ဝၼ်းၵိူတ်ႇ ၶူးဝႃးဝုၼ်းၸုမ်ႉ တီႈဝဵင်းၵႅဝ်ႈ (ၵဵင်းသႅၼ်) ပီ 2026

ဝၼ်းသုၵ်း၊ ၸၼ်ႇဝႃႇရီႇ 9၊ 2026

ဝၼ်းၵိူတ်ႇၶူးဝႃးဝုၼ်းၸုမ်ႈၼႆႉ တမ်ႈတီႈ ဝဵင်းၵႅဝ်ႈ (ၵဵင်းသႅၼ်)ၵေႃႈ တေႃႈၸတ်းႁဵတ်းၵူႈပီပီယူႇၼင်ႇၵဝ်ႇ။ ၶၢဝ်းယၢမ်းမၼ်းတႄႉ ပဵၼ်ဝၢႆးလင်ဝၼ်းၵိူတ်ႇ ဢၼ်ႁဵတ်းတီႈ မိူင်းၽူင်းၼၼ်ႉၵူႈပီ။

တႃႇပီ 2026 ၼႆႉတႄႉ ၶူးဝႃးဝုၼ်းၸုမ်ႉ ႁဵတ်းဝၼ်းၵိူတ်ႇ တီႈမိူင်းၽူင်းယဝ်ႉၵႂႃႇ မိူဝ်ႈ 5.1.2026 သေ ထိုင်မႃး 7.1.2026 ၵၢင်ၼႂ် 10 မွင်းပၢႆ ၸဝ်ႈၶူးဝႃး လုၵ်ႉၽၢႆႇတႃႈၶီႈလဵၵ်းသေ ၶၢမ်ႈၶူဝ်ၶဝ်ႈမိူဝ်း မႄႈသၢႆ (ၽၢႆႇထႆး)ယဝ်ႉ မိူဝ်းၵႂႃႇ တီႈလွႆဝဵင်းၵႅဝ်ႈ (ၵဵင်းသႅၼ်)ယဝ်ႉ။ ဝၼ်းၼၼ်ႉ ၸဝ်ႈၶူးဝႃးဝုၼ်းၸုမ်ႉ မဵတ်ႉတႃႇ တြႃးပၼ် တၵႃႇၼမ်လၢႆ တမ်ႈတီႈ ႁေႃႁေႃးထမ်း ဢၼ်မီးႁိမ်းၽၢႆႇၼႃႈ ၽြႃးၶၢဝ် ၼိူဝ်လွႆဝဵင်းၵႅဝ်ႈၼၼ်ႉသေ ၸဝ်ႈၶူးလူင်တွၵ်ႇတိူဝ်ႇထမ်ႇမသႃႇမိ လႄႈ ၸဝ်ႈသြႃႇသုၶမ်းၵေႃႈ မိူဝ်းၸွႆႈႁေႃး တြႃးသူင်ႇမဵတ်ႉတႃႇပၼ်ယဝ်ႉ။ ဝၼ်းၼၼ်ႉ ၸဝ်ႈၶူးလူင် ၶိုၼ်းပွၵ်ႈမိူဝ်းၵႂႃႇ တႃႈၶီႈလဵၵ်းသေတ ၸဝ်ႈသြႃႇသုၶမ်းတႄႉ သိုပ်ႇမီးၸွမ်း ၶူးဝႃးဝုၼ်းၸုမ်ႈ တီႈဝဵင်းၵႅဝ်ႈ တႃႇသွင်ၶိုၼ်းယူႇ။ ထိုင်မႃး ဝၢႆးဝၼ်း 3 မွင်း ၶူးဝႃးဝုၼ်းၸုမ်ႉလႄႈ သင်ႇၶႃႇၸဝ်ႈၶဝ် ဢွၼ်ၵၼ် သုတ်ႇမုၼ်းလွတ်ႈႁေႃး ၽႄမဵတ်ႉတႃႇပၼ် ၸဝ်ႈမႄႈ ၼၢင်းႁေႃၶမ်းထႆး ဢၼ်လႆႈၼွၼ်းၽႄးၵွႃႇၼၼ်ႉယဝ်ႉ။

ထိုင်မႃး ႁူဝ်ၶမ်ႈၵေႃႈ ၶူးဝႃး ၶိုၼ်းမႃးႁေႃးတြႃး ဢွၼ်ဝႆႈၽြႃး ဢွၼ်ၼင်ႈၵမ်ႇမထၢၼ်း ၸႅၵ်ႇၽႄၶူဝ်းလူႇ ၸႅၵ်ႇၽႄၵုသူဝ်ႇၵႂႃႇယဝ်ႉ။

8.1.2026 ဝၼ်းၼႆႉတႄႉ ၶပ်ႉမၢႆမၼ်း လုၵ်ႉဝႆႈၽြႃး တၢင်ႇသွမ်းၼႂ်ၽြႃးယဝ်ႉတူဝ်ႈလီငၢမ်း ၶၢဝ်းယၢမ်း တွၼ်ႈၼႂ် 8 မွင်းလိူဝ်လိူဝ် ၶူးဝႃးဝုၼ်းၸုမ်ႉလႄႈ ၽူႈမီးပုၼ်ႈၽွၼ်းၶဝ် ၵႂႃႇပိုတ်ႇၽုၺ်ႇ ႁွင်ႈၼႄပိုၼ်း ၶူးဝႃးဝုၼ်းၸုမ်ႉသေ တီႈၼႂ်းၼၼ်ႉ ၼႄဝႆႉ ၶႅပ်းႁၢင်ႈၵိုၵ်းပိုၼ်းၶူးဝႃး ဢိၵ်ႇ ၼႄပႃး ၶူဝ်းၵဝ်ႇၶူဝ်းမွၼ် ဢၼ်ၶူးဝႃး ၸႂ်ႉတိုဝ်းမႃးၼၼ်ႉယဝ်ႉ။ ၶူးဝႃးဢဝ်လူတ်ႉ(ၵႃး) ပႃႇၵျႄႇလူဝ်ႇၵဝ်ႇ လမ်းၼိုင်ႈၵေႃႈ လူႇဝႆႉပၼ် တႃႇႁွင်ႈၼႄပိုၼ်းၼၼ်ႉယဝ်ႉ။ ၶၢဝ်းယၢမ်းႁေႃးတြႃး သုတ်ႇမုၼ်းၵေႃႈ ပဵၼ်ၶၢဝ်းယၢမ်း 2 မွင်းပၢႆလႄႈ ႁူဝ်ၶမ်ႈ 7 မွင်းၼၼ်ႉယဝ်ႉ။

9.1.2026 ဝၼ်း ၵၢင်ၼႂ် 7 မွင်းၶိုင်ႈ သင်ႇၶႃႇပိုၼ်ႉတီႈ ယေႃးၶိင်းမႃး သိုပ်ႇၸႃႇတႃႇပၼ် ၶူးဝႃးဝုၼ်းၸုမ်ႉသေ ၶၢဝ်းယၢမ်းၵၢင်ၼႂ် 9 မွင်းပၢႆ ယဝ်ႉတူဝ်ႈၵႂႃႇလီငၢမ်း။ တၵႃႇသထႃး ၸိူဝ်းမႃးၶဝ်ႈ ပွႆးဝၼ်းၵိူတ်ႇၶူးဝႃးဝုၼ်းၸုမ်ႉၵေႃႈ မီးၼမ်တႄႉတႄႉ။ မွၵ်ႈ 80 %လိူဝ်ၼႆႉ ပဵၼ်တႆးႁဝ်းယဝ်ႉ။

ၵႂႃႇဝႆႈသႃ ႁူဝ်ပဝ်ႈလူင်သင်ႇၶမႁႃႇၼႃႇယၵ ၸိုင်ႈမိူင်း

ယွၼ်ႉပိူဝ်ႈ ၸဝ်ႈသြႃႇလူင် ႁူဝ်ပဝ်ႈသင်ႇၶမႁႃႇၼႃႇယၵ ၸိုင်ႈမိူင်း (မိူင်းမျၢၼ်ႇမႃႇ) တေယေႃးၶိင်းမႃး မိူင်းၽူင်းၼႆလႄႈ ၽူႈမီးပုၼ်ႈၽွၼ်းၶဝ် ၸင်ႇလႆႈႁၢင်ႈႁႅၼ်း လူႇတၢၼ်း သွမ်းဝၼ်းပၼ် ၶဝ်ၸဝ်ႈ တီႈထၢတ်ႈမႁႃႇၽေႃးထိ ပုတ်ႉထၵယႃႇ မိူင်းၽူင်းယဝ်ႉ။ ဝၢႆးၶဝ်ၸဝ်ႈ ဢဝ်သွမ်းဝၼ်းယဝ်ႉ ၶူးဝႃးဝုၼ်းၸုမ်ႉၵေႃႈ လုၵ်ႉမႄႈသၢႆ ႁွတ်ႈထိုင်မႃး တီႈထၢတ်ႈမႁႃႇၽေႃးထိသေ မႃးဝႆႈသႃ လူႇတၢၼ်း ၶူဝ်းလူႇၶူဝ်းတၢၼ်းပၼ် ၸဝ်ႈသြႃႇလူင် သင်ႇၶမႁႃႇၼႃႇယၵ ၸိုင်ႈမိူင်းၵႂႃႇ။ ဝၢႆးၼၼ်ႉ သြႃႇၸဝ်ႈလူင်ၶဝ် ဢႅဝ်ႇလႄႇတူၺ်း ၼင်လိၼ်သႃႇသၼႃႇ မိူင်းၽူင်းသေ ဝၢႆးဝၼ်း 12 မွင်းပၢႆ ၶိုၼ်းပွၵ်ႈမိူဝ်းၵႂႃႇ တႃႈၶီႈလဵၵ်း။ ၶူးဝႃးဝုၼ်းၸုမ်ႉၵေႃႈ ၶိုၼ်းပွၵ်ႈၵႂႃႇ ၵဵင်းသႅၼ်ယဝ်ႉ။

ထိုင်မႃး တၢမ်းၶမ်ႈ 5 မွင်း သင်ႇၶႃႇၸဝ်ႈလႄႈ ၸိူဝ်းမႃးၶဝ်ႈပွႆးတင်းသဵင်ႈ ဢဝ်ၸွမ်းၼင်ႇ ၶပ်ႉမၢႆမီးၼၼ်ႉသေ ဢွၼ်ၵၼ် လူႇၼမ်ႉသွၼ်းတိၼ်သွၼ်းမိုဝ်း ၶူးဝႃးဝုၼ်းၸုမ်ႉၵႂႃႇယဝ်ႉ။ ထိုင်မႃး ၵၢင်ၶမ်ႈ 7 မွင်းၸမ်ၸမ်ၼၼ်ႉ ၶူးဝႃးၶိုၼ်းမႃး ႁေႃးတြႃး ဝႆႈၽြႃး သုတ်ႇမုၼ်း ဢွၼ်ၼင်ႈၽႃႇဝၼႃႇၵႂႃႇသေ ၶၢဝ်းယၢမ်းၶမ်ႈ 8 မွင်းပၢႆ ၶွတ်ႇယွတ်ႈယၢတ်ႇၼမ်ႉ ပၢင်ၵႅဝ်ႈဝၼ်းၵိူတ်ႇၵႂႃႇယဝ်ႉ။ ႁႂ်ႈၸဝ်ႈသိၼ်ထမ်းဝုၼ်းၸုမ်ႉ ဢႃႇယုယိုၼ်းယၢဝ်း ၶၢဝ်းႁိုင် ပွင်ၶိုင်လႆႈ သႃႇသၼႃႇ ႁႂ်ႈႁိူဝ်ႈႁိူင်းၵႂႃႇ ဝၼ်းတႃမိူဝ်းၼႃႈ ယႂ်ႇယႂ်ႇၼမ်ၼမ်သေၵမ်း။

ႁွင်ႈၼႄပၢႆးမွၼ်း

ၶႅပ်းႁၢင်ႈမၢႆတွင်း ဝၼ်းၵိူတ်ႇ ၶူးဝႃးဝုၼ်းၸုမ်ႉ တီႈဝဵင်းၵႅဝ်ႈ (ၵဵင်းသႅၼ်) ပီ 2026

ငိူၼ်ႈငဝ်ႈၶၢဝ်ႇ

ဝီႇၶီႇၶၢဝ်ႇ

လိၵ်ႈႁွမ်တွမ် ၶၢဝ်ႇႁူဝ်ၼႆႉ ၼႆႉ ပဵၼ်ၵၢၼ်သိုဝ်ႇၶၢဝ်ႇ မိုဝ်းဢွၼ်တၢင်းသုတ်း လူၺ်ႈ ၽူႈၶဝ်ႈၸုမ်း ဝီႇၶီႇၶၢဝ်ႇၶႃႈဢေႃႈ။ တွၼ်ႈတႃႇ ႁူဝ်ယွႆႈမၼ်း တူၺ်းပၼ်တီႈ ၼႃႈလိၵ်ႈႁွမ်းမိုဝ်းၵၼ် ၼၼ်ႉလႄႈ။

ဝီႇၶီႇၶၢဝ်ႇ

လိၵ်ႈႁွမ်တွမ် ၶၢဝ်ႇႁူဝ်ၼႆႉ ၼႆႉ ပဵၼ် ၵၢၼ်သိုဝ်ႇၶၢဝ်ႇ မိုဝ်းဢွၼ်တၢင်းသုတ်း လူၺ်ႈ ၽူႈၶဝ်ႈၸုမ်း ဝီႇၶီႇၶၢဝ်ႇ။ တွၼ်ႈတႃႇ ႁူဝ်ယွႆႈမၼ်း တူၺ်းပၼ်တီႈ ၼႃႈလိၵ်ႈႁွမ်းမိုဝ်းၵၼ် ၼၼ်ႉလႄႈ။