ၶႄႇ လႄႈ ဢမႄႇရိၵၢၼ်ႇ လႆႈၸႂ်ၵၼ် တႃႇလူတ်းယွမ်းပၼ် ၶွၼ်ႇ တႃႇၶၢဝ်းတၢင်း 90 ဝၼ်း

ဝၼ်းၸၼ်၊ မေႇ 12၊ 2025 

ၽွင်းလူင် ၽၢႆႇငိုၼ်းတွင်း ဢမႄႇရိၵၢၼ်ႇ သၵွတ်ႉ ပႅတ်ႉသႅၼ်ႇ

ၶႄႇလႄႈ ဢမႄႇရိၵၢၼ်ႇ လႆႈၸႂ်ၵၼ်ဝႃႈ တေၵိုတ်းယိုတ်း လွင်ႈၵဵပ်းၶွၼ်ႇ ၵၢၼ်ၵႃႉၶၢႆ ဢၼ်ၼၵ်းၼႃ ဢၼ်တမ်းဝၢင်းဝႆႉ ၼိူဝ်ၵၼ်ၼၼ်ႉ ၵမ်ႈၽွင်ႈ၊ ယွၼ်ႉဝႃႈ ၶႄႇလႄႈ ဢမႄႇရိၵၢၼ်ႇ ႁၢင်ႈႁႅၼ်းတႃႇ တေမႄႇၶႂၢၵ်ႈ လွင်ႈဢုပ်ႇဢူဝ်း ဢၼ်ယိူင်းဢၢၼ်း တႃႇတေ ယွၼ်ႇယွမ်းလူင်း လွင်ႈၶဵင်ႈၶႅင် ပၢင်တိုၵ်းၵၢၼ်ၵႃႉၶၢႆၼၼ်ႉ ၼႆယဝ်ႉ။

ဝၢႆးသေ သွင်မိူင်း ဢုပ်ႇဢူဝ်းၵၼ် လွင်ႈၵၢၼ်ၵႃႉၶၢႆ တီႈဝဵင်းၵျီႇၼီႇဝႃႇ မိူင်းသဝိတ်ႉၸႃႇလႅၼ်ႇ ၶၢဝ်းတၢင်းသွင်ဝၼ်းယဝ်ႉ ၸင်ႇဢွၵ်ႇၶေႃႈပိုၼ်ၽၢဝ်ႇ ႁူမ်ႈၵၼ် မိူဝ်ႈဝၼ်းၸၼ်ၼၼ်ႉယဝ်ႉ။ ၶဝ်လၢတ်ႈဝႃႈ လွင်ႈဢုပ်ႇဢူဝ်း ဢၼ်ပဵၼ်မႃး ဝၢႆးသေ ၶပ်ႉမၢႆ ၸိူဝ်ႉၸၢတ်ႈ ၸွမ်ပွင်ၸိုင်ႈ ဢမႄႇရိၵၢၼ်ႇ တေႃႇၼႄႇထရမ်ႉ ႁဵတ်းႁႂ်ႈ ၼႃႈၵၢၼ် ၼၵ်းၼႃ ၼမ်မႃးၼၼ်ႉ ၼႆႉပဵၼ်လွင်ႈလီ ၼႆယဝ်ႉ။

လွၵ်းၵၢတ်ႇလုမ်ႈၾႃႉ လႆႈတုမ်ႉတွပ်ႇ ၶၢဝ်ႇငၢဝ်းၼႆႉ လီလီသေ ၵၢတ်ႇၶၢႆၶူဝ်းၶွင် တီႈႁွင်းၵွင်း၊ တီႈ ယူႇဢႅတ်ႉသ် လႄႈ တီႈ ယူးရူပ်ႉၸိူဝ်းၼႆႉၵေႃႈ ၶၼ်မၼ်း ၶိုၼ်းၶိုၼ်ႈမႃးယဝ်ႉ။

တီႈၼႂ်းၶေႃႈပိုၼ်ၽၢဝ်ႇၼၼ်ႉ ပိူၺ်ႇၵျိင်းလႄႈ ဝႃႇသျိၼ်ႇတၢၼ်ႇ လၢတ်ႈဝႃႈ လွင်ႈၵပ်းသိုပ်ႇ ၵၢၼ်ပၢႆးမၢၵ်ႈမီး လႄႈ ၵၢၼ်ၵႃႉၶၢႆ သွင်ၽၢႆႇၼႆႉ လမ်ႇလွင်ႈတႃႇ သွင်မိူင်း လႄႈ ၵၢၼ်ပၢႆးမၢၵ်ႈမီး လုမ်ႈၾႃႉ ၼႆယဝ်ႉ။

ၶဝ်လၢတ်ႈဝႃႈ တေသိုပ်ႇၶိုပ်ႈၼႃႈၵႂႃႇ “လူၺ်ႈၸႂ်ပိုတ်ႇၽုၺ်ႇၵၼ် သိုပ်ႇၵပ်းသိုပ်ႇၵၼ် ႁူမ်ႈမိုဝ်းၵၼ် ၼပ်ႉယမ်ၵၼ်” ၼႆယဝ်ႉ။

ၸွမ်းၼင်ႇ ၶေႃႈတူၵ်းလူင်းၼၼ်ႉသေ ဢမႄႇရိၵၢၼ်ႇ တေၵိုတ်းယိုတ်း ၶွၼ်ႇ ad valorem ဢၼ်မၼ်းတေလႆႈသႂ်ႇထႅင်ႈ ဢၼ်ပဵၼ် ၶွၼ်ႇဢၼ်ဢိင်ၼိူဝ် ၵႃႈၶၼ်ၶူဝ်းၶွင်ၼၼ်ႉ 24 ဝၢၵ်ႈ တႃႇၶၢဝ်းတၢင်း “တႄႇတင်ႈ” 90 ဝၼ်းၼၼ်ႉယဝ်ႉ။ လွင်ႈၼႆႉ တေႁဵတ်းႁႂ်ႈ ၵိုတ်းဝႆႉ ၵႃႈၶၼ်ၶွၼ်ႇ တီႈ 10 ဝၢၵ်ႈ။

ၶႄႇၵေႃႈ တေလူတ်းယွမ်း ၶွၼ်ႇ ဢၼ်ဢမႄႇရိၵၢၼ်ႇ သူင်ႇၶူဝ်းၶဝ်ႈမႃးၼၼ်ႉ မိူၼ်ၵၼ်သေ တေသိုပ်ႇၵဵပ်းၶွၼ်ႇ 10 ဝၢၵ်ႈ ၼႆယဝ်ႉ။

ဝႃႇသျိၼ်ႇတၢၼ်ႇ တေယွမ်းလူင်းပႃး ၶေႃႈၸီႉသင်ႇ ၽူႈပွင်ၵၢၼ် သွင်ၶေႃႈ ဢၼ်ထရမ်ႉ လူင်းလၢႆးမိုဝ်းဝႆႉ မိူဝ်ႈႁူဝ်လိူၼ်ဢေႇပရႄႇၼၼ်ႉဢၼ်မီး လွင်ႈတုမ်ႉတိူဝ်ႉ ၵုၼ်ႇသိၼ် ဢၼ်ဢမႄႇရိၵၢၼ်ႇ တေႃႉၶဝ်ႈမႃး တီႈမိူင်းၶႄႇ တင်းၼမ် ဢိၵ်ႇပႃး ႁွင်းၵွင်း လႄႈ မႃႇၵၢဝ်ႈၼၼ်ႉယူႇ။

ႁွင်ႈၵၢၼ်လူင် ၵၢၼ်ၵႃႉၶၢႆ မိူင်းၶႄႇ လၢတ်ႈဝႃႈ ၶေႃႈတူၵ်းလူင်း ဢၼ်လႆႈတူၵ်းလူင်းၵၼ်ဝႆႉ တင်း ဢမႄႇရိၵၢၼ်ႇၼၼ်ႉ ပဵၼ်ၶၵ်ႉတွၼ်ႈ ဢၼ်လမ်ႇလွင်ႈ တႃႇ “ၵႄႈလိတ်ႈ လွင်ႈပႅၵ်ႇပိူင်ႈ” လႄႈ “တမ်းဝၢင်း ပိုၼ်ႉထၢၼ် တႃႇတေ ၵႄႈလိတ်ႈ လွင်ႈပႅၵ်ႇပိူင်ႈ လႄႈ လွင်ႈႁူမ်ႈမိုဝ်း ႁႂ်ႈလိုၵ်ႉလမ်ႇ” ၼႆယဝ်ႉ။

ငိူၼ်ႈငဝ်ႈၶၢဝ်ႇ

• BBC News. "US and China agree to slash tariffs for 90 days" — BBC News, May 12, 2025
• Emma Farge and Olivia Le Poidevin. "US and China reach deal to temporarily slash tariffs, easing slump fears" — Reuters, May 12, 2025
• Nectar Gan, Auzinea Bacon and Juliana Liu. "US and China agree to drastically roll back tariffs in major trade breakthrough" — CNN, May 12, 2025
• Al Jazeera. "China and US agree to ease tariffs for 90 days as trade war talks extended" — Al Jazeera, May 12, 2025