ၶွမ်ႇပၼီႇ Microsoft တေဢိုတ်းႁပ်း Skype ၼႂ်းလိူၼ်မေႇ
ဝၼ်းဢႃးတိတ်ႉ၊ မၢတ်ႉၶျ် 2၊ 2025
ၶွမ်ႇပၼီႇ Microsoft ၼႆႉ တေဢိုတ်းပႅတ်ႈ ၵၢၼ်ၸွႆႈသၢင်ႈ Skype ဢၼ်ၸႂ်ႉတိုဝ်း ဝီးတီးဢူဝ်း သေ ၵပ်းသိုပ်ႇတိတ်းတေႃႇၵၼ် ဢၼ်ၶဝ်သိုဝ်ႉမႃး မိူဝ်ႈပီ 2011 ၼၼ်ႉ လူၺ်ႈငိုၼ်းတေႃႇလႃႇ 8.5 ပီႇလီႇယၼ်ႇ ဢၼ်ၸွႆႈထႅမ် ႁႂ်ႈၵူၼ်းႁဝ်း ၵပ်းသိုပ်ႇၵၼ် ၼိူဝ်ဢွၼ်ႇလၢႆး မီးလွင်ႈလႅၵ်ႈလၢႆႈမႃးၼၼ်ႉယဝ်ႉ။
ၶွမ်ႇပၼီႇလူင် ပၢႆးၸၢင်ႈ လၢတ်ႈဝႃႈ မိူဝ်ႈဝၼ်းသုၵ်းၼၼ်ႉ ၶဝ်တေ လိုဝ်ႈၵၢၼ် Skype ၼႂ်းလိူၼ်မေႇသေ တေၶၢႆႉပၼ် ၵၢၼ်ၸႂ်ႉတိုဝ်း ၵမ်ႈၽွင်ႈ ၸူးတီႈ Microsoft Teams ဢၼ်ပဵၼ် ၶိူင်ႈၸႂ်ႉတိုဝ်း တႃႇႁဵတ်းပၢင်ၵုမ် လူၺ်ႈ ဝီးတီးဢူဝ်း လႄႈ ၶိူင်ႈၸႂ်ႉတိုဝ်း တႃႇၸုမ်းၼၼ်ႉၼႆယဝ်ႉ။ ၽူႈၸႂ်ႉတိုဝ်း Skype ၶဝ် တေၸၢင်ႈၸႂ်ႉတိုဝ်း ဢၵွင်ႉဢၼ်မီးဝႆႉၼၼ်ႉသေ ၶဝ်ႈၵႂႃႇၼႂ်း Teams လႆႈယူႇ။
Microsoft ၼႆႉ လႆႈဝႆႉ Teams ပဵၼ်ပိူင်ယႂ်ႇလိူဝ် Skype မႃးပီယၢဝ်းၶၢဝ်းႁိုင်ယဝ်ႉလႄႈ လွင်ႈတႅပ်းတတ်း တႃႇတေ ၽွတ်ႈႁႅၼ်း မိၵ်ႈမၢႆၼၼ်ႉ ၼႄပၼ် တၢင်းၶႂ်ႈလႆႈ ၶွင် ၶမ်ႇပၼီႇလူင် ပၢႆးၸၢင်ႈ တႃႇတေ ႁဵတ်းႁႂ်ႈ ဢႅပ်ႉၵပ်းသိုပ်ႇ ပိူင်လူင်မၼ်း ၶႅမ်ႉလႅပ်ႈ ယွၼ်ႉဝႃႈ မၼ်းတေလႆႈ ႁူပ်ႉထူပ်း ၽူႈၶေႉၶဵင်ႇ တင်းၼမ်ၼၼ်ႉယဝ်ႉ။
Skypeၼႆႉ လုၵ်ႉတီႈ ၸုမ်းပၢႆးၸၢင်ႈ တီႈဝဵင်းတႄႇလိၼ်ႇ မိူင်းဢႄႇသတူဝ်းၼီးယႃး လႆႈၵေႃႇတင်ႈမႃး မိူဝ်ႈပီ 2003 ၼၼ်ႉေပဵၼ် ၽူႈဢွၼ်ႁူဝ် ဢၼ်ၸႂ်ႉတိုဝ်း ဢိၼ်ႇတႃႇၼႅတ်ႉသေ ႁွင်ႉၾူၼ်း ဢၼ်တႅၼ်းတီႈ ၾူၼ်းၼိူဝ်လိၼ်ၼၼ်ႉယဝ်ႉ။ မၼ်းပိုင်ႈဢိင်ၼိူဝ် VOIP ဢၼ်ပဵၼ် လွၵ်းလၢႆး ဢၼ်ၸႂ်ႉတိုဝ်း သဵင် ၼိူဝ်ဢိၼ်ႇတႃႇၼႅတ်ႉ ဢၼ်ပဵၼ် ပၢႆးၸၢင်ႈ ဢၼ်လႅၵ်ႈလၢႆႈ သဵင် ႁႂ်ႈပဵၼ် သၢႆငၢႆ တိတ်ႇၵျိတ်ႇတႄႇလ် ဢၼ်သူင်ႇၼိူဝ်ဢွၼ်ႇလၢႆးၼၼ်ႉယဝ်ႉ။ ဝၢႆးသေ ၶွမ်ႇပၼီႇ ဢၼ်ၶၢႆၶူဝ်းၶွင်ၼိူဝ်ဢွၼ်ႇလၢႆး eBay သိုဝ်ႉဢဝ် ၵၢၼ်ၸႂ်ႉတိုဝ်း မိူဝ်ႈပီ 2005 ၼၼ်ႉယဝ်ႉ Skype ၼႆႉ လႆႈသႂ်ႇပႃး လွင်ႈႁွင်ႉၽူၼ်း လူၺ်ႈ ဝီးတီးဢူဝ်းယဝ်ႉ။
ၶူးသွၼ် ၽၢႆႇၸတ်းၵၢၼ် တီႈၸၼ်ႉၸွမ် Northeastern ဢၼ်လဵပ်ႈႁဵၼ်းပိုၼ်း လွင်ႈႁဵတ်းၵၢၼ် ဢၼ်ၸႂ်ႉတိုဝ်း ၶိူင်ႈၸၢၵ်ႈ လႄႈ လွင်ႈႁဵတ်းၵၢၼ် တီႈၵႆၼၼ်ႉ လၢတ်ႈဝႃႈ “တႃႇတေ ၵပ်းသိုပ်ႇ ဝီးတီးဢူဝ်း ဢၼ်မီးၼမ်ႉၵတ်ႉလီၼၼ်ႉ ဢမ်ႇလူဝ်ႇပဵၼ် ၽူႈၸတ်းၵၢၼ် ၸၼ်ႉသုင် တီႈၶွမ်ႇပၼီႇ Fortune 500 ၼၼ်ႉယဝ်ႉ။ ႁဵတ်းႁႂ်ႈၵူၼ်းတင်းလုမ်ႈၾႃႉ ၸမ်ၸႂ်ၵၼ်မႃးတင်းၼမ်” ၼႆယဝ်ႉ။
လွင်ႈဢၼ် ၸၢင်ႈပူၼ်ႉလွတ်ႈလႆႈ လွင်ႈႁွင်ႉၾူၼ်း ဢၼ်ၵႃႈၶၼ်ယႂ်ႇ ၵူႈမိူင်းမိူင်းသေ ၵပ်းသိုပ်ႇ ၵူၼ်းႁဵတ်းၵၢၼ်ၸွမ်းၵၼ် ဢၼ်ယူႇၵႆၼၼ်ႉ ပဵၼ်ၽွၼ်းလီ တႃႇ ၶွမ်ႇပၼီႇ ဢၼ်တႄႇတင်ႈ ၵၢၼ်ငၢၼ်း သေဢမ်ႇၵႃး ၵူၼ်းၸိူဝ်း ယူႇၼွၵ်ႈ ၵၢၼ်ပၢႆးမၢၵ်ႈမီး ၼၼ်ႉၵေႃႈ ပဵၼ်ၽွၼ်းလီ တႃႇၶဝ်ယဝ်ႉ။
လႃႇသျိၼ်ႇ လၢတ်ႈဝႃႈ “ၵိုင်ႉၵၢင်ႉ ၸၢင်ႈလႆႈ ႁွင်ႉၾူၼ်း ၶၢဝ်းယၢဝ်း ၵႆႉၵႆႉ ႁွင်ႉၾူၼ်း ဢၼ်ဢမ်ႇလႆႈသဵင်ႈငိုၼ်း ဢမ်ႇၼၼ် ဢမ်ႇၵႃႈၶၼ်ယႂ်ႇ ၼႃႇၼၼ်ႉယဝ်ႉ။ မိူၼ်ၼင်ႇ တေးတၢင်းမႂ်ႇတၢင်ႇၸိူဝ်းၼၼ်ႉ ၵူၼ်းလႅၼ်ငိုၼ်းၶဝ်ၵေႃႈ ၸႂ်ႉတိုဝ်းမႃး။
ထိုင်မႃး ပီ 2011 မိူဝ်ႈ Microsoft သိုဝ်ႉဢဝ်တီႈ eBay ၼၼ်ႉ ၵူၼ်းၸႂ်ႉတိုဝ်း Skype ၼႂ်းလုမ်ႈၾႃႉ မီးမွၵ်ႈ 170 လၢၼ်ႉ ၼႆ ၽူႈၵွၼ်းၵၢၼ် Microsoft မိူဝ်ႈၼၼ်ႉ ဢၼ်ပဵၼ် Steve Ballmer လၢတ်ႈတီႈပၢင်ပိုၼ်ၽၢဝ်ႇ လွင်ႈတေႁူမ်ႈႁွမ်းၵၼ်ၼၼ်ႉယဝ်ႉ။
မိူဝ်ႈၼၼ်ႉ Ballmer လၢတ်ႈဝႃႈ “မိၵ်ႈမၢႆ Skype ၼႆႉ ပဵၼ်မႃး ၶေႃႈၵႂၢမ်း ဢၼ်ၸမ်တေမိူၼ်ၵၼ်တင်း လွင်ႈၵပ်းသိုပ်ႇ ဝီးတီးဢူဝ်း လႄႈ သဵင်ၼၼ်ႉယဝ်ႉ။
မိူဝ်ႈပီ 2017 ၼၼ်ႉ မိူဝ်ႈၽွင်း ၸွမ်ပွင်ၸိုင်ႈ တေႃႇၼႄႇထရမ်ႉ လႆႈတႄႇပိုတ်ႇ လူင်ပွင်ၸိုင်ႈ ဢမ်ႇႁိုင်သင်ၼႆႉ ၸႂ်ႉတိုဝ်း Skype သေ တွင်ႈထၢမ် ၽူႈသိုဝ်ႇၶၢဝ်ႇ ဢၼ်ၵႆယၢၼ် ႁွင်ႈသိုဝ်ႇၶၢဝ်ႇ ႁိူၼ်းၽိူၵ်ႇၼၼ်ႉယူႇ။ ဝၢႆးသေၼၼ်ႉ လိူၼ်႞ယဝ်ႉ ၶွမ်ႇပၼီႇ Microsoft ၸင်ႇပိုတ်ႇၽုၺ်ႇ Teams ဢၼ်ပဵၼ် လွင်ႈၶတ်းၸႂ် တႃႇတေ ၶိုတ်းၵၢပ်ႈ လွင်ႈလူဝ်ႇ ၵၢၼ်ၵပ်းသိုပ်ႇ တီႈႁဵတ်းၵၢၼ် ဢၼ် ၶွမ်ႇပၼီႇ ဢၼ်ၶႄႉၶဵင်ႇၵၼ် ဢၼ်ပဵၼ် Slack Technologies ႁဵတ်းဢွၵ်ႇမႃးၼၼ်ႉယဝ်ႉ။
Slack လႄႈ Teams ဢိၵ်ႇပႃး ပိူင်ၵၢၼ် ဝီးတီးဢူဝ်း ဢၼ်မႂ်ႇမႂ်ႇ မိူၼ်ၼင်ႇ Zoom ၼၼ်ႉ လႆႈႁၼ် လွင်ႈၶိုၼ်ႈယႂ်ႇ ဢၼ်တႅၵ်ႇလႅင်း ၽွင်းယၢမ်း တၢင်းပဵၼ် COVID-19 ၽႄႈလၢမ်းၼၼ်ႉ ယွၼ်ႉဝႃႈ ၶွမ်ႇပၼီႇၶဝ် ၶတ်းၸႂ် တႃႇတေ ၶၢႆႉၵႂႃႇႁဵတ်းၵၢၼ် တီႈၵႆ လႄႈ တေႃႇထိုင် ၵူၼ်းမုင်ႉႁေႃႁိူၼ်း လႄႈ ဢူၺ်းၵေႃႉ ၶဝ် လႆႈႁႃ ၶိူင်ႈမႂ်ႇ တႃႇတေ ႁူပ်ႉထူပ်းၵၼ် ၼိူဝ်ဢွၼ်ႇလၢႆးၼၼ်ႉယဝ်ႉ။ မိူဝ်ႈၼၼ်ႉ Skype ၼႆႉ မၼ်းယွမ်းလူင်းၵႂႃႇယဝ်ႉသေတႃႉ မၼ်းပိုတ်ႇပၼ်တၢင်း တႃႇတေႁဵတ်းႁႂ်ႈ လွင်ႈၵပ်းသိုပ်ႇ ဢၼ်ၵူၼ်းႁဝ်း ယူႇတီႈၵႆသေ ႁဵတ်းသၢင်ႈလႆႈၼၼ်ႉ ပဵၼ်ဢၼ်ၵႅၼ်ႇၶႅင်မႃးယဝ်ႉ။
လႃႇသျိၼ်ႇ လၢတ်ႈဝႃႈ “သိုဝ်ႇၶၢဝ်ႇ ဢၼ်မီးၼမ်ႉၵတ်ႉ သုင်လိူဝ်ၼၼ်ႉ ၸၢင်ႈႁဵတ်းႁႂ်ႈ လွင်ႈၵပ်းသိုပ်ႇ ၶိုၼ်ႈယႂ်ႇမႃးတႄႉတႄႉသေ ႁဵတ်းႁႂ်ႈ ၵူၼ်းႁဝ်း ႁဵတ်းၵၢၼ်လႆႈ ၸွမ်းပၼ်ႁႃ ဢၼ်သုၵ်ႉသၵ်ႉၼၼ်ႉ လီလိူဝ်ၵဝ်ႇ။ “ၵိုင်ႉၵၢင်ႉသေ၊ ၽူႈလႂ်ၽႂ်သေဢမ်ႇဝႃႈ ပေႃးမီး ဢိၼ်ႇတႃႇၼႅတ်ႉ ဢၼ်ထုၵ်ႇမႅၼ်ႈၼၼ်ႉ ၸၢင်ႈၸႂ်ႉတိုဝ်းလႆႈသေ ၼၼ်ႉ မၼ်းပဵၼ်လွင်ႈတၢင်း လုၵ်ႉၽိုၼ်ႉ ဢၼ် Skype မီးဝႆႉ တႄႉတႄႉၼၼ်ႉယဝ်ႉ ဝႃႈၼႆ။”
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Matt O’brien. "Microsoft shutting down Skype in May" — AP News, March 1, 2025
- Graham Fraser. "Microsoft announces Skype will close in May" — BBC News, March 1, 2025
- Jordan Valinsky,. "Skype is shutting down after two decades" — CNN, March 1, 2025
- Jordan Novet. "Microsoft is shutting down Skype after a 21-year run. Here's how it lost out to video call rivals" — CNBC, February 28, 2025
