Jump to content

ၸွမ်ၽွင်းလူင် ဢိတ်ႇသရေး တေဢုပ်ႇၵၼ်တင်း ၸွမ်ပွင်ၸိုင်ႈထရမ်ႉ လွင်ႈၵႃႇၸႃႇ

လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းၸၼ်၊ ၾႅပ်ႇဝႃႇရီႇ 3၊ 2025

ၸွမ်ၽွင်းလူင် ဢိတ်ႇသရေး ၼႄႇတၼ်ႇယႃႇႁု လႄႈ ၸွမ်ပွင်ၸိုင်ႈထရမ်ႉ

ၸွမ်ၽွင်းလူင် ဢိတ်ႇသရေး ၼေႇတၼ်ႇယႃႇႁု လၢတ်ႈ မိူဝ်ႈဝၼ်းဢႃးတိတ်ႉ မိူဝ်ႈႁူပ်ႉထူပ်း ၸွမ်ပွင်ၸိုင်ႈ ဢမႄႇရိၵၢၼ်ႇ တေႃႇၼႄႇထရမ်ႉၼၼ်ႉၼၼ်ႉဝႃႈ တေဢုပ်ႇၵၼ် လွင်ႈ “ဢွင်ႇပေႉ ၸုမ်းႁမၢသ်ႉ”၊ ဢၼ်တေၶႄႉၶဵင်ႇ ဢီႇရၢၼ်း လႄႈ လွင်ႈၶႂၢၵ်ႈၵၢၼ်ၵပ်းသိုပ်ႇ ၵၢၼ်မိူင်း တင်း မိူင်းဢႃႇရၢပ်ႉၶဝ် ၼႆယဝ်ႉ။

ပၢင်ၵုမ် ႁိူၼ်းၽိူၵ်ႇၵႅဝ်ႈ တင်း ၸွမ်ၽွင်းလူင် ဢိတ်သရေး တီႈဝၼ်းဢင်းၵၢၼ်းတေမႃးၼၼ်ႉ တေပဵၼ် ပွၵ်ႈဢွၼ်တၢင်းသုတ်း ဢၼ်ၸွမ်ပွင်ၸိုင်ႈထရမ်ႉ ႁူပ်ႉထူပ်း ၽူႈဢွၼ်ႁူဝ် ၸၼ်ႉလုမ်ႈၾႃႉ ဝၢႆးသေ ၸွမ်ပွင်ၸိုင်ႈထရၢမ်ႉ ႁပ်ႉပုၼ်ႈၽွၼ်း ပွၵ်ႈၵမ်းသွင်ၼၼ်ႉယဝ်ႉ။ ဢၼ် ၸွမ်ၽွင်းလူင် ဢိတ်ႇသရေး လႆႈႁၢင်ႈႁႅင်း တႃႇတေႁူပ်ႉထူပ်း ၸွမ်ပွင်ၸိုင်ႈ ဢမႄႇရိၵၢၼ်ႇၼၼ်ႉ ပဵၼ်ၽွင်း လႆႈယွၼ်ႇယွမ်းၵၢၼ်သိုၵ်း ဢၼ်ပဵၼ်ယူႇတီႈ ၵႃႇၸႃႇၼၼ်ႉသေ၊ ပဵၼ်ၽွင်းဢမႄႇရိၵၢၼ်ႇလႄႈ မိူင်းဢႃႇရၢပ်ႉၶဝ် ၶတ်းၸႂ် တႃႇတေလႆႈ ၶေႃႈတူၵ်းလူင်း တႃႇတေပွႆႇပၼ် ၵူၼ်းဢိတ်ႇသရေး ဢၼ်ၸုမ်းႁမၢသ်ႉၶဝ် တိၺွပ်းဝႆႉၼၼ်ႉယူႇ။

ၸုမ်းႁမၢသ်ႉ ဢၼ်လႆႈၶိုၼ်းၵုမ်းၵမ် တီႈၵႃႇၸႃႇ ဝၢႆးသေ လႆႈၶေႃႈတူၵ်းလူင်းၵၼ် ၵိုတ်းတိုၵ်းၵၼ် မိူဝ်ႈလိူၼ်ပူၼ်ႉမႃးၼၼ်ႉ လၢတ်ႈဝႃႈ တေႃႇထိုင် ပၢင်တိုၵ်းယဝ်ႉတူဝ်ႈၵႂႃႇသေ တပ်ႉသိုၵ်းဢိတ်ႇသရေး လႆႈထွၼ်တူဝ်ဢွၵ်ႇ တဵမ်ထူၼ်ႈၼၼ်ႉ တေဢမ်ႇႁပ်ႉၶၢမ်ႇ ၶေႃႈတူၵ်းလူင်းထႅင်ႈၸၼ်ႉၼိုင်ႈ ဢၼ်ပဵၼ် လွင်ႈၽွမ်ႉၸႂ် တႃႇပွႆႇပၼ် ၵူၼ်းၺႃးၺွပ်းၼၼ်ႉ ဝႃႈၼႆယဝ်ႉ။

ၸွမ်ၽွင်းလူင် ၼေႇတၼ်ႇယႃႇႁု ဢၼ်လႆႈထုၵ်ႇ ၽူႈႁဵတ်းၵၢၼ်မိူင်း ၽၢႆႇၶႂႃ ၼႂ်းလူင်ပွင်ၸိုင်ႈ ၽွမ်ႉႁူမ်ႈ ဢိတ်ႇသရေးၶဝ် ထွင်းဢီး ႁႂ်ႈၶိုၼ်းတႄႇပၢင်တိုၵ်း မိူဝ်ႈၶေႃႈတူၵ်းလူင်း ၵိုတ်းတိုၵ်း ၶၵ်ႉတွၼ်ႈဢွၼ်တၢင်းသုတ်း ယဝ်ႉတူဝ်ႈၵႂႃႇ ၼႂ်းႁူဝ်လိူၼ်မၢတ်ႉၶျ်ၼၼ်ႉ လၢတ်ႈဝႃႈ မၼ်းတႅပ်းတတ်းဝႆႉ တႃႇတေဢွင်ႇပႄႉ ၸုမ်းႁမၢသ်ႉ လႄႈ ႁႂ်ႈပွႆႇပၼ် ၵူၼ်းၸိူဝ်းထုၵ်ႇၺွပ်းဝႆႉ တင်းသဵင်ႈ ၸိူဝ်းဢၼ်ၺႃးၺွပ်းၵႂႃႇ မိူဝ်ႈႁမၢသ်ႉၶဝ် ၶဝ်ႈတိုၵ်းဢိတ်ႇသရေး မိူဝ်ႈ ဢွၵ်ႇထူဝ်ႇပႃႇ 7 ပီ 2023 ၼၼ်ႉယဝ်ႉ ဝႃႈၼႆ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]