ရတ်ႈသျႃး ယူႇၶရဵၼ်း လႄႈ ဢမႄႇရိၵၢၼ်ႇ တေဢုပ်ႇဢူဝ်းၵၼ် လွင်ႈႁူမ်ႇလူမ်ႈ တီႈဝဵင်းဢႃႇပူႇတႃႇပီႇ

ဝၼ်းသုၵ်း၊ ၸၼ်ႇဝႃႇရီႇ 23၊ 2026 

ၸွမ်ပွင်ၸိုင်ႈရတ်ႈသျႃး ပူႇတိၼ်ႇ ႁူပ်ႉထူပ်းၵၼ်တင်း ၽူႈတၢင်တူဝ်ၶိုၵ်ႉတွၼ်း ယူႇဢႅတ်ႉသ်

ရတ်ႈသျႃးတႄႉ လၢတ်ႈဝႃႈ တေဢုပ်ႇဢူဝ်း လွင်ႈႁူမ်ႇလူမ်ႈ တင်း ဢမႄႇရိၵၢၼ်ႇလႄႈ ယူႇၶရဵၼ်း တီႈဝဵင်းဢႃႇပူႇတႃႇပီႇ မိူဝ်ႈဝၼ်းသုၵ်းၼၼ်ႉသေတႃႉ ဝၢႆးသေ ၸွမ်ပွင်ၸိုင်ႈ ပူႇတိၼ်ႇ လႄႈ ၽူႈတၢင်တူဝ် ဢမႄႇရိၵၢၼ်ႇ သၢမ်ၵေႃႉ ႁူပ်ႉထူပ်းၵၼ် ၵၢင်ၶမ်ႈၼၼ်ႉယဝ်ႉ ပၼ်ၾၢင်ႉဝႃႈ သင်ဝႃႈ ဢမ်ႇၵႄႈလိတ်ႈပၼ်ႁႃ ၼႃႈလိၼ်ၼႆၸိုင် လွင်ႈငမ်းယဵၼ် ဢၼ်မၼ်ႈၵိုမ်းၼၼ်ႉ တေဢမ်ႇပဵၼ်လႆႈၼႆယဝ်ႉ။

ၽူႈၸွႆႈထႅမ် Kremlin ဢၼ်ပဵၼ် Yuri Ushakov လၢတ်ႈတီႈၽူႈသိုဝ်ႇၶၢဝ်ႇၶဝ်ဝႃႈ လွင်ႈဢုပ်ႇဢူဝ်း ဢၼ်တႄႇမိူဝ်ႈပႆႇထိုင် ၵၢင်ၶမ်ႈ လႄႈ ႁိုင်မွၵ်ႈ 4 ၸူဝ်ႈမူင်းၼၼ်ႉ ပဵၼ် "လွင်ႈဢၼ်လမ်ႇလွင်ႈ၊ လွင်ႈၵေႃႇသၢင်ႈ လႄႈ လွင်ႈသိုဝ်ႈယူဝ်းတႄႉတႄႉ" ၼႆယဝ်ႉ။

မၼ်းလၢတ်ႈဝႃႈ ၽူႈၵွၼ်းတပ်ႉၼမ်ႉ ရတ်ႈသျႃး Igor Kostyukov တေဢွၼ်ႁူဝ် ၸုမ်းမွတ်ႇသၵူဝ်ႇ တီႈပၢင်ဢုပ်ႇဢူဝ်း လွင်ႈႁူမ်ႇလူမ်ႈ သၢမ်ၽၢႆႇၼၼ်ႉသေ ၽူႈတၢင်တူဝ် ၽၢႆႇလူင်းတိုၼ်း Kirill Dmitriev တေႁူပ်ႉထူပ်း Steve Witkoff ၽူႈတၢင်တူဝ် ၸွမ်ပွင်ၸိုင်ႈ တေႃႇၼႄႇထရမ်ႉ ႁင်းၶေႃ ၵဵဝ်ႇလူၺ်ႈ လွင်ႈပၢႆးမၢၵ်ႈမီး ၼႆယဝ်ႉ။

ၵူၺ်းၵႃႈ ၽွင်းမိူဝ်ႈ Ushakov တိုၵ်ႉလၢတ်ႈၼႄ ၶၵ်ႉတွၼ်ႈ ဢၼ်တေႁဵတ်းၵႂႃႇထႅင်ႈၼၼ်ႉ မၼ်းၵိုတ်းယင်ႉ လွင်ႈယွင်ႈယေႃး လွင်ႈၶိုၼ်ႈယႂ်ႇမႂ်ႇသုင် ဢၼ်လႂ်သေဢမ်ႇဝႃႈ။

ၵဵဝ်ႇၵပ်းလွင်ႈ ပၢင်ၵုမ်လူင် ထရမ်ႉလႄႈ ပူႇတိၼ်ႇ ဢၼ်ၸတ်းႁဵတ်းတီႈ ဢႃႇလႃႇသၵႃႇ မိူဝ်ႈပီၵၢႆၼၼ်ႉ မၼ်းလၢတ်ႈဝႃႈ “ဢၼ်လမ်ႇလွင်ႈသုတ်းတႄႉ ၽွင်းမိူဝ်ႈ ၸွမ်ပွင်ၸိုင်ႈႁဝ်း လႄႈ ဢမႄႇရိၵၢၼ်ႇ ဢုပ်ႇၵၼ်ၸိူဝ်းၼႆႉ ၶိုၼ်းလၢတ်ႈဝႃႈ သင်ဝႃႈ ဢမ်ႇၵႄႈလိတ်ႈပၼ်ႁႃ ၼႃႈလိၼ် ၸွမ်းၼင်ႇ ပိူင်ၵၢၼ် ဢၼ်လႆႈတူၵ်းလူင်းၵၼ်ဝႆႉ တီႈဝဵင်းAnchorage ၼၼ်ႉၸိုင် ဢမ်ႇမီးတၢင်းမုင်ႈမွင်း တႃႇတေလႆႈ လွင်ႈၵႄႈလိတ်ႈ ၶၢဝ်းယၢဝ်း” ၼႆယဝ်ႉ။

Ushakov လၢတ်ႈဝႃႈ ပူႇတိၼ်ႇ လၢတ်ႈဝႃႈ ရတ်ႈသျႃးၼႆႉ သူၼ်ၸႂ် ၸႅတ်ႈၸၢင်ႇ တႃႇတေၵႄႈလိတ်ႈ ပၼ်ႁႃ ၵၢၼ်မိူင်း ၼႆယဝ်ႉ။

ၵူၺ်းၵႃႈ မၼ်းသိုပ်ႇလၢတ်ႈဝႃႈ “တေႃႇထိုင် လွင်ႈၼႆႉ လႆႈမႃးၼၼ်ႉ ရတ်ႈသျႃး တေသိုပ်ႇႁဵတ်းၸွမ်း ယိူင်းဢၢၼ်း ၵၢၼ်သိုၵ်း ဢၼ်ၶိုၵ်ႉတွၼ်းၼၼ်ႉ တႃႇသေႇယူႇ။

ယူႇၶရဵၼ်း လႆႈၶၢမ်ႇၶၢဝ်းၵတ်း ဢၼ်ႁၢဝ်ႈႁႅင်းလိူဝ်ပိူၼ်ႈ ၼႂ်းပၢင်တိုၵ်း ယွၼ်ႉရတ်ႈသျႃး ဢဝ်မၢၵ်ႇၼူၾႆး လႄႈ ႁိူဝ်းမိၼ် ဢမ်ႇပႃးၵူၼ်း ယိုဝ်းသႂ်ႇ တီႈႁူင်းၵၢၼ် ႁႅင်းၾႆးၾႃႉ မိူင်းယူႇၶရဵၼ်းၼၼ်ႉယဝ်ႉ။ ယွၼ်ႉတၢင်ႉလူမ်းမႆႈ တူၵ်းတႅမ်ႇလိူဝ် ၸၼ်ႉမႆႈလႄႈ ၵူၼ်းမိူင်း ၼပ်ႉႁူဝ်ပၢၵ်ႇ တီႈဝဵင်း Kyiv လႄႈ တၢင်ႇဝဵင်းၸိူဝ်းၼၼ်ႉ ဢမ်ႇလႆႈၾႆးၾႃႉ ၶၢဝ်းႁိုင်လႄႈ ဢမ်ႇမီး လွင်ႈတၢင်းဢုၼ်ႇ ၼႆယဝ်ႉ။

ယူႇၶရဵၼ်း ၼႄဝႃႈ လွင်ႈၼႆႉ ပဵၼ်လၵ်းထၢၼ် ဢၼ်ဝႃႈ ပူႇတိၼ်ႇ ဢမ်ႇမီးလွင်ႈၶဝ်ႈၸႂ် လွင်ႈငမ်းယဵၼ် တႄႉတႄႉဝႃႈဝႃႈ ဢၼ်မွတ်ႇသၵူဝ်ႇ ထဵင်ယူႇၼၼ်ႉ။ ၼႂ်းၼၼ်ႉ လၢတ်ႈဝႃႈ လွင်ႈဢၼ် ရတ်ႈသျႃး ၶိုၼ်ႈယႂ်ႇမႃးလွႆးလွႆးၼၼ်ႉ လႆႈလူႉသုမ်းၼမ်ၼႃႇဝႃႈၼႆယဝ်ႉ။

ငိူၼ်ႈငဝ်ႈၶၢဝ်ႇ

• Dmitry Antonov and Mark Trevelyan. "Russia, Ukraine and US set to hold security talks in Abu Dhabi" — Reuters, January 23, 2026
• Helen Regan, Darya Tarasova. "US, Ukraine and Russia set for first trilateral talks of the war" — CNN, January 23, 2026
• BBC News. "Zelensky says he hopes first Ukraine, Russia and US talks are 'step towards ending war'" — BBC News, January 23, 2026
• Jonathan Yerushalmy and agencies. "US, Ukraine and Russia delegations head to Abu Dhabi for first trilateral talks" — The Guardian, January 23, 2026