Jump to content

ၽွင်းလူင်မႂ်ႇ ပၼ်ၵႂၢမ်းမၼ်ႈဝႃႈ တေႁဵတ်းလွင်ႈလႅၵ်ႈလၢႆႈ ၼႂ်းတပ်ႉသိုၵ်း ဢမႄႇရိၵၢၼ်ႇ

လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းဢင်းၵၢၼ်း၊ ၸၼ်ႇဝႃႇရီႇ 28၊ 2025

ၽွင်းလူင် ၽၢႆႇၵႅတ်ႇၵင်ႈ ဢမႄႇရိၵၢၼ်ႇ Pete Hegseth

ၽွင်းလူင် ၽၢႆႇၵႅတ်ႇၵင်ႈ ဢမႄႇရိၵၢၼ်ႇ ၵေႃႉမႂ်ႇ Pete Hegseth ပၼ်ၵႂၢမ်းမၼ်ႈဝႃႈ တေႁဵတ်းသၢင်ႈ လွင်ႈလႅၵ်ႈလၢႆႈ ၼႂ်းတပ်ႉသိုၵ်းဢမႄႇရိၵၢၼ်ႇ ၼမ်လိူဝ်ၵဝ်ႇၼႆယဝ်ႉ။ ႁႅၵ်ႉသႅတ်ႉ ဢၼ်ပဵၼ် ၽူႈႁၢပ်ႇၵၢၼ်သိုၵ်းၵဝ်ႇ လႄႈ ၽူႈၼမ်းပၢင် ၶၢဝ်ႇ Fox News ၵဝ်ႇၼၼ်ႉ လႆႈထုၵ်ႇ ၸွမ်သိုၵ်းလူင် CQ Brown ဢၼ်ပဵၼ် ႁူဝ်ပဝ်ႈ ၸုမ်းၽူႈၵွၼ်းတပ်ႉသိုၵ်း ႁူမ်ႈၵၼ် ႁပ်ႉတွၼ်ႈ တီႈၼွၵ်ႈ ႁူင်းႁေႃ ပႅၼ်ႇတၵူၼ်ႇ မိူဝ်ႈမၼ်း ႁွတ်ႈၽႅဝ် ပဵၼ်ၽွင်းလူင် ၽၢႆႇၵႅတ်ႇၵင်ႈ မႂ်ႇ ဝၼ်းဢွၼ်တၢင်းသုတ်းၼၼ်ႉယဝ်ႉ။

လႆႈႁၢပ်ႇၵၢၼ် ၽွင်းလူင်ၾၢႆႇၵႅတ်ႇၵင်ၼႆႉ ပဵၼ်ၵုင်ႇမုၼ် တႃႇၸူဝ်ႈပၢၼ် ဝႃႈၼႆယဝ်ႉ။ ႁႅၵ်ႉသႅတ်ႉ လၢတ်ႈတီႈၽူႈသိုဝ်ႇၶၢဝ်ႇၶဝ်ဝႃႈ ႁွင်ႈၵၢၼ်ၽၢႆႇၵႅတ်ႇၵင်ႈ တေၶိုၼ်ႈယႂ်ႇဝႆးလိူဝ်ၵဝ်ႇ ၼႆယဝ်ႉ။ ၶေႃႈၸီႉသင်ႇ ဢၼ်ပဵၼ်တၢင်းၵၢၼ် ၸွမ်ပွင်ၸိုင်ႈဢမႄရိၵၢၼ်ႇၼၼ်ႉ တေႁဵတ်းသၢင်ႈၵႂႃႇ ဝႆးဝႆး တေဢမ်ႇႁႂ်ႈမီးလွင်ႈၶၢတ်ႇၶင်ႉ တီႈၼႂ်းႁွင်ႈၵၢၼ်ၽၢႆႇၵႅတ်ႇၵင်ႈ ၼႆယဝ်ႉ။ ႁႅၵ်ႉသႅတ်ႉ လၢတ်ႈဝႃႈ ၽူႈမီးပုၼ်ႈၽွၼ်းၶဝ် တေလႆႈဢဝ်ပုၼ်ႈၽွၼ်း ၼႆယဝ်ႉ။

တီႈပၢင်လိူၵ်ႈတင်ႈ သၽႃးသုင်ၼၼ်ႉ ၵႅမ်ၸွမ်ၸိုင်ႈ JD Vance ပၼ်သဵင်တႅပ်းတတ်းသေ လႆႈသဵင်ၵမ်ႉထႅမ် 51 သဵင်၊ သဵင်သၢၼ်ၶတ်း 50 သဵင်သေ ႁႅၵ်ႉသႅတ်ႉ လႆႈထုၵ်ႇမၵ်းမၼ်ႈပဵၼ် ၽွင်းလူင်ၽၢႆႇၵႅတ်ႇၵင်ႈ မိူဝ်ႈဝၢႆးဝၼ်း ဝၼ်းသုၵ်းၼၼ်ႉယဝ်ႉ။ ဝၢႆးသေ လႆႈၵိၼ်ႇၵႅၼ်ႇ ပဵၼ်ၽွင်းလူင် ၽၢႆႇၵႅတ်ႇၵင်ႈ မိူဝ်ႈဝၼ်းဢႃးတိတ်ႉၼၼ်ႉယဝ်ႉ မၼ်းလႆႈဢုပ်ႇၵၼ်တင်း ၸွမ်ၽွင်းလူင် ဢိတ်ႇသရေး မိူဝ်ႈဝၼ်းဢႃးတိတ်ႉၼၼ်ႉသေ ဢၼ်ပႅၼ်ႇတၵူၼ်ႇ လၢတ်ႈဝႃႈ ပဵၼ်ပၢင်ၵုမ် ဢၼ်ဢုပ်ႇဢူဝ်းသိုပ်ႇမိုတ်ႈၵၼ် ဝႃႈၼႆယဝ်ႉ။

ႁႅၵ်ႉသႅတ်ႉ လၢတ်ႈဝႃႈ ၽၢႆႇပႅၼ်ႇတၵူၼ်ႇ တေႁဵတ်းႁႂ်ႈ ထရမ်ႉ မီးႁႅင်းတိုၼ်းတင်းသဵင်ႈ ဢၼ်တႃႇႁူမ်ႇလူမ်ႈ လႅၼ်လိၼ် ဢမႄႇရိၵၢၼ်ႇ ပွတ်းၸၢင်း တင်းမူတ်းၼႆယဝ်ႉ။

ၽူႈၼမ်းၼႂ်း ၽၢႆႇၵႅတ်ႇၵင်ႈ လၢတ်ႈဝႃႈ “ တီႈလႅၼ်လိၼ်ၼၼ်ႉ လူဝ်ႇသင်ၵေႃႈ တေပၼ်ယူႇ။ "ဢၼ်ၼႆႉ ပဵၼ်လွင်ႈလႅၵ်ႈလၢႆႈယဝ်ႉ။ မၼ်းဢမ်ႇၸႂ်ႈ လၢႆးႁဵတ်းၵၢၼ်ပၢႆးမၢၵ်ႈမီးမိူၼ်ၼင်ႇ မိူဝ်ႈပူၼ်ႉမႃးၼၼ်ႉ။"

“ႁွင်ႈၵၢၼ်ၽၢႆႇၵႅတ်ႇၵင်ႈ တေၵမ်ႉထႅမ် ၵၢၼ်ၵႅတ်ႇၵင်ႈ ၼႃႈလိၼ် မိူင်းႁူမ်ႈတုမ် ဢမႄႇရိၵၢၼ်ႇ၊ လႅၼ်လိၼ်ပွတ်းၸၢၼ်း၊ ႁႂ်ႈၶဝ်ႈပႃး တပ်ႉပႂ်ႉၸိုင်ႈမိူင်း လႄႈ တပ်ႉပႂ်ႉလႅၼ်လိၼ် ဢၼ်တူင်ႉၼိုင် ၸွမ်းၼင်ႇ ပိူင်ငဝ်ႈပိုင်းမိူင်း လႄႈ မၢႆမီႈ မိူင်းႁဝ်း ၸွမ်းၼင်ႇ ၶေႃႈၸီႉသင်ႇ ၽူႈၵွၼ်းသိုၵ်း ဝႃႈၼႆယဝ်ႉ။

မိူဝ်ႈတွင်ႈထၢမ် လွင်ႈၸၢတ်ႈပၢၼ် ၵူၼ်းဢႃႇၾၵၢၼ်ႇ ၸိူဝ်းႁဵတ်းၵၢၼ်ၸွမ်း ဢမႄႇရိၵၢၼ်ႇ မိူဝ်ႈဢမေႇရိၵၢၼ်ႇ ပႆႇထွၼ်တူဝ်ဢွၵ်ႇ မိူဝ်ႈလိူၼ်ဢေႃးၵၢတ်ႉ 2021 ၼၼ်ႉ ႁႅၵ်ႉသႅတ်ႉ လၢတ်ႈဝႃႈ “ႁဝ်းၶႃႈ တေႁဵတ်းႁႂ်ႈ လွင်ႈဢၼ်ပဵၼ်မႃး တီႈဢႃႇၾၵၢၼ်ႇၼၼ်ႉ ႁႂ်ႈမီးလွင်ႈဢဝ်ပုၼ်ႈၽွၼ်း လႄႈ တေၸုၵ်းၸွမ်း ဢူၺ်းလီႁဝ်းၶႃႈ” ၼႆယဝ်ႉ။

ႁႅၵ်ႉသႅတ်ႉ ၵေႃႈ လႅၵ်ႈလၢႆႈ ၶေႃႈထၢမ် ဢၼ်ဝႃႈ ၸွင်ႇမၼ်း မီးၽႅၼ်ၵၢၼ် တႃႇတေ ထွၼ်ဢွၵ်ႇ ႁူဝ်ပဝ်ႈ ၽူႈၵွၼ်းသိုၵ်း ႁူမ်ႈၵၼ်ၼၼ်ႉႁိုဝ်ၼႆၼၼ်ႉယဝ်ႉ။ ႁႅၵ်ႉသႅတ်ႉ လၢတ်ႈဝႃႈ “ယၢမ်းလဵဝ် ၶႃႈၸုၵ်းၸွမ်းမၼ်းယူႇ။ "ၶႃႈႁဝ်းမုင်ႈမွင်းတႃႇတေႁဵတ်းၵၢၼ်ၸွမ်းမၼ်းၼၼ်ႉယဝ်ႉ။"

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]