Jump to content

ဢဝ်ၸွမ်ပွင်ၸိုင်ႈၵဝ်ႇ ၾီလိပ်ႈပိၼ်း ၻူႇတႃႇတေး သူင်ႇထိုင်တီႈ ICC တီႈ ဝဵင်း The Heague

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းပုတ်ႉ၊ မၢတ်ႉၶျ် 12၊ 2025

ၸွမ်ပွင်ၸိုင်ႈၵဝ်ႇ ၾီလိပ်ႈပိၼ်း ၻူႇတႃႇတေး

ၽူႈမီးပုၼ်ႈၽွၼ်း မိူင်းၾီလိပ်ႈပိၼ်းၶဝ် လၢတ်ႈဝႃႈ ၸွမ်ပွင်ၸိုင်ႈၵဝ်ႇ ၾီလိပ်ႉပိၼ်း ရူဝ်ႇတရီႇၵူဝ်ႇ ၻူႇတႃႇတေး လႆႈၶီႇႁိူဝ်းမိၼ် ဢွၵ်ႇဝဵင်းလူင် ၾီလိပ်ႉပိၼ်း မၼီႇလႃႇသေ တေဢဝ်ၵႂႃႇမွပ်ႈပၼ် တီႈလုမ်းတြႃး ၵူႈမိူင်းမိူင်း (ICC) ဢၼ်မီးတီႈ ဝဵင်းႁဵၵ်ႉၼၼ်ႉ ၼႆယဝ်ႉ။ ႁိူဝ်းမိၼ် ဢၼ်တၢင်ႇ ၸွမ်ပွင်ၸိုင်ႈၵဝ်ႇ ၻူႇတႃႇတေး မႃးၼၼ်ႉ လုၵ်ႉတီႈ ဝဵင်းလူင် မၼီႇလႃႇ မိူင်းၾီလိပ်ႈပိၼ်းသေ ဢွၵ်ႇၶၢဝ်းတၢင်းၵႂႃႇ မိူဝ်ႈဝၢႆးဝၼ်း ဝၼ်းဢင်းၵၢၼ်းၼၼ်ႉယဝ်ႉ။

မိူဝ်ႈပွတ်းၼႂ် ဝၼ်းဢင်းၵၢၼ်း ၼၼ်ႉ ယွၼ်ႉပိူဝ်ႈ မၼ်းလႄႈ ၵူၼ်းႁိူၼ်းမၼ်း လုၵ်ႉတီႈ ႁွင်းၵွင်းသေ ပွၵ်ႈမႃး တီႈတႃႈႁိူဝ်းမိၼ် ၵူႈမိူင်းမိူင်း မၼီႇလႃႇလႄႈ လႆႈထုၵ်ႇ တီႉၺွပ်း ၸွမ်းၼင်ႇ ၶေႃႈပူင် ICC ၼၼ်ႉယဝ်ႉ။

လူင်ပွင်ၸိုင်ႈ ၾီလိပ်ႈပိၼ်း လၢတ်ႈဝႃႈ ယွၼ်ႉပိူဝ်ႈ မၼ်းၵုမ်းၵမ် ၵၢၼ်ၽဵဝ်ႈမူၺ်ႉယႃႈမဝ်းၵမ် ဢၼ်လူၼ်ႉလိူဝ်လႆႈဢွၵ်ႇလိူတ်ႈဢွၵ်ႇယၢင် ၽွင်းမၼ်းပဵၼ် ၸွမ်ပွင်ၸိုင်ႈၼၼ်ႉလႄႈ လုမ်းတြႃး ICC ဢွၵ်ႇလိၵ်ႈပၼ်တီႉၺွပ်း တင်းလုမ်ႈၾႃႉ ၼႆယဝ်ႉ။

မိူဝ်ႈပႆႇၶိုၼ်ႈႁိူဝ်းမိၼ် ၸွမ်းၵူၼ်းပႂ်ႉတူဝ်မၼ်းၼၼ်ႉ ၸွမ်ပွင်ၸိုင်ႈၵဝ်ႇ ဢႃႇယု 79 ပီ ၼၼ်ႉ သၵ်ႉၶွၼ်ႉတဝ်ႉသေ ပႆၵႂႃႇလွႆးလွႆးသေ တူင်ႉတၵ်ႉ ၽူႈပၼ်ႁႅင်းမၼ်း ၸိူဝ်းဢၼ်ၼမ်ႉတႃတူၵ်းယူႇၼၼ်ႉ ၼႆယဝ်ႉ။

ယူႇတီႈ ICC တိုၵ်ႉၵူတ်ႇထတ်း လွင်ႈၶႃႈႁႅမ်တၢႆ ဢၼ်ပဵၼ်မႃး ၽွင်းမိူဝ်ႈ ၽဵဝ်ႈမူၺ်ႉယႃႈမဝ်းၵမ် ဢၼ်ပဵၼ်မႃး ၽွင်းမၼ်းၸဝ်ႈ ပဵၼ်ၽူႈၵွၼ်းဝဵင်း ဝဵင်းတႃႇဝူဝ်ႇ မိူင်းၾီလိပ်ႈပိၼ်း ပွတ်းႁွင်ႇလႄႈ ၽွင်းပဵၼ်ၸွမ်ၸိုင်ႈၼၼ်ႉယူႇ။

ႁူဝ်ၼပ်ႉ ၵူၼ်းတၢႆယွၼ်ႉ ၵၢၼ်ၽဵဝ်ႈမူၺ်ႉ မိူဝ်ႈပၢၼ် ၸွမ်ပွင်ၸိုင်ႈ ၻူႇတႃႇတေးၼၼ်ႉ မီးလွင်ႈပႅၵ်ႇပိူင်ႈၵၼ်ဝႆႉ။ ၸဝ်ႈၼႃႈတီႈပလိၵ်ႈၶဝ် ပိုၼ်ၽၢဝ်ႇဝႃႈ ၵူၼ်းတၢႆ မီးၵႂႃႇ 6,000 ၵေႃႉလိူဝ်ၼႆသေ ၸုမ်းသုၼ်ႇလႆႈၵူၼ်းၶဝ်တႄႉ လၢတ်ႈဝႃႈ ၵူၼ်းဢၼ်လႆႈတၢႆ မီးၵႂႃႇ 30,000 ၵေႃႉလိူဝ်ဝႃႈၼႆယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ဢဝ်ၸွမ်ပွင်ၸိုင်ႈၵဝ်ႇ_ၾီလိပ်ႈပိၼ်း_ၻူႇတႃႇတေး_သူင်ႇထိုင်တီႈ_ICC_တီႈ_ဝဵင်း_The_Heague&oldid=11418"