Jump to content

ယူႇၶရဵၼ်း ယိုဝ်းပၢင်သဝ်းတပ်ႉၵၢင်ႁၢဝ် ၼႂ်းမိူင်းရတ်ႈသျႃး တီႈၵႆၼပ်ႉႁူဝ်ႁဵင်လၵ်း

ထႅမ်သႂ်ႇ လိင်ႉၶ်
လုၵ်ႉတီႈ ဝီႇၶီႇၶၢဝ်ႇ မႃး

ဝၼ်းၸၼ်၊ ၸုၼ်ႇ 2၊ 2025

ယူႇၶရဵၼ်း ဢဝ်တရူၼ်းယိုဝ်း ပၢင်သဝ်းတပ်ႉၵၢင်ႁၢဝ် ရတ်ႈသျႃး

ၽူႈမီးပုၼ်ႈၽွၼ်း ၽၢႆႇႁူမ်ႇလူမ်ႈ မိူင်းယူႇၶရဵၼ်း လၢတ်ႈဝႃႈ သိုၵ်းယူႇၶရဵၼ်းၶဝ် ယႃႉပႅတ်ႈ ႁိူဝ်းမိၼ်သိုၵ်း ရတ်ႈသျႃး ဢၼ်ပၵ်းဝႆႉ တီႈတပ်ႉၵၢင်ႁၢဝ် ဢၼ်ၵႆယၢၼ် ၼႃႈသိုၵ်း ၼပ်ႉႁူဝ်ႁဵင်လၵ်းၼၼ်ႉ ၼႆယဝ်ႉ။

ပၢင်ယၼ်ႇသိုၵ်း ဢၼ်လႆႈပၼ်ၸိုဝ်ႈဝႃႈ “Spiderweb” ၼၼ်ႉ လႆႈႁၼ် ႁိူဝ်းမိၼ်တရူၼ်း ဢမ်ႇပႃးၵူၼ်း ယိုဝ်းသႂ်ႇ တီႈယိူင်းမၢႆ ဢၼ်ယႂ်ႇလူင် ၼႂ်းမိူင်းရတ်ႈသျႃး ပႃးၸဵမ် တီႈဝဵင်း Belaya – ဢၼ်ၸမ်ၵျႃႇပၢၼ်ႇ လိူဝ်သေ မိူင်းယူႇၶရဵၼ်း – လႄႈ တီႈတပ်ႉ Olenya ႁိမ်းဝဵင်း Murmansk ၼႂ်းဝူင်း Arctic ၼႆယဝ်ႉ။

ႁိူဝ်းမိၼ်ရတ်ႈသျႃး 40 လမ်းလိူဝ် “မႆႈပႅတ်ႈ တင်းၼမ်တင်းလၢႆ” တီႈတပ်ႉၵၢင်ႁၢဝ် 4 တီႈ ၼႆယဝ်ႉ။

ၸုမ်းၸွပ်ႇၶၢဝ်ႇ ၼႂ်းမိူင်း ယူႇၶရဵၼ်း SBU လၢတ်ႈဝႃႈ ယွၼ်ႉပိူဝ်ႈ လွင်ႈယိုဝ်းၵၼ်ၼႆႉ ႁဵတ်းႁႂ်ႈ လွင်ႈလူႉသုမ်း မီးမွၵ်ႈ 7 ပီႇလီႇယၼ်ႇတေႃႇလႃႇသေ လႆႈယိုဝ်းသႂ်ႇ ႁိူဝ်းမိၼ် ဢၼ်တေႃႉသူင်ႇ မၢၵ်ႇၼူၾႆး ဢၼ်ပဵၼ် ၽႅၼ်ၵၢၼ် ရတ်ႈသျႃး တီႈတပ်ႉၵၢင်ႁၢဝ် လူင်ၶဝ်ၼၼ်ႉ လႆႈတိူဝ်ႉၵႂႃႇ 34% ၼႆယဝ်ႉ။

လွင်ႈယိုဝ်းၵၼ်ၼႆႉ မိူၼ်ၼင်ႇ ယိူင်းဢၢၼ်း တႃႇတေသူင်ႇၶေႃႈၵႂၢမ်း ၸူး ရတ်ႈသျႃးဝႃႈ ဝၢႆးသေ ရတ်ႈသျႃး ဢမ်ႇမီးလွင်ႈတၢင်းသင်သေ ၶဝ်ႈတိုၵ်း မိူင်းယူႇၶရဵၼ်း မီးမႃး သၢမ်ပီလိူဝ်လိူဝ်ယူႇ။ ၵိပ်ႉၾ် ၼႄးဝႃႈ ၸွမ်ပွင်ၸိုင်ႈ ရတ်'သျႃး ပူႇတိၼ်ႇ ဢမ်ႇၶႂ်ႈႁႂ်ႈ ပၢင်တိုၵ်း ၵိုတ်းယိုတ်း၊ ယွၼ်ႉဝႃႈ မွတ်ႇသၵူဝ်ႇ တိူဝ်းႁဵတ်း လွင်ႈတိုၵ်းတေႃး လႄႈ လွင်ႈတိုၵ်းတေႃး ဢၼ်ဢိၵ်ႇပႃး လွင်ႈၸႂ်ႉ ႁိူဝ်းမိၼ် ဢမ်ႇပႃးၵူၼ်း ဢၼ်ယႂ်ႇလိူဝ်ပိူၼ်ႈ ဝၢႆးသေ ပၢင်တိုၵ်း တႄႇပဵၼ်မႃး မိူဝ်ႈၶမ်ႈဝၼ်းဢႃးတိတ်ႉၼၼ်ႉၼႆယဝ်ႉ။

ပၢင်ယၼ်ႇသိုၵ်း ဢၼ်ႁဵတ်းမႃး ၶၢဝ်းတၢင်း ၼိုင်ႈပီၶိုင်ႈလိူဝ်ၼၼ်ႉ လႆႈဢဝ် ႁိူဝ်းမိၼ် ဢၼ်ဢမ်ႇမီးၵူၼ်းၶီႇၼၼ်ႉ လၵ်ႉၶဝ်ႈၼႂ်းၼႃႈလိၼ် ရတ်ႈသျႃးသေ ဢဝ်ဝႆႉ ၼႂ်းႁိူၼ်းမႆႉ ဢၼ်ၶၢႆႉၵႂႃႇၶၢႆႉမႃးလႆႈ ၼိူဝ်ၵႃးတၢင်ႇၵုၼ်ႇ ၼႆယဝ်ႉ။ ဝၢႆးၼၼ်ႉ ယူႇတီႈၵႆသေ ပိုတ်ႇၽုၺ်ႇ မုင်းႁိူၼ်းသေ ဢဝ်ႁိူဝ်းမိၼ် ဢၼ်ဢမ်ႇမီးၵူၼ်းၶီႇၼၼ်ႉ ဢွၵ်ႇမႃးယိုဝ်းသႂ်ႇ ဝႃႈၼႆယဝ်ႉ။

ငဝ်းတူင်ႉတူင်ႇၵူၼ်း ဢၼ် CNN ၼႄတီႈဝႆႉၼၼ်ႉ ပဵၼ်တီႈ တပ်ႉၵၢင်ႁၢဝ် Belaya ဢၼ်မီးတီႈ ၸဵင်ႇၸၢၼ်းဝၼ်းဢွၵ်ႇ 7 ၵီႇလူဝ်ႇမီႇတႃႇ တီႈတိူင်း Irkutsk ပွတ်းဢွၵ်ႇ မိူင်းရတ်ႈသျႃးၼၼ်ႉ ၼႄဝႆႉ ႁိူဝ်းမိၼ် ဢၼ်ဢမ်ႇမီးၵူၼ်းၶီႇၼၼ်ႉ မိၼ်ဢွၵ်ႇမႃး တီႈႁွင်ႈမႆႉ ဢၼ်တၢင်ႇဝႆႉ ၼိူဝ်ၵႃးတၢင်ႇၵုၼ်ႇ ဢၼ်မီးပိုၼ်ႉလင် ဢၼ်ၵွၼ်းၽႆးဢွၵ်ႇဝႆႉ။ ၶႅပ်းႁၢင်ႈၸိူဝ်းၼၼ်ႉၵေႃႈ ၼႄဝႆႉ ႁိူဝ်းမိၼ် Drone ဢၼ်သႂ်ႇဝႆႉ ၼႂ်းဢၼ်မိူၼ်ၼင်ႇ တိူၵ်ႈမႆႉ ဢၼ်မီး ၽႃမုင်း ဢၼ်ၸၢင်ႈၶိုၼ်းတူပ်ႉလႆႈၼၼ်ႉ ၼႃႈဢွၼ်တၢင်း မိူဝ်ႈတေႁဵတ်းပၢင်ယၼ်ႇသိုၵ်းၼၼ်ႉယူႇ။

ၸွမ်ပွင်ၸိုင်ႈ ယူႇၶရဵၼ်း ဝေႃႇလေႃႇတီးမႃးရ် ၸႄးလႅၼ်းသၵီး လၢတ်ႈတီႈ ၶၢဝ်ႇ X ဝႃႈ “လွင်ႈဝၢင်းၽႅၼ်၊ လွင်ႈၸူႉတုမ်ၸိူဝ်းၼႆႉ လႆႈႁၢင်ႈႁႅၼ်းမႃး ႁူဝ်ယွႆႈမၼ်း လီလီငၢမ်းငၢမ်း။ ၸၢင်ႈယိုၼ်ယၼ်တႅမ်တူဝ်ဝႃႈလႆႈ ဝႃႈ ပၢင်ယၼ်ႇသိုၵ်းဢၼ်ၼႆႉ မၼ်းပဵၼ် ပၢင်ယၼ်ႇသိုၵ်း ဢၼ်ဢမ်ႇမိူၼ်ပိူၼ်ႈ ဢၼ်ၼိုင်ႈ“ ဝႃႈၼႆ။

မိူဝ်ႈဝၼ်းဢႃးတိတ်ႉၼၼ်ႉ ႁွင်ႈၵၢၼ်ၽၢႆႇၵႅတ်ႇၵင်ႈ ရတ်ႈသျႃး ယိုၼ်ယၼ်ဝႃႈ ယူႇၶရဵၼ်းၶဝ် ယိုဝ်းသႂ်ႇ တီႈတႃႈႁိူဝ်းမိၼ် ရတ်ႈသျႃး ဢၼ်မီးၼႂ်း ၼႃႈလိၼ် 5 တီႈၼၼ်ႉသေ ႁွင်ႉဝႃႈ လွင်ႈတိုၵ်းတေႃးတရူၼ်း ဢမ်ႇမီးၵူၼ်းၶီႇၼၼ်ႉ ပဵၼ်လွင်ႈၵေႃႇၵၢၼ်ႁၢႆႉ ၼႆယဝ်ႉ။

ငိူၼ်ႈငဝ်ႈၶၢဝ်ႇ

[မႄးထတ်း | မႄးထတ်းငဝ်ႈငႃႇ]
ဢဝ်ၶိုၼ်းမႃးတီႈ "https://shn.wikinews.org/w/index.php?title=ယူႇၶရဵၼ်း_ယိုဝ်းပၢင်သဝ်းတပ်ႉၵၢင်ႁၢဝ်_ၼႂ်းမိူင်းရတ်ႈသျႃး_တီႈၵႆၼပ်ႉႁူဝ်ႁဵင်လၵ်း&oldid=11779"