ၸုမ်း G7 ပၼ်ၽၢင်ႉဝႃႈ သင်ဢမ်ႇတူၵ်းလူင်းၵိုတ်းတိုၵ်းၼႆ တေဝၢင်းတၢမ်ႇၼိူဝ်ရတ်ႈသျႃး
ဝၼ်းသဝ်၊ မၢတ်ႉၶျ် 15၊ 2025
.jpg)
ၽူႈဢွၼ်ႁူဝ် ၵၢၼ်ပၢႆးမၢၵ်ႈမီး G7 ၶဝ် ႁူမ်ႈၵၼ်ဢွၵ်ႇၶေႃႈပိုၼ်ၽၢဝ်ႇ မိူဝ်ႈဝၼ်းသုၵ်းၼၼ်ႉသေ လႆႈၸႂ်ၵၼ်ဝႃႈ ႁႂ်ႈရတ်ႈသျႃးယွမ်းႁပ်ႉ ၶေႃႈတၢင်ႇၼႄ ဢမႄႇရိၵၢၼ်ႇ တႃႇၵိုတ်းတိုၵ်း မိူင်းယူႇၶရဵၼ်း သင်ဝႃႈ ဢမ်ႇႁဵတ်းၸွမ်းၼႆၸိုင် တေတမ်းဝၢင်း လွင်ႈတတ်းမၵ်းထႅင်ႈ ၼႆယဝ်ႉ။
တီႈၼႂ်း ၶေႃႈပိုၼ်ၽၢဝ်ႇၼၼ်ႉ လၢတ်ႈဝႆႉဝႃႈ မိူင်း G7 ၼႆႉ တေသိုပ်ႇၵမ်ႉထႅမ် ဢမ်ႇထၢတ်ႇဢမ်ႇဝၢႆး လွင်ႈဢၼ် မိူင်းယူႇၶရဵၼ်း မီးဢႃႇၼႃႇလွတ်ႈလႅဝ်း လႄႈ ၵၢၼ်ဢုပ်ႉပိူင်ႇၽွင်းငမ်းလွတ်ႈလႅဝ်း၊ ဢိၵ်ႇတင်း ၵဵဝ်ႇၵပ်းလွင်ႈၵႅတ်ႇၵင်ႈ ၼႃႈလိၼ်မၼ်း ဝႃႈၼႆယဝ်ႉ။
တီႈၶေႃႈပိုၼ်ၽၢဝ်ႇႁူမ်ႈၵၼ် ဢၼ်ဢွၵ်ႇမႃး ဝၢႆးသေ ပၢင်ၵုမ်လူင် G7 တီႈမိူင်းၶႅၼ်ႇၼေႇတႃႇၼၼ်ႉ ဝႃႈ တေတမ်းဝၢင်း ၶေႃႈတူၵ်းလူင်း ၵိုတ်းတိုၵ်း ၼႂ်းၵႄႈ ရတ်ႈသျႃးလႄႈ ယူႇၶရဵၼ်း သေ မီးၶေႃႈမုၼ်း ဢၼ်မိူၼ်ၵၼ် တႃႇသွင်ၽၢႆႇ တေလႆႈၸွမ်း၊ ယဝ်ႉၵေႃႈ လႆႈတုၵ်းယွၼ်းႁႂ်ႈရတ်ႈသျႃး တုမ်ႉတွပ်ႇ ၶေႃႈတူၵ်းလူင်း တႃႇတေႁဵတ်းသၢင်ႈၵႂႃႇ ႁႂ်ႈတဵမ်ထူၼ်ႈၼၼ်ႉယဝ်ႉ။
သင်ဝႃႈ ရတ်ႈသျႃး ဢမ်ႇၽွမ်ႉၸွမ်း လွင်ႈၵိုတ်းတိုၵ်းၼႆၸိုင် လႆႈဢုပ်ႇၵၼ် တႃႇတေတတ်းမၵ်း ရတ်ႈသျႃးထႅင်ႈ ပႃးၸဵမ် လွင်ႈတေတမ်းဝၢင်းမၵ်းၶၼ်ႈ ၶၼ်ၼမ်ႉမၼ်းမဵၼ်၊ ယဝ်ႉၵေႃႈ တႅမ်ႈဝႆႉဝႃႈ တေသိုပ်ႇႁဵတ်းသၢင်ႈၵႂႃႇလွင်ႈဢဝ်လိူင်ႈထႅင်ႈ တၢင်ႇလွင်ႈ ၼႆယဝ်ႉ။
ႁိူၼ်းၽိူၵ်ႇၵႅဝ်ႈ လၢတ်ႈဝႃႈ ၽူႈတၢင်တူဝ် ၶိုၵ်ႉတွၼ်း ၸွမ်ပွင်ၸိုင်ႈ တေႃႇၼႄႇထရမ်ႉ သတီးၾူတ်ႉ ဝိတ်ႉၶွပ်ႉ လၢတ်ႈတေႃႇ ၸွမ်ပွင်ၸိုင်ႈ ရတ်ႈသျႃး ပူႇတိၼ်ႇ မိူဝ်ႈဝၼ်းၽတ်းၼၼ်ႉ ၼႆယဝ်ႉ။
ၽွင်းလူင်ၽၢႆႇၼွၵ်ႈမိူင်း ၶႅၼ်ႇၼေႇတႃႇ Mélanie Joly လၢတ်ႈ မိူဝ်ႈဝၼ်းသုၵ်းၼၼ်ႉဝႃႈ ၽွင်းလူင်ၽၢႆႇၼွၵ်ႈမိူင်း G7 တင်းမူတ်း ၽွမ်ႉၸွမ်း ၶေႃႈတၢင်ႇၼႄ ဢမႄႇရိၵၢၼ်ႇၼၼ်ႉသေ မိူင်းယူႇၶရဵၼ်းၵေႃႈ ႁပ်ႉၶၢမ်ႇဝႆႉလႄႈ ယၢမ်းလဵဝ် တေလႆႈတူၺ်း လွင်ႈတုမ်ႉတွပ်ႇ ရတ်ႈသျႃးၼၼ်ႉၵွႆး ၼႆယဝ်ႉ။
ၶုၼ်ၽွင်းလူင် ၵၢၼ်ၼွၵ်ႈမိူင်း မိူင်းဢိင်းၵလဵတ်ႈ တေးဝိတ်ႉလမ်ႇမီႇၵေႃႈ လၢတ်ႈမိူၼ်ၵၼ်သေ မၼ်းလၢတ်ႈဝႃႈ တင်းမူတ်းၼႆႉ မီးၸႂ်ၶႂ်ႈႁဵတ်းသၢင်ႈပၼ် လွင်ႈႁူမ်ႇလူမ်ႈ တႃႇယူႇၶရဵၼ်း လွင်ႈတႃႇပၼ်လွၵ်းလၢႆးပႂ်ႉတူၺ်း ဢၼ်တေပဵၼ် လွင်ႈၵမ်ႉထႅမ် ၶေႃႈၽွမ်ႉၸႂ်တႃႇၵိုတ်းတိုၵ်းၼၼ်ႉယူႇ ဝႃႈၼႆ။
ၶေႃႈပိုၼ်ၽၢဝ်ႇ ၸုမ်း G7 ႁူမ်ႈၵၼ်ၼႆႉ လႆႈဢွၵ်ႇမႃး ယွၼ်ႉ လူင်ပွင်ၸိုင်ႈ ရတ်ႈသျႃး ဢမ်ႇၶႂ်ႈယွမ်းႁပ်ႉ ၶေႃႈတၢင်ႇၼႄ လွင်ႈၵိုတ်းတိုၵ်း ဢမႄႇရိၵၢၼ်ႇ တင်းပုတ်းတင်းတႅင်ႈလႄႈ လၢတ်ႈဝႃႈ ၶေႃႈတၢင်ႇၼႄ ဢမ်ႇတဵမ်ထူၼ်ႈ ၼႆယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Nike Ching. "G7 urges Russia to accept ceasefire or face further sanctions" — VOA News, March 14, 2025
- Reuters. "G7 warn Russia of new sanctions if no ceasefire agreed" — Reuters, March 14, 2025
- AFP. "G7 Warns Russia of New Sanctions Unless It Accepts Ukraine Ceasefire" — The Moscow Times, March 14, 2025
- The Straits Times. "G-7 ministers unite to back Ukraine and warn Russia of sanctions" — The Straits Times, March 14, 2025
