Jump to content

ဢီႇရၢၼ်း ဢမ်ႇယွမ်းႁပ်ႉ ၶေႃႈယိုၼ်ႈယွၼ်း ထရမ်ႉ တႃႇဢုပ်ႇဢူဝ်းသွင်ၽၢႆႇ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းဢႃးတိတ်ႉ၊ မၢတ်ႉၶျ် 9၊ 2025

ၽူႈဢွၼ်ႁူဝ် ဢီႇရၢၼ်း Ayatollah Khamenei

ၽူႈၼမ်းသုင်သုတ်း ဢီႇရၢၼ်း ဢႃႇယႃႇတူဝ်ႇလႃႇ ဢႃႇလီႇၶႃႇမႅၼ်ႇၼီႇ လၢတ်ႈဝႃႈ မၼ်းသၢၼ်ၶတ်း လွင်ႈဢၼ် ဢမႄႇရိၵၢၼ်ႇ တဵၵ်းတဵင် တႃႇတေဢုပ်ႇဢူဝ်းၵၼ် ၼႂ်းၵႄႈ ဢီႇရၢၼ်းလႄႈ ဢမႄႇရိၵၢၼ်ႇၼၼ်ႉယူႇ ၼႆယဝ်ႉ။

မၼ်းလၢတ်ႈဝႃႈ မၼ်းဢမ်ႇႁပ်ႉၶၢမ်ႇ လွင်ႈၼႆႉသေ လၢတ်ႈဝႃႈ ယိူင်းဢၢၼ်း တႃႇတေ မၵ်းၶၼ်ႈ မၢၵ်ႇၼူၾႆး ဢီႇရၢၼ်း လႄႈ လွင်ႈႁူမ်ႇငမ်း ၼႂ်းပိုၼ်ႉတီႈၼၼ်ႉ ၼႆယဝ်ႉ။

မိူဝ်ႈလၢတ်ႈတေႃႇ ၸုမ်းၽူႈမီးပုၼ်ႈၽွၼ်း လူင်ပွင်ၸိုင်ႈ မိူဝ်ႈဝၼ်းဢႃးတိတ်ႉၼၼ်ႉ မၼ်းဢမ်ႇလၢတ်ႈၸိုဝ်ႈ ဢမႄႇရိၵၢၼ်ႇသေတႃႉ မၼ်းလၢတ်ႈဝႃႈ လူင်ပွင်ၸိုင်ႈဢၼ်ၼိုင်ႈ ဢၼ်ပႄႉၵိၼ်ပိူၼ်ႈၼၼ်ႉ တိုၵ်ႉသိုပ်ႇတဵၵ်းတဵင် ဢီႇရၢၼ်း တႃႇတေဢုပ်ႇဢူဝ်းၵၼ်ယူႇ ၼႆယဝ်ႉ။

ဝၢႆးသေ ၸွမ်ပွင်ၸိုင်ႈ ဢမႄႇရိၵၢၼ်ႇ တေႃႇၼႄႇထရမ်ႉ လၢတ်ႈဝႃႈ မၼ်းသူင်ႇလိၵ်ႈၸူး ၽူႈဢွၼ်ႁူဝ်သုင်သုတ်း မိူင်းဢီႇရၢၼ်း ဢႃႇယႃႇတူဝ်ႇလႃႇ ဢႃႇလီႇၶႃႇမႅၼ်ႇၼီႇယဝ်ႉ ဝၼ်း႞ ၶႃႇမႅၼ်ႇၼီႇ လၢတ်ႈဢွၵ်ႇမႃးၼင်ႇၼႆ။

ၼႂ်းလိၵ်ႈဢၼ် ၸွမ်ပွင်ၸိုင်ႈထရမ်ႉ တႅမ်ႈၼၼ်ႉ တုၵ်းယွၼ်း ႁႂ်ႈၵုမ်းၵမ် ၵၢၼ်ၼိဝ်ႇၵလီးယႃး ဢၼ်ဢီႇရၢၼ်း ႁဵတ်းသၢင်ႈ ဝႆးဝႆး ႁၢဝ်ႈႁႅင်းၼၼ်ႉသေ ႁႂ်ႈႁဵတ်းလိၵ်ႈႁူမ်ႈမၢႆမႂ်ႇ တႃႇတေတႅၼ်းတၢင် ၶေႃႈတူၵ်းလူင်း ၼိဝ်ႇၵလီးယႃး ဢီႇရၢၼ်း ဢၼ်ဢမႄႇရိၵၢၼ်ႇ လႆႈထွၼ်တူဝ်ဢွၵ်ႇ မိူဝ်ႈပၢၼ်မၼ်း ပွၵ်ႈဢွၼ်တၢင်းသုတ်းၼၼ်ႉ ၼႆယဝ်ႉ။

ၶႃႇမႅၼ်ႇၼီႇ လၢတ်ႈဝႃႈ ၶေႃႈတုၵ်းယွၼ်း ဢမႄႇရိၵၢၼ်ႇၼႆႉ ယိူင်းၸူး ဢီႇရၢၼ်း လူၺ်ႈ ၵၢၼ်သိုၵ်းလႄႈ တႃႇတေ မၵ်းၶၼ်ႈ လွင်ႈႁူမ်ႇငမ်း ၼႂ်းပိုၼ်ႉတီႈၼၼ်ႉယူႇ ဝႃႈၼႆ။ Khamenei ဢၼ်ပဵၼ် ၽူႈမီးဢႃႇၼႃႇ သုင်သုတ်း ၼႂ်းမိူင်းဢီႇရၢၼ်းၼၼ်ႉ လၢတ်ႈဝႃႈ လွင်ႈဢုပ်ႇဢူဝ်း ဢၼ်ယိူင်းဢၢၼ်းဝႆႉ ၸိူင်ႉၼႆၼႆႉ တေဢမ်ႇၵႄႈလိတ်ႈလႆႈ ပၼ်ႁႃ ၼႂ်းၵႄႈ ဢီႇရၢၼ်း လႄႈ မိူင်းဝၼ်းတူၵ်း ၼႆယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ဢီႇရၢၼ်း_ဢမ်ႇယွမ်းႁပ်ႉ_ၶေႃႈယိုၼ်ႈယွၼ်း_ထရမ်ႉ_တႃႇဢုပ်ႇဢူဝ်းသွင်ၽၢႆႇ&oldid=11385"