Jump to content

ၶွမ်ႇပၼီႇထၢႆႇဝၢၼ်း ပိုၼ်ၽၢဝ်ႇဝႃႈ တေလူင်းတိုၼ်းထႅင်ႈ 100 ပီႇလီႇယၼ်ႇတေႃႇလႃႇ တီႈယူႇဢႅသ်ႉ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းပုတ်ႉ၊ မၢတ်ႉၶျ် 5၊ 2025

ႁူင်းၵၢၼ်ၸၢၵ်ႈ TSMC တီႈ ထၢႆႇဝၢၼ်း

ၸွမ်ပွင်ၸိုင်ႈဢမႄႇရိၵၢၼ်ႇ ထရမ်ႉ လၢတ်ႈဝႃႈ ၵၢၼ်ႁဵတ်းဢွၵ်ႇ ၶႅပ်းၶျိပ်ႉ (Chips) တႃႇၶိူင်ႈၸၢၵ်ႈ ပၢႆးၸၢင်ႈၼႆႉ ပဵၼ်လွင်ႈႁူမ်ႇလူမ်ႈၸိူဝ်ႉၸၢတ်ႈ တႃႇဢမႄႇရိၵၢၼ်ႇ ၼႆယဝ်ႉ။

ဝၢႆးသေ ႁူပ်ႉထူပ်း ၸွမ်ပွင်ၸိုင်ႈ တေႃႇၼႄႇထရမ်ႉ တီႈႁိူၼ်းၽိူၵ်ႇ မိူဝ်ႈဝၼ်းၸၼ်ၼၼ်ႉသေ ဢုပ်ႇၵၼ် လွင်ႈၽႅၼ်ၵၢၼ် ဢၼ်ၶွမ်ႇပၼီႇ ႁဵတ်းဢွၵ်ႇ ၶိူင်ႈၸၢၵ်ႈ TSMC မိူင်းထၢႆႇဝၢၼ်း တေလူင်းတိုၼ်း 100 ပီႇလီႇယၼ်ႇတေႃႇလႃႇ တီႈႁူင်းၵၢၼ် ၶိူင်ႈၸၢၵ်ႈ ထႅင်ႈ 5 တီႈ တီႈမိူင်းဢမႄႇရိၵၢၼ်ႇ ၼႂ်းပီၼႃႈၼၼ်ႉယဝ်ႉ ထရမ်ႉ လႆႈလၢတ်ႈမႃးၸိူင်ႉၼႆ။

TSMC ၼႆႉ ပဵၼ်ၶွမ်ႇပၼီႇ ဢၼ်ႁဵတ်းဢွၵ်ႇ ၶိူင်ႈၸၢၵ်ႈၶျိပ်ႉ ဢၼ်ယႂ်ႇလိူဝ်ပိူၼ်ႈ ၼႂ်းလုမ်ႈၾႃႉသေ ႁဵတ်းဢွၵ်ႇပၼ် ၶိူင်ႈၸၢၵ်ႈၶျိပ်ႉ တႃႇၶွမ်ႇပၼီႇ ဢမႄႇရိၵၢၼ်ႇ တင်းၼမ်။ လိူဝ်ၼၼ်ႉ ထရမ်ႉ လၢတ်ႈဝႃႈ ဢမႄႇရိၵၢၼ်ႇ တေလႆႈၵေႃႇသၢင်ႈ ႁူင်းၵၢၼ် တႃႇတေႁဵတ်းဢွၵ်ႇ ၶိူင်ႈၸၢၵ်ႈ ၶျိပ်ႉ လႄႈ ၶိူင်ႈၸၢၵ်ႈ ဢၼ်လူဝ်ႇၼၼ်ႉ ၼႆယဝ်ႉ။

ပေႃးႁဝ်းၶႃႈ ႁဵတ်းဢွၵ်ႇလႆႈ ၼႂ်းမိူင်းၼႆ မိူင်းဢမႄႇရိၵၢၼ်ႇ တေဢမ်ႇပေႃးလႆႈပိုင်ႈဢိင် ၵူၼ်းႁဵတ်းဢွၵ်ႇ ဢေးသျႃးၶဝ် ဝႃႈၼႆ။

မိူဝ်ႈလိူၼ်ဢေႇပရႄႇ ပီၵၢႆၼၼ်ႉ TSMC လႆႈၸႂ်ၵၼ်ဝႃႈ တေလူင်းတိုၼ်းထႅင်ႈ 25 ပီႇလီႇယၼ်ႇတေႃႇလႃႇ တီႈမိူင်းဢမႄႇရိၵၢၼ်ႇသေ ႁူမ်ႈၵၼ်တင်းမူတ်း တေမီး 65 ပီႇလီႇယၼ်ႇတေႃႇလႃႇ ၼႆယဝ်ႉ။

မိူဝ်ႈပီၵၢႆၼၼ်ႉ TSMC လႆႈၸႂ်ၵၼ်ဝႃႈ တေႁဵတ်းဢွၵ်ႇ ပၢႆးၸၢင် 2 ၼႃႇၼူဝ်ႇမီႇတႃႇ ဢၼ်ၶိုတ်းၵၢပ်ႈလိူဝ်ပိူၼ်ႈ ၼႂ်းလုမ်ႈၾႃႉ တီႈႁူင်းၵၢၼ် ဢႃႇရိတ်ႉၸူဝ်းၼႃး ထူၼ်ႈသွင် ဢၼ်မုင်ႈမွင်းဝႃႈ တေတႄႇႁဵတ်းဢွၵ်ႇ ၼႂ်းပီ 2028 ၼႆသေ TSMC ၵေႃႈ လႆႈၸႂ်ၵၼ်ဝႃႈ တေၸႂ်ႉတိုဝ်း ပၢႆးၸၢင် ႁဵတ်းဢွၵ်ႇ ၶိူင်ႈၸၢၵ်ႈ ဢၼ်ၶိုတ်းၵၢပ်ႈလိူဝ်ပိူၼ်ႈ ဢၼ်ႁွင်ႉဝႃႈ "A16" တီႈၸေႊမိူင်း ဢႃႇရိတ်ႉၸူဝ်းၼႃးၼၼ်ႉယူႇ။

TSMC ၼႆႉ တႄႇႁဵတ်းဢွၵ်ႇ ၶိူင်ႈၸၢၵ်ႈၶျိပ်ႉ 4 ၼႃႇၼူဝ်ႇမီႇတႃႇ ဢၼ်ၶိုတ်းၵၢပ်ႈ တႃႇၵူၼ်းၸႂ်ႉတိုဝ်း မိူင်းဢမႄႇရိၵၢၼ်ႇ တီႈၸႄႈမိူင်း Arizona မႃးယဝ်ႉ။

ႁူင်းၵၢၼ် ပွၵ်ႈၵမ်းသၢမ် တေၵေႃႇသၢင်ႈ တီႈၸႄႈမိူင်း Arizona ၼႂ်းပီ 2030 ၼႆယဝ်ႉ။ ဢမႄႇရိၵၢၼ်ႇ မႆႈၸႂ်ၸွမ်း လွင်ႈဢၼ် လႆႈပိုင်ႈဢိင် ၵၢၼ်ႁဵတ်းဢွၵ်ႇ ၶိူင်ႈၸၢၵ်ႈၶျိပ်ႉ မိူင်းထၢႆႇဝၢၼ်းၼၼ်ႉသေ ပိူင်လူင်မၼ်း ယွၼ်ႉၶႄႇ တဵၵ်းတဵင် မိူင်းထၢႆႇဝၢၼ်း ၼမ်မႃး။ မိူင်းၶႄႇတႄႉ လၢတ်ႈဝႃႈ မိူင်းထၢႆႇဝၢၼ်းၼႆႉ ယူႇတႂ်ႈဢႃႇၼႃႇၽွင်းငမ်းၶဝ် ၼႆယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ၶွမ်ႇပၼီႇထၢႆႇဝၢၼ်း_ပိုၼ်ၽၢဝ်ႇဝႃႈ_တေလူင်းတိုၼ်းထႅင်ႈ_100_ပီႇလီႇယၼ်ႇတေႃႇလႃႇ_တီႈယူႇဢႅသ်ႉ&oldid=11353"