Jump to content

ၸုမ်းႁမၢသ်ႉ ႁၢင်ႈႁႅၼ်းတႃႇဢုပ်ႇဢူဝ်း ၵႃႇၸႃႇ ၸွမ်းၼင်ႇဢၼ်ဢမႄႇရိၵၢၼ်ႇ မုင်ႈမွင်းဝႆႉ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းၸၼ်၊ ဢွၵ်ႇထူဝ်ႇပႃႇ 6၊ 2025

လွင်ႈလူႉလႅဝ် တီႈၵႃႇၸႃႇ

ၽူႈမီးပုၼ်ႈၽွၼ်း ၸုမ်းႁမၢသ်ႉၶဝ် ႁွတ်ႈၽႅဝ် မိူင်းဢီးၵျိပ်ႈ မိူဝ်ႈဝၼ်းဢႃးတိတ်ႉ ဢွၼ်တၢင်း မိူဝ်ႈတေဢုပ်ႇၵၼ်တင်း ဢိတ်ႇသရေး ဢၼ်ဢမႄႇရိၵၢၼ်ႇ မုင်ႈမွင်းဝႃႈ တေႁဵတ်းႁႂ်ႈ ပၢင်တိုၵ်း ၵိုတ်းယိုတ်း လႄႈ တေပွႆႇပၼ် ၵူၼ်းၸိူဝ်း ထုၵ်ႇၺွပ်းဝႆႉ တီႈၵႃႇၸႃႇၼၼ်ႉၼႆသေ ၽူႈမီးၸၼ်ႉ ၽၢႆႇၵၢၼ်မိူင်း ဝႃႇသျိၼ်ႇတၢၼ်ႇ လၢတ်ႈဝႃႈ ဝၼ်းၼႃႈၼႆႉ ပဵၼ်ဝၼ်း ဢၼ်လမ်ႇလွင်ႈ ၼႆယဝ်ႉ။

ၽူႈဢုပ်ႇဢူဝ်း ဢိတ်ႇသရေး ဢၼ်ၽွင်းလူင် ၽၢႆႇၽႅၼ်ၵၢၼ် ရူၼ်ႇတႃးမႃႇ ဢွၼ်ႁူဝ်ၼၼ်ႉ တေၵႂႃႇဢုပ်ႇဢူဝ်း တီႈဢီးၵျိပ်ႈ တီႈႁူင်းလိုဝ်ႈသဝ်း ပၢင်ႇလၢႆႇလႅင် ဝဵင် းSharm el-Sheikh ၵဵဝ်ႇလူၺ်ႈ လွင်ႈပွႆႇပၼ် ၵူၼ်းၸိူဝ်းထုၵ်ႇၺွပ်းဝႆႉၼၼ်ႉ ဢၼ်ပဵၼ် ၽႅၼ်ၵၢၼ် ၸွမ်ပွင်ၸိုင်ႈ ဢမႄႇရိၵၢၼ်ႇ တေႃႇၼႄႇထရမ်ႉ တႃႇတေ ၵိုတ်းယိုတ်း ပၢင်တိုၵ်း ၵႃႇၸႃႇ ဢၼ်ႁိုင်မႃး ၸမ်သွင်ပီၼၼ်ႉယဝ်ႉ။

ၽွင်းလူင်ၽၢႆႇၼွၵ်ႈမိူင်း ဢမႄႇရိၵၢၼ်ႇ Marco Rubio လၢတ်ႈတီႈ ၶၢဝ်ႇ NBC News “Meet the Press” မိူဝ်ႈဝၼ်းဢႃးတိတ်ႉၼၼ်ႉဝႃႈ “ၸုမ်းႁမၢသ်ႉၶဝ် လၢတ်ႈတႄႉႁိုဝ် ဢမ်ႇလၢတ်ႈတႄႉႁိုဝ် ၼႆ ႁဝ်းၶႃႈ တေႁူႉလႆႈ ဝႆးဝႆးယူႇ” ၼႆယဝ်ႉ။

ဝၢႆးၼၼ်ႉ မိူဝ်ႈဝၼ်းဢႃးတိတ်ႉၼၼ်ႉ ထရမ်ႉ လၢတ်ႈဝႃႈ လွင်ႈဢုပ်ႇဢူဝ်း ၶိုၼ်ႈယႂ်ႇမႃး ဝႆးဝႆးၼႆယဝ်ႉ။ မၼ်းလၢတ်ႈတီႈ ၼိူဝ်သိုဝ်ႇတူင်ႇဝူင်းၵူၼ်းဝႃႈ “လႆႈငိၼ်းဝႃႈ ၶၵ်ႉတွၼ်ႈဢွၼ်တၢင်းသုတ်း ထုၵ်ႇလီယဝ်ႉတူဝ်ႈ ၼႂ်းဝူင်ႈၼႆႉၼႆသေ ယွၼ်းႁႂ်ႈၵူႈၵေႃႉ တူင်ႉၼိုင်ဝႆးဝႆး MOVE FAST ၼႆယဝ်ႉ။

ၶၵ်ႉတွၼ်ႈဢွၼ်တၢင်းသုတ်း တေပွႆႇပၼ် ၵူၼ်းဢၼ်ထုၵ်ႇၺွပ်းဝႆႉ ႁႂ်ႈလႆႈလႅၵ်ႈလၢႆႈ ၵူၼ်းတူၵ်းၶွၵ်ႈ ပႃးလဵတ်ႈသတၢႆးၶဝ်။

ၸုမ်းတူဝ်တႅၼ်း ၸုမ်းႁမၢသ်ႉ ဢၼ်ၽူႈၵွၼ်း ၵႃႇၸႃႇ ဢၼ်လႆႈထုၵ်ႇ ပၢႆႈဢွၵ်ႇမိူင်း ဢၼ်ပဵၼ် ၶႃႇလိၼ်ႇ ဢႄးလ်ႁၢႆႇယႃႇ ဢွၼ်ႁူဝ်ၼၼ်ႉ လူင်းမႃး တီႈမိူင်းဢီးၵျိပ်ႈ မိူဝ်ႈဝၢႆးဝၼ်း ဝၼ်းဢႃးတိတ်ႉၼၼ်ႉသေ ႁူမ်ႈၵၼ်တင်း ၽူႈတၢင်တူဝ် ဢမႄႇရိၵၢၼ်ႇ လႄႈ ၶႃႇတႃႇ တႃႇဢုပ်ႇဢူဝ်း လွင်ႈႁဵတ်းသၢင်ႈ လွင်ႈၶတ်းၸႂ် ဢၼ်ၶိုၼ်ႈယႂ်ႇလိူဝ်ပိူၼ်ႈ ဢၼ်ပႆႇလႆႈ ၵိုတ်းယိုတ်း ပၢင်တိုၵ်းၼၼ်ႉယဝ်ႉ။

ဝၢႆးသေ ႁေႇယႃႇ လွတ်ႈၽေး လွင်ႈဢိတ်ႇသရေး ယိုဝ်းသႂ်ႇ တီႈဝဵင်းတူဝ်ႇႁႃႇ ဢၼ်ပဵၼ်ဝဵင်းလူင် ၶႃႇတႃႇရီႇ မိူဝ်ႈလိူၼ်ပူၼ်ႉမႃးၼၼ်ႉ ပဵၼ်ပွၵ်ႈဢွၼ်တၢင်းသုတ်း ဢၼ်ႁေႇယႃႇ ၵႂႃႇဢႅဝ်ႇလႄႇ မိူင်းဢီးၵျိပ်ႈၼၼ်ႉယဝ်ႉ။

ထရမ်ႉ လႆႈတၢင်ႇၼႄ ၽႅၼ်ၵၢၼ် 20 ၶေႃႈ ဢၼ်ယိူင်းဢၢၼ်း တႃႇတေၵိုတ်းယိုတ်း ပၢင်တိုၵ်း တီႈၵႃႇၸႃႇ လႄႈ တႃႇတေ ပွႆႇပၼ် ၵူၼ်းၸိူဝ်း ထုၵ်ႇၺွပ်းဝႆႉ ဢၼ်ၵိုတ်းဝႆႉၼၼ်ႉသေ တႃႇတေ မၵ်းမၼ်ႈ လွင်ႈၼႃႈလိၼ် မိူဝ်းၼႃႈၼၼ်ႉယဝ်ႉ။ ဢိတ်ႇသရေးလႄႈ ႁမၢသ်ႉၶဝ် လႆႈၸႂ်ၵၼ် ၵမ်ႈၽွင်ႈ ၼႂ်းၽႅၼ်ၵၢၼ်ၼၼ်ႉယူႇ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၸုမ်းႁမၢသ်ႉ_ႁၢင်ႈႁႅၼ်းတႃႇဢုပ်ႇဢူဝ်း_ၵႃႇၸႃႇ_ၸွမ်းၼင်ႇဢၼ်ဢမႄႇရိၵၢၼ်ႇ_မုင်ႈမွင်းဝႆႉ&oldid=12360"