လူမ်းလႅင်ႉလူင် မတ်ႉမူဝ်ႇ ၽတ်ႉၶဝ်ႈမိူင်းၶႄႇပွတ်းၸၢၼ်း ၺႃးမႅၼ်ႈမိူဝ်ႈၶၢဝ်းလိုဝ်ႈၵၢၼ်
ဝၼ်းဢႃးတိတ်ႉ၊ ဢွၵ်ႇထူဝ်ႇပႃႇ 5၊ 2025
လူမ်းလႅင်ႉလူင် Matmo ၽတ်ႉၶဝ်ႈမႃး တီႈမိူင်းၶႄႇပွတ်းၸၢၼ်း မိူဝ်ႈဝၼ်းဢႃးတိတ်ႉ (5/10/2019) ၼၼ်ႉ ဝၢႆးသေ ၶၢဝ်းတၢင်းႁိူဝ်းမိၼ် လႄႈ ပၢင်ပွႆးလၢႆလၢႆဢၼ် လႆႈၶိုၼ်းယႃႉပႅတ်ႈ တီႈၸႄႈမိူင်းၵုၼ်ႁၢႆးၼၢၼ်ႇၼၼ်ႉ ႁဵတ်းႁႂ်ႈ ၶၢဝ်းတၢင်း ဢၼ်ၵူၼ်းၼမ် ၵႂႃႇလိုဝ်ႈသဝ်းၼၼ်ႉ လႆႈလူႉလႅဝ်ၵႂႃႇ ၼႆယဝ်ႉ။
Matmo ဢၼ်ႁဵတ်းႁႂ်ႈ ၼမ်ႉထူမ်ႈ တီႈမိူင်းၾီလိပ်ႈပိၼ်း မိူဝ်ႈၸဝ်ႉဝူင်ႈၼႆႉၼၼ်ႉ ယၢမ်းဝၢႆးဝၼ်း မွၵ်ႈ 2.50 မူင်း ထိုင်မႃးတီႈၽင်ႇပၢင်ႇလၢႆႇ ၽၢႆႇဢွၵ်ႇ ၸူႇဝႅၼ်ႇ ၸႄႈမိူင်းၵႂၢင်းတူင်းၼၼ်ႉယဝ်ႉ။
ယွၼ်ႉဝႃႈ မၼ်းၸမ်တေထိုင် ၽင်ႇပၢင်ႇလၢႆႇ မိူင်းၶႄႇလႄႈ မၼ်းႁဵတ်းဢွၵ်ႇႁႅင်းလူမ်း 151kmh ၼႆ သုၼ်ၵၢင်ၾိင်ႈၾႃႉရႃႇသီႇ ၸိူဝ်ႉၸၢတ်ႈ လၢတ်ႈၼႄၼင်ႇၼႆ။
လူမ်းလႅင်ႉလူင်ၼႆႉ ၽႅဝ်မႃး ၼႂ်းၵႄႈၵၢင် ဝၼ်းလိုဝ်ႈၵၢၼ် 8 ဝၼ်း ဢၼ်တႄႇမႃး ဝၼ်းၸိူဝ်ႉၸၢတ်ႈ မိူဝ်ႈဝၼ်းပုတ်ႉၼၼ်ႉသေ ၼႂ်းၶၢဝ်းတၢင်းၼၼ်ႉ ၵူၼ်းမိူင်ဢွၵ်ႇၶၢဝ်းတၢင်း မွၵ်ႈ 2.36 ပီႇလီႇယၼ်ႇ ၼႆ သိုဝ်ႇၶၢဝ်ႇ ၸိုင်ႈမိူင်းၶဝ် ဢွၵ်ႇၶၢဝ်ႇဝႆႉၼင်ႇၼႆ။
ၶၢဝ်းတၢင်းႁိူဝ်းမိၼ် လႄႈ ႁိူဝ်းသၢင်းၽေႃး တီႈဝဵင်းႁၢႆးၼၢၼ်ႇ ဢၼ်ပဵၼ် တီႈလိုဝ်ႈသဝ်း ဝဵင်းႁၢႆးၼၢၼ်ႇၼၼ်ႉ တႄႇဢဝ် မိူဝ်ႈဝၼ်းသဝ် ၵၢင်ၶမ်ႈၼၼ်ႉ လႆႈၶိုၼ်းယႃႉပႅတ်ႈ ယွၼ်ႉ လူမ်းလႅင်ႉလူင် Matmo လႄႈ ၾူၼ်တူၵ်းႁႅင်း ၼၼ်ႉယဝ်ႉ။
မိူဝ်ႈဝၼ်းသုၵ်းၼၼ်ႉ လူမ်းလႅင်ႉလူင်Matmo လႆႈၶၢမ်ႈလွႆ ၽၢႆႇႁွင်ႇ မိူင်းၾီလိပ်ႈပိၼ်းသေ ၵူၼ်းၼပ်ႉႁူဝ်ႁဵင် လႆႈပၢႆႈဢွၵ်ႇၵႂႃႇယူႇယဝ်ႉ။
မၼ်းၶၢမ်ႈပူၼ်ႉ လွႆၽုၵ်ႇသွမ်ႈ ဢၼ်ၵႂၢင်ႈယႂ်ႇ လႄႈ ၸႄႈမိူင်းလွႆသေ လႆႈမီးလွင်ႈၼမ်ႉထူမ်ႈ ၼႆ ၽူႈမီးပုၼ်ႈၽွၼ်းၶဝ် လၢတ်ႈၼႄၼင်ႇၼႆ။ လူမ်းလႅင်ႉလူင်ၼႆႉ ၽတ်ႉၶဝ်ႈမႃး တီႈႈၸႄႈမိူင်း Isabela ပွတ်းႁွင်ႇဝၼ်းဢွၵ်ႇ မိူဝ်ႈဝၼ်းသုၵ်းၵၢင်ၼႂ်ၼၼ်ႉယဝ်ႉ။
လွင်ႈၵူၼ်းမၢတ်ႇၸဵပ်းလူႉတၢႆတႄႉ ပႆႇလႆႈႁူႉၸွမ်း ဝႃႈၼႆ။ ၵူၼ်းဝၢၼ်ႈ 8,000 ၵေႃႉလိူဝ် လႆႈၶၢႆႉတီႈယူႇသေ တီႈဝဵင်းဢီႇသႃႇပႄႇလႃႇ လႄႈ ၸႄႈမိူင်းဢေႃးရူဝ်ႇရႃႇ ဢၼ်မီးႁိမ်းႁွမ်းၼၼ်ႉ လႆႈႁူႉဝႃႈ ၾႆးၾႃႉမွတ်ႇၵႂႃႇ ၼႆယဝ်ႉ။
ႁူင်းႁဵၼ်း ၵိုတ်းယိုတ်း ၵၢၼ်ႁဵၼ်း လႄႈ ႁိူဝ်းတၢင်ႇၵုၼ်ႇ လႄႈ ႁိူဝ်းႁႃပႃ ၸိူဝ်းၼႆႉ ဢမ်ႇပၼ်ၶဝ်ႈၵႂႃႇ ၼႂ်းပၢင်ႇလၢႆႇ ဢၼ်ႁၢဝ်ႈႁႅင်း ၸွမ်းသဵၼ်ႈတၢင်း လူမ်းလႅင်ႉလူင်ၼၼ်ႉ။
ဢၼ်ၵူၼ်းၼႂ်းပိုၼ်ႉတီႈ ႁွင်ႉဝႃႈ ပၢဝ်ႇလူဝ်ႇ (Paolo) ၼၼ်ႉ ပဵၼ်လူမ်းလႅင်ႉလူင် ဢၼ်ၽတ်ႉၶဝ်ႈ မိူင်းၾီလိပ်ႈပိၼ်း ၼႂ်းပီၼႆႉ ပွၵ်ႈၵမ်း 16 ၼႆယဝ်ႉ။
ငိူၼ်ႈငဝ်ႈၶၢဝ်ႇ
[မႄးထတ်း | မႄးထတ်းငဝ်ႈငႃႇ]- Reuters. "Typhoon Matmo hits southern China during peak holiday season" — Reuters, October 5, 2025
- The Nation. "Heavy rain forecast in upper Thailand as Typhoon Matmo makes landfall in China" — The Nation, October 5, 2025
- China Global Television Network. "Typhoon Matmo makes landfall in Guangdong" — China Global Television Network, October 5, 2025
- Cna. "Typhoon Matmo hits southern China during peak holiday season" — CNA, October 5, 2025
