ဢိၼ်းတီးယႃး ထုၵ်ႇလီဝူၼ်ႉသွၼ်ႇ လွင်ႈမၵ်းၶၼ်ႈ ဢႃႇယု တႃႇသိုဝ်ႇတူင်ႇဝူင်းၵူၼ်း
ဝၼ်းၽတ်း၊ ၸၼ်ႇဝႃႇရီႇ 29၊ 2026
ၽူႈပၼ်တၢင်းၶႆႈၸႂ် ပၢႆးမၢၵ်ႈမီး ၸၼ်ႉသုင် မိူင်းဢိၼ်းတီးယႃး တုၵ်းယွၼ်း ႁႂ်ႈလူင်ပွင်ၸိုင်ႈ မၵ်းမၼ်ႈ ဢႃႇယု တႃႇၸႂ်ႉတိုဝ်း ဢႅပ်ႉ ၼိူဝ်သိုဝ်ႇတူင်ႇဝူင်းၵူၼ်း တႃႇတေ ၽဵဝ်ႈမူၺ်ႉ “လွင်တိတ်းၸပ်း တီႇၵျိတ်ႇတႄႇလ်” ၼႆသေ ပၼ်ၾၢင်ႉဝႃႈ လုၵ်ႈဢွၼ်ႇၶဝ် တေဢမ်ႇလႆႈၸႂ်ႉတိုဝ်း ပလႅတ်ႉၾွမ်း ၼႂ်းၵၢတ်ႇ ၽူႈၸႂ်ႉတိုဝ်း ဢၼ်ယႂ်ႇသုတ်း တႃႇ Meta လႄႈ YouTube ၼႆယဝ်ႉ။
လွင်ႈလႅၵ်ႈလၢႆႈ တီႈမိူင်းဢိၼ်းတီးယႃးၼႆႉ တေၵိုင်ႇငၢမ်ႇၵၼ်တင်း လွင်ႈဢၼ် လုမ်ႈၾႃႉ ၶိုၼ်ႈယႂ်ႇမႃးၼၼ်ႉယဝ်ႉ။ မိူဝ်ႈပီၵၢႆၼၼ်ႉ မိူင်းဢေႃးသထရေးလီးယႃး ပဵၼ်မိူင်းဢွၼ်တၢင်းသုတ်း ဢၼ်ႁၢမ်ႈတၢပ်ႈ လုၵ်ႈဢွၼ်ႇ ဢႃႇယု 16 လူင်းတႂ်ႈ ၼိူဝ်သိုဝ်ႇတူင်ႇဝူင်းၵူၼ်း။
မိူဝ်ႈဝၼ်းၸၼ်ၼၼ်ႉ သၽႃးၸိူဝ်ႉၸၢတ်ႈ မိူင်းၾရၢင်ႇသဵတ်ႈ ၵမ်ႉထႅမ် မၢႆမီႈ ဢၼ်ႁၢမ်ႈတၢပ်ႈ လုၵ်ႈဢွၼ်ႇ ဢႃႇယု 15 ၶူပ်ႇလူင်းတႂ်ႈ ၼိူဝ်သိုဝ်ႇတူင်ႇဝူင်းၵူၼ်းၼၼ်ႉသေ မိူင်းပရိတ်ႉတဵၼ်ႇ၊ မိူင်းတႅၼ်းမၢၵ်ႈ လႄႈ မိူင်းၵရိတ်ႈ ၸိူဝ်းၵေႃႈ တိုၵ်ႉလဵပ်ႈႁဵၼ်းလွင်ႈဢၼ်ၼႆႉယူႇ။
ၽူႈပၼ်တၢင်းၶႆႈၸႂ် လႆႈလၢတ်ႈ ၼႂ်းၽိုၼ်ထတ်းသၢင် ပၢႆးမၢၵ်ႈမီး မိူင်းဢိၼ်းတီးယႃး ၵူႈပီၼၼ်ႉသေ ပၼ်တၢင်းႁၼ်ထိုင် ႁႂ်ႈၵူၼ်းႁိူၼ်းၶဝ် ပၼ်ႁႅင်း ႁႂ်ႈမၵ်းၶၼ်ႈ ၶၢဝ်းယၢမ်း တူၺ်းၼႃႈၸေႃး၊ ၶၢဝ်းယၢမ်းဢမ်ႇလႆႈယိပ်းၶိူင်ႈၶူဝ်း လႄႈ ပိုၼ်ၽႄႈ လွင်ႈတူင်ႉၼိုင် ဢွပ်ႉၾ်လၢႆး။
ၽူႈပၼ်တၢင်းၶႆႈၸႂ် ဢၼ်ပဵၼ် V. Anantha Nageswaran တႅမ်ႈဝႆႉ ၼႂ်းၽိုၼ်ထတ်းသၢင်ၼၼ်ႉဝႃႈ “ပိူင်ၵၢၼ် ဢၼ်ဢိင်ၼိူဝ် ဢႃႇယုသေ မၵ်းမၼ်ႈ လွင်ႈၶဝ်ႈထိုင်လႆႈၼၼ်ႉ တေၸၢင်ႈဝူၼ်ႉသွၼ်ႇ တွၼ်ႈတႃႇ ၵူၼ်းၸႂ်ႉတိုဝ်း ဢၼ်ဢႃႇလဵၵ်ႉလိူဝ် ဢၼ်တေၸၢင်ႈ ၸႂ်ႉတိုဝ်း ၶေႃႈမုၼ်း ဢၼ်ထုၵ်ႇတဵၵ်းတဵင် လႄႈ ၶေႃႈမုၼ်း ဢၼ်မီးၽေးၼၼ်ႉ ၼမ်လိူဝ်” ၼႆယဝ်ႉ။
ၽူႈႁဵတ်းၵၢၼ် ၾဵတ်ႉပုၵ်ႉ ဢၼ်ပဵၼ် Meta (META.O) ၼၼ်ႉ ပိုတ်ႇၽုၺ်ႇ ၽႅၼ်ႇမႂ်ႇ၊ ဢၼ်ပဵၼ် Alphabet ပေႃႈမႄႈ ယူႇထုပ်ႉ (GOOGL.O) ၼၼ်ႉ ပိုတ်ႇၽုၺ်ႇ ၽႅၼ်ႇမႂ်ႇသေ ဢၼ်ပဵၼ် X တႄႉ ဢမ်ႇတွပ်ႇၶိုၼ်း ၶေႃႈယွၼ်း တႃႇတေ ပၼ်တၢင်းႁၼ်ထိုင် ၵမ်းလဵဝ်။
တီႈမိူင်းဢိၼ်းတီးယႃး ဢၼ်ပဵၼ် လွၵ်းၵၢတ်ႇ ဢၼ်ၶိုၼ်ႈယႂ်ႇ ဢၼ်လမ်ႇလွင်ႈ တႃႇ ဢႅပ်ႉ ၼိူဝ်သိုဝ်ႇတူင်ႇဝူင်းၵူၼ်းၼၼ်ႉ ဢမ်ႇမီးလွင်ႈမၵ်းၶၼ်ႈ ဢႃႇယု ဢၼ်ဢေႇသုတ်း ၸၼ်ႉၸိူဝ်ႉၸၢတ်ႈ တႃႇၸႂ်ႉတိုဝ်း ၼိူဝ်သိုဝ်ႇတူင်ႇဝူင်းၵူၼ်း။
ၶေႃႈပၼ်တၢင်းၶႆႈၸႂ် ၽၢႆႇလူင်ပွင်ၸိုင်ႈ ၼႆႉၵေႃႈ လႆႈဢွၵ်ႇမႃး ၸွမ်းၼင်ႇ လွင်ႈၶိုၼ်ႈယႂ်ႇ ၼႂ်းၸႄႈမိူင်း ဢိၼ်းတီးယႃး ၽႂ်မၼ်း တႃႇတေ ၵုမ်းထိင်း ၶၢဝ်းယၢမ်း တူၺ်းငဝ်းတူင်ႉၼၼ်ႉယဝ်ႉ။ မိူဝ်ႈပႆႇပေႃးႁိုင်သင်ၼၼ်ႉ ဢၼ်ပဵၼ် ၸႄႈမိူင်းၽင်ႇပၢင်ႇလၢႆႇ Goa လႄႈ ၸႄႈမိူင်း Andhra Pradesh ပွတ်းၸၢၼ်း ၶဝ်ပိုၼ်ၽၢဝ်ႇဝႃႈ ၶဝ်လဵပ်ႈႁဵၼ်း ပၵ်းပိူင် မိူင်းဢေႃးသထရေးလီးယႃး ဢၼ်တေၸၢင်ႈႁၢမ်ႈတၢပ်ႈ လွင်ႈၼႅင်ႈသိုဝ်ႇတူင်ႇဝူင်းၵူၼ်း တႃႇလုၵ်ႈဢွၼ်ႇၼၼ်ႉယူႇဝႃႈၼႆ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Reuters. "India should consider age-based limits for social media, chief economic adviser says" — Reuters, January 29, 2026
- The Straits Times. "India should consider age-based limits for social media access, says economic adviser" — The Straits Times, January 29, 2026
- AsiaOne. "India should consider age-based limits for social media, chief economic adviser says" — AsiaOne, January 29, 2026