သၢႆငၢႆပၢင်တိုၵ်း ဢိတ်ႇသရေး လႄႈ ဢီႇရၢၼ်း သိုပ်ႇၶဵင်ႈၶႅင်

ဝၼ်းဢင်းၵၢၼ်း၊ ၸုၼ်ႇ 17၊ 2025 

ဢီႇရၢၼ်း ဢဝ်မၢၵ်ႇမိသ်ႉသၢႆးယိုဝ်း ဢိတ်ႇသရေး

ပွႆးတိုၵ်း ဢၼ်ဢိတ်ႇသရေး လႄႈ ဢီႇရၢၼ်း တိုၵ်းၵၼ်ၼႂ်းၵႄႈသွင်မိူင်းၼၼ်ႉ တိုၵ်ႉပဵၼ်ပွႆးတိုၵ်း ဢၼ်မီးမၵ်းၶၢၼ်းဝႆႉယူႇ။ ၼင်ႇႁိုဝ် ပၢင်တိုၵ်းတေဢမ်ႇၵႂၢင်ႈၶႂၢင်ၼၼ်ႉ ၸဵမ်ၸၢတ်ႈၸိုင်ႈလုမ်ႈၾႃႉUN လႄႈ တင်းသဵင်ႈၵေႃႈ တိုၵ်းသူၼ်းဝႆႉယူႇ။

ၵပ်းၵၢႆႇလူၺ်ႈ လွင်ႈၶဵင်ႈၶႅင်ၼႆႉသေ ဢၼ်တေၸၢင်ႈပဵၼ်မႃးလႆႈဢၼ်ၼိုင်ႈၼၼ်ႉတႄႉ တေၸၢင်ႈပဵၼ် ၽၢႆႇဢီႇရၢၼ်းၶဝ် ဢိုတ်းပႅတ်ႈ ဝႅဝ်ႇၼမ်ႉႁေႃးမုတ်ႉၸ်ၼၼ်ႉသေ တေတုမ်ႉတိူဝ်ႉ ၶၼ်ၼမ်ႉမၼ်းမဵၼ်ၼၼ်ႉယဝ်ႉ။

သင်ဝႃႈ ၶၼ်ၼမ်ႉမၼ်းမဵၼ်ၶိုၼ်ႈၵႂႃႇ ပေႃးၼႆၸိုင် ဢၼ်တေလႆႈၼမ်ႉတွၼ်းတႄႉ တေပဵၼ်ရတ်ႈသျႃးယဝ်ႉ။ ပၼ်ႁႃ ဢၼ်ပဵၼ်ယူႇတီႈဢေးသျႃးပွတ်းဢွၵ်ႇတွၼ်ႈၵၢင်ၼႆႉ ရတ်ႈသျႃးတေၸၢင်ႈလုၵ်ႉတီႈ ၼမ်ႉမၼ်းမဵၼ်သေ ၸၢင်ႈလႆႈငိုၼ်းတေႃႇလႃႇ ႁူဝ်လၢၼ်ႉႁဵင်မၼ်းသေ တေၸၢင်ႈၶိုၼ်းၽိူမ်ႉလႆႈ ၵႃႈသိုၵ်း ဢၼ်လႆႈသဵင်ႈၸွမ်း ပၢင်တိုၵ်းယူႇၶရဵၼ်းၼၼ်ႉယူႇ။

ဝၢႆးပၢင်ၵုမ်လူင် G7 ဢၼ်ႁဵတ်းယဝ်ႉ တီႈၶႅၼ်ႇၼေႇတႃႇၼၼ်ႉ မိူဝ်ႈဝၼ်းၸၼ် ၸွမ်ပွင်ၸိုင်ႈဢမေႇရိၵၢၼ်ႇ တေႃႇၼႄႇထရမ်ႉ ပၼ်သတိဝႃႈ ႁႂ်ႈၵူၼ်းမိူင်းဢီႇရၢၼ်း ၸိူဝ်းယူႇသဝ်းတီႈ ဝဵင်းလူင်တႁီႇရၢၼ်ႇ ဢွၵ်ႇပၢႆႈၽႂ်းၽႂ်းၼႆလႄႈ တႄႇဢဝ်ၶမ်ႈဝႃး ၵူၼ်းၼႂ်းဝဵင်းတႁီႇရၢၼ်ႇ ဢွၼ်ႇၵၼ်ပၢႆႈဢွၵ်ႇဝဵင်း တင်းၼမ်။ ဢိတ်ႇသရေးၶဝ်ၵေႃႈ လႆႈပၼ်ၾၢင်ႉသတိ ၵူၼ်းမိူင်း 300,000 လိူဝ် ဢၼ်ယူႇသဝ်းတႁီႇရၢၼ်ႇ ႁႂ်ႈဢွၵ်ႇပၢႆႈ ၸိူင်ႉၼင်ႇထရမ်ႉလၢတ်ႈ။

ထရမ်ႉပၼ်ၾၢင်ႉထႅင်ႈဝႃႈ ပေႃးဢီႇရၢၼ်းၶဝ် တႄႇပိုတ်းယိုဝ်း ပၢင်သဝ်းတပ်ႉဢမႄႇရိၵၢၼ်ႇ တီႈဢေးသျႃးပွတ်းဢွၵ်ႇတွၼ်ႈၵၢင်ၸိုင် မိူင်းဢီႇရၢၼ်း တေထူပ်းၺႃး ဢၼ်ဢမ်ႇတွၼ်ႉၺႃးၼၼ်ႉ ႁၢဝ်ႈႁၢဝ်ႈႁႅင်းႁႅင်းၼႆယဝ်ႉ။

ၶၢဝ်းပၢင်တိုၵ်းလႆႈမႃး 5 ဝၼ်းၼႆႉ ၵူၼ်းမိူင်းၽၢႆႇဢိတ်ႇသရေး တၢႆ 20 ပၢႆ၊ မၢတ်ႇၸဵပ်း ပၢၵ်ႇပၢႆ။ ၽၢႆႇဢီႇရၢၼ်းၶဝ် လူႉတၢႆ မွၵ်ႈ 300 ပၢႆ၊ မၢတ်ႇၸဵပ်း မွၵ်ႈ 1500 ၵေႃႉၼႆယဝ်ႉ။

ငိူၼ်ႈငဝ်ႈၶၢဝ်ႇ

• David Brennan, Meredith Deliso, Leah Sarnoff, Jack Moore, and Nadine El-Bawab. "Israel-Iran live updates: Trump seeking 'real end' to Tehran nuclear program" — ABC News, JUNE 17, 2025
• The New York Times. "Trump Leaves G7 Summit Early After Signing Call for Mideast De-escalation" — The New York Times, JUNE 17, 2025
• Jessie Yeung, Lex Harvey, Chris Lau, Tamar Michaelis, Kareem Khadder, Antoinette Radford, Olivia Kemp and Maureen Chowdhury. "Israel and Iran trade strikes on fifth day of conflict" — CNN, JUNE 17, 2025
• The Washington Post. "Iran and Israel trade fresh strikes as Trump calls for ‘real end’ to conflict" — The Washington Post, JUNE 17, 2025