ၸွမ်ပွင်ၸိုင်ႈၵၢၼ်ႇ ႁပ်ႉတွၼ်ႈ လွင်ႈၵိုတ်ႈတိုၵ်း ဢိတ်ႇသရေး လႄႈ ႁႅꩡ်ႉပူဝ်းလႃႇ
ဝၼ်းၽတ်း၊ ၼူဝ်ႇဝႅမ်ႇပႃႇ 21၊ 2024
မိူဝ်ႈဝၼ်းဢႃးတိတ်ႉၼၼ်ႉ ဢိတ်ႇသရေး လႄႈ ၸုမ်းႁႅꩡ်ႉပူဝ်းလႃႇ မိူင်းလႄႇပႃႇၼွၼ်ႇ လႆႈတူၵ်းလူင်းၵၼ် လွင်ႈၵိုတ်းတိုၵ်းၵၼ်ဝႆႉယူႇ။ ၸွမ်ပွင်ၸိုင်ႈ ဢမႄႇရိၵၢၼ်ႇ ၵျူဝ်းပၢႆႇတႅၼ်ႇ ၵေႃႈ ႁပ်ႉတွၼ်ႈ ၶေႃႈတူၵ်းလူင်း ၵိုတ်းတိုၵ်း ဢၼ်ဢမေႇရိၵၢၼ်ႇ ယူႇပဵၼ်ၵၢင်မၼ်းၼၼ်ႉယူႇ။
ၸွမ်ပွင်ၸိုင်ႈ ဢမႄႇရိၵၢၼ်ႇ ပၢႆႇတႅၼ်ႇ လၢတ်ႈဝႃႈ “မိူဝ်ႈၽုၵ်ႈ ယၢမ်းၵၢင်ၼႂ် 4:00 မူင်းၼၼ်ႉ လွင်ႈၵေႃႇၵၢၼ်ႁၢႆႉ ၸွမ်းလႅၼ်လိၼ် လႄႇပႃႇၼွၼ်ႇ-ဢိတ်ႉၸရေး တေယဝ်ႉတူဝ်ႈၵႂႃႇယဝ်ႉ၊ ႁဝ်းၶႃႈ ဢၢၼ်းၵိုတ်းယိုတ်း လွင်ႈၵေႃႇၵၢၼ်ႁၢႆႉ ၵႂႃႇ သုတ်းၸူဝ်ႈ” ၼႆယဝ်ႉ။
ၶေႃႈတူၵ်းလူင်း ၵိုတ်းတိုၵ်း တင်း ၸုမ်းႁႅꩡ်ႉပူဝ်းလႃႇ တီႈမိူင်းလႄႇပႃႇၼွၼ်ႇၼၼ်ႉ ဢမႄႇရိၵၢၼ်ႇ ၵႄႈလိတ်ႈပၼ်သေ ဢိတ်ႇသရေးၵေႃႈ ႁပ်ႉႁွင်းယိုၼ်ယၼ်ပၼ်ယဝ်ႉ။
ၸွမ်ပွင်ၸိုင်ႈ ဢမႄႇရိၵၢၼ်ႇ ၵျူဝ်းၿၢႆႇတႅၼ်ႇ လၢတ်ႈဝႃႈ လွင်ႈဢၼ် ဢိတ်ႇသရေး လႄႈ ႁႅꩡ်ႉပူဝ်းလႃႇ လႆႈၸႂ်ၵၼ် ၵိုတ်းတိုၵ်းၵၼ်ၼၼ်ႉ ပဵၼ်ၶၢဝ်ႇလီသေ မုင်ႈမွင်းဝႃႈ လွင်ႈဢၼ် ၵိုတ်းယိုတ်း လွင်ႈတိုၵ်းတေႃးၵၼ် ၶၢဝ်းတၢင်း 13 လိူၼ်လိူဝ်ၼၼ်ႉ တေၸွႆႈထႅမ် ႁႂ်ႈပၢင်တိုၵ်း တီႈၵႃႇၸႃႇ ၵိုတ်းယိုတ်းၵႂႃႇ ၼႆယဝ်ႉ။
ၸွမ်ပွင်ၸိုင်ႈ ၿၢႆႇတႅၼ်ႇ လၢတ်ႈထႅင်ႈဝႃႈ ၼႂ်းဝၼ်းၼႃႈမႃးၼႆႉ ဢမႄႇရိၵၢၼ်ႇ တေသိုပ်ႇတိုၵ်းသူၼ်း ႁႂ်ႈဢိတ်ႇသရေး လႄႈ ႁမၢသ်ႉ ၵိုတ်းတိုၵ်းၵၼ် ၼႆယဝ်ႉ။ ၽွင်းၼၼ်ႉ မိူဝ်ႈဝၼ်းဢင်းၵၢၼ်းၼၼ်ႉ ႁိူဝ်းမိၼ်သိုၵ်း ဢိတ်ႇသရေး ယိုဝ်းသႂ်ႇ မိူင်းလႄႇပႃႇၼွၼ်ႇ ပတ်ႉပိုၼ်ႉသေ ၵူၼ်းတၢႆ ဢမ်ႇယွမ်း 24 ၵေႃႉ။
ၽူႈမီးပုၼ်ႈၽွၼ်း ၽၢႆႇပၢႆးယူႇလီ မိူင်းလႄႇပႃႇၼွၼ်ႇၶဝ် လၢတ်ႈဝႃႈ ၼႂ်းၶၢဝ်းတၢင်း 13 လိူၼ်ပူၼ်ႉမႃးၼႆႉ ယွၼ်ႉၵူၼ်းဢၼ် ဢိတ်ႇသရေး ယိုဝ်း တီႈမိူင်းလႄႇပႃႇၼွၼ်ႇၼၼ်ႉသေ မီးၵူၼ်းတၢႆ 3,760 ၵေႃႉလိူဝ်လႄႈ ၼႂ်းၼၼ်ႉ ၵူၼ်းမိူင်းၵေႃႈ ၶဝ်ႈပႃးတင်းၼမ် ၼႆယဝ်ႉ။ ယွၼ်ႉမၢၵ်ႇတႅၵ်ႇလႄႈ ၵူၼ်းမိူင်း 1.2 လၢၼ်ႉ လႆႈပၢႆႈဢွၵ်ႇႁိူၼ်းယေး၊ ဢိတ်ႇသရေးၶဝ်တႄႉ လၢတ်ႈဝႃႈ လႆႈၶႃႈႁႅမ်ပႅတ်ႈ ၽူႈၶဝ်ႈၸုမ်း ႁႅꩡ်ႉပူဝ်းလႃႇ 2,000 ၵေႃႉလိူဝ်ယဝ်ႉ ၼႆယဝ်ႉ။
ၸုမ်းႁႅꩡ်ႉပူဝ်းလႃႇ ႁဵတ်းႁႂ်ႈ ၵူၼ်းမိူင်းဢိတ်ႉၸရေး 50,000 ပၢႆ လႆႈပၢႆႈဢွၵ်ႇ တီႈပွတ်းႁွင်ႇ မိူင်းၼၼ်ႉသေ မၢၵ်ႇလူင်ၶဝ် လႆႈၽႅဝ်ထိုင် ပွတ်းၸၢၼ်း မိူင်းဢိတ်ႇသရေး တေႃႇထိုင် ဝဵင်းတႄႇလ်ဢႃႇဝီႇ ၼႆယဝ်ႉ။ ဢၼ်တၢႆၵႂႃႇ မီး 75 ၵေႃႉသေ ၼႂ်းၼၼ်ႉ ၶိုင်ႈလိူဝ် ပဵၼ်ၵူၼ်းမိူင်း ၼႆယဝ်ႉ။ ၵူၼ်းသိုၵ်းဢိတ်ႉၸရေး 50 ၵေႃႉလိူဝ် လႆႈတၢႆယွၼ်ႉ လွင်ႈတိုၵ်းတေႃး ၼိူဝ်လိၼ် တီႈမိူင်းလႄႇပႃႇၼွၼ်ႇၼၼ်ႉယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- KAREEM CHEHAYEB, BASSEM MROUE and JOSEF FEDERMAN. "Israel and Lebanon’s Hezbollah start a ceasefire after nearly 14 months of fighting" — AP News, November 27, 2024
- Tamara Qiblawi. "Israel has agreed to a truce in Lebanon. Here’s what that means" — CNN, November 27, 2024
- Jordana Miller. "Israeli Cabinet approves ceasefire deal between Israel and Hezbollah" — ABC News, November 27, 2024
- Eric Bazail-Eimil. "Israel, Lebanon agree to US-and-France-brokered cease-fire" — politico, November 26, 2024
- The Washington Post. "Israel-Hezbollah cease-fire deal begins" — The Washington Post, November 26, 2024
