Jump to content

သိုၵ်းဢိတ်ႇသရေး လၢတ်ႈဝႃႈ လႆႈမၵ်းမၼ်ႈ ၽႅၼ်ၵၢၼ် တႃႇတေၶဝ်ႈတိုၵ်း ၵႃႇၸႃႇ ဢၼ်မႂ်ႇ

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းပုတ်ႉ၊ ဢေႃးၵၢတ်ႉ 13၊ 2025

ၵႃးလဵၵ်းသိုၵ်းဢိတ်ႇသရေး

ဝၢႆးသေ ၸုမ်းၽွင်းလူင် ၽၢႆႇႁူမ်ႇလူမ်ႈၶဝ် တုၵ်းယွၼ်း ႁႂ်ႈသိမ်းဢဝ် ဝဵင်းၵႃႇၸႃႇ လၢႆဝၼ်းယဝ်ႉ သိုၵ်းဢိတ်ႇသရေး လၢတ်ႈဝႃႈ မိူဝ်ႈဝၼ်းပုတ်ႉ (13/08/2019) ၼၼ်ႉ ၶဝ်မၵ်းမၼ်ႈပၼ် “ၶွပ်ႇပိူင်” တႃႇတေ တိုၵ်းတေႃး တီႈၵႃႇၸႃႇ ဢၼ်မႂ်ႇၼၼ်ႉယဝ်ႉ။

ၽူႈၵွၼ်းတပ်ႉသိုၵ်း ၸဝ်ႈသိုၵ်းလူင် Eyal Zamir လၢတ်ႈဝႃႈ “မၵ်းမၼ်ႈ ၶွပ်ႇပိူင်ပိူင်လူင် တႃႇၽႅၼ်ၵၢၼ် ၵၢၼ်သိုၵ်း IDF တီႈၵႃႇၸႃႇ” ၼႆယဝ်ႉ။

လူင်ပွင်ၸိုင်ႈ ၸွမ်ၽွင်းလူင် ၼေႇတၢၼ်ႇယႃႇႁု ဢမ်ႇလႆႈပိုၼ်ၽၢဝ်ႇ ၶၢဝ်းယၢမ်း ဢၼ်တႅတ်ႈတေႃးဝႃႈ သိုၵ်းဢိတ်ႇသရေး တေၶဝ်ႈၵႂႃႇ ၼႂ်းဝဵင်းလူင် ဢၼ်ယႂ်ႇလိူဝ်ပိူၼ်ႈ ၼႂ်းၼႃႈလိၼ် ဢၼ်ၵူၼ်းၼပ်ႉႁူဝ်ႁဵင် လႆႈပၢႆႈၽေး လွင်ႈတိုၵ်းတေႃး မိူဝ်ႈဢွၼ်တၢင်းၼၼ်ႉ မိူဝ်ႈလႂ်။

ၽူႈတၢင်တူဝ် ၽၢႆႇၵႅတ်ႇၶႄၵူၼ်းမိူင်း Gaza လၢတ်ႈဝႃႈ လွင်ႈဢိတ်ႇသရေး ဢဝ်တပ်ႉၵၢင်ႁၢဝ် ယိုဝ်း ၼိူဝ်ဝဵင်း Gaza ၼႆႉ ႁၢဝ်ႈႁႅင်းမႃး မိူဝ်ႈပူၼ်ႉမႃးလၢႆဝၼ်းၼၼ်ႉသေ တီႈၵူၼ်းယူႇသဝ်း ႁိမ်းႁွမ်း Zeitoun လႄႈ Sabra ၼၼ်ႉ လႆႈထုၵ်ႇယိုဝ်း "လူၺ်ႈလွင်ႈယိုဝ်းၵၢင်ႁၢဝ် ႁၢဝ်ႈႁႅင်းၼႃႇ ဢၼ်ယိူင်းၸူး ႁိူၼ်းၵူၼ်းမိူင်း ဢိၵ်ႇပႃး တိူၵ်ႈသုင်သုင်" ၼႆယဝ်ႉ။

ၶၢဝ်ႇဢၼ် ၽၢႆႇသိုၵ်းၶဝ် မၵ်းမၼ်ႈ ၽႅၼ်ၵၢၼ်ၼႆႉ ပဵၼ်ဝၢႆးသေ ၸုမ်းႁမၢသ်ႉၶဝ် လၢတ်ႈဝႃႈ ၸုမ်းတူဝ်တႅၼ်း ၸၼ်ႉသုင်ၶဝ် ႁွတ်ႈၽႅဝ် ဝဵင်းၵၢႆႇရူဝ်ႇ တႃႇတေဢုပ်ႇဢူဝ်း ၵမ်းဢွၼ်တၢင်းသုတ်း တင်း ၽူႈမီးပုၼ်ႈၽွၼ်း ဢီးၵျိပ်ႈၶဝ် တႃႇတေ ၵိုတ်းတိုၵ်း ၸူဝ်ႈၶၢဝ်းၼၼ်ႉ လၢႆၸူဝ်ႈမူင်းယဝ်ႉ။

ဝၢႆးသေ ပၢင်တိုၵ်း 22 လိူၼ်လိူဝ်ယဝ်ႉ လူင်ပွင်ၸိုင်ႈ ၼေႇတၢၼ်ႇယႃႇႁု ဝၢင်းၽႅၼ် တႃႇတေၶႂၢၵ်ႈပၢင်တိုၵ်း ၵႃႇၸႃႇၼၼ်ႉ ႁဵတ်းႁႂ်ႈ ၸၼ်ႉလုမ်ႈၾႃႉ ဢိၵ်ႇပႃး ၼႂ်းမိူင်း သၢၼ်ၶတ်း ၼႆယဝ်ႉ။

ၽူႈလူင်ႉလႅၼ်ႇ ဢၼ်ၸုမ်းၸၢတ်ႈၸိုင်ႈလုမ်ႈၾႃႉ ၵမ်ႉထႅမ်ၼၼ်ႉ ပၼ်ၾၢင်ႉဝႃႈ ၼႂ်းၼႃႈလိၼ်ၼၼ်ႉ တေမီးလွင်ႈဢိုပ်းယၢၵ်ႈ ၵႂၢင်ႈၶႂၢင် ဢၼ်ဢိတ်ႇသရေးၶဝ် လူတ်းယွမ်းပၼ် လွင်ႈၸွႆႈထႅမ် ၵူၼ်းမိူင်း ဢၼ်ၶဝ်ပၼ်ၶႂၢင်ႉၶဝ်ႈမႃးၼၼ်ႉ ၼႆယဝ်ႉ။

လွင်ႈဢၼ် ၸုမ်းႁမၢသ်ႉၶဝ် လႆႈၶဝ်ႈယိုဝ်း မိူဝ်ႈလိူၼ်ဢွၵ်ႇထူဝ်ႇပႃႇ 2023 ဢၼ်ႁဵတ်းႁႂ်ႈ ပဵၼ်ပၢင်တိုၵ်းၼၼ်ႉ ႁဵတ်းႁႂ်ႈ ၵူၼ်းတၢႆ 1,219 ၵေႃႉ ၼႆ ၶၢဝ်ႇ AFP ဢၼ်ဢိင်ၼိူဝ် ၶေႃႈမုၼ်း ဢၼ်ပဵၼ်တၢင်းၵၢၼ်ၼၼ်ႉ ဢွၵ်ႇဝႆႉၼင်ႇၼႆ။

ၽၢႆႇပၢႆးယူႇလီ တီႈၵႃႇၸႃႇ ဢၼ်ၸုမ်းႁမၢသ်ႉၶဝ် ၵုမ်းၵမ်ၼၼ်ႉ ၸၢတ်ႈၸိုင်ႈလုမ်ႈၾႃႉ ႁၼ်ထိုင်ဝႃႈ ၽၢႆႇၵူၼ်းမိူင်းပႃႇလႅတ်ႉသတၢႆး လႆႈတၢႆၵႂႃႇ ဢမ်ႇယွမ်း 61,599 ၵေႃႉ ၼႆယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=သိုၵ်းဢိတ်ႇသရေး_လၢတ်ႈဝႃႈ_လႆႈမၵ်းမၼ်ႈ_ၽႅၼ်ၵၢၼ်_တႃႇတေၶဝ်ႈတိုၵ်း_ၵႃႇၸႃႇ_ဢၼ်မႂ်ႇ&oldid=12174"