Jump to content

ဢိတ်ႇသရေး လႄႈ ဢီႇရၢၼ်း ပိုၼ်ၽၢဝ်ႇ ၵိုတ်းတိုၵ်း

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းပုတ်ႉ၊ ၸုၼ်ႇ 25၊ 2025

ႁၢင်ႈၽႅၼ်ႇလိၼ် ဢီႇရၢၼ်း လႄႈ ဢိတ်ႇသရေး

ၼႂ်းၵႄႈၵၢင် ပၢင်တိုၵ်းဢိတ်ႇသရေး လႄႈ ဢီႇရၢၼ်းၼၼ်ႉ ၸွမ်ပွင်ၸိုင်ႈဢမႄႇရိၵၢၼ်ႇ ၶဝ်ႈၸိမ်ၵႄႈလိတ်ႈလႄႈ တေလႆႈဝႃႈ ႁၼ်ၼမ်ႉႁၼ်တူဝ်မၼ်းမႃး ယူႇၼႆယဝ်ႉ။

မိူဝ်ႈဝၼ်းဢင်းၵၢၼ်း တၢမ်းၶမ်ႈ ၶႃသွင်မိူင်း လႆႈၸႂ်ၵၼ် တႃႇတေၵိုတ်းတိုၵ်းၼၼ်ႉသေ ၸွမ်ပွင်ၸိုင်ႈထရမ်ႉလၢတ်ႈဝႃႈ တေမုင်ႈၼႃႈၵႂႃႇၸူး လွင်ႈငမ်းယဵၼ် ၶၢဝ်းယၢဝ်းယူႇၼႆယဝ်ႉ။

ၶုၼ်ၽွင်းၽၢႆႇၼွၵ်ႈမိူင်း မိူင်းဢီႇရၢၼ်း ဢႃးယိၸ်ႉဢႃးပိၸ်ႉဢႃႇရႃႇၶျီႇ လၢတ်ႈဝႃႈ တႄႇဢဝ်ၶၢဝ်းယၢမ်း ၼႂ်ၼႆႉ ယႃႇႁႂ်ႈတူၵ်းလိုၼ်း 4 မွင်း ႁႂ်ႈၽၢႆႇဢိတ်ႇသရေးၶဝ် ၵိုတ်းယိုတ်း လွင်ႈလႃႈလီႈတိုၵ်းတေႃး ၵူၼ်းမိူင်းဢီႇရၢၼ်းၼႆသေ ၽၢႆႇဢီႇရၢၼ်းၶဝ်ၵေႃႈ တေဢမ်ႇမီးလွင်ႈတွပ်ႇတိုၵ်းသင်ၶိုၼ်းၼႆယဝ်ႉ။

ၼႂ်းသိုဝ်ႇၶၢဝ်ႇတႄႉၵေႃႈ လၢတ်ႈဢွၵ်ႇမႃးဝႃႈ တႄႇဢဝ်ၵၢင်ၼႂ် 4 မွင်း ၼႂ်ၼႆႉမႃး လွင်ႈဢိတ်ႇသရေးပိုတ်းယိုဝ်းၼၼ်ႉၵေႃႈ ထၢတ်ႇၵိုတ်းၵႂႃႇယူႇၼႆယဝ်ႉ။

ၸွမ်းၼင်ႇၸွမ်ပွင်ၸိုင်ႈထရမ်ႉပၼ်ၸိုဝ်ႈဝႃႈ "ပၢင်တိုၵ်း 12 ဝၼ်း" ၼၼ်ႉ သင်ဝႃႈ ၵိုတ်းယိုတ်းၵႂႃႇတႄႉၸိုင် တီႈၵုၼ်ၵၢင်ပွတ်းဢွၵ်ႇဢေးသျႃးၼႆႉ လွင်ႈဢဵၼ်ႁႅင်းဢၼ်ၼိုင်ႈ တႃႇတေငုမ်းသုမ်ႇၼၼ်ႉ တေလႆႈဝႃႈ ၶိုၼ်းႁူၼ်လင်ၵႂႃႇ ယၢင်ႈၼိုင်ႈၼႆယူႇ။

မိူဝ်ႈဝၼ်းသဝ်ၼၼ်ႉ ဢမႄႇရိၵၢၼ်ႇၶဝ် ယိုဝ်းႁူင်းၸၢၵ်ႈၼိဝ်ႇၶလီးယႃး ဢီႇရၢၼ်းယဝ်ႉသေ ၸင်ႇတေၶိုၼ်းတိုၵ်းသူၼ်း ႁႂ်ႈဢဝ်လွင်ႈငမ်းယဵၼ်ယဝ်ႉ။

တွပ်ႇတႅၼ်းၶိုၼ်း ဢမႄႇရိၵၢၼ်ႇၼႆသေ ဢီႇရၢၼ်းၶဝ် ဢဝ်မၢၵ်ႇၼူၾႆး ယိုဝ်းတပ်ႉပၢင်သဝ်း ဢမႄႇရိၵၢၼ်ႇၶဝ် ဢၼ်ပၵ်းဝႆႉ တီႈၶႃႇတႃႇသေတ ၽၢႆႇၶႃႇတႃႇၶဝ် လတ်းယိုဝ်းတူၵ်းပႅတ်ႈတင်းသဵင်ႈလႄႈ ဢမ်ႇတိူဝ်ႉၽႂ်။ ဝၢႆးၼၼ်ႉ ဢီႇရၢၼ်းၶဝ်ဝႃႈ ဢမႄႇရိၵၢၼ်ႇ ၸႂ်ႉၵိုတ်းလွင်ႈပိုတ်းယိုဝ်းလႄႈ ၶဝ်ၵေႃႈ ၶိုၼ်းၵိုတ်းယိုဝ်းၵႂႃႇၼႆယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ဢိတ်ႇသရေး_လႄႈ_ဢီႇရၢၼ်း_ပိုၼ်ၽၢဝ်ႇ_ၵိုတ်းတိုၵ်း&oldid=11988"