ၽူႈၼမ်းၽၢႆႇသၢၼ်ၶတ်း ဢွင်ႇပႄႉပၢင်လိူၵ်ႈတင်ႈ မိူင်းၵျႃႇမၼီႇ
ဝၼ်းၸၼ်၊ ၾႅပ်ႇဝႃႇရီႇ 24၊ 2025
တီႈပၢင်လိူၵ်ႈတင်ႈ ၵျႃႇမၼီႇ ဢၼ်ၸတ်းႁဵတ်းၵႂႃႇ မိူဝ်ႈဝၼ်းဢႃးတိတ်ႉၼၼ်ႉ ၽူႈဢွၼ်ႁူဝ် ၽၢႆႇသၢၼ်ၶတ်း Friedrich Merz လၢတ်ႈဝႃႈ မၼ်းဢွင်ႇပႄႉၼႆသေ ၸွမ်ၽွင်းလူင် Olaf Scholz သမ်ႉ ယွမ်းႁပ်ႉဝႃႈ မၼ်းလႆႈသုမ်းၼႆယဝ်ႉ။
ၸွမ်းၼင်ႇ ၶေႃႈထတ်းသၢင် ဢၼ်ဢွၵ်ႇမႃးၼၼ်ႉသေ ပႃႇတီႇ AfD မိုဝ်းၶႂႃသုတ်းၼၼ်ႉ ပဵၼ်တီႈသွင်သေ တေၸၢင်ႈလႆႈ တီႈယူႇ ဢၼ်ႁႅင်းယႂ်ႇလိူဝ်ပိူၼ်ႈ ဝၢႆးသိုၵ်းလုမ်ႈၾႃႉ ပွၵ်ႈၵမ်းသွင်ၼၼ်ႉယူႇ။
Friedrich Merz ၽူႈဢွၼ်ႁူဝ် ၸုမ်းပႃႇတီႇ ၶရိတ်ႉယၢၼ်ႇ တီႇမူဝ်ႇၶရေႇၸီႇ ႁူမ်ႈတုမ် CDU ဢၼ်မီးၽၢႆႇၶႂႃၵၢင်ၼၼ်ႉ လၢတ်ႈဝႃႈ မၼ်းႁူႉလွင်ႈၵၢၼ်ဢၼ်မၼ်းတေလႆႈႁူပ်ႉထူပ်းသေ လွင်ႈၼႆႉ တေဢမ်ႇငၢႆႈငၢႆႈ ဝႃႈၼႆ။
Merz လၢတ်ႈဝႃႈ မၼ်းယိူင်းဢၢၼ်း တႃႇတေၽွတ်ႈတင်ႈ လူင်ပွင်ၸိုင်ႈၽွမ်ႉႁူမ်ႈ ဝႆးဝႆးၼႆယဝ်ႉ။ မိူဝ်ႈပူၼ်ႉမႃး မၼ်းယၢမ်ႈလၢတ်ႈမႃးလၢႆပွၵ်ႈဝႃႈ တေဢမ်ႇႁူမ်ႈမိုဝ်းၵၼ်တင်း ပႃႇတီႇ AfD ဢၼ်မီးၽၢႆႇၶႂႃသုတ်းၼၼ်ႉၼႆယဝ်ႉ။ Scholz ၽူႈဢွၼ်ႁူဝ် ပႃႇတီႇ သူဝ်ႇသျႄႇလိတ်ႉ ၽၢႆႇသၢႆႉ ၵၢင်ၼၼ်ႉ ယွမ်းႁပ်ႉၽွၼ်းပၢင်လိူၵ်ႈတင်ႈသေ လၢတ်ႈတီႈ ၽူႈပၼ်ႁႅင်းၶဝ်ဝႃႈ ပဵၼ်ၶေႃႈတွပ်ႇ ပၢင်လိူၵ်ႈတင်ႈ ဢၼ်ၶူမ်ၶူမ် ၼႆယဝ်ႉ။
မၼ်းယင်းလၢတ်ႈဝႃႈ မၼ်းမုင်ႈမွင်းဝႃႈ ပႃႇတီႇၵၢၼ်မိူင်းၶဝ် တေဢမ်ႇႁဵတ်းၵၢၼ်ၸွမ်း ပႃႇတီႇၽၢႆႇၶႂႃသုတ်းၶဝ် ၼႆယဝ်ႉ။ Alice Weidel ၽူႈဢွၼ်ႁူဝ် ပႃႇတီႇၽၢႆႇၶႂႃသုတ်း AfD လၢတ်ႈဝႃႈ လႆႈပိုတ်ႇၸႂ် ဝႆႉ တႃႇတေဢုပ်ႇဢူဝ်း တႃႇတေၽွတ်ႈတင်ႈ လူင်ပွင်ၸိုင်ႈ ၽွမ်ႉႁူမ်ႈ တင်း ပႃႇတီႇ CDU ဢၼ်တေၸၢင်ႈလႆႈ ၶႅပ်းၵၢင်ၸႂ်ၼမ်လိူဝ်ပိူၼ်ႈၼၼ်ႉယူႇ ဝႃႈၼႆ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Associated Press. "Germany's conservatives win election, hard coalition talks loom" — VOA News, February 23, 2025
- Reuters. "German election: Conservative bloc celebrates win with far-right AfD in second" — The Guardian, February 24, 2025
- Geir Moulson. "Conservative opposition wins German election and the far right is 2nd with strongest postwar result" — AP News, February 24, 2025
- Paul Kirby. "Germany's conservatives celebrate, but far right enjoy record result" — BBC News, February 24, 2025
- Sarah Marsh and Matthias Williams. "German election victor Merz plans pivot from US as coalition talks loom" — Reuters, February 24, 2025
