Jump to content

ၸိူင်း ၶူဝ်းဝိတ်ႉ လႆႈ သူးမႃႉၶမ်း Oscar ၸိူင်းၶႄႇ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းၸၼ်၊ ၼူဝ်ႇဝႅမ်ႇပႃႇ 25၊ 2024

ဢွင်ႈတီႈတွင်ႈထၢမ်ပိူင်လူင် Walk of Fame ၊ ပၢင်တွၼ်ႈသူးမႃႉၶမ်း (ၶႅပ်းႁၢင်ႈၵဝ်ႇ)

တီႈပၢင်တွၼ်ႈသူး Golden Horse Awards ဢၼ်ၸတ်းႁဵတ်းတီႈမိူင်းထၢႆဝၢၼ်း ပီ 2024 ၼၼ်ႉ ၸိူင်းဢၼ်ဢိင်ၼိူဝ် ၽေးၶဵၼ် Covid-19 တီႈမိူင်းၶႄႇ လႄႈ ၸိူင်းဢၼ်ပဵၼ် လွင်ႈတၢင်းႁၵ်ႉၵေး လႆႈသူးပိူင်လူင် ၼႆယဝ်ႉ။ ပၢင်တွၼ်ႈသူး Golden Horse Awards ဢၼ်ၸတ်းႁဵတ်း မိူဝ်ႈဝၼ်းဢႃးတိတ်ႉ လိူၼ်ၼူဝ်ႇဝႅမ်ႇပႃႇ 23၊ 2024 ၼၼ်ႉ လႆႈႁူႉဝႃႈ ပဵၼ်ပၢင်တွၼ်ႈသူး ဢွၵ်ႉသၵႃႇ ၸိူင်းငဝ်းတူင်ႉ ဢၼ်ၸႂ်ႉၽႃႇသႃႇၶႄႇ ၼႆယဝ်ႉ။

ယွၼ်ႉပိူဝ်ႈဝႃႈ တီႈထၢႆဝၢၼ်းၼႆႉ ဢမ်ႇမီးပိူင်ထတ်းသၢင် ဢၼ်ၵႅပ်ႈမိူၼ်မိူင်းၶႄႇလႄႈ ပၢင်တွၼ်ႈသူး Golden Horse ထၢႆဝၢၼ်း ၼႆႉ ၵႆႉပႃး ၸိူင်းဢၼ်လိူင်ႈမၼ်းၵႂၢင်ႈၶႂၢင်ၼၼ်ႉယဝ်ႉ။

ၸိူင်းဢၼ် ၽူႈၼမ်းၸိူင်းၶႄႇ လူႇယေး တႅမ်ႈဝႆႉ ဢၼ်ပဵၼ်ၸိူင်းမၢႆတွင်း "An Unfinished Film" ဢၼ်လၢတ်ႈၼႄလွင်ႈ ၶၢဝ်းတၢင်း ဢၼ်လႆႈႁၢမ်ႈတၢပ်ႈ ယွၼ်ႉၽေးၶဵၼ် ၶူဝ်းဝိတ်ႉၼၼ်ႉ လႆႈသူးၸိူင်း ဢၼ်လီသုတ်း လႄႈ ၽူႈၼမ်းၸိူင်း ဢၼ်လီသုတ်းသေ ယွၼ်ႉဝႃႈ မၼ်းၸၢႆး တိုၵ်ႉၽႅဝ်ဝႆႉ မိူင်းၵျႃႇပၢၼ်ႇ ယွၼ်ႉလူၺ်ႈ ၼႃႈၵၢၼ်လႄႈ မေးမၼ်း မႃႇရိၼ်ႇလီႇ လႆႈတၢင်တူဝ် ႁပ်ႉဢဝ် သူးၽူႈၼမ်းၸိူင်းဢၼ်လီသုတ်း ၼၼ်ႉၼႆယဝ်ႉ။

ၼၢင်းၸိူင်း ႁွင်းၵွင်း ၶျူင်းသူဝ်းယိင်း လႆႈသူးၼၢင်းၸိူင်း ဢၼ်လီသုတ်း တွၼ်ႈတႃႇ တူဝ်ၸိူင်း ၼၢင်းယိင်း ဢၼ်ဢမ်ႇငိၼ်းသဵင် တီႈၼ်ႂးၸိူင်း "The Way We Talk" ၼၼ်ႉယဝ်ႉ။

ၸိူင်းငဝ်းတူင်ႉ သီလမ်ၽိူၵ်ႇ “Bel Ami” ဢၼ်ၽူႈၼမ်းၸိူင်း ၸၢဝ်းၶႄႇ ၵဵင်းၸူၼ်ႇ ပေႃႉဢွၵ်ႇၼၼ်ႉ လႆႈပေႃႉတီႈ မိူင်းၾရၢင်ႇသဵတ်ႈသေတႃႉ လႆႈသူး ၽူႈလဵၼ်ႈၸိူင်း ၶႅၼ်ႇသေပိူၼ်ႈ ၼႆယဝ်ႉ။ လႆႈသူး ၽူႈထႆႇငဝ်းတူင်ႉ ဢၼ်လီသုတ်း လႄႈ ၽူႈတတ်းတေႃႇ ဢၼ်လီသုတ်း။

ၸိူင်း "MA-Cry of Silence" ဢၼ်ၽူႈၼမ်းၸိူင်းမၢၼ်ႈ တီႇမေႃႇၼၢႆႇ ႁဵတ်းဝႆႉ ဢၼ်ပဵၼ် ၸိူင်းဢၼ်ၼႄလွင်ႈယၢပ်ႇၽိုတ်ႇ ၼၢင်းယိင်းဢွၼ်ႇ ႁဵတ်းၵၢၼ်ယဵပ်ႉၶူဝ်းၼုင်ႈ ၵေႃႉ႞ ၽွင်းပၢင်တိုၵ်းၼၼ်ႉၵေႃႈ လႆႈၶဝ်ႈၶေႉၶဵင်ႇ ၼႂ်းၸၼ်ႉ NETPAC ဢၼ်လႆႈသူးမႃႉၶမ်းၼၼ်ႉယဝ်ႉ။ တႄႇဢဝ်ပီ 2007 မႃး ပၢင်ပွႆးၸိူင်းမႃႉၶမ်း တီႈထၢႆပႄႈ လႆႈသႂ်ႇပၼ်သူးၼႆႉ တႃႇပၼ်ႁႅင်း ၽူႈၼမ်းၸိူင်း ႁုၼ်ႈမႂ်ႇ ဢၼ်ဢွၵ်ႇမႃး တီႈဢေးသျႃးဝႃႈၼႆယဝ်ႉ။

မိူင်းၶႄႇ ဢၼ်ၼပ်ႉသွၼ်ႇဝႃႈ ထၢႆႇဝၢၼ်း ပဵၼ်ၼႃႈလိၼ်မၼ်းၼၼ်ႉ မိူဝ်ႈပီ 2019 ၼၼ်ႉ လႆႈႁၢမ်ႈတၢပ်ႈ ၸိူင်းဢၼ်မၼ်းႁဵတ်းဢွၵ်ႇၼၼ်ႉ ဢမ်ႇႁႂ်ႈၶဝ်ႈႁူမ်ႈပဵၼ်တၢင်းၵၢၼ် တီႈ ပၢင်တွၼ်ႈသူး မႃႉၶမ်း ဢၼ်ၸတ်းႁဵတ်းၵူႈပီ တီႈထၢႆႇဝၢၼ်းၼၼ်ႉ။

တီႈပၢင်တွၼ်ႈသူး ပီ 2018 ၼၼ်ႉ ဝၢႆးသေ ၽူႈၼမ်းၸိူင်း ထၢႆႇဝၢၼ်း ၽူႇၶျူင်း လၢတ်ႈၵႂၢမ်း ၵမ်ႉထႅမ် လွင်ႈလွတ်ႈလႅဝ်းသဝ်းၶေႃ ထၢႆႇဝၢၼ်းၼၼ်ႉယဝ်ႉ လူင်ပွင်ၸိုင်ႈၶႄႇ ႁၢမ်ႈတၢပ်ႈ လွင်ႈၼႄၸိူင်းၼၼ်ႉယဝ်ႉ။ တွၼ်ႈတႃႇ လူင်ပွင်ၸိုင်ႈၶႄႇတႄႉ လွင်ႈထၢႆႇဝၢၼ်း လႆႈလွတ်ႈလႅဝ်းၵွၼ်းၶေႃၼႆႉ ပဵၼ်လွင်ႈဢၼ် ဢမ်ႇယွမ်းႁပ်ႉလႆႈ သေဢိတ်းၼၼ်ႉယဝ်ႉ။

ၵူၺ်းၵႃႈ ၸိူင်းၸိူဝ်းဢၼ်ထုၵ်ႇႁၢမ်ႈ ဢမ်ႇၼၼ် ဢမ်ႇပၼ်ပိုၼ်ၽႄ ၼႂ်းမိူင်းၶႄႇၼၼ်ႉ တိုၵ်ႉသိုပ်ႇၶႄႉၶဵင်ႇ ၼႂ်းပၢင်တွၼ်ႈသူး Golden Horse Awards ယူႇ။ ပၢင်တွၼ်ႈသူး Golden Horse Awards ဢၼ်တႄႇႁဵတ်းမႃး မိူဝ်ႈပီ 1962 ၼၼ်ႉ လႆႈဝႃႈ ပဵၼ်ပၢင်တွၼ်ႈသူး ဢၼ်မီးၸိုဝ်ႈသဵင် ၼႂ်းၸိူင်း ဢၼ်လၢတ်ႈၵႂၢမ်းၶႄႇ တႄႉတႄႉဝႃႈဝႃႈ ၼႆယဝ်ႉ။ ၸိူင်းငဝ်းတူင်ႉ မိူင်းၶႄႇ၊ ႁွင်းၵွင်း လႄႈ ထၢႆႇဝၢၼ်း ၶဝ်ႈႁူမ်ႈပၢင်ၶေႉၶဵင်ႇၼႆႉ ပိူင်လူင်မၼ်း။


ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၸိူင်း_ၶူဝ်းဝိတ်ႉ_လႆႈ_သူးမႃႉၶမ်း_Oscar_ၸိူင်းၶႄႇ&oldid=10071"