Jump to content

ၽူႈၵွၼ်းၵၢၼ် ၶွမ်ႇပၼီႇ Microsoft လႄႈ Meta ၶဝ် ၵႅတ်ႇၶႄႁႄႉၵင်ႈ လွင်ႈၸႂ်ႉၸၢႆႇ AI ၼမ်ၼႃႇ

လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းသုၵ်း၊ ၸၼ်ႇဝႃႇရီႇ 31၊ 2025

ပၢႆႉ ငဝ်ႈငုၼ်း ၶွမ်ႇပၼီႇ Meta

ဝၢႆးသေ ၶွမ်ႇပၼီႇ DeepSeek ဢၼ်ပဵၼ် ၶွမ်ႇပၼီႇ ၶႄႇ ပိုၼ်ၽၢဝ်ႇ လွင်ႈၶိုၼ်ႈယႂ်ႇ ၶွမ်ႇပိဝ်ႇထႃႇ AI ဢၼ်ၵႃႈၶၼ်ထုၵ်ႇ ဢၼ်ႁဵတ်းႁႂ်ႈ ပၢႆးၸၢင်ႈ မိူင်းဢမႄႇရိၵၢၼ်ႇ တူင်ႉတိုၼ်ႇၼၼ်ႉ လၢႆဝၼ်းယဝ်ႉၼၼ်ႉ ၽူႈပွင်ၵၢၼ် ၶွမ်ႇပၼီႇ Microsoft လႄႈ Meta ၶဝ် ၵႅတ်ႇၶႄ လွင်ႈၸႂ်ႉၸၢႆႇ ငိုၼ်းၼမ်ၼႃႇ ဢၼ်ၶဝ်ဝႃႈ ပဵၼ် ၵၢၵ်ႇသေႃး တႃႇတေ ၶႄႉၶဵင်ႇၵၼ်လႆႈ ၼႂ်းပၢႆးမႂ်ႇၼၼ်ႉယူႇ။

ၼႂ်းပၢႆး AI ၼၼ်ႉ ၶွမ်ႇပၼီႇ Deepseek ၼႆႉ ႁဵတ်းႁႂ်ႈ ၶွမ်ႇပၼီႇပၢႆးၸၢင်ႈ ၼႂ်းလုမ်ႈၾႃႉ ဢွၼ်ၵၼ် ဢၢမ်းဢေႃး ယွၼ်ႉၸႂ်ႉၸၢႆႇငိုၼ်း ၵႃႈၶၼ်ဢေႇ ပေႃးမႃးၼိူင်းၵၼ်တင်း ၶွမ်ႇပၼီႇ ပၢႆးၸၢင်ႈ မိူင်းဝၼ်းတူၵ်းၶဝ်သေ ပၢႆးၸၢင်ႈၶဝ် ၸၢင်ႈၶႄႉၶဵင်ႇၵၼ်တင်း ၶွမ်ႇပၼီႇ မိူင်းဝၼ်းတူၵ်းၶဝ် ဢမ်ႇၼၼ် ၸၢင်ႈၶႅၼ်ႇလိူဝ်ၶဝ် ၼႂ်းမၢင်လွင်ႈသေဢမ်ႇၵႃး ႁဵတ်းႁႂ်ႈ မီးလွင်ႈထၢင်ႇထိူမ် ၼိူဝ် လွင်ႈဢမေႇရိၵၢၼ်ႇ ဢွၼ်ႁူဝ် ၼႂ်းၵၢၼ် AI ၼႆယဝ်ႉ။ ၵူၺ်းၵႃႈ ၽူႈပွင်ၵၢၼ် ပၢႆးၸၢင်ႈ ဢမႄႇရိၵၢၼ်ႇၶဝ် လၢတ်ႈ မိူဝ်ႈဝၼ်းပုတ်ႉၼၼ်ႉဝႃႈ လွင်ႈၸႂ်ႉၸၢႆႇငိုၼ်းၼမ်ၼႆႉ ပဵၼ်လွၵ်းလၢႆး တႃႇတေ ၶႄႉၶဵင်ႇၵၼ်လႆႈ ၼႂ်းၵၢၼ်ၼႆႉသေ တႃႇတေ ၵေႃႇသၢင်ႈ ၼႅတ်ႉဝွၵ်ႉၶ် ၶွမ်ႇပိဝ်ႇထႃႇ ယႂ်ႇလူင် တႃႇတေ ၵမ်ႉၸွႆႈပၼ် လွင်ႈလူဝ်ႇ ၶွမ်ႇပၼီႇ ဢၼ်ၶိုၼ်ႈယႂ်ႇမႃးၼၼ်ႉ ပဵၼ်လွင်ႈလမ်ႇလွင်ႈတႄႉတႄႉ ၼႆယဝ်ႉ။

ၽူႈၵွၼ်းၵၢၼ် ၶွမ်ႇပၼီႇ Meta ဢၼ်ပဵၼ် Mark Zuckerberg လၢတ်ႈဝႃႈ လွင်ႈဢၼ် လူင်းတိုၼ်းလၢင်း ၼမ်ၼမ် တီႈၵၢၼ်ၸႂ်ႉၸၢႆႇ လႄႈ ၵၢၼ်ၵေႃႇသၢင်ႈ ၶူဝ်းၶွင် ၸိူဝ်းၼႆႉ တေပၼ် ၽွၼ်းလီ ၽၢႆႇၽႅၼ်ၵၢၼ် ၸွမ်းၶၢဝ်းယၢမ်း ၼႆယဝ်ႉ။

ၽူႈၵွၼ်းၵၢၼ် ၶွမ်ႇပၼီႇ Microsoft ဢၼ်ပဵၼ် Satya Nadella လၢတ်ႈဝႃႈ တႃႇတေၶၢမ်ႈပူၼ်ႉလႆႈ လွင်ႈမၵ်းၶၼ်ႈ ပၢႆးၸၢင်ႈ AI ၼၼ်ႉ လူဝ်ႇလႆႈၸႂ်ႉၸၢႆႇငိုၼ်း ဝႃႈၼႆယဝ်ႉ။

ၼႂ်းပီၵၢၼ်ငိုၼ်းၼႆႉ ၶွမ်ႇပၼီႇ Microsoft တေၸႂ်ႉတိုဝ်း ငိုၼ်းတေႃႇလႃႇ 80 ပီႇလီႇယၼ်ႇ တႃႇပၢႆးၸၢင်ႈ AI သေ ၶွမ်ႇပၼီႇ Meta သမ်ႉ ပၼ်ၵႂၢမ်းမၼ်ႈဝႃႈ တေၸႂ်ႉတိုဝ်း ငိုၼ်းတေႃႇလႃႇ 65 ပီႇလီႇယၼ်ႇ ၼႆယဝ်ႉ။ ၶွမ်ႇပၼီႇၶႄႇ Deepseek လၢတ်ႈဝႃႈ တႃႇတေႁဵတ်းဢွၵ်ႇ ပၢႆးၸၢင်ႈ AI ဢၼ်မႂ်ႇၼၼ်ႉ လႆႈၸႂ်ႉငိုၼ်း မွၵ်ႈ 6 လၢၼ်ႉတေႃႇလႃႇၵူၺ်း ဝႃႈၼႆယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]