ၵမ်ႇပေႃးတီးယႃး တုၵ်းယွၼ်းႁႂ်ႈၵိုတ်းတိုၵ်းၵၼ်တင်းထႆးဝႆးဝႆး ယွၼ်ႉၵူၼ်းတၢႆၼမ်

ဝၼ်းသဝ်၊ ၸူႇလၢႆႇ 26၊ 2025 

တပ်ႉသိုၵ်းထႆး ၽိုၵ်းၵၢၼ်သိုၵ်း (ၶႅပ်းႁၢင်ႈၵဝ်ႇ)

ၵမ်ႇပေႃးတီးယႃး တုၵ်းယွၼ်း ႁႂ်ႈၵိုတ်းတိုၵ်း တင်းမိူင်းထႆး “ၵမ်းလဵဝ်” ယွၼ်ႉဝႃႈ သွင်မိူင်း လႆႈႁၼ် ၵူၼ်းတၢႆ 30 ၵေႃႉလိူဝ် ပႃးၸဵမ်ၵူၼ်းမိူင်း ၼႂ်းပၢင်တိုၵ်း လႅၼ်လိၼ် ဢၼ်တိုၵ်ႉပဵၼ်ယူႇၼႆႉ ၼႆယဝ်ႉ။

ၽူႈတၢင်တူဝ် မိူင်းၵမ်ႇပေႃးတီးယႃး တီႈ UN ဢၼ်ပဵၼ် Chhea Keo လၢတ်ႈဝႃႈ မိူင်းမၼ်း ယွၼ်းႁႂ်ႈၵိုတ်းတိုၵ်း “ဢမ်ႇမီးၶေႃႈမၵ်းမၼ်ႈသင်” ၼႆသေ သိုပ်ႇလၢတ်ႈဝႃႈ ၽၼူမ်းပဵင်းၵေႃႈ ၶႂ်ႈႁႂ်ႈ “ၵႄႈလိတ်ႈပၼ်ႁႃ လွင်ႈထဵင်ထွင်ၵၼ် လူၺ်ႈလွင်ႈငမ်းယဵၼ်” ၼႆယဝ်ႉ။

ၽွင်းလူင်ၽၢႆႇၼွၵ်ႈမိူင်း မိူင်းထႆး Maris Sangiampongsa လၢတ်ႈဝႃႈ တႃႇတေဢုပ်ႇဢူဝ်းၵိုတ်းတိုၵ်း တေသိုပ်ႇႁဵတ်းၵႂႃႇၼၼ်ႉ မိူင်းၵမ်ႇပေႃးတီးယႃး လူဝ်ႇလႆႈၼႄ လွင်ႈသိုဝ်ႈယူဝ်း ဢၼ်ၸႅတ်ႈၸၢင်ႇ တႃႇတေၵိုတ်းယိုတ်း ပၢင်တိုၵ်း ၼႆယဝ်ႉ။

မိူင်းဢေးသျႃးၸဵင်ႇၸၢၼ်းဝၼ်းဢွၵ်ႇ သွင်မိူင်း ဢၼ်ၼႄးၵၼ်ဝႃႈ ပဵၼ်ၵေႃႉယိုဝ်း ဢွၼ်တၢင်းသုတ်း မိူဝ်ႈဝၼ်းၽတ်းၼၼ်ႉ ၵူၼ်းသိုၵ်း လႄႈ ၵူၼ်းမိူင်း လႆႈတၢႆၵႂႃႇ ဢမ်ႇယွမ်း 32 ၵေႃႉသေ ၵူၼ်းပၢႆႈၽေးသိုၵ်း မီး 2 သႅၼ်ပၢႆ ၼႆယဝ်ႉ။

မိူဝ်ႈဝၼ်းသဝ်ၼၼ်ႉ ပၢင်တိုၵ်းသိုပ်ႇပဵၼ်ထႅင်ႈ ဝၼ်းတီႈ 3 ။ ၽၢႆႇသိုၵ်းထႆးၶဝ် လၢတ်ႈဝႃႈ ၵမ်ႇပူးၶျႃးၶဝ် ပိုတ်ႇၼႃႈသိုၵ်း တီႈၼႃႈလိၼ်မႂ်ႇ ႁိမ်းၽင်ႇပၢင်ႇလၢႆႇ ၽၢႆႇႁွင်ႇၼၼ်ႉသေတႃႉ လႆႈထုၵ်ႇ တပ်ႉၼမ်ႉၶဝ် တဵၵ်းၶိုၼ်း ၼႆယဝ်ႉ။

ဢွၼ်ၼႃႈၼႆႉ မိူင်းထႆး ပိုၼ်ၽၢဝ်ႇဝႃႈ ပဵၼ်ပၢင်တိုၵ်း တီႈၸႄႈမိူင်း သူႇရိၼ်ႇ၊ ပိုၼ်ၽၢဝ်ႇဝႆႉ မၢႆမီႈသိုၵ်း ၼႂ်းၸႄႈဝဵင်း 8 ၸႄႈဝဵင်း ဢၼ်တိတ်းၸပ်းၵၼ် တင်းမိူင်းၵမ်ႇပေႃးတီးယႃး။

ၽူႈမီးပုၼ်ႈၽွၼ်း တီႈဝဵင်းၵုင်းထဵပ်ႈ လၢတ်ႈဝႃႈ တႄႇဢဝ် ဝၼ်းၽတ်းၼၼ်ႉ ၵူၼ်းမိူင်း 13 ၵေႃႉ လႄႈ ၵူၼ်းသိုၵ်း 6 ၵေႃႉ လႆႈတၢႆၵႂႃႇ ၼႂ်းမိူင်း 19 ၵေႃႉ ၼႆယဝ်ႉ။

ၵူၼ်းမိူင်း 140,000 ပၢႆ လႆႈၶၢႆႉတီႈယူႇယဝ်ႉ ၸဝ်ႈၼႃႈတီႈထႆး သိုပ်ႇလၢတ်ႈထႅင်ႈၼင်ႇၼႆ။ ၽၢႆႇၵႅတ်ႇၶႄ မိူင်းၵမ်ႇပေႃးတီးယႃး ပိုၼ်ၽၢဝ်ႇဝႃႈ ၵူၼ်းတၢႆ 13 ၵေႃႉ - ၵူၼ်းမိူင်း 8 ၵေႃႉ လႄႈ ၵူၼ်းသိုၵ်း 5 ၵေႃႉ ၼႆယဝ်ႉ။ လၢတ်ႈဝႃႈ ၵူၼ်းမိူင်း ဢၼ်လႆႈပၢႆႈဢွၵ်ႇႁိူၼ်းယေး မီး 35,000 ၵေႃႉလိူဝ် ၼႆယဝ်ႉ။

မိူဝ်ႈဝၼ်းသုၵ်းၼၼ်ႉ ၸွမ်ၽွင်းလူင် မိူင်းထႆး ဢၼ်ႁၢပ်ႇၵၢၼ် ၸွမ်ၽွင်းလူင် မိူင်းထႆး ပၼ်ၾၢင်ႉဝႃႈ လွင်ႈတိုၵ်းတေႃးၵၼ်ၼႆႉ ၸၢင်ႈပဵၼ်မႃး ပၢင်တိုၵ်းၼႆယဝ်ႉ။

မၼ်းလၢတ်ႈဝႃႈ မိူဝ်ႈလဵဝ် ပၢင်တိုၵ်းၼႆႉ ပႃးၵွင်ႈလူင်သေ ၽႄႈလၢမ်းၵႂႃႇ ၸွမ်းလႅၼ်လိၼ် 12 တီႈယဝ်ႉ ဝႃႈၼႆ။

မိူင်းထႆးၵေႃႈ ၼႄးဝႃႈ မိူင်းၵမ်ႇပေႃးတီးယႃး ယိုဝ်းသႂ်ႇၼႂ်းပိုၼ်ႉတီႈၵူၼ်းမိူင်းသေ လႆႈၶၢႆႉဢွၵ်ႇပႅတ်ႈ ဝၢၼ်ႈၸိူဝ်းဢၼ် မီးၼႂ်းၵႄႈ ဢၢင်ႈၶႂၢင်ႇ မၢၵ်ႇလူင်ၶဝ်ၼၼ်ႉ တင်းမူတ်း။

ၽၢႆႇမိူင်းၵမ်ႇပေႃးတီးယႃးတႄႉ ၼႄးဝႃႈ မိူင်းထႆး ၸႂ်ႉတိုဝ်း မၢၵ်ႇၵလၢတ်ႇသ်တႃႇ၊ မၢၵ်ႇၵလၢတ်ႇသ်တႃႇၼၼ်ႉ လႆႈထုၵ်ႇႁၢမ်ႈတၢပ်ႈဝႆႉ ၼႂ်းလုမ်ႈၾႃႉ ၵမ်ႈၼမ် ယွၼ်ႉပိူဝ်ႈ မၼ်းၸၢင်ႈတုမ်ႉတိူဝ်ႉပဵၼ်ၽေးတေႃႇ ၵူၼ်းမိူင်း။ ၵဵဝ်ႇၵပ်းလွင်ႈၼႆႉ မိူင်းထႆး ပႆႇတုမ်ႉတွပ်ႇသင်မႃး။

ၽွင်းၼၼ်ႉ ၽွင်းလူင်ၽၢႆႇၼွၵ်ႈမိူင်း မိူင်းထႆး လၢတ်ႈတီႈ သိုဝ်ႇၶၢဝ်ႇ Reuters ဝႃႈ ၽူႈဢွၼ်ႁူဝ်လုမ်ႈၾႃႉၶဝ် တုၵ်းယွၼ်းႁႂ်ႈၵိုတ်းတိုၵ်းၵမ်းလဵဝ်သေတႃႉ ဢမ်ႇလူဝ်ႇ ၽၢႆႇထူၼ်ႈသၢမ် ၵႄႈလိတ်ႈပၼ်ႁႃ ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Jaroslav Lukiv. "Cambodia calls for immediate ceasefire with Thailand as death toll rises" — BBC News, JULY 26, 2025
• The Nation. "Thai Ambassador to UNSC condemns Cambodia’s violations, calls for immediate ceasefire and peace talks" — The Nation, JULY 26, 2025
• Euronews with AP. "Cambodia calls for 'immediate ceasefire' with Thailand as deaths rise" — Euronews, JULY 26, 2025
• AFP. "Cambodia calls for ceasefire with Thailand after deadly clashes" — Bangkok Post, JULY 26, 2025