Jump to content

လုမ်းတႅၼ်းၽွင်း မၵ်းမၼ်ႈ ၶရိတ်ႉသတီးၼူမ်း ပဵၼ်ၽွင်းလူင်ၽၢႆႇႁူမ်ႇ​လူမ်ႈ မႄႈမိူင်း

လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းဢႃးတိတ်ႉ၊ ၸၼ်ႇဝႃႇရီႇ 26၊ 2025

ၶရိတ်ႉသတီးၼူမ်း

မိူဝ်ႈဝၼ်းဢႃးတိတ်ႉၼၼ်ႉ သၽႃးသုင် လႆႈမၵ်းမၼ်ႈ ၽူႈၵွၼ်းၸႄႈမိူင်ႈ ၸႄႈမိူင်း South Dakota ဢၼ်ပဵၼ် Kristi Noem ၼၼ်ႉ ပဵၼ်ၽွင်းလူင် ၽၢႆႇႁူမ်ႇလူမ်ႈ မႄႈမိူင်း ဢၼ်ပဵၼ် ႁွင်ႈၵၢၼ် ဢၼ်လမ်ႇလွင်ႈ တႃႇလွင်ႈႁူမ်ႇလူမ်ႈ ၸိူဝ်ႉၸၢတ်ႈ ဢမႄႇရိၵၢၼ်ႇၼၼ်ႉယဝ်ႉ။

မၼ်းတေပဵၼ် ၽူႈလမ်ႇလွင်ႈ တႃႇၸွမ်ပွင်ၸိုင်ႈ တေႃႇၼႄႇထရမ်ႉ ဢၼ်တေၽဵဝ်ႈမူၺ်ႉ ၵူၼ်းၸိူဝ်းဢမ်ႇမီးဝႂ်ၵပ်းတူဝ် ၶဝ်ႈမိူင်းၼၼ်ႉယူႇ။ ၽွင်းလူင် ၽၢႆႇႁူမ်ႇလူမ်ႈမႄႈမိူင်း ၼႆႆႉ တေလႆႈဢဝ်ပုၼ်ႈၽွၼ်း ၽၢႆႇၵႅတ်ႇၶႄလႅၼ်လိၼ်၊ ၵၢၼ်ၵူတ်ႇထတ်းၵူၼ်းၶဝ်ႈမိူင်း၊ တေၵုမ်းၵမ် ၽၢႆႇၵူၼ်းမိူင်း လႄႈ ၽၢႆႇၵဵပ်းၶွၼ်ႇၵုၼ်ႇသိၼ် ၸိူဝ်းၼႆႉ။ လိူဝ်ၼၼ်ႉ မီးပုၼ်ႈၽွၼ်းပႃး ၵဵဝ်ႇၵပ်းလူၺ်ႈ လိူင်ႈၽေးသၽႃႇဝ၊ ယဝ်ႉၵေႃႈ လွင်ႈႁူမ်ႇလူမ်ႈ ၵၢၼ်တေႃႉသူင်ႇလူမ်း ၸိူဝ်းၼႆႉယဝ်ႉ။

ၶရိတ်ႉသတီးၼူမ်း ဢၼ်ပဵၼ် ၽူႈၵွၼ်းၸႄႈမိူင်း ပွၵ်ႈၵမ်းသွင်ၼၼ်ႉ ပဵၼ်ဢူၺ်းလီ ၸွမ်ပွင်ၸိုင်ႈထရမ်ႉ။ ယွၼ်ႉဝႃႈ မၼ်းမီးၽႅၼ်ၵၢၼ် တႃႇတေၶိုၼ်းမႄးၵေႃႇသၢင်ႈ ႁွင်ႈၵၢၼ် ၽၢႆႇၸတ်းၵၢၼ် လွင်ႈၶိုၵ်ႉၶၵ်ႉ မိူင်းႁူမ်ႈတုမ်သေ ၸႂ်ႉတိုဝ်း တပ်ႉသိုၵ်း ၼႂ်းၵၢၼ် ၽဵဝ်ႈမူၺ်ႉ ၵူၼ်းၶဝ်ႈမိူင်း လႄႈ တေႁဵတ်းႁႂ်ႈ လွင်ႈမၵ်းမၼ်ႈ လႄႈ ၼႃႈၵၢၼ် ႁွင်ႈၵၢၼ် ၽၢႆႇႁူမ်ႇလူမ်ႈ မႄႈမိူင်း လႅၵ်ႈလၢႆႈ ယႂ်ႇလူင် ဢိၵ်ႇပႃး လွင်ႈၸႂ်ႉတိုဝ်း ဢဵၼ်ႁႅင်း ၼႆယဝ်ႉ။

မိူဝ်ႈဝူင်ႈၼႆႉ လႆႈထွမ်ႇငိၼ်း တီႈၼႃႈ ၶွမ်ႇမတီႇ ၽၢႆႇႁူမ်ႇလူမ်ႈ မႄႈမိူင်း လႄႈ ၵၢၼ်လူင်ပွင်ၸိုင်ႈ တီႈသၽႃးသုင်သုတ်းသေ လႆႈႁပ်ႉလွင်ႈၵမ်ႉထႅမ် တီႈပႃႇတီႇ တီႇမူဝ်ႇၶရႅတ်ႉ ၵမ်ႈၽွင်ႈယူႇ။ ၸုမ်းရီႇပၢပ်ႉပလိၵ်ႇၵႅၼ်ႇၶဝ်ၵေႃႈ လၢတ်ႈဝႃႈ ယုမ်ႇယမ်ၼိူဝ် ၼမ်ႉၵတ်ႉမၼ်းလႄႈ ၶေႃႈတႅပ်းတတ်း တႃႇတေဢွၼ်ႁူဝ် လွင်ႈႁူမ်ႇလူမ်ႈ လႅၼ်လိၼ် လႄႈ လွင်ႈၵူၼ်းၶဝ်ႈမိူင်း ယွၼ်ႉဝႃႈ မၼ်းလႆႈၶႅပ်းၵၢင်ၸႂ် ဢၼ်လူဝ်ႇ တႃႇတေမၵ်းမၼ်ႈမၼ်းၼၼ်ႉ ယဝ်ႉၼႆယဝ်ႉ။

ၽူႈဢွၼ်ႁူဝ် ၽၢႆႇၵူၼ်းၼမ် ၼႂ်းသၽႃးသုင် ဢၼ်ပဵၼ် ၽူႈတႅၼ်းၽွင်း ရီႇပၢပ်ႉပလိၵ်ႇၵႅၼ်ႇ John Thune ဢၼ်လုၵ်ႉတီႈ ၸႄႈမိူင်း South Dakota မႃးၼၼ်ႉ လၢတ်ႈဝႃႈ “လွင်ႈၵႄႈလိတ်ႈပၼ်ႁႃ လႄႈ လွင်ႈၶိုၼ်းမႄး ပၵ်းပိူင်မၢႆမီႈၼႆႉ ပဵၼ်လွင်ႈဢၼ် ၸွမ်ပွင်ၸိုင်ႈထရမ်ႉ လႄႈ ပႃႇတီႇ ရီႇပၢပ်ႉပလိၵ်ႇၵႅၼ်ႇၶဝ် ဝႆႉၼၵ်းၼိူဝ် ဢၼ်ၼိုင်ႈ” ၼႆယဝ်ႉ။ ႁွင်ႈၵၢၼ်ၽၢႆႇႁူမ်ႇလူမ်ႈ မႄႈမိူင်းၼႆႉ လူဝ်ႇၽူႈဢွၼ်ႁူဝ် ဢၼ်ၸႅင်ႈလႅင်း လႄႈ ဢၼ်မၼ်ႈၵိုမ်း လႄႈ ၶႃႈယုမ်ႇယမ်ဝႃႈ ၶရိတ်ႉသတီးၼႆႉ မီးၼမ်ႉၵတ်ႉ တဵမ်ထူၼ်ႈ တႃႇတေ ႁၢပ်ႇၼႃႈတီႈၼၼ်ႉ တင်းမူတ်းယူႇ” ၼႆယဝ်ႉ။

မိူဝ်ႈဝၼ်းသဝ်ၼၼ်ႉ ၽူႈတႅၼ်းၽွင်း ရီႇပၢပ်ႉပလိၵ်ႇၵႅၼ်ႇၶဝ် သိုပ်ႇႁဵတ်းသၢင်ႈ ၵၢၼ်ပၼ်သဵင် ၼႂ်းသၽႃး တႃႇၼႃႈတီႈ ၼႂ်းလူင်ပွင်ၸိုင်ႈ ဢၼ်လမ်ႇလွင်ႈ ၼၼ်ႉယူႇ။

လွင်ႈဢၼ် ၸွမ်ပွင်ၸိုင်ႈ လိူၵ်ႈ Scott Bessent ပဵၼ် ၽွင်းလူင် ၽၢႆႇငိုၼ်းတွင်း ၼၼ်ႉၵေႃႈ လႆႈထုၵ်ႇ သၽႃးသုင်သုတ်း မၵ်းမၼ်ႈဝႆႉ မိူဝ်ႈဝၼ်းသဝ်ၼၼ်ႉသေ တေလႆႈပၼ်သဵင်ၵၢင်ၸႂ် ၵမ်းလိုၼ်းသုတ်း ဝၼ်းၸၼ်ၼၼ်ႉယဝ်ႉ။

မိူဝ်ႈတွၼ်ႈၶမ်ႈ ဝၼ်းသုၵ်းၼၼ်ႉ ပီႇတႄႇႁႅၵ်ႉသႅတ်ႉ ဢၼ်ပဵၼ် ၽူႈတၢင်ႇလၢႆးငၢၼ်းၶၢဝ်ႇ Fox News ၵဝ်ႇ လႄႈ ၽူႈမီးၸၼ်ႉသိုၵ်း ဢမႄႇရိၵၢၼ်ႇ ၵဝ်ႇၼၼ်ႉ လႆႈမၵ်းမၼ်ႈ ပဵၼ်ၽွင်းလူင် ၽၢႆႇၵႅတ်ႇၵင်ႈ ၼႆယဝ်ႉ။ ၼႂ်းဝၼ်းပူၼ်ႉမႃးၼႆႉ ၼႃႈတီႈလမ်ႇလွင်ႈတၢင်ႇဢၼ်ၵေႃႈ လႆႈတဵမ်ထူၼ်ႈမႃး မိူၼ်ၼင်ႇ ၽွင်းလူင်ၽၢႆႇၼွၵ်ႈမိူင်း မႃႇၶူဝ်ႇရူဝ်ႇပီႇယႃႇ၊ ၵျွၼ်ႇရႅတ်ႉၶလိပ်ႉ (John Ratcliffe) လႆႈထုၵ်ႇမၵ်းမၼ်ႈပဵၼ် ၽူႈၵွၼ်းမႂ်ႇ တီႈၸုမ်းၸွပ်ႇၶၢဝ်ႇ သုၼ်ၵၢင် ဢမႄႇရိၵၢၼ်ႇ (CIA) ၼၼ်ႉယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]