Jump to content

ဢိင်ႇသၼ်ႇႁႅင်း 7.4 မႅၵ်ႇၼီႇတုတ်ႉ တီႈႁိမ်းၾီလိပ်ႈပိၼ်း လႄႈ လႆႈယိုတ်းၶေႃႈပၼ်ၾၢင်ႉ သူႇၼႃႇမီႇ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းသုၵ်း၊ ဢွၵ်ႇထူဝ်ႇပႃႇ 10၊ 2025

ဢိင်ႇသၼ်ႇႁႅင်း တီႈႁိမ်း ၾီလိပ်ႈပိၼ်း

မိူဝ်ႈဝၼ်းသုၵ်းၼၼ်ႉ ဢိင်ႇသၼ်ႇ တီႈၽင်ႇပၢင်ႇလၢႆႇ မိူင်းၾီလိပ်ႈပိၼ်း ပွတ်းၸၢၼ်း မီးႁႅင်း 7.4 မႅၵ်ႇၼီႇတုတ်ႉသေ ၵူၼ်းတၢႆ ဢမ်ႇယွမ်း 2 ၵေႃႉသေ ဝဵင်းၸိူဝ်းဢၼ်မီးႁိမ်း သုၼ်ၵၢင် ဢိင်ႇသၼ်ႇၼၼ်ႉ ယူင်ႉသၢင်ႈ လႆႈလူႉသုမ်း လႄႈ ၽူႈမီးပုၼ်ႈၽွၼ်းၶဝ် ပၼ်ၾၢင်ႉဝႃႈ တေမီးဢိင်ႇသၼ်ႇ ႁၢဝ်ႈႁႅင်းၼႆယဝ်ႉ။

ဢိင်ႇသၼ်ႇ ဢၼ်ပဵၼ်တီႈ ၼႂ်းၼမ်ႉ ႁိမ်းဝဵင်း Manay ၼႂ်းၸႄႈမိူင်း Davao Oriental ၼၼ်ႉ ႁဵတ်းႁႂ်ႈ ၽင်ႇပၢင်ႇလၢႆႇ ဢၼ်မီးၼႂ်းၵႄႈ 300 ၵီႇလူဝ်ႇမီႇတႃႇ (186 လၵ်း) တီႈဢၼ် ဢိင်ႇသၼ်ႇၼၼ်ႉ လႆႈပၼ်ၾၢင်ႉ လွင်ႈသူႇၼႃႇမီႇ ၼႆသေတႃႉ ဝၢႆးၼၼ်ႉ လႆႈယိုတ်းပႅတ်ႈ ၶေႃႈပၼ်ၾၢင်ႉ တႃႇမိူင်းၾီလိပ်ႈပိၼ်း လႄႈ မိူင်းဢိၼ်ႇတူဝ်ႇၼီးသျႃး ၼႆယဝ်ႉ။

ၽူႈမီးပုၼ်ႈၽွၼ်း တီႈဝဵင်းမၼၢႆး ၵေႃႉ႞ လၢတ်ႈဝႃႈ မိူဝ်ႈတႄႇမၼ်း လႆႈငိၼ်းၶၢဝ်ႇဝႃႈ ႁိူၼ်းယေး ႁူင်းႁေႃ လႄႈ ၶူဝ် လႆႈလူႉၵွႆၵႂႃႇၼႆသေတႃႉ တီႈမိူင်းၾီလိပ်ႈပိၼ်းတႄႉ ဢမ်ႇလႆႈႁူႉၸွမ်း လွင်ႈတၢင်းမၼ်း တဵမ်ထူၼ်ႈ ၼႆယဝ်ႉ။

ၽူႈမီးပုၼ်ႈၽွၼ်း ၽၢႆႇၵႅတ်ႇၶႄၵူၼ်းမိူင်း Karlo Puerto လၢတ်ႈလူၺ်ႈၾူၼ်းဝႃႈ ၵူၼ်းတၢႆ ဢမ်ႇယွမ်း 2 ၵေႃႉသေ တင်းသွင်ၵေႃႉ လႆႈတၢႆၵႂႃႇ တီႈဝဵင်း Mati ဢၼ်ၸမ်ၵၼ်တင်း တီႈဢၼ်ဢိင်ႇသၼ်ႇၼၼ်ႉၼႆယဝ်ႉ။ လုမ်းၽေးၶဵၼ် ၼႂ်းပိုၼ်ႉတီႈ ဢၼ်သိုဝ်ႇၶၢဝ်ႇ Reuters ၵပ်းသိုပ်ႇမႃးၼၼ်ႉ ဢမ်ႇလႆႈႁူႉၸွမ်း လွင်ႈၵူၼ်းလူႉတၢႆထႅင်ႈ။

ဢိင်ႇသၼ်ႇၼႆႉ ပဵၼ်ၼႂ်းၵႄႈ ဢိင်ႇသၼ်ႇ ဢၼ်ႁႅင်းယႂ်ႇသေပိူၼ်ႈ ၼႂ်းပီပူၼ်ႉမႃး ဢၼ်ၽႃႇၺႃး မိူင်းၾီလိပ်ႈပိၼ်း ဢၼ်ၼင်ႈဝႆႉ တီႈၼိူဝ် ပၢင်ႇလၢႆႇပၸိၾိၵ်ႉ “Ring of Fire” သေ ၼိုင်ႈပီလႂ် လႆႈထူပ်းၺႃး ဢိင်ႇသၼ်ႇ 800 ပွၵ်ႈလိူဝ်ၼၼ်ႉယဝ်ႉ။

မိူင်းၾီလိပ်ႈပိၼ်း တိုၵ်ႉၶိုၼ်းလီမႃး ဝၢႆးသေ ဢိင်ႇသၼ်ႇ မိူဝ်ႈဝၼ်းတီႈ 30 လိူၼ်သႅပ်ႇထႅမ်ႇပႃႇ ဢၼ်မီးႁႅင်း 6.9 မႅၵ်ႇၼီႇတုတ်ႉသေ ႁဵတ်းႁႂ်ႈၵူၼ်းတၢႆ ဢမ်ႇယွမ်း 74 ၵေႃႉ လႄႈ ၵူၼ်းၼပ်ႉႁူဝ်ႁဵင် လႆႈပၢႆႈၽေး တီႈၸႄႈမိူင်း ပွတ်းၵၢင် Cebu ပိူင်လူင်မၼ်း တီႈဝဵင်း ပူဝ်ႇၵူဝ်ႇ လႄႈ ဝဵင်းၼွၵ်ႈမိူင်းၼၼ်ႉယူႇ။

တေႃႇထိုင်ယၢမ်းလဵဝ် ဢိင်ႇသၼ်ႇ ဢၼ်မီးႁႅင်း 2.6 တေႃႇထိုင် 4.9 ၼၼ်ႉ တိုၵ်ႉသိုပ်ႇသၼ်ႇဝႆ ႁႂ်ႈ ပွတ်းတွၼ်ႈ ပွတ်းၸၢၼ်း မိၼ်ႇတႃႇၼေႇဝူဝ်ႇ သၼ်ႇဝႆ ဝၢႆးသေ ဢိင်ႇသၼ်ႇ ဢွၼ်တၢင်းသုတ်း လၢႆၸူဝ်ႈမူင်းယဝ်ႉ ၼႆ ၸုမ်း Phivolcs ၶဝ် ဢွၵ်ႇၶၢဝ်ႇဝႆႉၼင်ႇၼႆ။

တီႈမိူင်းဢိၼ်ႇတူဝ်ႇၼီးသျႃး ဢၼ်မီးႁိမ်းႁွမ်းၼၼ်ႉ လႆႈႁၼ် "သူႇၼႃႇမီႇဢွၼ်ႇ" ဢၼ်သုင်သုတ်း ထိုင် 17cm တီႈၵုၼ် Talaud တီႈ Sulawesi ပွတ်းႁွင်ႇၼၼ်ႉယဝ်ႉ။

လုၵ်ႈႁဵၼ်း တီႈၵုၼ် Talaud ဢၼ်ပဵၼ် မူႇၵုၼ် ဢၼ်ၸမ်လႅၼ်လိၼ် ၾီလိပ်ႈပိၼ်းၼၼ်ႉ လႆႈသူင်ႇပွၵ်ႈမိူဝ်းႁိူၼ်းသေတႃႉ ငဝ်းလၢႆးမၼ်းတႄႉ တိုၵ်ႉယဵၼ်ဝႆႉယူႇ ၼႆ ၽူႈမီးပုၼ်ႈၽွၼ်း ၼႂ်းပိုၼ်ႉတီႈ ၵေႃႉ႞ လၢတ်ႈတီႈ BBC ၼင်ႇၼႆ။

ၵူၼ်းမိူင်းဢိၼ်ႇတူဝ်ႇၼီးသျႃးၶဝ် တိုၵ်းသူၼ်းဝႃႈ ႁႂ်ႈၵူၼ်းမိူင်း ယူႇဝႆႉၸႂ်ၵတ်းၸႂ်ယဵၼ်သေ ႁႂ်ႈၵႆယၢၼ် ႁူင်းႁေႃ ဢၼ်လႆႈလူႉၵွႆယွၼ်ႉ ဢိင်ႇသၼ်ႇ ၼႆယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ဢိင်ႇသၼ်ႇႁႅင်း_7.4_မႅၵ်ႇၼီႇတုတ်ႉ_တီႈႁိမ်းၾီလိပ်ႈပိၼ်း_လႄႈ_လႆႈယိုတ်းၶေႃႈပၼ်ၾၢင်ႉ_သူႇၼႃႇမီႇ&oldid=12392"