ၶၢဝ်းတၢင်းၼွၵ်ႈမိူင်း ပွၵ်ႈဢွၼ်တၢင်းသုတ်း ၽွင်းလူင် ၵၢၼ်ၼွၵ်ႈမိူင်း ဢမႄႇရိၵၢၼ်ႇ
ဝၼ်းဢႃးတိတ်ႉ၊ ၾႅပ်ႇဝႃႇရီႇ 2၊ 2025

ၽွင်းလူင်ၽၢႆႇၼွၵ်ႈမိူင်း ဢမႄႇရိၵၢၼ်ႇ Marco Rubio တေဢွၵ်ႇၶၢဝ်းတၢင်း ပဵၼ်တၢင်းၵၢၼ် ပွၵ်ႈဢွၼ်တၢင်းသုတ်း ဢၼ်ပဵၼ် ၽူႈမီးၸၼ်ႉသုင် ၼႂ်းၸိုင်ႈမိူင်းသေ လႆႈတမ်းၽႅၼ်ဝႆႉ တႃႇတေၵႂႃႇဢႅဝ်ႇလႄႇ မိူင်းပႃႈၼႃးမႃး၊ မိူင်းဢႄႇသႃႇဝႃႇတေႃႇ၊ မိူင်းၵေႃးသတႃႇရိၵႃႇ၊ မိူင်းၵႂႃႇတမႃႇလႃႇ လႄႈ မိူင်းၸွမ်ပွင်ၸိုင်ႈ တူဝ်ႇမီႇၼီႇၵၼ်ႇ တႄႇဢဝ် ဝၼ်းသဝ် တေႃႇ ဝၼ်းၽတ်း ဝႃႈယဝ်ႉ။
လိူဝ်သေ လွင်ႈႁွင်ႈမိူင် ပႃႈၼႃးမႃးယဝ်ႉ ႁွင်ႈၵၢၼ်ၽၢႆႇၼွၵ်ႈမိူင်း မိူင်းဢမႄႇရိၵၢၼ်ႇ ဢွၵ်ႇၶေႃႈပိုၼ်ၽၢဝ်ႇဝႃႈ ၼႃႈတီႈဢၼ်တေဢုပ်ႇၵၼ်ၼၼ်ႉ တေပဵၼ်လွင်ႈဢၼ်ၵဵဝ်ႇၵပ်း ၵူၼ်းၶၢႆႉၶဝ်ႈမိူင်း၊ ၸုမ်းၵေႃႇၵၢၼ်ႁၢႆႉ ဢၼ်လတ်းၽၢၼ်ႇ ၸိုင်ႈမိူင်း လႄႈ ၵၢၼ်ၵႃႉၶၢႆယႃႈမဝ်းၵမ် ၼႆယဝ်ႉ။ ယဝ်ႉၵေႃႈ ပႃးဝႆႉဝႃႈ ပဵၼ်တႃႇသၢၼ်ၶတ်း လွင်ႈႁူမ်ႇငမ်း မိူင်းၶႄႇ ၼႆယဝ်ႉ။ လွင်ႈဢၼ် ၽွင်းလူင် ၽၢႆႇၼွၵ်ႈမိူင်း မႃးဢႅဝ်ႇလႄႇ မိူင်းပႃႈၼႃးမႃးၼႆႉ ပဵၼ်ယွၼ်ႉ ၸွမ်ပွင်ၸိုင်ႈထရမ်ႉ လၢတ်ႈဝႃႈ ယွၼ်ႉပိူဝ်ႈ ၶႄႇ မီးလွင်ႈႁူမ်ႇငမ်းၼိူဝ် ႁွင်ႈမိူင်ပႃႈၼႃးမႃး ဢၼ်လမ်ႇလွင်ႈတွၼ်ႈတႃႇ သၢႆတၢင်းၼမ်ႉ လွင်ႈၵႃႉၶၢႆႉလုမ်ႈၾႃႉလႄႈ ဢမႄႇရိၵၢၼ်ႇ တေႁဵတ်း တႃႇၶိုၼ်းၵုမ်းၵမ်လႆႈ ႁွင်ႈမိူင်ပႃႈၼႃးမႃး ဢၼ်ဝႃႈၼၼ်ႉယဝ်ႉ။ ၽွင်းလူင်ၽၢႆႇၼွၵ်ႈမိူင်း ရူႇပီႇယူဝ်ႇ မီးၽႅၼ်ၵၢၼ် တႃႇတေၵႂႃႇလႄႇ ႁွင်ႈမိူင်ပႃႈၼႃးမႃး မိူဝ်ႈမၼ်းႁွတ်ႈၽႅဝ် မိူင်းပႃႈၼႃးမႃး မိူဝ်ႈၼႆႉ။
လွင်ႈဢၼ် ၽွင်းလူင်ၼွၵ်ႈမိူင်း ဢမႄႇရိၵၢၼ်ႇ မႃးဢႅဝ်ႇလႄႇၼၼ်ႉၵေႃႈ မိူဝ်ႈၼႆႉ တီႈမိူင်းပႃႈၼႃးမႃး မီးလွင်ႈသၢၼ်ၶတ်းၼႄၵၢင်ၸႂ်ၼင်ႇၵဝ်ႇ။ ၸွမ်ပွင်ၸိုင်ႈ မိူင်းပႃႈၼႃးမႃး José Raúl Mulino ဢမ်ႇယွမ်းႁပ်ႉ ၶေႃႈပိုၼ်ၽၢဝ်ႇ ၸွမ်ပွင်ၸိုင်ႈထရမ်ႉသေ လၢတ်ႈဝႃႈ- ၶေႃႈတွပ်ႇမၼ်းတႄႉ ႁွင်ႈမိူင်ပႃႈၼႃးမႃးၼႆႉ ပဵၼ်ၶွင်မိူင်းပႃႈၼႃးမႃး ဝႃႈၼႆယဝ်ႉ။
ၸွမ်ပွင်ၸိုင်ႈ တေႃႇၼႄႇထရမ်ႉ ႁေႃႈလိုပ်ႈပႅတ်ႈ ၵူၼ်းၸိူဝ်းဢၼ် ၶဝ်ႈမႃးၼႂ်းမိူင်းဢမေႇရိၵၢၼ်ႇ လူၺ်ႈဢမ်ႇၸွမ်းမၢႆမီႈ ဢၢၼ်ႇႁူဝ်လၢၼ်ႉမၼ်း ပႃးၸဵမ်ၸိူဝ်းလုၵ်ႉတီႈ မိူင်းလႅတ်ႇတိၼ်ႇ ဢမႄႇရိၵၼၼ်ႉ ႁႂ်ႈပွၵ်ႈမိူဝ်းၶိုၼ်း။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Nike Ching. "Rubio heads to Central America, pursuing ‘America First’ diplomacy, countering China" — VOA News, January 31, 2025
- Jennifer Hansler and Priscilla Alvarez. "Rubio heads to Central America as Trump admin attempts crackdown on migration to US" — CNN, February 1, 2025
- Matthew Lee. "Rubio is off to Central America with the Panama Canal and immigration top of mind" — AP News, January 30, 2025
- News Wires. "Rubio to take up Panama Canal, immigration crackdown on Latin America debut trip" — france24, February 2, 2025