ၽူႈၵွၼ်းဝဵင်းၼိဝ်းယွၵ်ႉ ထုၵ်ႇဢဝ်တၢင်းၽိတ်း
ဝၼ်းသုၵ်း၊ သႅပ်ႇထႅမ်ႇပႃႇ 27၊ 2024
_(cropped).jpg)
ၽူႈတၢင်တူဝ် FBI ၶဝ် လႆႈၵူတ်ႇထတ်း တီႈႁိူၼ်း Gracie Mansion ဢၼ်ပဵၼ် ႁိူၼ်း ၽူႈၵွၼ်းဝဵင်း ၼိဝ်းယွၵ်ႉ Eric Adams ၼၼ်ႉ ဝၢႆးသေ ၶၢဝ်ႇငၢဝ်း ဢွၵ်ႇမႃးဝႃႈ မၼ်းတေလႆႈ ထုၵ်ႇဢဝ်တၢင်းၽိတ်း တီႈလုမ်းတြႃး ၽၢႆႇလူင်ပွင်ၸိုင်ႈ မိူဝ်ႈဝၼ်းၽတ်းၼၼ်ႉ ၼႆယဝ်ႉ။
လွင်ႈဢၼ်ဢဝ်တၢင်းၽိတ်းၼၼ်ႉတႄႉ ဢမ်ႇလႆႈႁူႉၸႅင်ႈလႅင်းၵမ်းလဵဝ်။ ၽူႈတၢင်လၢတ်ႈ ၸုမ်း FBI လႄႈ ၽူႈတၢင်လၢတ်ႈ ဢမေႇရိၵၢၼ်ႇ ၸေႊဝဵင်းၼိဝ်းယွၵ်ႉ ပွတ်းၸၢၼ်းၶဝ် ဢမ်ႇၶႂ်ႈလၢတ်ႈသင်။
ၽၢႆႇလူင်ပွင်ၸိုင်ႈ ဢႄးတမ်ႇ လႆႈဝၢင်ႇဝိူဝ်ႈမႃး ယွၼ်ႉ ၽူႈမီးၸၼ်ႉသုင်ၶဝ် လႆႈထွၼ်တူဝ်ဢွၵ်ႇ ၼႂ်းၵႄႈ ၵၢၼ်ထတ်းသၢင် ၽၢႆႇလူင်ပွင်ၸိုင်ႈ တီႈဢေႇသုတ်း 4 ပွၵ်ႈၼၼ်ႉယဝ်ႉ။
ၵူၺ်းၵႃႈ လွင်ႈဢၼ် ၽူႈၵွၼ်းဝဵင်း ဝဵင်းၼိဝ်းယွၵ်ႉ လႆႈထုၵ်ႇဢဝ်တၢင်းၽိတ်းၼၼ်ႉ ပဵၼ်လွင်ႈလႅၵ်ႈလၢႆႈ ဢၼ်လီဢၢမ်း တႃႇ ဢႄးတမ်ႇ ဢၼ်ပဵၼ် ၽူႈၵွၼ်းတပ်ႉ NYPD ၵဝ်ႇ ဢၼ်လႆႈ ႁပ်ႉပုၼ်ႈၽွၼ်း မိူဝ်ႈပူၼ်ႉမႃး သၢမ်ပီ လူၺ်ႈ ၵႂၢမ်းမၼ်ႈ တႃႇတေ ၵႄႈလိတ်ႈ လွင်ႈပူၼ်ႉပႅၼ် လႄႈ လွင်ႈဢမ်ႇၼိမ်သဝ်း တီႈဝဵင်းလူင် ဢမႄႇရိၵၢၼ်ႇၼၼ်ႉယဝ်ႉ။
ၼႂ်းၶေႃႈပိုၼ်ၽၢဝ်ႇ ဢၼ်ဢွၵ်ႇမႃး မိူဝ်ႈၶမ်ႈဝႃးၼၼ်ႉ ဢႄးတမ်ႇ ဢႃႇယု 64 ပီ ပၼ်ၵႂၢမ်းမၼ်ႈဝႃႈ တေၶႄႉၶဵင်ႇ လွင်ႈဢၼ် ဢဝ်တၢင်းၽိတ်းၼၼ်ႉယူႇ ၼႆယဝ်ႉ။
မၼ်းလၢတ်ႈဝႃႈ “ၶႃႈႁူႉဝႆႉတႃႇသေႇဝႃႈ သင်ဝႃႈ ၶႃႈၸုၵ်းမၼ်ႈတွၼ်ႈတႃႇ ၵူၼ်းမိူင်းၼိဝ်းယွၵ်ႉၶဝ်ၼႆ ၶႃႈတေပဵၼ် ၽူႈယိူင်းၸူး — လႄႈ ၽူႈယိူင်းၸူး ဢၼ်ၶႃႈပဵၼ်မႃးၼၼ်ႉယူႇ” ၼႆယဝ်ႉ။ “သင်ဝႃႈ ၶႃႈထုၵ်ႇတၢင်ႇလိူင်ႈ ၶႃႈဢမ်ႇလႆႈႁဵတ်းၽိတ်ႈသင် လႄႈ ၶႃႈတေတေႃႇသူႈၵႂႃႇ ၸွမ်းၼင်ႇ လွင်ႈၶႅင်ႁႅင်း ၶွၼ်းငဝ်းၶႃႈ မီးဝႆႉၼၼ်ႉ" ဝႃႈၼႆယဝ်ႉ။
ဝၢႆးသေ ၸုမ်း FBI ၶဝ် ၵူတ်ႇထတ်း ႁိူၼ်း Adams ယဝ်ႉ ၽူႈတၢင်လၢတ်ႈမၼ်း Alex Spiro လၢတ်ႈဝႃႈ ၽူႈတၢင်တူဝ်ၶဝ် မႃးၵူတ်ႇထတ်း ၾူၼ်းမၼ်း ပွၵ်ႈၵမ်းသွင် ၼႆယဝ်ႉ။
ၽၢႆႇလူင်ပွင်ၸိုင်ႈ ဢႄးတမ်ႇ လႆႈႁူပ်ႉထူပ်း ၶေႃႈထၢမ် ၵဵဝ်ႇၵပ်း လွင်ႈထတ်းသၢင် ၾႅတ်ႇၻရႄႇ လၢႆလၢႆပွၵ်ႈၼၼ်ႉမႃး လၢႆလိူၼ်ယဝ်ႉ။
ၵၢၼ်ၵူတ်ႇထတ်း ဢၼ်ၼိုင်ႈတႄႉ ယုမ်ႇယမ်ဝႃႈ တေပၵ်းၸႂ်ၼိူဝ် လွင်ႈဝႃႈ ၵၢၼ်ႁႃသဵင် တႃႇပဵၼ် ၽူႈၵွၼ်းဝဵင်း ဢႄးတမ်ႇၼႆႉ မၼ်းၽွမ်ႉႁူမ်ႈၵၼ်တင်း လူင်ပွင်ၸိုင်ႈ တူႇရၵီႇ တႃႇတေလႆႈ ငိုၼ်းၵမ်ႉၸွႆႈ ၵၢၼ်ႁႃသဵင် ဢၼ်ဢမ်ႇၸွမ်းမၢႆမီႈ တီႈၼွၵ်ႈမိူင်းၼၼ်ႉႁိုဝ်ၼႆယဝ်ႉ။ ၼႂ်းၵၢၼ်ထတ်းသၢင်ၼၼ်ႉ မိူဝ်ႈပီၵၢႆၼၼ်ႉ ၸုမ်း FBI ၶဝ် လႆႈၵူတ်ႇထတ်း ႁိူၼ်းၵူၼ်း တီႈဝဵင်း Brooklyn ဢၼ်ပဵၼ်ၶွင် ၽူႈၵဵပ်းငိုၼ်းၵွင်ၵၢင် လူင် Adams ၼၼ်ႉယဝ်ႉ။
မၼ်းပဵၼ် ၽူႈၵွၼ်းဝဵင်း ဢၼ်တိုၵ်ႉႁၢပ်ႇၵၢၼ်ယူႇ ဢွၼ်တၢင်းသုတ်း ၼႂ်းပိုၼ်း ၵၢပ်ႈပၢၼ်မႂ်ႇ ဝဵင်းၼိဝ်းယွၵ်ႉ ဢၼ်လႆႈထုၵ်ႇ ဢဝ်တၢင်းၽိတ်း ၵဵဝ်ႇၵပ်း လိူင်ႈၾႅတ်ႇၻရႄႇၼၼ်ႉယဝ်ႉ။ မၼ်းပဵၼ်ၽူႈၵွၼ်းဝဵင်း ဝဵင်းၼိဝ်းယွၵ်ႉ ၵေႃႉထူၼ်ႈ 111 ယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Jonathan Dienst, Tom Winter and Rich Schapiro. "New York Mayor Eric Adams expected to face federal charges" — NBC News, September 26, 2024
- Holly Honderich and Madeline Halpert. "NYC mayor charged with taking bribes and illegal campaign funds" — BBC News, September 27, 2024
- Michael Rothfeld, Nicole Hong and Bianca Pallaro. "Here Are the Charges Eric Adams Faces, Annotated" — The New York Times, September 26, 2024
- Luc Cohen. "New York Mayor Adams faces criminal indictment, vows to fight charges" — Reuters, September 26, 2024
