ၸဝ်ႈၶူးဝႃးဝုၼ်းၸုမ်ႉလႄႈ ၸဝ်ႈသုၶမ်း ႁွတ်ႈမိူင်းလႃး
မိူဝ်ႈလိူၼ်ၸူႇလၢႆႇ 2 ဝၼ်း ၸဝ်ႈၶူးဝႃးဝုၼ်းၸုမ်ႉ လုၵ်ႉမိူင်းၽူင်း ဢွၵ်ႇၶၢဝ်းတၢင်းမႃးသေ မႃးဝႄႉတီႈ လွႆပၢင်ၵႂၢႆး တီႈသူၼ်ပုတ်ႉထၸဝ်ႈယဝ်ႉ။ ၸဝ်ႈၶူးဝႃး ၵႂႃႇ မဵတ်ႉတႃႇ ယၢတ်ႇၼမ်ႉပၼ် တမ်ႈတီႈ ထၢတ်ႈၵွင်းမူး လေႃးၵသရၽူႇ ဢၼ်ၸဝ်ႈသြႃႇဝၸီႇပိၵ်ႉ ဢွၼ်ႁဵတ်းဝႆႉ ဢၼ်ဢၢၼ်းႁႂ်ႈငၢႆး ၵွင်းမူးပေႃးရေႃးပုတ်ႉထေႃး မိူင်းဢိၼ်ႇတူဝ်ႇၼီးသျႃး ဢၼ်ဢဝ်ႁိၼ်ႁဵတ်းဝႆႉၼၼ်ႉယဝ်ႉ။
ဝၢႆးၼၼ်ႉ ၶူးဝႃး ၵႂႃႇမဵတ်ႉတႃႇပၼ် တိူင်းသၢမ်ၸဵင်ႇၶမ်း လႄႈ မႃးဝႆႈသႃ ဢႃႇယႃးထမ်း ဝတ်ႉၵဵင်းယိုၼ်း ၵဵင်းတုင် မိူဝ်းတီႈ ႁူင်းႁႅမ်းသူၺ်ႇယေႇၵၢၼ်ႇသေ သိုပ်ႇၶၢဝ်းတၢင်း ၽၢတ်ႇယၢၼ်ၵဵင်းတုင်။ ၶၢဝ်းယၢမ်း ၵၢင်ၶမ်ႈ 9 မွင်းပၢႆ ႁွတ်ႈထိုင်မိူင်းလႃး မိူဝ်းလိုဝ်ႈတီႈႁိူၼ်းႁူဝ်ပဝ်ႈ မိူင်းလႃးယဝ်ႉ။
ၸူႇလၢႆႇ ဝၼ်း 2 ၼင်ႇၵဝ်ႇ ၸဝ်ႈသြႃႇသုၶမ်းၵေႃႈ လုၵ်ႉတၢင်ႉယၢၼ်းသေ မႃးႁွတ်ႈထိုင်မိူင်းလႃး ၶၢဝ်းတၢမ်းၶမ်ႈ 4:30။ ၵၢင်ၶမ်ႈ ႁေႃးတြႃးပၼ် ပီႈၼွင်ႉၸိူဝ်းး မႃးပႂ်ႉႁပ်ႉ ၸဝ်ႈၶူးဝႃး တီႈဝတ်ႉထၢတ်ႈလူင်မိူင်းလႃး။ ၶမ်ႈၼၼ်ႉ ၸဝ်ႈၶူးဝႃး ႁိူဝ်ႉၶၢဝ်းတၢင်းလႄႈ ဢမ်ႇမႃးႁေႃးတြႃး။
လိူၼ်ၸူႇလၢႆႇ 3 ဝၼ်း ၸဝ်ႈသြႃႇ 2 ၸဝ်ႈႁူမ်ႈလူၺ်ႈ လုၵ်ႈၼွင်ႉတပႄး မိူဝ်းမဵတ်ႉတႃႇ ဢဝ်သွမ်းဝၼ်း တီႈႁိူၼ်ႈပေႃႈၽယႃးတိပ်ႉၶဝ်၊ ဝၢႆးဝၼ်း 2 မွင်း မိူဝ်းၽႄမဵတ်ႉတႃႇတြႃးပၼ် တီႈၶုမ် ႁူဝ်ပဝ်ႈၵဝ်ႇ ၸဝ်ႈၸၢႆးလိုၼ်းသေ ထိုင်မႃး ၵၢင်ၶမ်ႈ 8 မွင်းတေႃႇ 9:30 ၸဝ်ႈၶူးဝႃးဝုၼ်းၸုမ်ႉလႄႈ ၸဝ်ႈသြႃႇသုၶမ်း ႁေႃးတြႃးပၼ် ပရိသၢတ်ႈတငိးၼမ် ၸိူဝ်းမႃးထွမ်ႇတြႃးၼၼ်ႉယဝ်ႉ။
လိူၼ်ၸူႇလၢႆႇ 4 ဝၼ်း ၵၢင်ၼႂ် 9 မွင်း ဢွၵ်ႇၽၢတ်ႇယၢၼ် မိူင်းလႃး မိူဝ်းဢဝ်သွမ်းဝၼ်း တီႈႁိူၼ်း ဢႃးလိင်ႇၵေႃး လုၵ်ႈၵဵပ်း ၸဝ်ႈၶူးဝႃးတီႈၵဵင်းၶၢင်။ ဝၢႆးၼၼ်ႉ မိူဝ်းဝႄႉဝႆႈထၢတ်ႈၽပၢတ်ႇသေ သိုပ်ႇၵႂႃႇတီႈထမ်ႈၽပၢတ်ႇၽႃၸၢင်ႉ မိူင်းႁႄႉမိူင်းၶၼ်ယဝ်ႉ။ ဢွင်ႈတီႈၼႆႈ ၶူးဝႃး ယၢမ်ႈမႃးဢဝ်ဝႃႇ မီးမႃးယဝ်ႉ 4 ပွၵ်ႈသေ ပႃးပွၵ်ႈၼႆႉ ပဵၼ် 5 ပွၵ်ႈယဝ်ႉ။
ၵႃးၽႅဝ်လႆႈ တီႈတိၼ်ထမ်ႈၵူၺ်းလႄႈ လႆႈပႆၶိုၼ်ႈ မွၵ်ႈ 10 မိၼိတ်ႉထိုင်ပၢၵ်ႇထမ်ႈယဝ်ႉ။ ၸွမ်းတၢင်းၽူၼ်တၢၵ်းႁႅင်းလႄႈ တၢင်းၵႃး ဢၼ်လူင်းမႃးၸူးထမ်ႈ ပဵၼ်ဢၼ်ဢုင်တႄႉတႄႉ။ တၢမ်းၶမ်ႈ သူင်ႇၶူးဝႃး ႁွတ်ႈထိုင်ၼိူဝ်ထမ်ႈ ၶူးဝႃးႁေႃႈတြႃး သူင်ႇသင်ႇပၼ် လုၵ်ႈၼွင်ႉတပႄးယဝ်ႉ။ ၼႂ်းဝႃႇ 3 လိူၼ်ၼႆႉ ၼိုင်ႈပၢတ်ႈ တေၵိၼ်သုင်း မၢၵ်ႇမႆႉ 6 ဝၼ်း တေၵိၼ်သုင်းၶဝ်ႈ 1 ဝၼ်းၼႆယဝ်ႉ။ မၢၵ်ႇမႆႉတႄႉ ပေႃးတဵမ် 7 ဝၼ်း ႁႂ်လႅၵ်ႈမႂ်ႇၼႆယဝ်ႉ။
လိူၼ်ၸူႇလၢႆႇ 5 ဝၼ်း ၵၢင်ၼႂ် ၸဝ်ႈသြႃႇသုၶမ်းလႄႈ လုၵ်ႈၼွင်ႉတပႄးၶူးဝႃး ၶိုၼ်းဢွၼ်ၵၼ် ၽၢတ်ႇယၢၼ်ထမ်ႈ ပွၵ်ႈမိူဝ်းၵႂႃႇ သိုဝ်ႈၽႂ်မၼ်းသေ တပႄးဢွၼ်ႇၸၢႆး 3 ၵေႃႉ တေယူႇၼွၵ်ႈထမ်ႈ ပႂ်ႉလုမ်းလႃး ၶူးဝႃးၵႂႃႇ၊ ၽၢႆႇႁူမ်ႇလူမ်ႈလႄႈ မၢၵ်ႇဝၢၵ်ႈတၢင်းၵိၼ်တႄႉ ပေႃႈထဝ်ႈတိပ်ႉလႄႈ ၽူႈမီးပုၼ်ႈၽွၼ်း မိူင်းလႃး တေဢဝ်ပုၼ်ႈၽွၼ်းၵႂႃႇ။
ပေႃးဢွၵ်ႇဝႃႇယဝ်ႉ 1387 လိူၼ် 11 လွင်ႈ 5 ၶမ်ႈ (11.10.2025) သင်ႇၶၸဝ်ႈၶဝ်၊ ၽူႈယႂ်ႇၵူၼ်းလူင် တီႈမိူင်းလႃး တေယုၵ်ႉဢဝ်ၶူးဝႃးဝုၼ်းၸုမ်ႉ ၶိုၼ်ႈပဵၼ် "ဢႃႇယႃးသူမ်တဵတ်ႇပႃႇ" ၼႆယဝ်ႉ။
