Jump to content

ၸွမ်ပွင်ၸိုင်ႈထရမ်ႉ မုင်ႈမွင်းဝႃႈ ပၢင်တိုၵ်း ရတ်ႈသျႃး တီႈမိူင်းယူႇၶရဵၼ်း ၸမ်တေယဝ်ႉတူဝ်ႈ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းဢင်းၵၢၼ်း၊ ၾႅပ်ႇဝႃႇရီႇ 25၊ 2025

ၸွမ်ပွင်ၸိုင်ႈဢမႄႇရိၵၢၼ်ႇလႄႈ ၸွမ်ပွင်ၸိုင်ႈၾရၢင်ႇသဵတ်ႈ ႁူပ်ႉထူပ်းၵၼ် တီႈ ဝႃႇသျိၼ်ႇတၼ်ႇ

ဝၢႆးသေ ႁူပ်ႉထူပ်း ၸွမ်ပွင်ၸိုင်ႈ ၾရၢင်ႇသဵတ်ႈ မိူဝ်ႈဝၼ်းၸၼ်ၼၼ်ႉယဝ်ႉ ၸွမ်ပွင်ၸိုင်ႈ ဢမႄႇရိၵၢၼ်ႇ ထရမ်ႉ လၢတ်ႈဝႃႈ မၼ်းမုင်ႈမွင်းဝႃႈ ပၢင်တိုၵ်း ဢၼ်ပဵၼ်ယူႇ တီႈမိူင်းယူႇၶရဵၼ်း တင်း ရတ်ႈသျႃးၼၼ်ႉ ၸမ်တေယဝ်ႉတူဝ်ႈယဝ်ႉ ၼႆယဝ်ႉ။

ၸွမ်ပွင်ၸိုင်ႈထရမ်ႉ လၢတ်ႈပႃး ၽွင်းမိူဝ်ႈ ၽူႈဢွၼ်ႁူဝ်သွင်ၵေႃႉ ႁူမ်ႈၵၼ် ႁဵတ်းပၢင်သပ်းၸႅင်ႈၶၢဝ်ႇ တီႈႁိူၼ်းၽိူၵ်ႇၼၼ်ႉဝႃႈ မၼ်းယုမ်ႇယမ်ဝႃႈ ၸွမ်ပွင်ၸိုင်ႈ ရတ်ႈသျႃး ပူႇတိၼ်ႇ တေႁပ်ႉႁွင်း လွင်ႈဢၼ် တေဢဝ်တပ်ႉသိုၵ်း လွင်ႈငမ်းယဵၼ်ယူးရူပ်ႉ မႃးဝႆႉ တီႈမိူင်းယူႇၶရဵၼ်း ၼၼ်ႉယူႇဝႃႈၼႆ။

ၸွမ်ပွင်ၸိုင်ႈထရမ်ႉ လၢတ်ႈဝႃႈ မၼ်းမုင်ႈမွင်းဝႃႈ ၸွမ်ပွင်ၸိုင်ႈ ယူႇၶရဵၼ်း ဝေႃႇလေႃႇတီးမႃးရ် ၸႄးလႅၼ်းသၵီး တေမႃးဢႅဝ်ႇမိူင်းဢမႄႇရိၵၢၼ်ႇ ဢမ်ႇႁိုင်သင်ၼႆႉသေ လူင်းလၢႆးမိုဝ်း ၶေႃႈတူၵ်းလူင်း ဢၼ်တေၵိုတ်းယိုတ်းလႆႈ ပၢင်တိုၵ်း ၼႂ်းဝူင်ႈၼႃႈၼႆႉသေ တေပၼ်ၶိုၼ်း သုၼ်ႇၶုတ်းႁႄႈ ၵိုင်ႇတေႃႇလႃႇ 180 ပီႇလီႇယၼ်ႇ တီႈယူႇၶရဵၼ်းၼၼ်ႉၼႆယဝ်ႉ။

ထရမ်ႉ လၢတ်ႈတီႈပၢင်သပ်းၸႅင်ႈၶၢဝ်ႇဝႃႈ ၶေႃႈတူၵ်းလူင်းၼႆႉ ၸမ်ၵၼ်ၼႃႇၼႆယဝ်ႉ။ မိူင်းယူႇၶရဵၼ်း ၶႂ်ႈႁႂ်ႈပႃး လွင်ႈႁူမ်ႇလူမ်ႈ မိူဝ်းၼႃႈ ၼႂ်းၶေႃႈတူၵ်းလူင်းၼၼ်ႉသေတႃႉ ထရမ်ႉတႄႉ ဢမ်ႇလၢတ်ႈပႃးၵႂႃႇလွင်ႈၼၼ်ႉ။

ၸွမ်ပွင်ၸိုင်ႈ ၾရၢင်ႇသဵတ်ႈ မႅၵ်ႉၶရူၼ်ႇ ယွမ်းႁပ်ႉ တီႈပၢင်သပ်းၸႅင်ႈၶၢဝ်ႇ ႁူမ်ႈၵၼ်ၼၼ်ႉဝႃႈ သွင်မိူင်း လႆႈဢုပ်ႇၵုမ်ၵၼ် မီးၽွၼ်းလီ ဢၼ်လႆႈမႃး တီႈလွင်ႈဢုပ်ႇဢူဝ်းၵၼ်ၼၼ်ႉသေ တႃႇတေၵႅတ်ႇၶႄ ယူးရူပ်ႉၼၼ်ႉ မိူင်းယူးရူပ်ႉၶဝ် တေလႆႈႁဵတ်းသၢင်ႈ ၼမ်လိူဝ်ၵဝ်ႇ ၼႆယဝ်ႉ။

မႅၵ်ႉၶရူၼ်ႇ လၢတ်ႈဝႃႈ ၵဵဝ်ႇၵပ်းလူၺ်ႈ လွင်ႈငမ်းယဵၼ် ယူႇၶရဵၼ်းၼႆႉ ဢမ်ႇထုၵ်ႇလီပဵၼ် လွင်ႈၵိုတ်းတိုၵ်း ဢၼ်ဢမ်ႇမီး လွင်ႈမၼ်ႈၸႂ်သေဢမ်ႇၵႃး တေလႆႈပဵၼ် လွင်ႈငမ်းယဵၼ် ဢၼ်ပၼ်သုၼ်ႇ ယူႇၶရဵၼ်း မီးဢႃႇၼႃႇၽွင်းငမ်းတူဝ်ၵဝ်ႇ ၼႆယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၸွမ်ပွင်ၸိုင်ႈထရမ်ႉ_မုင်ႈမွင်းဝႃႈ_ပၢင်တိုၵ်း_ရတ်ႈသျႃး_တီႈမိူင်းယူႇၶရဵၼ်း_ၸမ်တေယဝ်ႉတူဝ်ႈ&oldid=11346"