ၸွမ်ၽွင်းလူင်မိူင်းထႆး လတ်းၽၢၼ်ႇ ပၢင်လိူၵ်ႈတင်ႈ ဢမ်ႇယုမ်ႇယမ် ၼႂ်းသၽႃး

ဝၼ်းပုတ်ႉ၊ မၢတ်ႉၶျ် 26၊ 2025 

ၸွမ်ၽွင်းလူင်မိူင်းထႆး Paetongtarn Shinawatra (ၶႅပ်းႁၢင်ႈၵဝ်ႇ)

ၸွမ်ၽွင်းလူင် မိူင်းထႆး ၽႄထွင်ထၢၼ် သျိၼ်ၼဝတ်း လႆႈလွတ်ႈၽေး လွင်ႈဢမ်ႇယုမ်ႇယမ် ၼႂ်းသၽႃး မိူဝ်ႈဝၼ်းပုတ်ႉၼၼ်ႉ ငၢႆႈငၢႆႈလူမ်လူမ် ဝၢႆးသေ ၽူႈၶေႉၶဵင်ႇၶဝ် လႆႈထဵင်ၵၼ် ၶၢဝ်းတၢင်းသွင်ဝၼ်း ဢၼ်ၽူႈၶေႉၶဵင်ႇၶဝ် ဢဝ်တၢင်းၽိတ်းဝႃႈ မၼ်းၼၢင်း ၸတ်းၵၢၼ် ဝၢၼ်ႈမိူင်း ၽိတ်းပိူင်ႈသေ ပၼ်ပေႃႈမၼ်း ဢၼ်ပဵၼ် ၸွမ်ၽွင်းလူင်ၵဝ်ႇ ၵုမ်းၵမ် ၵၢၼ်ၽွင်းငမ်းမၼ်းၼၢင်းၼၼ်ႉယဝ်ႉ။

ၸွမ်ၽွင်းလူင် မိူင်းထႆး ဢၼ်ဢႃႇယုလဵၵ်ႉသေပိူၼ်ႈၼၼ်ႉ လႆႈလွင်ႈၵမ်ႉထႅမ် တီႈၽူႈတႅၼ်းၽွင်း 319 ၵေႃႉ ၼႂ်း 488 ၵေႃႉ ဢၼ်မႃးၶဝ်ႈႁူမ်ႈၼၼ်ႉသေတႃႉ မိူဝ်ႈၽွင်း ပၢင်ထဵင်ထွင် ဢၼ်ၼႄးဝႃႈ မၼ်းၼၢင်း ဢမ်ႇမီးၼမ်ႉၵတ်ႉ၊ ဢမ်ႇမီးတၢင်းႁူႉတၢင်းႁၼ် လွင်ႈၵၢၼ်ပၢႆးမၢၵ်ႈ၊ လွင်ႈဝႄႈၶွၼ်ႇ၊ ႁဵတ်းၵၢၼ်ပုၼ်ႈတႃႇ မုင်ႉႁေႃႁိူၼ်းမၢၵ်ႈမီး လႄႈ ဢဝ်ၶေႃႈၸီႉသင် တီႈ ပေႃႈမၼ်းၼၢင်း ထၵ်းသိၼ် သျိၼ်ၼဝတ်း ဢၼ်ပဵၼ် ၽူႈမီးတၢင်ႉႁႅင်းလူင်ၵၢၼ်မိူင်း ၼၼ်ႉ ဝႃႈၼႆယဝ်ႉ။

ၶေႃႈတၢင်ႇၼႄ လွင်ႈသၢၼ်ၶတ်းၼႆႉ ပဵၼ်လွင်ႈၸၢမ်းတူၺ်း မိူဝ်ႈၸဝ်ႉ ၶွင် ၽေထွင်ထၢၼ် ဝၢႆးသေ မၼ်းၼၢင်း လႆႈထုၵ်ႇ ဢဝ်သႂ်ႇၼႂ်းသၢႆငၢႆ ဢၼ်ဢမ်ႇထၢင်ႇသေ ပဵၼ်ၽူႈမႂ်ႇ ၵၢၼ်မိူင်း ဢၼ်ဢမ်ႇယၢမ်ႈ ႁပ်ႉပုၼ်ႈၽွၼ်း ၵူၼ်းမိူင်းၼၼ်ႉသေ မႃးတႅၼ်းတီႈ ဢူၺ်းလီ Srettha Thavisin ဝၢႆးသေ လုမ်းတြႃး ဢဝ်မၼ်းဢွၵ်ႇပႅတ်ႈ ယွၼ်ႉမၼ်းပူၼ်ႉပႅၼ် လွင်ႈတိုဝ်းၵမ်ၼၼ်ႉယဝ်ႉ။

မၼ်းၼၢင်း ဢမ်ႇယွမ်းႁပ်ႉ ၶေႃႈၼႄးၵၢဝ်ႇႁႃ ဢၼ်ဢဝ်မႃးၼိူဝ်မၼ်းၼၢင်းၼၼ်ႉ တင်းမူတ်း။

ပိၵ်ႉသမ်ႉဝႃႈ မၼ်းၼၢင်း လႆႈၶႅပ်းၵၢင်ၸႂ် ဢၼ်ဢမ်ႇပေႃးၶႅမ်ႉလႅပ်ႈ လႄႈ လွင်ႈၶိုၼ်ႈယႂ်ႇပၢႆးမၢၵ်ႈမီး ၵူၼ်းၸိူဝ်း မိူၼ်ၵၼ် ၼႂ်းပိုၼ်ႉတီႈၼၼ်ႉတိုၵ်ႉၵႆၵၼ်ဝႆႉသေတႃႉ ၶႅပ်းၵၢင်ၸႂ် မိူဝ်ႈဝၼ်းပုတ်ႉၼၼ်ႉ ၼႄဝႃႈ ၸုမ်းၽွမ်ႉႁူမ်ႈ ပႃႇတီႇ 11 ဢၼ် ၶွင် Paetongtarn ၼၼ်ႉ တိုၵ်ႉမီး လွင်ႈမၼ်ႈၵိုမ်းယူႇလႄႈ ႁဵတ်းႁႂ်ႈ လွင်ႈဢမ်ႇၼိမ်သဝ်း ၼႂ်းၶၢဝ်းၸမ် ၼႂ်းမိူင်း ဢၼ်ၵမ်းၵမ်းမီးလွင်ႈသုၵ်ႉယုင်ႈ ၵၢၼ်မိူင်း ၼၼ်ႉ ယွမ်းလူင်းၵႂႃႇယူႇ။

ၽေထွင်ထၢၼ် ဢႃႇယု 38 ပီ ပိုၼ်ၽၢဝ်ႇၼိူဝ် ၼႅင်ႈသိုဝ်ႇတူင်ႇဝူင်းၵူၼ်း X သေ ယိၼ်းၸူမ်းၶွပ်ႈၸႂ်ထိုင် ၸုမ်းဢူၺ်းလီ ဢၼ်ဢုပ်ႉပိူင်ႇ မိူင်းမၼ်းၼၢင်း ဢၼ်ၵမ်ႉထႅမ်ပၼ်ၼၼ်ႉဝႃႈ “ၶႅပ်းၵၢင်ၸႂ် ဢၼ်ၵမ်ႉထႅမ်လႄႈ ဢၼ်သၢၼ်ၶတ်း ၵူႈဢၼ်ၼႆႉ တေပဵၼ်ႁႅင်းၸႂ် တႃႇၶႃႈလႄႈ ၸုမ်းၽွင်းလူင် တေသိုပ်ႇႁဵတ်းၵၢၼ် တႃႇၵူၼ်းမိူင်းယူႇ” ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Panarat Thepgumpanat and Panu Wongcha-um. "Thai PM Paetongtarn Shinawatra sails through no-confidence vote in parliament" — Reuters, March 26, 2025
• Al Jazeera. "Thailand prime minister survives vote of no-confidence" — Al Jazeera, March 26, 2025
• AP News. "Thai prime minister survives a challenge by rivals who say her father is pulling the strings" — AP News, March 26, 2025
• The Associated Press. "Thai Prime Minister survives a challenge by rivals" — ABC News, March 26, 2025