ၸွမ်ၽွင်းလူင်ထႆး လႆႈယင်ႉလိုဝ်ႈတႃၶုၼ်

ဝၼ်းဢင်းၵၢၼ်း၊ ၸူႇလၢႆႇ 1၊ 2025 

ၸွမ်ၽွင်းလူင် မိူင်းထႆး ၽႄႊထွင်ႊထၢၼ်ႊ သျိၼ်ႊၼဝတ်း (ၶႅပ်းႁၢင်ႈၵဝ်ႇ)

ဝၢႆးသေ လႆႈႁပ်ႉၸၼ်ႉ ၸွမ်ၽွင်းလူင် ၸမ်တေတဵမ်ပီ လူဝ်ႇထႅင်ႈ လိူၼ်ၼိုင်ႈၼၼ်ႉ မိူဝ်ႈလိူၼ်ၸုၼ်ႇ 1 ဝၼ်း ၸွမ်ၽွင်းလူင် ပေႇထူင်ႇထၢၼ်ႇသျၼဝတ်ႉ လႆႈဢွၵ်ႇၽၢၵ်ႈ ႁိူၼ်းႁေႃ လူင်ပွင်ၸိုင်ႈၵႂႃႇယဝ်ႉ။

ပဵၼ်ယွၼ်ႉလူၺ်ႈ လုမ်းတတ်းသိၼ် ဢၼ်ၵပ်းၵၢႆႇလၵ်းမိူင်း တႅပ်းတတ်း မိူဝ်ႈလိူၼ်ၸုၼ်ႇ 1 ဝၼ်းဝႃႈ ယင်ႉလိုဝ်ႈတႃၶုၼ် ၸွမ်ၽွင်းလူင်ပေႇထူင်ႇထၢၼ်ၼႆၼၼ်ႉယဝ်ႉ။

တႃႇတေၵႄႈလိတ်ႈပၼ်ႁႃ လႅၼ်လိၼ် မိူင်းထႆးလႄႈ ၵမ်ႇပူးၶျႃးၼၼ်ႉ လွင်ႈၸွမ်ၽွင်းလူင်သွင်မိူင်း ဢုပ်ႇၵၼ်ၼၼ်ႉ သဵင်ဢုပ်ႇလၢတ်ႈၵၼ် လႆႈႁူဝ်ႈၵႂႃႇ၊ မၼ်းၼၢင်းႁွင်ႉ ၸွမ်ၽွင်းလူင်ၵမ်ႇပူးၶျႃး (ၵဝ်ႇ) ဝႃႈ "လုင်း" ၼႆလႄႈ ႁဵတ်းႁႂ်ႈ ၵူၼ်းတင်းၼမ် လႆႈငိၼ်းသေ ပဵၼ်ဢၼ်ဢမ်ႇႁၢၼ်ႉၸႂ်ၼၼ်ႉယဝ်ႉ။

လိူဝ်သေၼၼ်ႉ ၸုမ်းၽၢႆႇၶွမ်ႈၶတ်းၶဝ် လၢတ်ႈဝႃႈ ဢၼ်မၼ်းၼၢင်းလၢတ်ႈၵႂႃႇ ၸိူဝ်းၼၼ်ႉ ဢမ်ႇမီးလွင်ႈၵႅတ်ႇၶႄပၼ် ၵူၼ်းမိူင်းထႆး၊ ပႃးလွင်ႈ တုမ်ႉတိူဝ်ႉ တပ်ႉသိုၵ်းလႄႈ ၸိူဝ်းၼႆႉ ဢမ်ႇငၢမ်ႇမႅၼ်း လၵ်းမိူင်းၼႆသေ ၸိူဝ်းၶွမ်ႈၶတ်းၶဝ် ဢဝ်သဵင် Audio ၶဝ် သူင်ႇထိုင်တီႈ လုမ်းတတ်းသိၼ် ၽၢႆႇလၵ်းမိူင်းယဝ်ႉ။

လွင်ႈဢၼ် တၢင်ႇထိုင်လုမ်းၼႆႉ ၽၢႆႇလုမ်းၶဝ် မိူဝ်ႈလိူၼ်ၸုၼ်ႇ 1 ဝၼ်းၼၼ်ႉ ၽူႈၶဝ်ႈၸုမ်း လုမ်းတြႃးၶဝ် သႂ်ႇၶႅပ်းၵၢင်ၸႂ်၊ ဢဝ်ၶႅပ်းၵၢင်ၸႂ် ၽၢႆႇၼမ်သေ ၸင်ႇတႅပ်းတတ်းၵႂႃႇ ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Kelly Ng and Thanyarat Doksone. "Thai prime minister suspended over leaked phone call" — BBC News, JULY 1, 2025
• Jintamas Saksornchai. "Court suspends Thailand’s prime minister to investigate a leaked phone call" — AP News, JULY 1, 2025
• Panu Wongcha-um and Panarat Thepgumpanat. "Blow for Thailand's government as court suspends PM from duty" — Reuters, JULY 1, 2025
• Helen Regan and Kocha Olarn. "Thailand’s prime minister suspended over leaked phone call with former strongman" — CNN, JULY 1, 2025