ၸဝ်ႈၼႃႈတီႈပလိၵ်ႈထႆး 2 ၵေႃႉ ဢၼ်ထုၵ်ႇထၢင်ႇထိူမ်ဝႃႈ ၵဵဝ်ႇၶွင်ႈၸုမ်းၵျႃးၽႅၼ်ႉ ထုၵ်ႇထဵတ်ႈထၢမ်
ဝၼ်းပုတ်ႉ၊ ၾႅပ်ႇဝႃႇရီႇ 12၊ 2025
ၸဝ်ႈၼႃႈတီႈပလိၵ်ႈထႆး ၸၼ်ႉသုင် ဢၼ်ၸိုဝ်ႈသဵင်လိုဝ်းလင် တီႈလႅၼ်လိၼ် ၸႄႈမိူင်းတၢၵ်ႇ 2 ၵေႃႉၼၼ်ႉ လႆႈၶၢႆႉၵႂႃႇယူႇတီႈ ၵုင်းထဵပ်ႈသေ ပႂ်ႉၵူတ်ႇထတ်း လွင်ႈဝႃႈ ၸၢင်ႈၵွင်ႉၵၢႆႇၵၼ်တင်း ၵၢၼ်လဵၼ်ႈၵဵမ်း လႄႈ ၵၢၼ်ၵႃႉၶၢႆၵူၼ်း ၼႂ်းမိူင်းမၢၼ်ႈ ၼႆယဝ်ႉ။
မိူဝ်ႈဝၼ်းဢင်းၵၢၼ်းၼၼ်ႉ ၽူႈၵွၼ်းပလိၵ်ႈၸိူဝ်ႉၸၢတ်ႈ Kittharath Punpetch ၸီႉသင်ႇႁႂ်ႈ ၸဝ်ႈသိုၵ်းလူင်ပလိၵ်ႈ Gen Ekkarat Intasueb လႄႈ ၸဝ်ႈသိုၵ်းလူင်ပလိၵ်ႈ Samrit Aimkamol ၶၢႆႉၵႂႃႇယူႇတီႈ ငဝ်ႈငုၼ်းပလိၵ်ႈ တီႈဝဵင်းလူင် ၵမ်းလဵဝ် ၼႆယဝ်ႉ။
ၸဝ်ႈသိုၵ်းလူင်ပလိၵ်ႈ ဢႅၵ်ႉၵႃႇရတ်ႉ ဢႃႇယု 53 ပီၼႆႉ မိူဝ်ႈပႆႇလူင်းလၢႆးမိုဝ်း ၶေႃႈၸီႉသင်ႇ ၶၢႆႉတီႈယူႇၼၼ်ႉ ပဵၼ်ၽူႈၵွၼ်း ၵိင်ႇၽႄ လုမ်းၽူႈၵုမ်းၵမ် ၸႄႈမိူင်း ဢၼ်ၵုမ်းၵမ် ၸႄႈမိူင်းပွတ်းႁွင်ႇ ၵမ်ႈၽွင်ႈ ပႃးၸဵမ် ၸႄႈမိူင်းတၢၵ်ႇ။ မၼ်းၸၢႆးၼႆႉ ပဵၼ်ၵူၼ်းၼႂ်းပိုၼ်ႉတီႈလႅၼ်လိၼ် ၼႂ်းၸႄႈဝဵင်းတၢၵ်ႇ ၸိုဝ်ႈသဵင်လိုဝ်းလင်တႄႉတႄႉသေ ယၢမ်ႈပဵၼ် ၽူႈၵွၼ်းပလိၵ်ႈ ၸႄႈတွၼ်ႈမႄႈသွတ်ႇမႃး။
သိုဝ်ႇၶၢဝ်ႇၼႂ်းပိုၼ်ႉတီႈ လၢတ်ႈဝႃႈ ၸဝ်ႈၼႃႈတီႈၵေႃႉၼႆႉ မီးႁိူၼ်းလူင် ၼိူဝ်လိၼ် 5 ရၢႆးသေ ၼႂ်းၵႄႈ တီႈဢၼ်လီသူၼ်ၸႂ်ၼၼ်ႉ မီးၼမ်ႉတူၵ်းတၢတ်ႇ လႄႈ တီႈလဵၼ်ႈၵွပ်ႉၾ် ၼႆသေတႃႉ မၼ်းလႆႈၸႂ်ယူႇတီႈ ႁူင်းသဝ်း ပလိၵ်ႈ ဢၼ်ႁၢင်ႈႁႅၼ်းဝႆႉ တႃႇၽူႈၵွၼ်းမႄႈသွတ်ႇၼၼ်ႉ ၼႆယဝ်ႉ။
ၸဝ်ႈသိုၵ်းလူင် ၵိတ်ႉထႃႇရတ်ႉ လႆႈပၼ်ပုၼ်ႈၽွၼ်း ၸဝ်ႈသိုၵ်းလူင် ၶျႃႇရူၼ်ႇၵိတ်ႉ ပၼ်းၵႅဝ်ႈ ၵႅမ်ၽူႈၵွၼ်း လုမ်းၵူတ်ႇထတ်း ငဝ်ႈငုၼ်း ႁႂ်ႈဢွၼ်ႁူဝ် ၵူတ်ႇထတ်း လွင်ႈဢၼ် ၸဝ်ႈသိုၵ်းလူင် ဢႅၵ်ႉၵႃႇရတ်ႉ လႄႈ ၵၢၼ်မၢၵ်ႈမီး ၼႂ်းႁူင်းၵၢၼ် မျႃႉဝတီႇ ဢၼ်မီးၽၢႆႇၼိူဝ် လႅၼ်လိၼ် မႄႈသွတ်ႇ မိူင်းမၢၼ်ႈၼၼ်ႉ ၸွင်ႇမီးလွင်ႈၵွင်ႉၵၢႆႇၵၼ် ဢၼ်ဝႃႈၼၼ်ႉ။ ဢွင်ႈတီႈမူၼ်ႈသိူဝ်းၼႆႉ ၵူၼ်းတင်းၼမ် ႁူႉဝႃႈ ပဵၼ်တီႈ လွင်ႈလဵၼ်ႈၵဵမ်း လႄႈ လွင်ႈတူင်ႉၼိုင် တၢင်ႇၸိူဝ်း။
ၸဝ်ႈသိုၵ်းလူင်ပလိၵ်ႈ Samrit ၼႆႉ ပဵၼ်ၽူႈၵွၼ်းပလိၵ်ႈတၢၵ်ႇ ဢၼ်ဢဝ်ပုၼ်ႈၽွၼ်း လႅၼ်လိၼ် တင်းမိူင်းမၢၼ်ႈ တီႈၼႂ်းၸႄႈမိူင်းၼၼ်ႉ တင်းမူတ်း။ မၼ်းၸၢႆးၼႆႉ တိုၵ်ႉၵူတ်ႇထတ်းတူၺ်းဝႃႈ ၸၢင်ႈၵွင်ႉၵၢႆႇၵၼ်တင်း ၵူၼ်းၼွၵ်ႈမိူင်း ဢၼ်ထုၵ်ႇယွၵ်ႇလႅၼ် ၶဝ်ႈမိူင်းထႆးသေ လတ်းၽၢၼ်ႇ ၸႄႈဝဵင်းမႄႈသွတ်ႇ၊ ယူႇတီႈလုမ်းပလိၵ်ႈၸႄႈမိူင်း ၼႃႈလိၼ် 6 ဢဝ်ပုၼ်ႈၽွၼ်း ၵူတ်ႇထတ်း ၵဵဝ်ႇၵပ်းလွင်ႈၼႆႉ ဝႃႈၼႆ။
ၽူႈၵုမ်းၵမ် ႁူင်းပလိၵ်ႈ မႄႈသွတ်ႇ မႄႈရမတ်ႉ လႄႈ ၽူပ်းၽရ ၸိူဝ်းၼႆႉၵေႃႈ လႆႈၶၢႆႉၵႂႃႇ တီႈလုမ်းပလိၵ်ႈၸႄႈမိူင်း ၼႃႈလိၼ် 6 ၵမ်းလဵဝ် တႃႇတေပိုတ်ႇတၢင်း တႃႇၵူတ်ႇထတ်း လွင်ႈၵႃႉၶၢႆၵူၼ်း ၼႆယဝ်ႉ။
ပလိၵ်ႈၸိူဝ်းဢၼ်လႆႈၶၢႆႉၵႂႃႇၼၼ်ႉ ပဵၼ်ၸုမ်းၽူႈမီးၸၼ်ႉသုင် ဢၼ်ထၢင်ႇထိူမ်ဝႃႈ ၵွင်ႉၵၢႆႇၵၼ်တင်း သုၼ်ၵၢင် ၵၢၼ်ႁွင်ႉၵႂၢမ်း လႄႈ ၵၢၼ်လႅၼ်ငိုၼ်း တၢင်ႇၸိူဝ်း ၼႂ်းမိူင်းမၢၼ်ႈ ယွၼ်ႉလူင်ပွင်ၸိုင်ႈထႆး ၶတ်းၸႂ် တႃႇတေ ၽဵဝ်ႈမူၺ်ႉ ၶဝ် လူၺ်ႈ ႁႄႉႁၢမ်ႈ ၵၢၼ်ၾႆးၾႃႉ၊ ၵၢၼ်ပၼ်ဢိၼ်ႇတႃႇၼႅတ်ႉ လႄႈ ၼမ်ႉမၼ်းၸၢၵ်ႈ ဢၼ်လဵင်ႉလူ ၵၢၼ်မၢၵ်ႈမီး ဢၼ်ဢမ်ႇၸွမ်းမၢႆမီႈၸိူဝ်းၼၼ်ႉ ၼႆယဝ်ႉ။
ၽွင်းလူင်ၽၢႆႇၵႅတ်ႇၵင်ႈ Phumtham Wechayachai လၢတ်ႈဝႃႈ ၼင်ႇႁိုဝ် တေငၢႆႈလူမ်ၸႂ် တႃႇၵူတ်ႇထတ်းထႅင်ႈၼၼ်ႉ တေသင်ႇႁႂ်ႈ ၽူႈမီးပုၼ်ႈၽွၼ်း ၸႄႈမိူင်း ၸိူဝ်းၵဵဝ်ႇၶွင်ႈ ၵၢၼ်ၽိတ်းမၢႆမီႈ တင်းသဵင်ႈ ဢွၵ်ႇပႅတ်ႈ တီႈလႅၼ်လိၼ် ဢၼ်ၶဝ် မီးဢႃႇၼႃႇၼၼ်ႉ ၼႆယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Wassayos Ngamkham. "Senior policemen in Tak shunted over scam suspicions" — Bangkok Post, February 11, 2025
- The Nation. "Senior police officer sidelined for alleged connection to Myawaddy casino" — The Nation, February 11, 2025
