သွၵ်ႈႁႃၵူၼ်းႁၢႆ 32 ၵေႃႉ တီႈလိၼ်ၵူၼ်ႇ ဢိၼ်ႇတူဝ်ႇၼီးသျႃး
ဝၼ်းပုတ်ႉ၊ ၸၼ်ႇဝႃႇရီႇ 28၊ 2026
ဝၢႆးသေ လိၼ်ၵူၼ်ႇပင်း တီႈ ၵျႃႇဝႃႈပွတ်းတူၵ်း မိူင်းဢိၼ်ႇတူဝ်ႇၼီးသျႃး မိူဝ်ႈဝၼ်းပုတ်ႉ တွၼ်ႈၸဝ်ႉၼၼ်ႉ ယွၼ်ႉၾူၼ်တူၵ်းလႄႈ လႆႈမီးလွင်ႈၶွင်ႉၶမ် တီႈၵၢၼ်သွၵ်ႈႁႃ ၵူၼ်း 32 ၵေႃႉ ဢၼ်တိုၵ်ႉႁၢႆလၢႆယူႇၼၼ်ႉသေ လႆႈႁၼ်ဝႃႈ ၵူၼ်းတၢႆ မီးမႃး 34 ၵေႃႉ ၼႆယဝ်ႉ။
မိူဝ်ႈဝၼ်းသဝ် ၸဝ်ႉၸဝ်ႉၼၼ်ႉ လိၼ်ၵူၼ်ႇပင်း တီႈဝၢၼ်ႈ Pasir Langu ၼႂ်းၸႄႈတွၼ်ႈ ပၼ်ႇတုင်းပွတ်းတူၵ်း ၼၼ်ႉလႆႈပဵၼ်ယွၼ်ႉၾူၼ်တူၵ်းႁၢဝ်ႈႁႅင်း မိူဝ်ႈၸဝ်ႉဝၼ်း႞ၼၼ်ႉယဝ်ႉ။
ဝၢၼ်ႈၼႆႉ မီးဝႆႉ ၼႂ်းပိုၼ်ႉတီႈလွႆ ၼႂ်းၸႄႈမိူင်း ဢၼ်ယၢၼ်ၵႆ ဝဵင်းလူင် ဢိၼ်ႇတူဝ်ႇၼီးသျႃး ၸဵင်ႇၸၢၼ်းဝၼ်းဢွၵ်ႇ မွၵ်ႈ 100 ၵီႇလူဝ်ႇမီႇတႃႇ (62.14 လၵ်း) ၼၼ်ႉယဝ်ႉ။
ၽူႈတၢင်လၢတ်ႈ ၸုမ်းဢႅပ်ႉတူးလ်မူႇႁႃႇရီႇ လၢတ်ႈတီႈသိုဝ်ႇၶၢဝ်ႇ Reuters ဝႃႈ “မိူဝ်ႈၸဝ်ႉၼႆႉ တီႈဢၼ်လိၼ်ၵူၼ်ႇၼၼ်ႉ ၾူၼ်တူၵ်းယူႇသေတႃႉ ၵူၼ်းၸွႆႈထႅမ်ၶဝ် တင်းမူတ်း ႁၢင်ႈႁႅၼ်းဝႆႉ တႃႇတေသိုပ်ႇသွၵ်ႈႁႃ ပႂ်ႉၶၢဝ်းယၢမ်း ဢၼ်ထုၵ်ႇမႅၼ်ႈၼၼ်ႉယူႇ။
မိူဝ်ႈဢွၼ်တၢင်း မီးၵူၼ်းလူႉတၢႆ 20 ၵေႃႉ၊ တိူဝ်းၶိုၼ်ႈထႅင်ႈ 34 ၵေႃႉသေ ၵူၼ်းဢၼ်လွတ်ႈၽေးၼၼ်ႉ မီးထႅင်ႈ 23 ၵေႃႉ ၼႆယဝ်ႉ။
မိူဝ်ႈဝၼ်းဢင်းၵၢၼ်းၼၼ်ႉ တပ်ႉၼမ်ႉ ဢိၼ်ႇတူဝ်ႇၼီးသျႃး ပိုၼ်ၽၢဝ်ႇဝႃႈ ၽွင်းတိုၵ်ႉၽိုၵ်းၽွၼ်ႉ ၵၢၼ်ပႂ်ႉလႅၼ်လိၼ်ၼၼ်ႉ ၵူၼ်းသိုၵ်း 23 ၵေႃႉ လႆႈတၢႆၵႂႃႇ ၼႆယဝ်ႉ။
ၼႂ်းၵူၼ်းတၢႆ ၵမ်းလိုၼ်းသုတ်းၼၼ်ႉ ၸွင်ႇပႃးၵူၼ်းသိုၵ်းၸိူဝ်းၼၼ်ႉႁိုဝ် ဢမ်ႇပႃးၼႆတႄႉ ပႆႇၸႅင်ႈလႅင်းလီ ၼႆ မူႇႁႃႇရီႇ လၢတ်ႈၼႄၼင်ႇၼႆ။
ယၢမ်းလဵဝ် ၸုမ်း႞ တိုၵ်ႉႁဵတ်းၵၢၼ် တီႈဢွင်ႈတီႈ တႃႇတေႁူႉႁၼ် တူဝ်တၢႆ ဢၼ်ၵူၼ်းၵူတ်ႇထတ်းၶဝ် ႁၼ်ၼၼ်ႉယူႇ ၼႆ မူႇႁႃႇရီႇ သိုပ်ႇလၢတ်ႈထႅင်ႈ။
တႃႇႁႃၵူၼ်းၸိူဝ်းႁၢႆလၢႆၵႂႃႇ ဢၼ်ၵိုတ်းဝႆႉၼၼ်ႉ မီးၵူၼ်းၸွႆႈထႅမ် ၵူၼ်းသိုၵ်း လႄႈ ပလိၵ်ႈ ဢမ်ႇယွမ်း 800 ၵေႃႉ ဢိၵ်ႇပႃး ၶိူင်ႈၶုတ်း 9 လမ်း ၼႆယဝ်ႉ။
ၵူၼ်းမိူင်း ၼႂ်းဝၢၼ်ႈဢၼ်လႆႈၺႃးၽေးၼၼ်ႉ လႆႈၶၢႆႉၵႂႃႇယူႇသဝ်း တီႈႁူင်းႁေႃ လူင်ပွင်ၸိုင်ႈပိုၼ်ႉတီႈ ၸမ် 700 ၵေႃႉ ၼႆ ႁွင်ႈၵၢၼ်ၼၼ်ႉ လၢတ်ႈဝႆႉ မိူဝ်ႈဢွၼ်တၢင်း ၼႆယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Reuters. "Search for 32 people missing in Indonesia landslide hampered by rain as death toll rises to 34" — Reuters, January 28, 2026
- Cna. "Indonesia landslide death toll rises to 34, dozens missing" — CNA, January 28, 2026
- China Global Television Network. "Indonesia landslide death toll in West Java climbs to 38" — China Global Television Network, January 28, 2026
