ဢိၼ်းတီးယႃး ပိုတ်ႇႁိူဝ်းမိၼ် ယိုဝ်းပႃႇၵိတ်ႈသတၢၼ်ႇ

ဝၼ်းၽတ်း၊ မေႇ 8၊ 2025 

ပၢင်ၸႅင်ႈၶၢဝ်ႇ ၵဵဝ်ႇၵပ်းလူၺ်ႈ "ၵၢၼ်ယၼ်ႇသိုၵ်း သိၼ်ႇၻူး"

လွင်ႈ ဢိၼ်းတီးယႃး ဢဝ်ႈတင်းၸိုဝ်ႈ “ၵၢၼ်ယၼ်ႇသိုၵ်း သိၼ်ႇၻူး“ သေ ပိုတ်ႇတိုၵ်း ပႃႇၵိတ်ႈသတၼ်ႇ

လူင်ပွင်ၸိုင်ႈ ဢိၼ်းတီးယႃး လၢတ်ႈဝႃႈ ဢဝ်မၢၵ်ႇလူင် လႆႈယိုဝ်းသႂ်ႇ ဢွင်ႈတီႈ 9 တီႈသေ ယိူင်းဢၢၼ်း တီႈႁူင်း ၽူႈၵေႃႇၵၢၼ်ႁၢႆႉ ၼႂ်းမိူင်းပႃႇၵိတ်ႈၸတၢၼ်ႇ လႄႈ တီႈၸႄႈမိူင်း ၶႅတ်ႉသ်မီႇယႃႇ ဢၼ်ပႃႇၵိတ်ႈသတၼ်ႇ ၽွင်းငမ်းၼၼ်ႉ ၼႆယဝ်ႉ။ ၼႂ်းလိၵ်ႈပိုၼ်ၽၢဝ်ႇၼၼ်ႉ လၢတ်ႈဝႃႈ လွင်ႈတိုၵ်းယိုဝ်း ဢၼ်ႁွင်ႉဝႃႈ “ၵၢၼ်ယၼ်ႇသိုၵ်းသိၼ်ႇၻူး” ၼၼ်ႉ လႆႈႁၢင်ႈႁႅၼ်း ၵုမ်းၵမ်ဝႆႉလီလီသေ ဢမ်ႇလႆႈယိူင်းၸူး ၽၢႆႇသိုၵ်းပႃႇၵိတ်ႈသတၼ်ႇ ၼႆယဝ်ႉ။ ဝၢႆးသေ မၢၵ်ႇၼူၾႆး တူၵ်းသႂ်ႇယဝ်ႉ ၽူႈတၢင်လၢတ်ႈ ၽၢႆႇသိုၵ်းပႃႇၵိတ်ႈတၢၼ်ႇ ၵေႃႉ႞ လၢတ်ႈဝႃႈ ပဵၼ်လွင်ႈႁဵတ်းသၢင်ႈ ဢၼ်လီဢၢႆ ဢၼ်လုၵ်ႉတီႈ ၼႂ်းၼႃႈလိၼ် ဢိၼ်းတီးယႃး မႃးၼၼ်ႉသေ လၢတ်ႈဝႃႈ ပႃႇၵိတ်ႈသတၼ်ႇ တေတွပ်ႇတႅၼ်း ၸွမ်းၶၢဝ်းယၢမ်း ဢၼ်ထုၵ်ႇမႅၼ်ႈ လႄႈ လၢႆးတၢင်း ဢၼ်ထုၵ်ႇမႅၼ်ႈ ၼႆယဝ်ႉ။

ၶႄႇလၢတ်ႈဝႃႈ လွင်ႈဢိၼ်းတီးယႃး တူင်ႉၼိုင်ၵၢၼ်သိုၵ်းၼႆႉ ပဵၼ်ဢၼ်ၸႂ်ဢမ်ႇလီ

ထၢၼ်ၽွင်းလူင် ၵၢၼ်ၼွၵ်ႈမိူင်း မိူင်းၶႄႇတႄႉ လၢတ်ႈဝႃႈ လွင်ႈဢၼ် ဢိၼ်းတီးယႃး တိုၵ်းတေႃး ပႃႇၵိတ်ႈသတၼ်ႇၼၼ်ႉ လႆႈပဵၼ်လွင်ႈၸႂ်ဢမ်ႇလီ ဝႃးၼႆယဝ်ႉ။ ၽၢႆႇၼွၵ်ႈမိူင်းၶႄႇ တုမ်ႉတွပ်ႇ လွင်ႈၶဵင်ႈၶႅင် ၼႂ်းၵႄႈ မိူင်းဢေးသျႃးပွတ်းၸၢၼ်း ဢိၼ်းတီးယႃး လႄႈ ပႃႇၵိတ်ႈသတၼ်ႇ ဢၼ်ပဵၼ်ယႂ်ႇမႃး ယၢမ်းလဵဝ်ၼၼ်ႉယူႇ။ ၶႄႇ မႆႈၸႂ်ၸွမ်း ငဝ်းလၢႆးယၢမ်းလဵဝ်သေ တိုၵ်းသူၼ်းဝႃႈ ႁႂ်ႈဝႄႈလွင်ႈႁဵတ်းသၢင်ႈ ဢၼ်တေႁဵတ်းႁႂ်ႈ ငဝ်းလၢႆးယၢမ်းလဵဝ် ယၢပ်ႇၽိုတ်ႇထႅင်ႈၼၼ်ႉ ၼႆယဝ်ႉ။ ႁဝ်းၶႃႈၵေႃႈ တုၵ်းယွၼ်းႁႂ်ႈတင်းသွင်မိူင်း ၵႄႈလိတ်ႈငဝ်းလၢႆး ၼိမ်ၼိမ်သဝ်းသဝ်း လီလီငၢမ်းငၢမ်း ၼႆယဝ်ႉ။

ပႃႇၵိတ်ႈသတၼ်ႇ လၢတ်ႈဝႃႈ လႆႈယိုဝ်းတူၵ်း ႁိူဝ်းမိၼ် ဢိၼ်းတီးယႃး 5 လမ်း ပႃးၸဵမ် ႁိူဝ်းမိၼ် Su-30

ပႃႇၵိတ်ႈသတၼ်ႇ လၢတ်ႈဝႃႈ လႆႈယိုဝ်းတူၵ်း ႁိူဝ်းမိၼ် ဢိၼ်းတီးယႃး 5 လမ်း လႄႈ ႁိူဝ်းမိၼ် Drone ၼႆယဝ်ႉ။ ၽူႈမီးသုၼ်ႇလၢတ်ႈ တပ်ႉသိုၵ်းပႃႇၵိတ်ႈသတၼ်ႇ လၢတ်ႈဝႃႈ “တေႃႇထိုင်ယၢမ်းလဵဝ် လႆႈႁူႉဝႃႈ ႁိူဝ်းမိၼ်တိုၵ်း ဢိၼ်းတီးယႃး လႆႈထုၵ်ႇယိုဝ်းတူၵ်း 5 လမ်း ဢၼ်ဝႃႈၼၼ်ႉ ယိုၼ်ယၼ်လႆႈယဝ်ႉ။ ပႃးၸဵမ်ႁိူဝ်းမိၼ်တိုၵ်း ရႃႇၾႄး 3 လမ်း၊ Su-30 ၼိုင်ႈလမ်း လႄႈ တရုၼ်းႁႃႇရွၼ်း 1 လမ်း“ ဝႃႈၼႆ။ ၽူႈမီးသုၼ်ႇလၢတ်ႈ ၽၢႆႇတပ်ႉသိုၵ်းၵေႃႉ႞ လၢတ်ႈၵႂႃႇ မိူဝ်ႈၵၢၼ်တွင်ႈထၢမ် ငဝ်းႁၢင်ႈသဵင် ဢၼ်သိုဝ်ႇၶၢဝ်ႇ Reuters တွင်ႈထၢမ်ၼၼ်ႉ ၼႆယဝ်ႉ။ ၵပ်းၵၢႆႇလူၺ်ႈ ၶေႃႈပိုၼ်ၽၢဝ်ႇ ပႃႇၵိတ်ႈသတၼ်ႇၼၼ်ႉ ၽၢႆႇဢိၼ်းတီးယႃးတႄႉ ပႆႇတွပ်ႇလၢတ်ႈသင်မႃး။

ၽွင်းလူင်ၵၢၼ်ၼွၵ်ႈမိူင်း မိူင်းဢမႄႇရိၵၼ်ႇ လၢတ်ႈဝႃႈ လႆႈပႂ်ႉတူၺ်း ငဝ်းလၢႆးမၼ်းယူႇ ၸမ်ၸမ်

ၽွင်းလူင်ၵၢၼ်ၼွၵ်ႈမိူင်း ဢမႄႇရိၵၢၼ်ႇ Marco Rubio တႅမ်ႈဝႆႉ တီႈၼႂ်းဢၵွင်ႉ X (မိူဝ်ႈဢွၼ်တၢင်း ပဵၼ် Twitter) မၼ်းၼၼ်ႉဝႃႈ မၼ်းပႂ်ႉတူၺ်း ငဝ်းလၢႆး ဢိၼ်းတီးယႃး လႄႈ ပႃႇၵိတ်ႈသတၼ်ႇ ၸမ်ၸမ်ယူႇ ၼႆယဝ်ႉ။ ဢွၼ်ၼႃႈၼႆႉ ၽူႈပၼ်တၢင်းႁၼ်ထိုင် ၽၢႆႇႁူမ်ႇလူမ်ႈၸိူဝ်ႉၸၢတ်ႈ ဢိၼ်းတီးယႃး ဢႃႇၸိတ်ႉ တူဝ်ႇဝႃႇလ် လႆႈဢုပ်ႇၵၼ်တင်း ရူဝ်ႇပီႇယူဝ်ႇသေ “လႆႈမွၵ်ႇလၢတ်ႈၼႄ ငဝ်းလၢႆး ဢၼ်တႅတ်ႈၼႅတ်ႈ” ၼႆယဝ်ႉ။ ၸွမ်ပွင်ၸိုင်ႈဢမႄႇရိၵၢၼ်ႇ တေႃႇၼႄႇထရၢမ်ႉၵေႃႈ မိူဝ်ႈတွပ်ႇၵႄႈၶေႃႈထၢမ် တီႈသိုဝ်ႇၶၢဝ်ႇၶဝ်ၼၼ်ႉ လၢတ်ႈဝႃႈ လွင်ႈဢၼ် ဢိၼ်းတီးယႃးၶဝ် တိုၵ်းတေၼၼ်ႉ ပဵၼ်လွင်ႈလီဢၢႆတႄႉတႄႉ ၼႆယဝ်ႉ။ ၸွမ်ပွင်ၸိုင်ႈထရၢမ်ႉ လၢတ်ႈတီႈႁိူၼ်းၽိူၵ်ႇၵႅဝ်ႈ ဝဵင်းဝႃႇသျိၼ်ႇတၢၼ်ႇ တီႇသီႇဝႃႈ “မုင်ႈမွင်းဝႃႈ ငဝ်းလၢႆးဢၼ်ၼႆႉ တေယဝ်ႉတူဝ်ႈၵႂႃႇဝႆးဝႆးယူႇ” ၼႆယဝ်ႉ။ Marco Rubio ၵေႃႈ လၢတ်ႈၶိုၼ်း ၶေႃႈၵႂၢမ်း ၸွမ်ပွင်ၸိုင်ႈထရမ်ႉၼၼ်ႉသေ လၢတ်ႈဝႃႈ “ၶႃႈမုင်ႈမွင်းဝႃႈ ငဝ်းလၢႆးဢၼ်ၼႆႉ တေယဝ်ႉတူဝ်ႈၵႂႃႇ ဝႆးဝႆးယူႇ” ၼႆယဝ်ႉ။ တႃႇ ႁႂ်ႈႁႃတၢင်းၵႄႈလိတ်ႈ လူၺ်ႈလွင်ႈငမ်းယဵၼ် ၼၼ်ႉ မႃႇၶူဝ်ႇရူဝ်ႇပီႇယူဝ်ႇ လၢတ်ႈဝႃႈ တေဢုပ်ႇၵၼ်တင်း ၽူႈဢွၼ်ႁူဝ် ဢိၼ်းတီးယႃး လႄႈ ပႃႇၵိတ်ႈသတၼ်ႇၶဝ် ၼႆယဝ်ႉ။

ၽူႈမီးပုၼ်ႈၽွၼ်း ၽၢႆႇသိုၵ်းဢိၼ်းတီးယႃး ပိုၼ်ၽၢဝ်ႇ လွင်ႈဢဝ်ႁိူဝ်းမိၼ်ယိုဝ်း

ဝၢႆးသေ ႁိူဝ်းမိၼ်ၵႂႃႇယိုဝ်း ပႃႇၵိတ်ႈသတၼ်ႇ လႄႈ ၸႄႈမိူင်းၶႅတ်ႉသ်မီႇယႃႇ ဢၼ်ပႃႇၵိတ်ႉၸတၢၼ်ႇ ၽွင်းငမ်းၼၼ်ႉ လၢႆမိၼိတ်ႉယဝ်ႉ ၽွင်းလူင် ၵၢၼ်ၼွၵ်ႈမိူင်း ဢိၼ်းတီးယႃး ဝိၵ်ႉရမ်ႇမိတ်ႉသရႃႇ လႄႈ ၽူႈမီးပုၼ်ႈၽွၼ်း ၽၢႆႇသိုၵ်း ဢိၼ်းတီးယႃးၶဝ် ႁဵတ်းပၢင်သပ်းၸႅင်ႈၶၢဝ်ႇ တီႈဝဵင်းတႄႇလီႇ ၼႆယဝ်ႉ။ ၽူႈမီးပုၼ်ႈၽွၼ်း ၽၢႆႇသိုၵ်းဢိၼ်းတီးယႃးၶဝ်ၵေႃႈ ပိုၼ်ၽၢဝ်ႇ လွင်ႈတၢင်း လွင်ႈၼႆႉ တီႈပၢင်သပ်းၸႅင်ႈၶၢဝ်ႇ ပွၵ်ႈၼႆႉယူႇ။ ၶေႃႈဢၼ်ဢွၵ်ႇမႃးတီႈ ၶေႃႈပိုၼ်ၽၢဝ်ႇၼၼ်ႉ မီးၼင်ႇတႂ်ႈၼႆႉ။

• ဢိၼ်းတီးယႃး ဢဝ်ႁိူဝ်းမိၼ် ယိုဝ်းသႂ်ႇ 9 တီႈ ၼႂ်းမိူင်းပႃႇၵိတ်ႈသတၼ်ႇ လႄႈ ၸႄႈမိူင်းၶႅတ်ႉသ်မီႇယႃႇ ဢၼ်ပႃႇၵိတ်ႉသတၼ်ႇ ၽွင်းငမ်းၼၼ်ႉ၊
• လွင်ႈပိုတ်ႇယိုဝ်းၼႆႉ ႁိုင် 25 မိၼိတ်ႉ ၼႂ်းၵႄႈ 1:05 မူင်း တေႃႇထိုင် 1:30 မူင်း ၶၢဝ်းယၢမ်းဢိၼ်းတီးယႃး၊
• လိူၵ်ႈဢဝ် ပဝ်ႉမၢႆ ဢၼ်ဢဝ်ၶေႃႈမုၼ်းၵၢၼ်ၸွပ်ႇ ဢၼ်ယုမ်ႇယမ်လႆႈ ၼၼ်ႉ ဝူၼ်ႉသွၼ်ႇပႃးသေ ပိုတ်ႇယိုဝ်းၵႂႃႇ၊
• ပဝ်ႉမၢႆၸိူဝ်းၼႆႉ လႆႈၽဵဝ်ႈမူၺ်ႉလႆႈလီငၢမ်း။

လွင်ႈၼႆႉ ၸဝ်ႈႁၢၼ် တပ်ႉသိုၵ်းဢိၼ်းတီးယႃး သူဝ်ႇၽီႇယႃႇ ၶူဝ်ႇသျီႇ လႄႈ ၽူႈၵွၼ်းတပ်ႉလူမ်း ယွမ်ႇၵႃႇသိင်ႇ ၶဝ် လၢတ်ႈၼႄ တီႈပၢင်သပ်းၸႅင်ႈၶၢဝ်ႇ ၼႆယဝ်ႉ။ တီႈပၢင်သပ်းၸႅင်ႈၶၢဝ်ႇၼၼ်ႉ ၶဝ်ၼႄပႃး ၶႅပ်းႁၢင်ႈ ဢၼ်ၶဝ်လၢတ်ႈဝႃႈ ပဵၼ် "ပၢင်သဝ်း ၽူႈၵေႃႇၵၢၼ်ႁၢႆႉ ဢၼ်လႆႈလူႉလႅဝ်ၵႂႃႇ" ၼႆယဝ်ႉ။

ပႃႇၵိတ်ႈသတၼ်ႇ ဢမ်ႇယွမ်းႁပ်ႉ လွင်ႈဢၼ် ဢိၼ်းတီးယႃး လၢတ်ႈဝႃႈ မီးပၢင်သဝ်း ၽူႈၵေႃႇၵၢၼ်ႁၢႆႉ

ဝၢႆးသေ ပၢင်ၵုမ် ၶွမ်ႇမတီႇ ၽၢႆႇႁူမ်ႇလူမ်ႈၸိူဝ်ႉၸၢတ်ႈ ဢၼ်ၸွမ်ၽွင်းလူင် ပႃႇၵိတ်ႈသတၼ်ႇ Shehbaz Sharif ပဵၼ်ႁူဝ်ပဝ်ႈၼၼ်ႉ ယဝ်ႉတူဝ်ႈၵႂႃႇသေၸင်ႇလႆႈပိုၼ်ၽၢဝ်ႇဢွၵ်ႇမႃး ၼႆယဝ်ႉ။ ပႃႇၵိတ်ႈသတၼ်ႇတႄႉ ပၢၵ်ႈပႅတ်ႈ ၶေႃႈၵႂၢမ်း ဢၼ်ဢိၼ်းတီးယႃး လၢတ်ႈဝႃႈ မီးပၢင်သဝ်း ၽူႈၵေႃႇၵၢၼ်ႁၢႆႉ ၼႂ်းလိၼ်မိူင်းပႃႇၵိတ်ႈသတၼ်ႇၼႆသေ ႁွင်ႉဝႃႈ ပဵၼ်ၶေႃႈၼႄး ဢၼ်ဢမ်ႇမီးပိုၼ်ႉထၢၼ် ၼႆယဝ်ႉ။ ၼႂ်းပိုၼ်ၽၢဝ်ႇၼၼ်ႉ ပႃးဝႆႉဝႃႈ ဝၢႆးလင် 2025 လိူၼ်ဢေႇပရႄႇ 22 ဝၼ်းၼၼ်ႉ ပႃႇၵိတ်ႇသတၼ်ႇ လၢတ်ႈဝႃႈ “ႁဝ်းၶႃႈ ၼပ်ႉယမ်သေ ယိုၼ်ႈယွၼ်း တႃႇတေႁဵတ်းၵၢၼ် ၵူတ်ႇထတ်း ဢၼ်ဢမ်ႇၸပ်းၽၢၵ်ႇ ၼႆသေတႃႉ လႆႈထုၵ်ႇပၢၵ်ႈပႅတ်ႈၼႆ့ ပဵၼ်ဢၼ်ၸႂ်ဢမ်ႇလီၸွမ်း” ၼႆယဝ်ႉ။ သိုဝ်ႇၶၢဝ်ႇလုမ်ႈၾႃႉ လႆႈၵႂႃႇႁွတ်ႈထိုင် တီႈဢၼ်ဝႃႈ “ပၢင်သဝ်း ၽူႈၵေႃႇၵၢၼ်ႁၢႆႉ” ၼႆၼၼ်ႉ မိူဝ်ႈမေႇ 6 ဝၼ်းသေ တေဢၢၼ်းၵႂႃႇႁွတ်ႈထိုင်ထႅင်ႈ ၼႂ်းၶၢဝ်းတၢင်းၼႃႈ ၼႆယဝ်ႉ။ ၵူၺ်းၵႃႈ ဢိၼ်းတီးယႃးတႄႉ ဢမ်ႇၼႄလၵ်းထၢၼ် လွင်ႈဢၼ်ၶဝ်လၢတ်ႈၼၼ်ႉသေ လၢတ်ႈဝႃႈ လွင်ႈဢၼ် ၶဝ်ယိုဝ်းၼၼ်ႉ ပဵၼ်ယွၼ်ႉ ၵၢင်ၸႂ်ၵၢၼ်မိူင်းဢမ်ႇၵႂၢင်ႈ လႄႈ ပဵၼ်လွင်ႈဢၼ်တိုၵ်းတေႃး တေႃႇၵူၼ်းမိူင်း ၸိူဝ်းဢမ်ႇမီးတၢင်းၽိတ်းသင်ၼၼ်ႉ ၼႆယဝ်ႉ။Í

ဢမ်ႇၶႂ်ႈႁႂ်ႈပဵၼ်သိုၵ်း - ၸွမ်ၽွင်းလူင် ၸႄႈမိူင်းၵျမူး လႄႈ ၶႅတ်ႉသ်မီႇယႃႇ လၢတ်ႈ - ဢမ်ႇၶႂ်ႈႁႂ်ႈပဵၼ်သိုၵ်း

ၼႂ်းပိုၼ်ႉတီႈၼႆႉ ၽႂ်ၵေႃႈဢမ်ႇၶႂ်ႈႁႂ်ႈပဵၼ်ပၢင်တိုၵ်းၼႂ်းၵႄႈသွင်မိူင်း ယၢမ်းလဵဝ်။ ၵူၺ်းၵႃႈ ပုၼ်ႈၽွၼ်း တႃႇတေ ‘ဝၢင်းၶိူင်ႈ’ ၼၼ်ႉ မီးတီႈ ဢိတ်ႉသလမ်းပၢတ်ႉ (ပႃႇၵိတ်ႇသတၼ်ႇ) ၼႆယဝ်ႉ။ ဝၢႆးသေ ဢိၼ်းတီးယႃး တိုၵ်းပႃႇၵိတ်ႈသတၼ်ႇယဝ်ႉ မၼ်းဢွၵ်ႇလၢတ်ႈၵႂၢမ်း ၽၢႆႇၼႃႈၵူၼ်းတင်းၼမ် ပဵၼ်ပွၵ်ႈဢွၼ်တၢင်းသုတ်းယဝ်ႉ။ ဢႅပ်ႇတူႇလႃႇ လၢတ်ႈဝႃႈ လူင်ပွင်ၸိုင်ႈ ဢိၼ်းတီးယႃး လိူၵ်ႈဢဝ် သဵၼ်ႈတၢင်း ဢၼ်ထုၵ်ႇမႅၼ်ႈသေ ပၼ်ၶေႃႈတွပ်ႇ ဢၼ်ထုၵ်ႇမႅၼ်ႈ တီႈၵူၼ်းၸိူဝ်း ဢၼ်မီးၽၢႆႇလင် လွင်ႈၵေႃႇၵၢၼ်ႁၢႆႉ မိူဝ်ႈလိူၼ်ပူၼ်ႉမႃး တီႈၸႄႈမိူင်းၶႅတ်ႉသ်မီႇယႃႇ ဢၼ်ဢိၼ်းတီးယႃး ၵုမ်းၵမ်ၼၼ်ႉ ၼႆယဝ်ႉ။ မၼ်းလၢတ်ႈတီႈ သိုဝ်ႇၶၢဝ်ႇ ANI ဝႃႈ “တီႈၽၢႆႇပႃႇၵိတ်ႉၸတၢၼ်ႇၶဝ်ၼၼ်ႉ လႆႈယိုဝ်းသႂ်ႇ တီႈယူႇ ၽူႈၵေႃႇၵၢၼ်ႁၢႆႉၶဝ်ၵူၺ်းသေ ဢမ်ႇယိုဝ်းၵူၼ်းမိူင်း ဢမ်ႇၼၼ် တီႈယူႇသိုၵ်း ၵူၺ်းၵႃႈ ပႃႇၵိတ်ႉၸတၢၼ်ႇၶဝ်ၼႆႉ ၶဝ်ယိူင်းၸူး ၵူၼ်းမိူင်းႁဝ်း လႄႈ တီႈယူႇႁဝ်းၶႃႈ ၵမ်ႈၽွင်ႈသေ ဢဝ်မၢၵ်ႇပွႆႇသႂ်ႇ” ၼႆယဝ်ႉ။ ၸွမ်ၽွင်းလူင် ပၼ်လွင်ႈမၼ်ႈၸႂ်ဝႃႈ ၵူၼ်းမိူင်း ၸိူဝ်းယူႇသဝ်း ၼႂ်းပိုၼ်ႉတီႈၸိူင်ႉၼႆ ဢမ်ႇလူဝ်ႇလႆႈသၢၼ်ႈ ၼႆယဝ်ႉ။ ၵူၼ်းမိူင်း ဢမ်ႇလူဝ်ႇပၢႆႈၵႆတီႈၼႆႈ” ၼႆယဝ်ႉ။ ယဝ်ႉၵေႃႈ လၢတ်ႈဝႃႈ ၼႂ်းပိုၼ်ႉတီႈၼႆႉ မီးလွင်ႈၵမ်ႉၸွႆႈ ဢၼ်လမ်ႇလွင်ႈ တႃႇတေၶၢမ်ႈပူၼ်ႉ လွင်ႈၶွင်ႈၶမ် ဢၼ်႞ၼၼ်ႉ တဵမ်ထူၼ်ႈဝႆႉယဝ်ႉ ၼႆယဝ်ႉ။

ငိူၼ်ႈငဝ်ႈၶၢဝ်ႇ

• BBC News. "Pakistan's PM says it 'made reply' to Indian strikes after Pahalgam killings" — BBC News, May 7, 2025
• Sophia Saifi, Rhea Mogul and Jessie Yeung,. "India and Pakistan are on the brink of wider conflict. Here’s what we know" — CNN, May 7, 2025