ၶႄႇတေၵႄႈလိတ်ႈပၼ်ႁႃ ၶွၼ်ႇၵုၼ်ႇသိၼ်ၶဝ်ႈမိူင်း တင်းယူးရူပ်ႉ
ဝၼ်းသုၵ်း၊ ၾႅပ်ႇဝႃႇရီႇ 21၊ 2025
ၵဵဝ်ႇၵပ်းလွင်ႈ တေၶိုၼ်ႈၵႃႈၶၼ်ၶွၼ်ႇ ၵႃးၾႆးၾႃႉ ဢၼ်ႁဵတ်းဢွၵ်ႇ တီႈမိူင်းၶႄႇၼၼ်ႉ ၶႄႇ ၶတ်းၸႂ်ဢုပ်ႇဢူဝ်းၵၼ်တင်း ၸုမ်းၽွမ်ႉႁူမ်ႈယူးရူပ်ႉယူႇ ၼႆ ၽူႈတၢင်လၢတ်ႈ ႁွင်ႈၵၢၼ်လူင် ၵၢၼ်ၵႃႉၶၢႆၶႄႇ လၢတ်ႈဝႃႈ မိူဝ်ႈဝၼ်းၽတ်းၼၼ်ႉ ၼႆယဝ်ႉ။
ၶေႃႈပိုၼ်ၽၢဝ်ႇၼႆႉ ဢွၵ်ႇမႃး ဝၢႆးသေ ၸုမ်း EU ၶဝ် ၵဵပ်းၶွၼ်ႇၶဝ်ႈမိူင်း ၵႃးၾႆးၾႃႉ ၶႄႇ ႁၢဝ်ႈႁႅင်း ဢၼ်မီးၸမ် 4 လိူၼ်ၼၼ်ႉယဝ်ႉ။
ၶွမ်ႇမသျိၼ်ႇ ယူးရူပ်ႉ ဢၼ်ၵုမ်းၵမ် ပေႃႇလသီႇ ၵၢၼ်ၵႃႉၶၢႆ ၵူႈမိူင်းမိူင်း ၶွင် EU ၼၼ်ႉ မိူဝ်ႈလိူၼ်ဢွၵ်ႇထူဝ်ႇပႃႇ ပီၵၢႆၼၼ်ႉ လႆႈပၼ်သဵင်ၵၢင်ၸႂ် တႃႇတေ ယုၵ်ႉၶွၼ်ႇ လူတ်ႉၾႆးၾႃႉ ၶႄႇ ဢၼ်တေႃႉသူင်ႇၶဝ်ႈမိူင်းၼၼ်ႉ ႁႂ်ႈပဵၼ် 45.3% ဝၢႆးသေ EU ၵူတ်ႇထတ်းတူၺ်းဝႃႈ ၸွင်ႇၶွမ်ႇပၼီႇလူင်ၶႄႇ ၶဝ် လႆႈငိုၼ်းၵမ်ႉၸွႆႈ လူင်ပွင်ၸိုင်ႈ လႄႈ ၽွၼ်းလီငိုၼ်းတွင်း တွၼ်ႈတႃႇ လႆႈ လိၼ်၊ မၢၵ်ႇထၢတ်ႈ လႄႈ ၶူဝ်းၵုၼ်ႇပိူင်လိူင်း ဢၼ်ၵႃႈၶၼ်ယွမ်းလိူဝ်ၼႂ်း လွၵ်းၵၢတ်ႇၼၼ်ႉဝႃႈၼႆယဝ်ႉ။
ၵဵဝ်ႇၵပ်းလူၺ်ႈလွင်ႈၼႆႉသေ ၶႄႇၵေႃႈ ၶတ်းၸႂ်ဢုပ်ႇဢူဝ်းၵၼ် ႁႂ်ႈလီတီႈသုတ်းသေ ၸုမ်း EU ၵေႃႈ ႁူႉၸွမ်း ၶေႃႈတုၵ်းယွၼ်း ၵၢၼ်ပၢႆးမၢၵ်ႈမီး ၶႄႇၶဝ်သေ ၸတ်းႁဵတ်း ပၢင်ႁူပ်ႉထူပ်း ဢုပ်ႇဢူဝ်းၵၼ် ၼႆယဝ်ႉ။ He Yadong ၽူႈတၢင်လၢတ်ႈ ႁွင်ႈၵၢၼ်လူင် ၵၢၼ်ၵႃႉၶၢႆ မိူင်းၶႄႇ လၢတ်ႈဝႃႈ မုင်ႈမွင်းဝႃႈ တေဢဝ် လွင်ႈဢုပ်ႇဢူဝ်းၵၼ်သေ ႁဵတ်းႁႂ်ႈ လွင်ႈႁူမ်ႈမိုဝ်း ၵၢၼ်လူင်းတိုၼ်း ၼႂ်းၵႄႈ သွင်မိူင်း ၶိုၼ်ႈယႂ်ႇမႃး ၼႆယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Reuters. "China says 'doing its best' to push for tariff negotiations with EU" — Reuters, February 20, 2025
