Jump to content

ဢိတ်ႇသရေး သင်ႇႁႂ်ႈတပ်ႉသိုၵ်း ၸတ်းၵၢၼ် လွင်ႈပႃးလႅတ်ႈသတၢႆး ထွၼ်တူဝ်ဢွၵ်ႇ တီႈၵႃႇၸႃႇ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းသဝ်၊ ၾႅပ်ႇဝႃႇရီႇ 8၊ 2025

လွင်ႈလူႉလႅဝ်တီႈ ၵႃႇၸႃႇ

ဝၢႆးသေ ၸွမ်ပွင်ၸိုင်ႈ တေႃႇၼႄႇထရမ်ႉ တၢင်ႇလၢတ်ႈ ၽႅၼ်ၵၢၼ် ဢၼ်ၵဵဝ်ႇလူၺ်ႈ လွင်ႈၸတ်းၵၢၼ် တႃႇၼႃႈလိၼ်ၵႃႇၸႃႇ ဢၼ်လႆႈလူႉလႅဝ်ၵူၼ်ႇပင်း ယွၼ်ႉပၢင်တိုၵ်းၼၼ်ႉယဝ်ႉ ၽွင်းလူင်ၽၢႆႇၵႅတ်ႇၵင်ႈ ဢိတ်ႇၸရေး ၸီႉသင်ႇႁႂ်ႈ IDF တႄႇဝၢင်းၽႅၼ် တႃႇတေ ဢဝ်ၵူၼ်းမိူင်းပႃးလႅတ်ႈသတၢႆး ဢွၵ်ႇၵႂႃႇ တီႈၵႃႇၸႃႇၼၼ်ႉယဝ်ႉ။

ၽွင်းလူင်ၽၢႆႇၵႅတ်ႇၵင်ႈ Israel Katz လၢတ်ႈဝႃႈ မိူဝ်ႈဝၼ်းၽတ်းၼၼ်ႉ မၼ်းၸီႉသင်ႇ IDF ႁႂ်ႈႁၢင်ႈႁႅၼ်းၽႅၼ်ၵၢၼ် တႃႇပၼ်ၶႂၢင်ႉ ၵူၼ်းမိူင်းၵႃႇၸႃႇ ၸိူဝ်းၶႂ်ႈဢွၵ်ႇၵႂႃႇ လူၺ်ႈၸႂ်ၶႂ်ႈဢွၵ်ႇၶဝ်ၼၼ်ႉသေ ၵူၼ်းၵႃႇၸႃႇၶဝ် တေၸၢင်ႈၵႂႃႇလႆႈၸူး မိူင်းဢၼ်တေႁပ်ႉၶဝ်ၼၼ်ႉ ၼႆယဝ်ႉ။

ၽႅၼ်ၵၢၼ်ၼႆႉ တေပႃးတၢင်းလိူၵ်ႈ တႃႇဢွၵ်ႇၶၢဝ်းတၢင်း လႄႈ တႃႇၶၢမ်ႈလႅၼ်လိၼ်သေ သင်ဝႃႈ တေဢွၵ်ႇၵႂႃႇၸွမ်း သၢႆၵၢၼ်မိၼ် ဢမ်ႇၼၼ် ၸွမ်းသၢႆတၢင်းၼမ်ႉၼႆ တေၶပ်ႉၶိုင်ပၼ်ၶိုၵ်ႉတွၼ်း ဝႃႈၼႆယဝ်ႉ။

ၽွင်းလူင် ၶႅတ်ႉၸ် ယွင်ႈယေႃး ၶေႃႈတၢင်ႇၼႄ ၸွမ်ပွင်ၸိုင်ႈထရမ်ႉ တႃႇတေ ၶၢႆႉဢွၵ်ႇ ၵူၼ်းမိူင်း တီႈၵႃႇၸႃႇ ဢၼ်လႆႈထုၵ်ႇ ဢိတ်ႇသရေး ဢဝ်တင်း သိုၵ်းၵၢင်ႁၢဝ် လႄႈ သိုၵ်းၼိူဝ်လိၼ် တိုၵ်းတေႃး ၸုမ်းႁမၢသ်ႉၼၼ်ႉ ပဵၼ်ၽႅၼ်ၵၢၼ် ဢၼ်ႁတ်းႁၢၼ် ဝႃႈၼႆယဝ်ႉ။

ၸွမ်ပွင်ၸိုင်ႈထရမ်ႉ လၢတ်ႈဝႃႈ ဝၢႆးသေ ပၢင်တိုၵ်းၵၼ်တင်း ၸုမ်းႁမၢသ်ႉယဝ်ႉ ဢိတ်ႇသရေး ထုၵ်ႇလီဢဝ်ၵႃႇၸႃႇ ပၼ်တီႈဢမႄႇရိၵၢၼ်ႇၼႆသေ ၸွမ်ပွင်ၸိုင်ႈထရမ်ႉ လၢတ်ႈၼႄ တီႈၼိူဝ် ဢၵွင်ႉ Truth Social Media မၼ်းၼၼ်ႉယဝ်ႉ။

ၽႅၼ်ၵၢၼ်မၼ်းၼႆႉ တေႁဵတ်းႁႂ်ႈ ၵူၼ်းမိူင်းပႃးလႅတ်ႇသတၢႆး 2 လၢၼ်ႉလိူဝ် လႆႈယူႇသဝ်း ႁိူၼ်းယေး ဢၼ်ၶိုတ်းၵၢပ်ႈ ဢၼ်လွတ်ႈၽေး လႄႈ ဢၼ်ႁၢင်ႈလီ ၼႂ်းပိုၼ်ႉတီႈၼၼ်ႉ ၼႆယဝ်ႉ။ ၵူၺ်းၵႃႈ ဢၼ်ၼႆႉ ပဵၼ်တီႈၵႃႇၸႃႇႁိုဝ် ဢမ်ႇၼၼ် ပဵၼ်တီႈတၢင်ႇမိူင်းႁိုဝ်ၼႆ ဢမ်ႇလႆႈလၢတ်ႈဝႆႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ဢိတ်ႇသရေး_သင်ႇႁႂ်ႈတပ်ႉသိုၵ်း_ၸတ်းၵၢၼ်_လွင်ႈပႃးလႅတ်ႈသတၢႆး_ထွၼ်တူဝ်ဢွၵ်ႇ_တီႈၵႃႇၸႃႇ&oldid=10839"