ၵူႇတႄႇရႅတ်ႉ ၽူႈၼမ်းၸၢတ်ႈၸိုင်ႈလုမ်ႈၾႃႉ UN ပၼ်ၾၢင်ႉဝႃႈ ‘ငိုၼ်းတွင်း ၸမ်တေလူႉလႅဝ်’

ဝၼ်းသုၵ်း၊ ၸၼ်ႇဝႃႇရီႇ 30၊ 2026 

ၸွမ်းၼင်ႇ လိၵ်ႈဢၼ် သိုဝ်ႇၶၢဝ်ႇ Reuters လႆႈႁၼ် မိူဝ်ႈဝၼ်းသုၵ်းၼၼ်ႉ ၽူႈၼမ်းၼႂ်း U.N လၢတ်ႈတီႈ ၸႄႈမိူင်းၶဝ်ဝႃႈ ၸုမ်းၶဝ်ၼႆႉ မီးၽေးၶဵၼ် လွင်ႈငိုၼ်းတွင်းၵူၼ်ႇပင်း ၼႂ်းၶၢဝ်းတၢင်း ဢမ်ႇႁိုင်သင်ၼႆသေ ဢိင်ၼိူဝ် ၵႃႈၸႂ်ႉၸၢႆႇ ဢၼ်ဢမ်ႇလႆႈပၼ် လႄႈ ပၵ်းပိူင် ငိုၼ်းတွင်း ဢၼ်တဵၵ်းႁႂ်ႈ ၸုမ်းလုမ်ႈၾႃႉ လႆႈပၼ်ၶိုၼ်း ငိုၼ်းဢၼ်ဢမ်ႇၸႂ်ႉတိုဝ်းၼၼ်ႉ ၼႆယဝ်ႉ။

ၽူႈၼမ်းၼႂ်းလူင် ၸၢတ်ႈၸိုင်ႈလုမ်ႈၾႃႉ ဢႅၼ်ႇတူဝ်ႇၼီႇယူဝ်ႇ ၵူဝ်ႇတႄႇရႅတ်ႉ တႅမ်ႈလိၵ်ႈၸူး ၽူႈတၢင်တူဝ် မိူဝ်ႈဝၼ်းတီႈ 28 လိူၼ်ၸၼ်ႇဝႃႇရီႇၼၼ်ႉဝႃႈ “လွင်ႈၶွင်ႈၶမ်ၼႆႉ ယႂ်ႇမႃးတိၵ်းတိၵ်းသေ ႁဵတ်းႁႂ်ႈ ၵၢၼ်ႁဵတ်းသၢင်ႈ ပရူဝ်ႇၵရႅမ်ႇ လႄႈ ၽေးၶဵၼ် ငိုၼ်းတွင်း ၵူၼ်ႇပင်းၵႂႃႇ ၼႆယဝ်ႉ။

ၸုမ်း U.N ၼႆႉ လႆႈႁူပ်ႉထူပ်း လွင်ႈၶွင်ႈၶမ် ငိုၼ်းတွင်း ယွၼ်ႉဝႃႈ ၸုမ်းဢၼ်ၸွႆႈထႅမ် ငိုၼ်းတွင်း ယႂ်ႇသုတ်း ၼႂ်းလုမ်ႈၾႃႉ ဢၼ်ပဵၼ် ဢမႄႇရိၵၢၼ်ႇၼၼ်ႉ လႆႈတတ်းပႅတ်ႈ ငိုၼ်းၵွင်ၵၢင် ဢၼ်ပၼ်လူၺ်ႈၸေႇတၼႃႇ တႃႇၸုမ်း U.N သေ ဢမ်ႇယွမ်းႁပ်ႉ တႃႇတေပၼ်ငိုၼ်း ဢၼ်လူဝ်ႇလႆႈ ပၼ် တီႈငိုၼ်းၵွင်ၵၢင် U.N ဢၼ်ၸႂ်ႉတိုဝ်း ၸွမ်းပိူင် လႄႈ ငိုၼ်းၵွင်ၵၢင် လွင်ႈငမ်းယဵၼ်။

ၼႂ်းလိၵ်ႈၼၼ်ႉ Guterres လၢတ်ႈဝႃႈ "လွင်ႈတႅပ်းတတ်း တႃႇတေဢမ်ႇယုၵ်ႉယွင်ႈ လွင်ႈၵမ်ႉၸွႆႈထိုင် ဢၼ်လႆႈတႅပ်းတတ်းဝႆႉ တႃႇၵမ်ႉၸွႆႈငိုၼ်းၵွင်ၵၢင် ဢၼ်လမ်ႇလွင်ႈ ၶွင်ငိုၼ်းတွင်း ဢၼ်လႆႈမၵ်းမၼ်ႈဝႆႉၼၼ်ႉ လႆႈပိုၼ်ၽၢဝ်ႇဝႆႉ ပဵၼ်တၢင်းၵၢၼ်ယဝ်ႉ" ၼႆယဝ်ႉ။

မၼ်းလၢတ်ႈလွင်ႈၸိုင်ႈမိူင်း ဢမ်ႇၼၼ် ၸိုင်ႈမိူင်းဢၼ်လႂ်ၼႆတႄႉ ဢမ်ႇလႆႈႁူႉၸွမ်းၵမ်းလဵဝ်လႄႈ ၽူႈတၢင်လၢတ်ႈ U.N. လၢတ်ႈဝႃႈ “ၸိုင်ႈမိူင်းၽူႈၶဝ်ႈၸုမ်းတင်းသဵင်ႈ တေလႆႈႁဵတ်းၸွမ်း ပုၼ်ႈၽွၼ်းၶဝ် တႃႇတေပၼ်ငိုၼ်း ႁႂ်ႈတဵမ်ထူၼ်ႈ ၸွမ်းၶၢဝ်းယၢမ်းမၼ်း – ဢမ်ႇၼၼ် ၸိုင်ႈမိူင်းၽူႈၶဝ်ႈၸုမ်း တေလႆႈမူၼ်ႉမႄး ပၵ်းပိူင်ငိုၼ်းတွင်း ႁဝ်းၶႃႈ ႁႂ်ႈပဵၼ်ပိုၼ်ႉထၢၼ် တႃႇတေႁႄႉၵင်ႈ လွင်ႈဢၼ်ငိုၼ်းတွင်း တေၵူၼ်ႇပင်းၵႂႃႇ ၼႂ်းၶၢဝ်းတၢင်းဢမ်ႇႁိုင်သင်ၼၼ်ႉယူႇ” ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Emma Farge. "UN chief Guterres warns of 'imminent financial collapse'" — Reuters, January 30, 2026
• Reuters. "UN chief warns global body at risk of ‘imminent financial collapse’" — The Times of Israel, January 30, 2026
• Reuters. "UN chief Antonio Guterres warns of 'imminent financial collapse'" — The Economic Times, January 30, 2026