ၽူႈတူင်ႉၼိုင် ပႃႇတီႇၶွၼ်ႇသႃႇဝေးတိပ်ႉ Charlie Kirk ထုၵ်ႇၶႃႈတၢႆ တီႈၸၼ်ႉၸွမ်ယူႇတႃး

ဝၼ်းၽတ်း၊ သႅပ်ႇထႅမ်ႇပႃႇ 11၊ 2025

Charlie Kirk ဢၼ်ပဵၼ် ၽူႈတူင်ႉၼိုင် ၽၢႆႇပၢႆးဝူၼ်ႉၵဝ်ႇ လႄႈ ပဵၼ်ဢူၺ်းလီၸမ်ၸႂ် ၸွမ်ပွင်ၸိုင်ႈ Donald Trump ဢၼ်မီးၼႃႈတီႈ ၽူႈပၼ်သဵင် ၼုမ်ႇႁၢႆးၸၢႆးယိင်း ရီႇပၢပ်ႉပလိၵ်ႇၵႅၼ်ႇၶဝ်ၼၼ်ႉ လႆႈထုၵ်ႇယိုဝ်းတၢႆ မိူဝ်ႈဝၼ်းပုတ်ႉ တီႈပၢင်ပွႆး ၶေႃးလဵၵ်ႉ Utah ဢၼ်ၽူႈၵွၼ်းၸႄႈဝဵင်း ႁွင်ႉဝႃႈ လွင်ႈၶႃႈႁႅမ်ၵၢၼ်မိူင်း ဢၼ်လုၵ်ႉတီႈ ၼိူဝ်ႁိူၼ်းသေ ႁဵတ်းသၢင်ႈမႃးၼၼ်ႉယဝ်ႉ။

ၽူႈၵွၼ်းၸႄႈမိူင်း ယူႇတႃး သပႅၼ်ႇသႃႇၶွၵ်ႉ လၢတ်ႈဝႃႈ “ဝၼ်းၼႆႉ ပဵၼ်ဝၼ်းလပ်းသိင်ႇ တႃႇၸႄႈမိူင်းႁဝ်း ပဵၼ်ဝၼ်းဢၼ်လီၸႂ်လဵၵ်ႉ တႃႇၸိူဝ်ႉၸၢတ်ႈႁဝ်း။ “ၶႂ်ႈလၢတ်ႈၸႅင်ႈလႅင်းဝႃႈ ဢၼ်ၼႆႉ ပဵၼ်လွင်ႈၶႃႈႁႅမ်ၵၢၼ်မိူင်း” ၼႆယဝ်ႉ။

ၽူႈမီးပုၼ်ႈၽွၼ်း ၽၢႆႇပၵ်းပိူင်မၢႆမီႈ ဢၼ်ႁူႉၸၵ်းလွင်ႈၼႆႉ ဢၼ်ဢမ်ႇလႆႈဢၼုၺၢတ်ႈ တႃႇတေဢုပ်ႇလၢတ်ႈ ၸိုဝ်ႈသဵင် လႄႈ ဢမ်ႇၶႂ်ႈဢွၵ်ႇၸိုဝ်ႈၼၼ်ႉ လၢတ်ႈဝႃႈ ၸဝ်ႈၼႃႈတီႈၶဝ် တိုၵ်ႉသွၵ်ႈႁႃ ၵူၼ်းမႂ်ႇ ဢၼ်ၶဝ်ႈၸႂ်ၼၼ်ႉယူႇသေတႃႉ မိူဝ်ႈဝၢႆးဝၼ်း ဝၼ်းပုတ်ႉၼၼ်ႉ ဢမ်ႇမီးၽူႈထၢင်ႇထိူမ် ဢၼ်ထုၵ်ႇၵုမ်းၶင်ဝႆႉ။ မိူဝ်ႈၸဝ်ႉၼၼ်ႉ ၵူၼ်းသွင်ၵေႃႉ လႆႈထုၵ်ႇၵုမ်းၶင်ဝႆႉသေတႃႉ ဢမ်ႇလႆႈႁူႉဝႃႈ ၽႂ်ၵေႃႈ ၵွင်ႉၵၢႆႇၵၼ်တင်း လွင်ႈယိုဝ်းၵၼ်ၼၼ်ႉလႄႈ လႆႈပွႆႇပၼ်ၶိုၼ်း တင်းသွင်ၵေႃႉယဝ်ႉ ၼႆ ၽူႈမီးပုၼ်ႈၽွၼ်း ၽၢႆႇႁူမ်ႇလူမ်ႈၵူၼ်းမိူင်း ၸႄႈမိူင်း Utah ၶဝ် လၢတ်ႈၼႄၼင်ႇၼႆ။

ၸဝ်ႈၼႃႈတီႈၶဝ် ဢမ်ႇလႆႈႁူႉၸွမ်း လွင်ႈတၢင်းမၼ်းၵမ်းလဵဝ်သေတႃႉ ငဝ်းလၢႆး ဢၼ်ယိုဝ်းၵၼ်ၼၼ်ႉ ႁဵတ်းႁႂ်ႈ ၵူၼ်းတင်းၼမ် လႆႈသႂ်ႇၸႂ် လွင်ႈလွၵ်ႇငိူတ်ႈ လွင်ႈၵေႃႇၵၢၼ်ႁၢႆႉ ၵၢၼ်မိူင်း ဢၼ်ယႂ်ႇမႃး ၼႂ်းမိူင်းဢမႄႇရိၵၢၼ်ႇ ဢၼ်ၼႂ်းလၢႆပီပူၼ်ႉမႃးၼႆႉ လႆႈတတ်းပႅတ်ႈ ပၢႆးဝူၼ်ႉ ၵူၼ်းတင်းၼမ်ၼၼ်ႉယဝ်ႉ။ လွင်ႈၶႃႈႁႅမ်တၢႆၼႆႉ လႆႈထုၵ်ႇ သွင်ပႃႇတီႇ သၢၼ်ၶတ်းယူႇသေတႃႉ လွင်ႈၼပ်ႉသွၼ်ႇ ၸိူဝ်ႉၸၢတ်ႈ ၼိူဝ်လွၵ်းလၢႆး တႃႇႁႄႉၵင်ႈ လွင်ႈၼႄးၵၢဝ်ႇႁႃ ၵၢၼ်မိူင်း ဢၼ်ၼႄတူဝ် မိူၼ်ၼင်ႇ လွင်ႈႁုၵ်းႁၢႆႉ ဢၼ်တၢႆၼၼ်ႉ မိူၼ်ႁၢင်ႈ ဢမ်ႇပွင်ႇၸႂ်လႆႈ။

ၶႅပ်းႁၢင်ႈ ဢၼ်ၸၼ်ႉၸွမ် Utah Valley ၶဝ် ပိုၼ်ၽႄၼိူဝ် ၼႅင်ႈသိုဝ်ႇတူင်ႇဝူင်းၵူၼ်းၼၼ်ႉ ၼႄဝႆႉဝႃႈ ၶိၵ်ႉ လၢတ်ႈၵႂၢမ်း ၼႂ်းမၢႆႇၶရူဝ်ႇၾူၼ်း ဢၼ်ယိပ်းဝႆႉ ၼႂ်းမိုဝ်း ၽွင်းၼင်ႈယူႇ တႂ်ႈ သုမ်ႉၽိူၵ်ႇ ဢၼ်တႅမ်ႈဝႆႉ ၶေႃႈၵႂၢမ်း “The American Comeback” လႄႈ “Prove Me Wrong” ၼႆယဝ်ႉ။ သဵင်ၵွင်ႈဢွၵ်ႇမႃးသဵင်လဵဝ်သေ လႆႈႁၼ် ၶိၵ်ႉ ဢဝ်မိုဝ်းၶႂႃမၼ်း ယိုၼ်းၶိုၼ်ႈမႃး ယွၼ်ႉလိူတ်ႈ ဢၼ်ဢွၵ်ႇမႃး ၽၢႆႇသၢႆႉၶေႃးမၼ်း တင်းၼမ်တင်းလၢႆၼၼ်ႉယဝ်ႉ။ ၵူၼ်းတူၺ်း ဢၼ်တူၵ်းၸႂ်ၵူဝ်ႁႄၼၼ်ႉ လႆႈငိၼ်းသဵင်ႁွင်ႉသႅၼ်ႇ မိူဝ်ႈၵူၼ်းပႆႇတႄႇပၢႆႈ။ သိုဝ်ႇၶၢဝ်ႇ Associated Press လႆႈမၵ်းမၼ်ႈဝႃႈ ၶႅပ်းႁၢင်ႈၸိူဝ်းၼၼ်ႉ လႆႈထႆႇဝႆႉ တီႈဝၢင်း Sorensen Center ဢၼ်မီးတီႈ ၸၼ်ႉၸွမ် Utah Valley ၼၼ်ႉၼႆယဝ်ႉ။

ၸၼ်ႉၸွမ် Utah Valley လၢတ်ႈဝႃႈ ဝၢင်းႁူင်းႁဵၼ်းၼၼ်ႉ လႆႈၶၢႆႉဢွၵ်ႇၵႂႃႇၵမ်းလဵဝ်သေ တိုၵ်ႉဢိုတ်းႁပ်းဝႆႉယူႇ ၼႆယဝ်ႉ။ ပၢင်သွၼ် လႆႈၶိုၼ်းယႃႉပႅတ်ႈ တေႃႇထိုင် ၶၢဝ်းယၢမ်းပၼ်ၽၢင်ႉထႅင်ႈ။ ၸိူဝ်းတိုၵ်ႉမီးၼႂ်းဝၢင်းႁူင်းႁဵၼ်းၼၼ်ႉ ႁႂ်ႈယူႇတီႈၼၼ်ႈ တေႃႇထိုင် ၸဝ်ႈၼႃႈတီႈပလိၵ်ႈၶဝ် တေၸၢင်ႈဢဝ်ၶဝ်ဢွၵ်ႇဝၢင်းႁူင်းႁဵၼ်း လွတ်ႈၽေးလီငၢမ်း။ ၸဝ်ႈၼႃႈတီႈယိပ်းၵွင်ႈၵၢင်ႇၶဝ် ပႆလႄႇ ၼႂ်းပွၵ်ႉၼႂ်းယွမ်ႇ ဢၼ်မီးလႅၼ်လိၼ်ဢိူမ်ႈၵၼ်တင်း ႁူင်းႁဵၼ်းၼၼ်ႉသေ တွႆႇၽၵ်းတူသေ ယွၼ်းၶေႃႈမုၼ်း လွင်ႈၵူၼ်းယိုဝ်းၼၼ်ႉ။

လႆႈႁၼ်ၸဝ်ႈၼႃႈတီႈၶဝ် တူၺ်းၶႅပ်းႁၢင်ႈ ဢၼ်မီးၼႂ်းၾူၼ်းသေ ၼႄၵူၼ်း တႃႇတေႁူႉဝႃႈ ၸွင်ႇႁူႉၸၵ်း ၵူၼ်းဢၼ်ၶဝ်သူၼ်ၸႂ်ၼၼ်ႉႁိုဝ်ၼႆယဝ်ႉ။

ငိူၼ်ႈငဝ်ႈၶၢဝ်ႇ

HANNAH SCHOENBAUM, ALANNA DURKIN RICHER, MARK SHERMAN and ERIC TUCKER. "Conservative activist Charlie Kirk assassinated at Utah university" — AP News, September 11, 2025
The New York Times. "Manhunt Continues for Killer of Charlie Kirk, Charismatic Right-Wing Activist" — The New York Times, September 11, 2025
Erin Hale and John Power. "Trump ally and activist Charlie Kirk shot dead at Utah university" — Al Jazeera, September 11, 2025
NBC News. "Charlie Kirk assassination prompts outcry over political violence" — NBC News, September 11, 2025