ဢိင်ႇသၼ်ႇ ႁႅင်း 6.6 သေ ၵူၼ်းမိူင်းဢိၼ်ႇတူဝ်ႇၼီးသျႃး ဢွၼ်ၵၼ်လႅၼ်ႈဢွၵ်ႇၼွၵ်ႈႁိူၼ်း

ဝၼ်းၽတ်း၊ ၼူဝ်ႇဝႅမ်ႇပႃႇ 27၊ 2025 

ဢိင်ႇသၼ်ႇ ႁႅင်း 6.6 တီႈဢိၼ်ႇတူဝ်ႇၼီးသျႃး

မိူဝ်ႈဝၼ်းၽတ်း (27/11/2025) ၼၼ်ႉ ၸုမ်းၽၢႆႇထတ်းသၢင် ၽၢႆႇပၢႆးလိၼ် မိူင်းဢမႄႇရိၵၢၼ်ႇ လၢတ်ႈဝႃႈ ၵုၼ်ဢၼ်ၼိုင်ႈ ဢၼ်မီးတီႈ ၽင်ႇပၢင်ႇလၢႆႇ သုမႃးတြႃး တီႈမိူင်းဢိၼ်ႇတူဝ်ႇၼီးသျႃး ပွတ်းတူၵ်းၼၼ်ႉ ဢိင်ႇသၼ်ႇ ႁႅင်း 6.6 မႅၵ်ႇၼီႇတုတ်ႉ ၼႆသေ ဢမ်ႇလႆႈႁူႉၸွမ်း လွင်ႈလူႉသုမ်း ဢမ်ႇၼၼ် ၶေႃႈပၼ်ၾၢင်ႉ လွင်ႈၽေးသူႇၼႃႇမီႇ ၼႆယဝ်ႉ။

ဢိင်ႇသၼ်ႇ ဢၼ်ပဵၼ်မႃး တီႈၵုၼ် Simeulue မိူဝ်ႈယၢမ်း 11.56 မူင်း (ၶၢဝ်းယၢမ်း 12.56 မူင်း ၶၢဝ်းယၢမ်း မိူင်းသိင်ႇၵႃႇပူဝ်ႇ) တၢင်းလိုၵ်ႉ 25 ၵီႇလူဝ်ႇမီႇတႃႇၼၼ်ႉ ႁဵတ်းႁႂ်ႈ ၵူၼ်းပိုၼ်ႉတီႈ ဢၼ်မီးတီႈၵုၼ်ၼၼ်ႉ လႅၼ်ႈဢွၵ်ႇၵႂႃႇတၢင်းၼွၵ်ႈၵမ်းလဵဝ်။

ဢႃႇႁႃႇမႃႇတီႇ ဢၼ်မိူၼ်ၼင်ႇ ၵူၼ်းမိူင်းဢိၼ်ႇတူဝ်ႇၼီးသျႃး လၢတ်ႈတီႈသိုဝ်ႇၶၢဝ်ႇ AFP ဝႃႈ “ၶႃႈၼင်ႈယူႇတီႈလၢၼ်ႉၵေႃႇၾီႇ ၵိုင်ႉၵၢင်ႉ ၽိူၼ်ၼၼ်ႉ သၼ်ႇဝႆၵႂႃႇ ၵူၼ်းတင်းၼမ် လႅၼ်ႈဢွၵ်ႇၵႂႃႇ ၽၢႆႇၼွၵ်ႈ ႁူင်းႁေႃ လႄႈ ႁိူၼ်းယေး” ၼႆယဝ်ႉ။

"ဢိင်ႇသၼ်ႇၼႆႉ မၼ်းႁိုင်ၼႃႇ။ ၶႃႈထၢင်ႇတႄႉ တေမီးမွၵ်ႈ ၸဵတ်းၸႅၵ်ႉၵၢၼ်ႉ ဢမ်ႇၼၼ် လိူဝ်ၼၼ်ႉယူႇ။"

မၼ်းလၢတ်ႈဝႃႈ ဢိင်ႇသၼ်ႇ ဝၢႆးလင်ၼၼ်ႉ မီးလၢႆပွၵ်ႈလၢႆၽဝ်ႇသေတႃႉ ပေႃးမႃးၼိူင်းၵၼ်တင်း ၸိူဝ်းဢွၼ်တၢင်းၸိုင် ဢိင်ႇသၼ်ႇၼၼ်ႉ မၼ်းပွတ်းလိူဝ်ၵဝ်ႇၼႆသေ မၼ်းလၢတ်ႈဝႃႈ လွင်ႈလူႉသုမ်းတႄႉ မၼ်းပႆႇလႆႈၶေႃႈမုၼ်းသင်််််် ၼႆယဝ်ႉ။

ဝၢႆးသေ ဢိင်ႇသၼ်ႇယဝ်ႉ သုၼ်ၵၢင်ပၼ်ၾၢင်ႉ ၽေးသူႇၼႃႇမီႇ တီႈပၢင်ႇလၢႆႇဢိၼ်းတီးယႃး လၢတ်ႈဝႃႈ ဢမ်ႇမီးလွင်ႈလွၵ်ႇငိူတ်ႈ ဢၼ်တေၸၢင်ႈပဵၼ်မႃး ယွၼ်ႉၽေးဢိင်ႇသၼ်ႇၼၼ်ႉ ၼႆယဝ်ႉ။

ၸုမ်းပၢႆးၾိင်ႈၾႃႉရႃႇသီႇ လႄႈ ပၢႆးလိၼ် မိူင်းဢိၼ်ႇတူဝ်ႇၼီးသျႃးၶဝ် မၢႆတွင်းဝႆႉဝႃႈ ဢိင်ႇသၼ်ႇၼႆႉ မီးႁႅင်း 6.3 တီႈတၢင်းလိုၵ်ႉ 10 ၵီႇလူဝ်ႇမီႇတႃႇသေ လၢတ်ႈဝႃႈ ဢိင်ႇသၼ်ႇၼႆႉ ဢမ်ႇမီးလွင်ႈၸၢင်ႈႁဵတ်းႁႂ်ႈ ပဵၼ်ၽေးသူႇၼႃႇမီႇ ၼႆယဝ်ႉ။

ငိူၼ်ႈငဝ်ႈၶၢဝ်ႇ

• Cna. "Indonesia residents rush outside as magnitude 6.6 quake hits" — CNA, November 27, 2025
• The Times of India. "Powerful earthquake jolts Indonesia: 6.3-magnitude tremor strikes Sumatra island; no tsunami alert issued" — The Times of India, November 27, 2025
• Jack Evans and AFP. "Magnitude 6.6 earthquake strikes island off Sumatra coast" — News AU, November 27, 2025