Jump to content

သၽႃးတႅၼ်းၽွင်း တွတ်ႈၶႅပ်းၵၢင်ၸႂ် တႃႇဢဝ်လိူင်ႈ ၵႅမ်ၸွမ်ၸိုင်ႈ မိူင်းၾီလိပ်ႈပိၼ်း

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းပုတ်ႉ၊ ၾႅပ်ႇဝႃႇရီႇ 5၊ 2025

ၵႅမ်ၸွမ်ၸိုင်ႈ Sara Duterte

မိူဝ်ႈဝၼ်းပုတ်ႉၼၼ်ႉ လုမ်းတႅၼ်းၽွင်း မိူင်းၾီလိပ်ႈပိၼ်း လႆႈပၼ်သဵင်ၵၢင်ၸႂ် တႃႇတေဢဝ်လိူင်ႈ ၵႅမ်ၸွမ်ပွင်ၸိုင်ႈ Sara Duterte ၼႆယဝ်ႉ။ လွင်ႈၼႆႉ မၼ်းပိုတ်ႇပၼ် ၽၵ်းတူ တႃႇတေထွမ်ႇငိၼ်း တီႈသၽႃး ဢၼ်ၸၢင်ႈႁဵတ်းႁႂ်ႈ ၵႅမ်ၸွမ်ပွင်ၸိုင်ႈ ဢၼ်ယၢမ်ႈ မီးတၢင်းႁၼ်ထိုင်ပႅၵ်ႇပိူင်ႈၵၼ်တင်း ၸွမ်ပွင်ၸိုင်ႈ ယႂ်ႇလူင်ၼၼ်ႉ လႆႈထုၵ်ႇထွၼ်ဢွၵ်ႇတႃၶုၼ်ၼၼ်ႉယဝ်ႉ။

လွင်ႈတၢင်းမၼ်းတႄႉ ပႆႇလႆႈႁူႉႁူဝ်ယွႆႈမၼ်းသေတႃႉ ယုမ်ႇယမ်ဝႃႈ မီးၽႅၼ်ၵၢၼ် တႃႇတေၶႃႈႁႅမ်တၢႆ ၸွမ်ပွင်ၸိုင်ႈ ၾႃႇတီႇၼႅၼ်ႇ မႃးၶူဝ်ႉသ်၊ ဝၢႆးသေ မၼ်းလႆႈထုၵ်ႇဢဝ်တၢင်းၽိတ်း 3 လိူင်ႈ မိူဝ်ႈလိူၼ်တီႇသႅမ်ႇပႃႇပူၼ်ႉမႃးၼၼ်ႉ ဢိၵ်ႇပႃး လွင်ႈလၵ်ႉဢဝ်ငိုၼ်းၵူၼ်းမိူင်း ၼပ်ႉႁူဝ်လၢၼ်ႉတေႃႇလႃႇၼၼ်ႉယဝ်ႉ သၽႃးတႂ်ႈ လႆႈပၼ်သဵင်ၵၢင်ၸႂ် တႃႇတေဢဝ်တၢင်းၽိတ်းမၼ်း ၼႆယဝ်ႉ။

ၽူႈၼမ်းၼႂ်းသၽႃး Martin Romualdez ပိုၼ်ၽၢဝ်ႇၼႂ်းလုမ်းတႅၼ်းၽွင်းဝႃႈ ၶေႃႈတၢင်ႇၼႄ တႃႇတေဢဝ်တၢင်းၽိတ်း ၵႅမ်ၸွမ်ပွင်ၸိုင်ႈၼၼ်ႉ လႆႈမၵ်းမၼ်ႈယဝ်ႉ ယွၼ်ႉဝႃႈ ၽူႈတႅၼ်းသၽႃး 215 ၵေႃႉၼၼ်ႉ သၢမ်ပုၼ်ႈၼိုင်ႈပုၼ်ႈ တၢင်ႇလၢတ်ႈမႃးၼႆယဝ်ႉ။

ၵႅမ်ၸွမ်ပွင်ၸိုင်ႈ ဢၼ်ပဵၼ်လုၵ်ႈယိင်း ၸွမ်ပွင်ၸိုင်ႈၵဝ်ႇ ၾီလိပ်ႈပိၼ်း ရူဝ်ႇတရီႇၵူဝ်ႇ တူႇတႃႇတေးၼၼ်ႉ ယၢမ်းလဵဝ် ဢိင်ၼိူဝ် ၽူႈတႅၼ်းၽွင်း သၽႃးၼိူဝ် 24 ၵေႃႉ ၼႆယဝ်ႉ။ တႃႇတေထွၼ်ဢွၵ်ႇ တီႈၼင်ႈ လႄႈ တႃႇတေလႆႈ ႁၢပ်ႇၵၢၼ် ၼႂ်းလူင်ပွင်ၸိုင်ႈ မိူဝ်းၼႃႈၼၼ်ႉ မၼ်းၼၢင်း လူဝ်ႇလႆႈ ၶႅပ်းၵၢင်ၸႂ် သွင်ပုၼ်ႈသၢမ်ပုၼ်ႈ ၼႂ်းသၽႃးသုင်သုတ်း။ ဝၼ်းဢၼ်တေထွမ်ႇတြႃး တီႈသၽႃးသုင်ၼၼ်ႉတႄႉ ပႆႇႁူႉတႅတ်ႈတေႃး။

မိူဝ်ႈၾႅပ်ႇဝႃႇရီႇ 4 ဝၼ်း ၵွၼ်ႇၼႃႈ တေတႄႇႁႃသဵင် တႃႇပၢင်လိူၵ်ႈတင်ႈ ၵၢင်ၶၢဝ်း ဢၼ်တေၸတ်းႁဵတ်းၼၼ်ႉ ဝၼ်း႞ၼၼ်ႉ လုမ်းတႅၼ်းၽွင်း လႆႈပၼ်သဵင်ၵၢင်ၸႂ် ၽူႈတႅၼ်းၽွင်း ၵဵဝ်ႇၵပ်းလူၺ်ႈ လွင်ႈၵႅမ်ၸွမ်ၸိုင်ႈ ၼႆယဝ်ႉ။ ပၢင်လိူၵ်ႈတင်ႈ ၵၢင်ၶၢဝ်းၼႆႉၵေႃႈ ပဵၼ်ပၢင်လိူၵ်ႈတင်ႈ ဢၼ်တေလၢမ်းၶၢတ်ႈဝႃႈ ၽႂ်တေဢွင်ႇပႄႉ ပၢင်လိူၵ်ႈတင်ႈ ၸွမ်ၸိုင်ႈ ပီ 2028 ၼၼ်ႉယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=သၽႃးတႅၼ်းၽွင်း_တွတ်ႈၶႅပ်းၵၢင်ၸႂ်_တႃႇဢဝ်လိူင်ႈ_ၵႅမ်ၸွမ်ၸိုင်ႈ_မိူင်းၾီလိပ်ႈပိၼ်း&oldid=10820"