သိုၵ်းထႆး လႄႈ ၵမ်ႇပေႃးတီးယႃး ပဵၼ်ပၢင်တိုၵ်းၵၼ် တီႈလႅၼ်လိၼ် ဢၼ်မီးလွင်ႈထဵင်ထွင်ၵၼ်
ဝၼ်းၽတ်း၊ ၸူႇလၢႆႇ 24၊ 2025
မိူဝ်ႈၸဝ်ႉဝၼ်းၽတ်းၼၼ်ႉ သိုၵ်းထႆး လႄႈ သိုၵ်းၵမ်ႇပေႃးတီးယႃး လႆႈပဵၼ်ပၢင်တိုၵ်းၵၼ် တီႈလႅၼ်လိၼ် ဢၼ်မီးလွင်ႈထဵင်ထွင်ၵၼ်ၼၼ်ႉသေ သွင်ၽၢႆႇ ၼႄးၵၼ်ဝႃႈ ပဵၼ်ၵေႃႉတႄႇယိုဝ်းၵၼ် ဢွၼ်တၢင်းၼႆယဝ်ႉ။
ၽၢႆႇသိုၵ်းထႆးၶဝ်တႄႉ လၢတ်ႈဝႃႈ သိုၵ်းၵမ်ႇပေႃးတီးယႃးၶဝ် ယိုဝ်းၵွင်ႈ တီႈႁိမ်းၵျွင်းၶမဵၼ် တႃမိုၼ်းထူမ်း ဢၼ်မီးလွင်ႈၶဵင်ႈၶႅင်ၵၼ် ၼႂ်းဝူင်ႈဝၢင်ႈၼႆႉ ၼႆယဝ်ႉ။
ၵူၺ်းၵႃႈ ၽၢႆႇၵႅတ်ႇၶႄ မိူင်းၵမ်ႇပေႃးတီးယႃးတႄႉ လၢတ်ႈဝႃႈ ဝၢႆးသေ သိုၵ်းထႆး ယိုဝ်းၵွင်ႈဢွၼ်တၢင်းသုတ်းယဝ်ႉ ၵူၼ်းသိုၵ်းၶဝ် လႆႈတုမ်ႉတွပ်ႇ တႃႇၵႅတ်ႇၶႄတူဝ်ၵဝ်ႇ ၼႆယဝ်ႉ။
မိူင်းၵမ်ႇပေႃးတီးယႃး ယၢမ်ႈသူင်ႇ ႁိူဝ်းမိၼ် Drone ဢၼ်ပႂ်ႉတူၺ်း ၼႂ်းပိုၼ်ႉတီႈၼၼ်ႉ မိူဝ်ႈပႆႇသူင်ႇသိုၵ်းယိပ်းၵွင်ႈၵၢင်ႇ ႁၢဝ်ႈႁႅင်း ၼႆသေ ၽၢႆႇသိုၵ်းထႆး လၢတ်ႈဝႃႈ ၵူၼ်းသိုၵ်းထႆး လႆႈမၢတ်ႇၸဵပ်း ဢမ်ႇယွမ်း 2 ၵေႃႉ ၼႆယဝ်ႉ။
ၽူႈမီးသုၼ်ႇလၢတ်ႈ ထၢၼ်ၽွင်းလူင် ၵၢၼ်ၵႅတ်ႇၶႄ မိူင်းၵမ်ႇပူးၶျႃး Maly Socheata လၢတ်ႈဝႃႈ သိုၵ်းၶဝ် “ၸႂ်ႉတိုဝ်းသုၼ်ႇလႆႈ တႃႇၵႅတ်ႇၶႄ ဢႃႇၼႃႇၽွင်းငမ်း လႄႈ ၼႃႈလိၼ် ဢၼ်မၼ်ႈၵိုမ်း တေႃႇ လွင်ႈပူၼ်ႉပႅၼ် သိုၵ်းထႆး” ၼႆယဝ်ႉ။
Socheata လၢတ်ႈဝႃႈ မိူင်းထႆး "ပူၼ်ႉပႅၼ် ၼႃႈလိၼ် မိူင်းၵမ်ႇပေႃးတီးယႃး" ၼႆယဝ်ႉ။
ၸႄႈမိူင်းၵမ်ႇပေႃးတီးယႃး သွင်တီႈၼၼ်ႉ လႆႈထုၵ်ႇသိုၵ်းထႆး ယိုဝ်းမၢၵ်ႇတိူၵ်းသႂ်ႇ ပဵၼ်ပွတ်းတွၼ်ႈ ၼႆ ၽူႈဢွၼ်ႁူဝ်ၵဝ်ႇ ႁုၼ်ႇသႅၼ်ႇ လၢတ်ႈၼႄ ၼႂ်းၾဵတ်ႉပုၵ်ႉသေ တိုၵ်းသူၼ်းပႃးဝႃႈ ယႃႇပေၵူဝ်ႁႄ ၼႆယဝ်ႉ။
ၸွမ်ၽွင်းလူင် ႁုၼ်ႇမၼႅတ်ႉ လၢတ်ႈတီႈ ၾဵတ်ႉပုၵ်ႉဝႃႈ “မိူင်းၵမ်ႇပေႃးတီးယႃးၼႆႉ တိုၼ်းမီးဝႆႉ ၼႃႈတီႈ ၶႂ်ႈၵႄႈလိတ်ႈပၼ်ႁႃ လူၺ်ႈလၢႆးငမ်းယဵၼ်ယူႇ ၵူၺ်းၵႃႈ ၼႂ်းလွင်ႈၼႆႉ ႁဝ်းၶႃႈ ဢမ်ႇမီးတၢင်းလိူၵ်ႈသင် လိူဝ်သေ ဢဝ်ႁႅင်းသိုၵ်း တွပ်ႇတႅၼ်း လွင်ႈပူၼ်ႉပႅၼ် ၵွင်ႈၵၢင်ႇ” ၼႆယဝ်ႉ။
ၸွမ်ၽွင်းလူင် မိူင်းထႆး ဢၼ်ႁပ်ႉပုၼ်ႈၽွၼ်း ၽူမ်းထမ်ႇ ဝႄႇၶျႃႇယႃႇၶျၢႆႇ လၢတ်ႈဝႃႈ လွင်ႈထဵင်ထွင် တင်း မိူင်းၵမ်ႇပေႃးတီးယႃးၼႆႉ တိုၵ်ႉပဵၼ် လွင်ႈၶိုၵ်ႉၶၵ်ႉယူႇလႄႈ တေလႆႈ ၾၢင်ႉသတိသေ ၵႄႈလိတ်ႈ ႁႂ်ႈမႅၼ်ႈၸွမ်း ပၵ်းပိူင် ၸၼ်ႉလုမ်ႈၾႃႉ ၼႆယဝ်ႉ။
ဝၢႆးသေ မၢၵ်ႇတႅၵ်ႇ ၸွမ်းလႅၼ်လိၼ်သေ ၵူၼ်းသိုၵ်းထႆး ၵေႃႉ႞ လႆႈမၢတ်ႇၸဵပ်းယဝ်ႉ မိူင်းထႆး ႁွင်ႉဢဝ် ၽွင်းတၢင် မိူင်းၵမ်ႇပေႃးတီးယႃးမၼ်း ၶိုၼ်းမႃးယဝ်ႉ ထႅင်ႈဝၼ်း႞ၵေႃႈ ၸင်ႇပဵၼ်ပၢင်တိုၵ်းၵၼ်မႃး မိူဝ်ႈဝၼ်းၽတ်းၼၼ်ႉယဝ်ႉ။
မိူဝ်ႈဝၼ်းပုတ်ႉၼၼ်ႉ ၵုင်းထဵပ်ႈၵေႃႈ လၢတ်ႈဝႃႈ တေလိုပ်ႈဢွၵ်ႇ ၶုၼ်ၽွင်းတၢင် မိူင်းၵမ်ႇပူးၶျႃးၼႆယဝ်ႉ။
ဝၢႆးသေ မိူဝ်ႈလိူၼ်မေႇၼၼ်ႉ ပဵၼ်ပၢင်တိုၵ်းၵၼ် လူၺ်ႈၵွင်ႈၵၢင်ႇသေ ၵူၼ်းသိုၵ်းၵမ်ႇပေႃးတီးယႃး ၵေႃႉ႞ လႆႈတၢႆၵႂႃႇယဝ်ႉလႄႈ လွင်ႈၵပ်းသိုပ်ႇ သွင်မိူင်းၼႆႉ ပဵၼ်ဢၼ်ႁၢႆႉသုတ်း ၼႂ်းၶၢဝ်းတၢင်း သိပ်းပီလိူဝ်လိူဝ်ယဝ်ႉ။
ဝၢႆးသေၼၼ်ႉ မိူင်းၵမ်ႇပေႃးတီးယႃး တုၵ်းယွၼ်း ႁႂ်ႈလုမ်းတြႃးလုမ်ႈၾႃႉ ICJ ဢၼ်မီးတီႈဝဵင်း The Hague ၼၼ်ႉ ၸွႆႈၵႄႈလိတ်ႈပၼ် ၼႃႈလိၼ် ဢၼ်မီးလွင်ႈထဵင်ထွင်ၵၼ် 4 တီႈၼၼ်ႉ ၼႆယဝ်ႉ။ ၵူၺ်းၵႃႈ မိူင်းထႆးတႄႉ လၢတ်ႈဝႃႈ ဢမ်ႇႁပ်ႉႁွင်း ဢႃႇၼႃႇလုမ်းတြႃး ၼႂ်းလွင်ႈၼႆႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Kelly Ng. "Thai and Cambodian troops clash at disputed border" — BBC News, JULY 24, 2025
- Panu Wongcha-um. "Two soldiers wounded as Thai and Cambodia militaries clash at disputed border" — Reuters, JULY 24, 2025
- Helen Regan and Kocha Olarn. "Shots fired, landmine explosions as relations break down between Thailand and Cambodia" — CNN, JULY 24, 2025
- Bangkok Post. "Cambodia opens fire at Thai military base" — Bangkok Post, JULY 24, 2025
