ်း လွင်ႈၼႆႉ ႁၢဝ်ႈႁၢဝ်ႈႁႅင်းႁႅင်းယူႇ ၽၢႆႇတပ်ႉသိုၵ်းၵေႃႈ လႆႈတူၺ်းယူႇ လႄႈ ႁဝ်းၶႃႈ လႆႈတူၺ်း လွၵ်းလၢႆး ဢၼ်ႁႅင်းယႂ်ႇတႄႉတႄႉ ၵမ်ႈၽွင်ႈယူႇ ႁဝ်းၶႃႈ တေႁဵတ်း ၶေႃႈတႅပ်းတတ်း ၼႆယဝ်ႉ။

ၸွမ်ပွင်ၸိုင်ႈ ဢမႄႇရိၵၢၼ်ႇၵေႃႈ လၢတ်ႈဝႃႈ ၽူႈဢွၼ်ႁူဝ် ဢီႇရၢၼ်းၶဝ် လႆႈၵပ်းသိုပ်ႇ မၼ်းသေ လၢတ်ႈဝႃႈ ၶႂ်ႈဢုပ်ႇဢူဝ်းၵၼ် ၼႆယဝ်ႉ။ ထရမ်ႉ လၢတ်ႈဝႃႈ “ၽူႈဢွၼ်ႁူဝ် ဢီႇရၢၼ်းၶဝ် ထူဝ်းမႃး” ၼႆသေ ၶႂ်ႈဢုပ်ႇဢူဝ်းၵၼ် ၼႆယဝ်ႉ။

ၼႂ်းၶေႃႈၵႂၢမ်း မိူဝ်ႈဝၼ်းၸၼ်ၼၼ်ႉ Araghchi လၢတ်ႈဝႃႈ ဢီႇရၢၼ်း “ဢမ်ႇႁႃပၢင်တိုၵ်း ၵူၺ်းၵႃႈ ႁၢင်ႈႁႅၼ်းဝႆႉ တႃႇပၢင်တိုၵ်း တဵမ်ထူၼ်ႈယူႇ” ၼႆယဝ်ႉ။

ႁဝ်းၶႃႈၵေႃႈ ႁၢင်ႈႁႅၼ်းဝႆႉ တႃႇတေဢုပ်ႇဢူဝ်းၵၼ်ယူႇ ၵူၺ်းၵႃႈ လွင်ႈဢုပ်ႇဢူဝ်းၸိူဝ်းၼႆႉ ႁႂ်ႈပဵၼ်လွင်ႈၽဵင်ႇပဵင်း မီးသုၼ်ႇလႆႈၽဵင်ႇပဵင်းၵၼ် လႄႈ ဢိင်ၼိူဝ်လွင်ႈၼပ်ႉယမ်ၵၼ် ၼႆယဝ်ႉ။

ယၢမ်းလဵဝ် မိူင်းဢီႇရၢၼ်း လႆႈႁူပ်ႉထူပ်း လွင်ႈဢိၼ်ႇတႃႇၼႅတ်ႉ ၶၢတ်ႇပတ်းပိုၼ်ႉၸိုင်ႈမိူင်းသေ သိုဝ်ႇၶၢဝ်ႇၶဝ် လၢတ်ႈဝႃႈ ၵဵဝ်ႇၵပ်းလူၺ်ႈ လွင်ႈၼႄၵၢင်ၸႂ် ဢၼ်တိုၵ်ႉသိုပ်ႇပဵၼ်ယူႇၼၼ်ႉ ၼႆယဝ်ႉ။ ဢႃႇရႅၵ်ႇၶျီႇ လၢတ်ႈဝႃႈ ဢမ်ႇႁိုင်သင် တေၶိုၼ်းၸႂ်ႉတိုဝ်းလႆႈ ဢိၼ်ႇတႃႇၼႅတ်ႉ ၼႂ်းမိူင်းပတ်ႉပိုၼ်ႉ ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Cui Haipei. "Unrest under total control, claims Iran" — China Daily, January 13, 2026
• Patrick Wintour. "Iran says it is open to talks with US amid protest crackdown" — The Guardian, January 12, 2026
• Al Jazeera Staff and News Agencies. "Iran’s FM says protests became ‘bloody’ to give Trump intervention excuse" — Al Jazeera, January 12, 2026
• Public Broadcasting Service. "Trump says Iran wants to negotiate as the death toll in protests rises to at least 572" — Public Broadcasting Service, January 12, 2026