Jump to content

ၸွမ်ပွင်ၸိုင်ႈရတ်ႈသျႃး လႄႈ ၶႄႇ ဢုပ်ႇဢူဝ်းလွင်ႈၵပ်းသိုပ်ႇ တင်းထရမ်ႉ

လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းပုတ်ႉ၊ ၸၼ်ႇဝႃႇရီႇ 22၊ 2025

ပူႇတိၼ်ႇ လႄႈ သျီးၸိၼ်းပိင်ႇ ဢုပ်ႇဢူဝ်းၵၼ်

မိူဝ်ႈဝၼ်းဢင်းၵၢၼ်းၼၼ်ႉ ၸွမ်ပွင်ၸိုင်ႈရတ်ႈသျႃး ပူႇတိၼ်ႇ လႄႈ ၸွမ်ပွင်ၸိုင်ႈၶႄႇ သျီးၸိၼ်းပိင်ႇ ဢုပ်ႇဢူဝ်းၵၼ် လွင်ႈတေႁဵတ်းႁိုဝ် ၵေႃႇသၢင်ႈလွင်ႈၵပ်းသိုပ်ႇ တင်း ၸွမ်ပွင်ၸိုင်ႈဢမႄႇရိၵၢၼ်ႇ တေႃႇၼႄႇထရမ်ႉ ၼႆယဝ်ႉ။

ၽူႈၸွႆႈထႅမ် လၵ်းၼမ်းၵၢၼ်ၼွၵ်ႈမိူင်း ယူႇရီႇဢူဝ်ႇသျႃႇၵူဝ်ႇ လၢတ်ႈတီႈၽူႈသိုဝ်ႇၶၢဝ်ႇၶဝ် တီႈဝဵင်းမွတ်ႇသၵူဝ်ႇဝႃႈ “ပေႃးဝႃႈ ထရမ်ႉ ၶဝ်ႈၸႂ်ၼႆ ထုၵ်ႇလီမီးလွင်ႈၼပ်ႉယမ်ၵၼ်၊ ႁဝ်းၶႃႈ ၶႂ်ႈၵေႃႇသၢင်ႈ လွင်ႈၵပ်းသိုပ်ႇ ဢၼ်ဢိင်ၼိူဝ် ၽွၼ်းလီ တင်းသွင်ၽၢႆႇၼၼ်ႉယူႇ“ ဝႃႈၼႆ။

လႆႈဢုပ်ႇဢူဝ်းၵၼ်မႃး လွင်ႈတႃႇတေၵိုတ်းယိုတ်းလႆႈ ပၢင်တိုၵ်း တီႈမိူင်းယူႇၶရဵၼ်း လႄႈ လွင်ႈဢၼ် ရတ်ႈသျႃး ၵမ်ႉထႅမ်ပၼ် ၼႃႈတီႈၶႄႇ ဢၼ်ၵဵဝ်ႇၵပ်း မိူင်းထႆႇဝၢၼ်းၼၼ်ႉ ၼႆယဝ်ႉ။ ဝၢႆးထရမ်ႉ ၵိၼ်ႇၵႅၼ်ႇပဵၼ် ၸွမ်ပွင်ၸိုင်ႈ ဢမႄႇရိၵၢၼ်ႇယဝ်ႉ ပူႇတိၼ်ႇ ဢႃႇယု 72 ပီ လုၵ်ႉတီႈ ႁိူၼ်းၼူဝ်ႇဝူဝ်ႇဢူဝ်ႇၵႃႇရီႇဝူဝ်ႇ ဢၼ်မီးၼွၵ်ႈဝဵင်းမွတ်ႇသၵူဝ်ႇၼၼ်ႉလၢတ်ႈသေ သျီးၸိၼ်းပိင်ႇ ဢႃႇယု 71 ပီ တႄႉ လုၵ်ႉတီႈ တီႈႁူင်းႁေႃလူင် ၵူၼ်းမိူင်း တီႈဝဵင်းပိူၺ်ႇၵျိင်းၼၼ်ႉသေ လၢတ်ႈၵႂၢမ်း လူၺ်ႈ ဝီးတီးဢူဝ်း ၶၢဝ်းတၢင်း ၼိုင်ႈၸူဝ်ႈမူင်းၶိုင်ႈလိူဝ်လိူဝ်ယဝ်ႉ။

ဢူဝ်ႇသျႃႇၵူဝ်ႇ လၢတ်ႈပႃးဝႃႈ ပူႇတိၼ်ႇၼႆႉ ဢမ်ႇၸႂ်ႈဝႃႈ ႁႃၵိုတ်းတိုၵ်းၶၢဝ်းပွတ်း၊ မၼ်းၶႂ်ႈလႆႈလွင်ႈငမ်းယဵၼ် ၶၢဝ်းယၢဝ်း တင်း ယူႇၶရဵၼ်းၼႆယဝ်ႉ။ ဝၢႆးသေ ၸွမ်ပွင်ၸိုင်ႈထရမ်ႉ ႁပ်ႉပုၼ်ႈၽွၼ်းယဝ်ႉ မၼ်းလၢတ်ႈတီႈ ၽူႈသိုဝ်ႇၶၢဝ်ႇၶဝ်ဝႃႈ ယွၼ်ႉဝႃႈ ပၢင်တိုၵ်းၼႆႉ ႁဵတ်းႁႂ်ႈ ရတ်ႈသျႃး လူႉလႅဝ်ၵႂႃႇလႄႈ ပူႇတိၼ်ႇ ထုၵ်ႇလီႁဵတ်း ၶေႃႈတူၵ်းလူင်း တႃႇတေၵိုတ်းယိုတ်း ပၢင်တိုၵ်းၼၼ်ႉယူႇ ဝႃႈၼႆ။

သျီႇ တုၵ်းယွၼ်း ႁႂ်ႈဢုပ်ႇဢူဝ်းၵၼ် တႃႇတေၵိုတ်းယိုတ်း ပၢင်တိုၵ်း တီႈမိူင်းယူႇၶရဵၼ်း သေ ၼႄးဝႃႈ ဢမႄႇရိၵၢၼ်ႇ ဢဝ်ၵွင်ႈၵၢင်ႇ သူင်ႇပၼ် ၶိပ်ႉၾ် သေ ႁဵတ်းႁႂ်ႈ ပၢင်တိုၵ်း ပဵၼ်မႃးၼႆသေ ဢမႄႇရိၵၢၼ်ႇ လၢတ်ႈဝႃႈ တူဝ်ႈတၼ်းတႃႇ တေႁႃလၢႆးတၢင်း ဢၼ်တေဢုပ်ႇဢူဝ်းၵၼ် ဢၼ်တေၼပ်ႉယမ် ၽွၼ်းလီမၼ်းၼၼ်ႉၼႆယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]