Jump to content

ၽူႈဢွၼ်ႁူဝ် ယူးရူပ်ႉၶဝ် ႁွင်ႉပၢင်ၵုမ်ၶိုၵ်ႉၶၵ်ႉ ၵဵဝ်ႇၵပ်းလွင်ႈ ယူႇၶရဵၼ်း

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းၸၼ်၊ ၾႅပ်ႇဝႃႇရီႇ 17၊ 2025

ၸွမ်ပွင်ၸိုင်ႈ ၾရၢင်ႇသဵတ်ႈ Emmanuel Macron လႄႈ ၸွမ်ပွင်ၸိုင်ႈ ယူႇၶရဵၼ်း ဝေႃႇလေႃႇတီးမႃးရ် ၸႄးလႅၼ်းသၵီး

ပၢင်ၵုမ်ၶိုၵ်ႉၶၵ်ႉ ၵဵဝ်ႇၵပ်း ပၢင်တိုၵ်း မိူင်းယူႇၶရဵၼ်း ဢၼ်ၸွမ်ပွင်ၸိုင်ႈ ၾရၢင်ႇသဵတ်ႈ Emmanuel Macron ၸတ်းႁဵတ်းၼၼ်ႉ တေၸတ်းႁဵတ်း တီႈဝဵင်းပႄးရိတ်ႉ ၼႂ်းလိူၼ်ၾႅပ်ႇဝႃႇရီႇ 17 ဝၼ်း တင်း ၽူႈဢွၼ်ႁူဝ် ယူးရူပ်ႉၶဝ် ၼႆယဝ်ႉ။ ဝၢႆးသေ ဢမႄႇရိၵၢၼ်ႇ လၢတ်ႈဝႃႈ ဢမ်ႇလူဝ်ႇ ႁႂ်ႈယူးရူပ်ႉ ၶဝ်ႈပႃးၼႂ်း ပၢင်တိုၵ်း ရတ်ႈသျႃး-ယူႇၶရဵၼ်းၼၼ်ႉယဝ်ႉ ၽူႈဢွၼ်ႁူဝ် ယူးရူပ်ႉၶဝ် ႁူပ်ႉထူပ်းၵၼ် ႁင်းၽႂ်ႁင်းမၼ်းၼႆယဝ်ႉ။

ပၢင်ဢုပ်ႇဢူဝ်းပွၵ်ႈၼႆႉ ၸိူဝ်းပဵၼ် ၽူႈဢွၼ်ႁူဝ် မိူင်းပရိတ်ႉတဵၼ်ႇ၊ မိူင်းၵျႃႇမၼီႇ၊ ဢီႇတလီႇ၊ မိူင်းပူဝ်ႇလႅၼ်ႇ၊ မိူင်းသပဵၼ်ႇ၊ မိူင်းၼႄႇတႃႇလႅၼ်ႇ လႄႈ မိူင်းတႅၼ်းမၢၵ်ႈၶဝ် တေမႃးၶဝ်ႈႁူမ်ႈ ၼႆယဝ်ႉ။ ၽူႈၼမ်းၼႂ်းလူင် ၸုမ်းၼေႇတူဝ်ႇ မၢၵ်ႉရူတ်ႉ၊ ႁူဝ်ပဝ်ႈ ၶွင်ႇသီႇ ယူးရူပ်ႉ ဢႅၼ်ႇတူဝ်ႇၼီႇယူဝ်ႇ ၶူဝ်ႇသတႃႇ လႄႈ ႁူဝ်ပဝ်ႈ ၶွမ်ႇသျိၼ်ႇ ယူးရူပ်ႉ ဢူဝ်ႇသူဝ်ႇလႃႇ ဝူၼ်ႇ တႄႇလီႇယႅၼ်ႇ ၸိူဝ်းၼႆႉၵေႃႈ တေမႃးၶဝ်ႈႁူမ်ႈၸွမ်း ၼႆယဝ်ႉ။

ၽူႈဢွၼ်ႁူဝ် ယူးရူပ်ႉၶဝ် ပၼ်ၵႂၢမ်းမၼ်ႈဝႆႉ မိူဝ်ႈပူၼ်ႉမႃး လၢႆဝၼ်းၼၼ်ႉဝႃႈ တေသိုပ်ႇၵမ်ႉထႅမ် ယူႇၶရဵၼ်းၼႆသေ ၸွမ်ၽွင်းလူင် ဢိင်းၵလဵတ်ႈ ၶျီႇယႃႇသတႃႇမႃႇ လၢတ်ႈဝႃႈ မိူဝ်ႈဝၼ်းဢႃးတိတ်ႉၼၼ်ႉ မၼ်းႁၢင်ႈႁႅၼ်းဝႆႉ တႃႇတေသူင်ႇသိုၵ်းဢိင်းၵလဵတ်ႈ ႁႂ်ႈပဵၼ် တပ်ႉသိုၵ်း ဢၼ်ၵမ်ႉထႅမ် လွင်ႈငမ်းယဵၼ် ဝၢႆးသိုၵ်းယဝ်ႉၼႆ သိုဝ်ႇၶၢဝ်ႇ Daily Telegraph ဢွၵ်ႇဝႆႉၼင်ႇၼႆ။

မိူဝ်ႈၼႆႉ ၽွင်းလူင်ၽၢႆႇၼွၵ်ႈမိူင်း ဢမႄႇရိၵၢၼ်ႇ Marco Rubio မီးဝႆႉတီႈ မိူင်းသေႃႇတီႇဢႃႇရေးပီးယႃးသေ ထိုင်ဝၼ်းဢင်းၵၢၼ်း တေႁူပ်ႉထူပ်း ၽွင်းလူင်ၽၢႆႇၼွၵ်ႈမိူင်း ရတ်ႈသျႃး Sergey Lavrov တႃႇတေဢုပ်ႇဢူဝ်းၵၼ် လွင်ႈပၼ်ႁႃ မိူင်းယူႇၶရဵၼ်းၼၼ်ႉယူႇ။

မိူဝ်ႈဝၼ်းဢႃးတိတ်ႉၼၼ်ႉ ၸွမ်ပွင်ၸိုင်ႈ ယူႇၶရဵၼ်း ဝေႃႇလေႃႇတီးမႃးရ် ၸႄးလႅၼ်းသၵီး လၢတ်ႈတီႈ ၶၢဝ်ႇ NBC ဢၼ်ပဵၼ် Meet the Press ၼၼ်ႉဝႃႈ သင်ဝႃႈ ယူႇၶရဵၼ်း ဢမ်ႇၶဝ်ႈပႃးၸွမ်းၼႆၸိုင် မၼ်းတေဢမ်ႇႁပ်ႉၶၢမ်ႇ ၶေႃႈတႅပ်းတတ်း ဢၼ်ဢမႄႇရိၵၢၼ်ႇ လႄႈ ရတ်ႈသျႃး တႅပ်းတတ်းၼၼ်ႉ ၼႆယဝ်ႉ။ ၸႄးလႅၼ်းသၵီး လၢတ်ႈဝႃႈ မိူဝ်ႈဝူင်ႈပုၼ်ႉ ၵပ်းသိုပ်ႇၾူၼ်းၵၼ်တင်း ၸွမ်ပွင်ၸိုင်ႈ ဢမႄႇရိၵၢၼ်ႇ တေႃႇၼႄႇထရမ်ႉၼၼ်ႉ မၼ်းလၢတ်ႈဝႃႈ ပူႇတိၼ်ႇ ႁဵတ်းၵႅင်ႈ ၶႂ်ႈလႆႈလွင်ႈငမ်းယဵၼ်ၵူၺ်းၼႆယဝ်ႉ။ လိူဝ်ၼၼ်ႉ မၼ်းလၢတ်ႈဝႃႈ ပေႃးဢမ်ႇမီး လွင်ႈၸွႆႈထႅမ် ၽၢႆႇသိုၵ်း ဢမႄႇရိၵၢၼ်ႇၼႆ တႃႇတေ တိုၵ်းတေႃး ရတ်ႈသျႃးၼၼ်ႉ တေယၢပ်ႇၽိုတ်ႇၼႃႇ ၼႆယဝ်ႉ။ ၽူႈမီးသုၼ်ႇလၢတ်ႈ ၸွမ်ပွင်ၸိုင်ႈ ၸႄးလႅၼ်းသၵီး လၢတ်ႈတီႈသိုဝ်ႇၶၢဝ်ႇ AFP ဝႃႈ မိူဝ်ႈဝၼ်းပုတ်ႉၼၼ်ႉ ၸွမ်ပွင်ၸိုင်ႈ ၸႄးလႅၼ်းသၵီး တေဢွၵ်ႇၶၢဝ်းတၢင်းၵႂႃႇ မိူင်းသေႃႇတီႇဢႃႇရေးပီးယႃး ၼႆယဝ်ႉ။

ရတ်ႈသျႃး သိမ်းဢဝ် ၼႃႈလိၼ် ယူႇၶရဵၼ်ႈ 20 ဝၢၵ်ႈ ဢၼ်ၸၼ်ႉလုမ်ႈၾႃႉ ယွမ်းႁပ်ႉဝႆႉၼၼ်ႉ ပႃးၸဵမ် ၵုၼ်ၶရၢႆးမီးယႃး ဢၼ်ၶဝ် သိမ်းဢဝ် မိူဝ်ႈပီ 2014 ၼၼ်ႉယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၽူႈဢွၼ်ႁူဝ်_ယူးရူပ်ႉၶဝ်_ႁွင်ႉပၢင်ၵုမ်ၶိုၵ်ႉၶၵ်ႉ_ၵဵဝ်ႇၵပ်းလွင်ႈ_ယူႇၶရဵၼ်း&oldid=11146"